THUPHUANDOH 8
8
Peengkuul sagih kimuut muhna
1Huleh ama’n chiamchihna sagihna a phel zohin pung makhai dibang sung vaan chu a sip kiikeei a. 2Huin angel sagih Pathian ma a ding ka mu a; a kawmvah pengkuul sagih piah ahi uhi. 3Huleh angel dangkhat a hung a, gimtui haalna sana bawm tawi in maitaam bulah a ding a; huleh a kawmah chu Laltouphah ma a sana maitaam tung a misiangthoute haamteina toh a latkhawm diingin gimtui tampi piah ahi. 4Huleh gimtui khuu chu misiangthoute haamteina toh kiton in angel khut apatin Pathian ma-ah a jamtouta hi. 5Huleh angel in gimtui haalna bawm a la a, maitaam meiin a thundim a, leitung ah a paaikheta hi; huin awte, vaangingte, kawlphete leh, ziillingte ahung umta hi. 6Huin hu angel sagih pengkuul sagih neite chu muut diingin a kisa uh. 7Angel khatna in a muut a, gial leh mei sisan toh kihal ahung umta a, hute chu leitung a paihkhiah in a um a; singkung mun thum a khen mun khat a kaangtum a, huleh hampa hing zousiah a kaangtumta hi. 8Huleh angel nihna in a muut a, mei a kaang taang lianpi hileh kilawm tui khang lian a paihluut in a um a; huleh tui khang lian mun thum a khen mun khat sisan ahung suaahta hi. 9Huleh tui khang lian a um hinna nei ganhingte chu mun thum a khen mun khat a sita a; huleh kuang te chu mun thum a khen mun khat suhsiat ahita hi. 10Huleh angel thumna in a muut a, aahsi liantah khat, meisel banga kuang vaan apatin ahung kesuh a, luidungte mun thum a khen mun khat leh tuikhuuhte tungah a tu a; 11Hu aahsi min chu Gamsaai ahi; huleh tui mun thum a khen mun khat chu gamsaai ahung suaahta a; huleh hu tuite in mi tampi a sita hi, suhkhaat a hihtaah jiahin. 12Huin angel lina in a muut a, ni mun thum a khen mun khat, ha mun thum a khen mun khat, aahsi mun thum a khen mun khat suhsiat in a umta a; huchia hute mun thum a khen mun khat suhsiat ahihmah bangin suun chu mun thum a khen mun khat a vaah sih a, jan zong huchi mahin. 13Huin ka et leh, angel khat vaanlaizawl a leeng a, aw ngaihtaha, angel thum in pengkuul a muut diing, hu pengkuul gin hung um nalai diingte jiahin lei a umte a tunggih hi, a tunggih hi, a tunggih hi, a chih ka ja hi.
Currently Selected:
THUPHUANDOH 8: SIMTBSI
Highlight
Copy
Compare
Share
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.
