THUPHUANDOH 9
9
1Huin angel ngaana in a muut a, aahsi khat vaan apat a leia kesuh ka mu a; huleh a kawmah kokhuuh tobei chabi piah in a um hi. 2Huleh ama’n kokhu a tobei chu a hong a; huin hu kokhuuh apatin haaltuina mei nasatah khuu bangin meikhu ahung pawtdoh a; huleh hu kokhuuh a meikhu jiahin ni leh vaan ahung mialta hi. 3Huleh hu meikhu lah apatin khauphe leitung ah ahung pawtdoh a; leia momaaite silbawltheihna neih bang silbawltheihna a kawmvah piah ahi uh. 4Amah u’chu, a tal va Pathian chiamchihna neiloute chauh chih louh, leia hampa aha, sil hing aha, ahihlouhleh sing mawngmawng suse lou diing a thupiah ahi uhi. 5Huleh amahuh chu hute that lou a, hizongleh ha ngaa sung sugenthei diing a hilh ahi va; huleh a suhgentheihna u’chu momaai in mi a peh chianga natdan bang ahi. 6Huleh hu ni chiangin mite’n sihna a hawl diing va, hizongleh a mu sih diing uh; sih a ut diing va, hizongleh sihna in amahuh a taimangsan diing hi. 7Huleh hu khauphete meel chu gaal kuan diing a guatsa sakolte bangmai ahi va; a lutung vah sana tobang lallukhuh hileh kilawm a khuh uh, huleh a maai u’chu mihingte maai bang ahi. 8Amahun numei sam tobang sam a nei va, a haa u’chu huumpibahnei haa bang ahi. 9Huleh amahun siih awmphaw hileh kilawm a nei va; huleh a ha zaapging u’chu gaal a kuan sakol tampi kaangtalai ging bang ahi. 10Amahun momaai bangin mei a nei va, a mei vah gu a um hi; huleh a silbawltheihna u’chu mihingte ha ngaa sung suhnat ahi. 11Huleh amahun kokhuuh tobei angel chu a tungvah kumpipa in a nei va; a min chu Hebrai haam in Abbadon ahi a, hizongleh Grik haam in chu a min Appolion ahi. 12Tunggihna khat a beita a, tunggihna nih ahung tung nalai diing hi. 13Huin angel guupna in a muut a, Pathian ma a um sana maitaam ki lite akipan aw ka ja a, 14Pengkuul nei angel guupna kawm a, Euphrates luipi lian a angel li kaana umte khu suut in, chi'n. 15Huchi'n a pung leh, a ni leh, a ha leh, a kum huntaha mihingte mun thum a khen mun khat that diing a kikoih angel lite chu phelin a umta a. 16Huleh hu sakol tungtuang gaalmite tamdan chu saang mun saang ja nih ahi uh; a phaahzah uh kisoi ka ja hi. 17Huleh hichibangin kilaahna in sakolte leh a tunga tuang, mei leh ngen leh kaat awmphaw neite chu ka mu a; hu sakolte lutang chu humpibahnei lutang tobang ahi a; huleh a kam sung vapatin mei leh, meikhu leh, kaat a suaahdoh hi. 18Hi sil thum, a kam vapat hung suaahdoh, mei leh, meikhu leh, kaat in mihingte mun thum a khen mun khat thah in a umta uhi. 19Ajiahchu hu sakolte silbawltheihna chu a kam uleh a mei va um ahi a; a mei u’chu guul tobang ahi; huleh lutang a nei va, hute a mi a suhnat uh ahi. 20Huleh hi gawtnate a si lou midang siah chu dawite leh, mu lah mu thei lou, jalah ja thei lou, pai lah pai thei lou, sana milemte leh sing milemte a biah louhna diing va a khut va a silbawlte uh tawpsan diingin a kisiih tuan sih uhi. 21Huleh a tualthahna uleh, a mibumna uleh, a aangkawmna uleh a guuhtaatna vapatin zong a kisiih tuan sih uhi.
Currently Selected:
THUPHUANDOH 9: SIMTBSI
Highlight
Copy
Compare
Share
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.
