Luke 4

NAKATA 4

Jesus uktuktauyuk

(Mt. 4:1-11; Mk. 1:12-13)

1Jesuslu Anengnimik Naguyumik ilumektauvluni Jordanmin utegami aullautiyauyuk inuilgulmun Anengnikun Naguyukun. 2Takanani uvlivaktuk 40nik Tupilagmin uktuktauvluni. Tapfumani negiyuinami kinguagunlu kaalekpiaktuk.

3Tupilaum ukallautiyaa, “Godim engnigipatin una uayagak ukagvigiguk mukpauyangukuvlugu.” 4Jesusim kiuyaa, “Tiitigakhimayugaluak, 'Inum mukpauyainat inuyutigiyakhagingitait.' ”

5Talva Tupilaum maiyugaktinamiuk tayyainak takupkaktitaa nunanik tamainik, atanguvingniglu, 6ukautivlugu “Tahapkua tamaita naminigigapkit tamainik tuniniaktagin pikutainiglu 7Ilvit talva angayyuvigigungma, tamaita piniaktatin.” 8Jesusim kiuyaa, “Tiitigakhimayuk, 'Angayyuvigiyakhan Godin Atanin kivgaktuglugulu tamna kihimi.”

9Talva Tupilaum Jerusalemun aullautiyaa angayyuvikpagyuam kaanganun ilivlugu ukautiyaa “Godim engnigipatin ataanun mihigiagin 10tiitigakhimangman, 'Godim ihalgulini pitkuhimayain munagikuvlutin.' 11Imaatuntauk, 'Tapkua algaitigun tiguniaktaatin itiganlunin aanekunagu uyagagmun.' ” 12Jesusim kiuyain, “Ukakhimayuk, 'Godinik Ataningnik uktuktailutin ihuitumik.” 13Talva Tupilaum uktuguegamiuk kimakpagaa.

Jesus ilihauyyinahualektuk

(Mt. 4:12-17; Mk. 1:14-15)

14Jesuslu Anengnim Naguyum hakugigningagun utektuk Galileemun nunamilu takanani inuit tuhaayun tapfumuna. 15Tapfumalu inuit ilihautiyain atugvingni nagugiyauvluni tamainin.

Nazarethmiun piyumangngitaat Jesus

(Mt. 13:53-58; Mk. 6:1-6)

16Aahin Jesusim Nazareth tikittaa nunagiyaminun, Sabbathiumanlu pitkuhini maligamiuk atugvigmungaktuk. Taikani nangektuk taiguakuvlugu, 17inuillu tuniyaat nalautaiyim Isaiam makpiganganik. Makpigakami nanniyain hapkua ukauhiit,

18“Atangum anengningata naiyuktanga ukhukhekpiagaminga ilihauyyikuvlunga unipkainik naguyunik ilingayunun.

Tiliyangalu ukautigikuvlugu itektauhimayun anivikhangat,

takpiitunlu takpikhipkaktaukuvlugillu aiyukaktitauyun ikayuktaukuvlugillu,

19ukautigikuvlugulu Atangum tikiniagutaa annauyyauniangmagit inuit.”

20Taiguguegami makpigak tuniyaa kivgagmun ingivluni, inuit tamangmik atugvingmiitun iigitillugu. 21Tapfumalu ukallautinahualektain, “Uvlumi ukua Godim ukauhiit ilumukhilektun nalaugaluaktilluhi.” 22Tamangmiglu ukautigiyaat naguyumik agligutautigivlugit ukakhimayain naguyun ukakhutik, “Una Jospehim engnigingipauk?” 23Ukallautiyain, “Ukallautiniagunakhiyapfinga imaa, 'Dakti ilingnik naguhipkaiguit, tuhaagapta hapengnaktumik havakpagavin Capernaumi takki hamanitauk nunangni ayyikutaanik havagiagin.” 24Ukallagmiyuk, “Ilumun ukautigipfi, nalautaiyi kinalika nagugiyauyunaektuk nunaminiitillugu. 25Itkumayumik ukaktunga, Elijah umatillugu Israelmi uilgaktun amihut itpaktun, nipaluyuitpiangman nunamun ukiuni pingahuni napanilu, inuillu nekaekpiaktillugit. 26Israelmiunun uilgaktunun nallianunlunin Elijah tiliyaungitugaluak, Zarephathmunli Sidom nunaanun uilgaktumun kihimi. 27Aahin nalautaiyi Elisha umatillugu Israelmiuni kilalgit amigaitun inuvaktun, Syriamiutak kihimi atikaktuk Naamanmik kilaektitauhimayugaluak.” 28Inuillu atugvingmiitun tuhaagamitku tamna ningaktun. 29Makinamiglu Jesus aullautiyaat iglukagvium hilataanun imnagmun anmun igitumavlugu. 30Jesusli akungaktigun pihukhuni kimauyuk.

Jesus agiuktulingmik ikayuktuk

(Mk. 1:21-28)

31Talva Jesus aullaktuk Capernaumun Galileemiitumun ilihautivlugit inuit Sabbathmi. 32Tapfuma ilihauyyutain inuit agligutautigiyain ilihauyyingnakpangman hakugiktumik. 33Tapfumani inuk agiuktukaktuk atugvingmiituk kukuakhunilu ukaktuk, 34“Ha huliniakkitigut Jesus Nazarethmiutak? Kaivit piektitkuvluta? Godim pilluagmatin ilihimayagit.” 35Jesusimli ihuakhaktaa ukakhuni, “Nipahuegin umanga anitguit.” Agiuktum ulgutinamiuk inuit akunganun kimaktaa aanekhimangngitagaluanga. 36Inuillu agigutakpiakhutik ingmingnun ukallaktun, “Ukauhiit kanu-itpat? Agiuktunlunin anipkakpagit tuhaavigiyaat anivlutik.” 37Nunamilu takanani inuit tamangmik havaangit unipkautigiyait.

Jesusim Simonim hakia inuillu allat naguhipkaktain

(Mt. 8:14-17; Mk. 1:29-39)

38Jesuslu nangekhuni atugvingmin aniyuk Simonim iglua pulaakhugu. Taikani Simonim hakia angnak kiiyyakpiagami aaniaktuk. Tapkua tukhiagvigiyaat Jesus pivlugu. 39Hanianilu nangekhuni aaniaguta angnam pitkumani, tapfuma kimaktaa. Tayyainaglu makinami kivgaktuktuk tapkuninga.

40Hikeneglu nipimalengman inuit tamangmik aaniakhimayun kagitiyain Jesusmun. Tamaitalu aktugamigit naguhipkaktain. 41Amigaituninlu agiuktun aniyuk tukhuvlutik “Godim engnigiyaatin ilvit”. Tapfumali tanektait ukaktailivlugit ilitagimayyuk Christiuman.

42Kaulgagmanlu aullaktuk iglupailgulmun, inuilli kengiaktuktaat pakhugu kimautailivlugulu. 43Jesusim ukallautiyagaluangit, “Ilihauyyiyukhauyungali Godim atanguviata unipkautainik naguyunik iglukagvigmiunun allanuntauk tiliyaugama taimaliukuvlunga. 44Judeamilu atugvingni ilihauyyingnaktuk.

Currently Selected:

Luke 4: Sperry

Highlight

Copy