Joawh 13

Jesus sukuhkuge gikannuhnivwi

1Ayteke ariwnteke ini, kaba danuh ahawkanavrik adahan ini fet adahan axne muwtohyan arih. Hiyeg judeyenevwi axni adahan kiyene ku samah minikwak Kiyavwiye Uhokri umahkise muwtohyan gidukwenavrikkis amekenegben kahadbe ig giwiwhkiswitnikis giwakutakis hiyeg ejituyenevwi. Ig Kiyavwiye Jesus hiyapni hene, ig hiyakni ku gihawkanavrik kaba danuh adahan ig tivikwiye amadgatak inin diyuhpiye git Gig. Henewa gihawkan makisup, ig batekye gikakkis gihiyegavu amadga inin. Ayteke nikwe ig ekke gitkis huwewe ku ig batek ukakuh mpinevevye. Nah akkite yit ku samah.

2Aygete usuh axne gikak Kiyavwiye Jesus. Ig Judas Iskariyotismin ku pariye amekene Simawh gikamkayh, ig ayge ukakuh. Kuwis wavitye gikivarakis tuguhkise abet gihiyekemni adahan ig kamaykiswiye Kiyavwiye Jesus.

3 Heneme ig Kiyavwiye Jesus tuwathasew utivut, hiyawa ig hiyakni ku ig giwntekne Kiyavwiye Uhokri, ig diyuhpiye git Kiyavwiye Uhokri. Ig hiyakni ku Kiyavwiye Uhokri iki gikiytani gitnek adahan ig kumadukene madikte.

4Heneme ig awna:

— Nah akkite gitkis huwewehe ku samah nah batek gikakkis.

Ig kannikew ahumwatak axtet. Ig wiwhe gidagmanvit. Ig waneke pahak sewvyet gibutikmin.

5Ig dimuke un amadgat pohow beysin. Ayteke nikwe ig sukuhkuge gikannuhnivwi pahavwimpi. Ig manpuse ukugku akak gisevyeta ku pariye waneknene ay gibutikmin.

6Metakwa ig danuh git Simawh Pedru. Igme Simawh Pedru awna git:

— Kiyavwiye, pis ka ibuktima. Pis nukivara. Ka kis adahan pis sukuhkugan.

7Igme Kiyavwiye Jesus awna git:

— Pis ka pukuha ku pariye kuri nah kehne. Heneme kuwewanek pis pukuhpinek.

8Igme Pedru awna git:

— Pis ka nubukuhma, Kiyavwiye. Nah ka isaksap adahan pis sukuhkugan.

Igme kaytwa giwn:

— Ku nah ka sukuhkugap, nikwe pis ka nudahewektenma akiw.

9Igme Pedru timapni hene, ig awna git:

— Ku hene nikwe, uya sukuhptan pahavwite peyeke akak nukugku.

10Igme awna git:

— Ku pariye hiyeg kuwisnene awkep, ig kuwis barewvit. Ku ig wagah waxrit, ig ka pataha givit akiw. Ig pataha gikugkunen. Kuri amawka ig sukuhe gikugkunen adahan ig misakwa barewvit akiw. Kuwis yis barewvityekuye. Heneme pahavwiwa yaytak ka barewvityema.

11Ig awna inakni hene mmanawa ig kuwis hiyak ku pariye gikamaykiswitni gitkis givetunyavu.

Amawka wixwiy ikaw tuwatavye ke ibuktibe

Mt 20.25, 23.8; Mk 9.35; Fil 2.3; 1Ped 5.3

12Pisenwa gisukan gikugkukis, ig kawihe gidagmanvit akiw, ig batahkiswe akiw. Ayteke nikwe ig awna gitkis:

— Ba yis pukuhpa ini ku pariye nukehni yikak kuri? Nah akkite yit.

13Yis kanumun yikivara yikannuhten. Yiwnavriknawa mmanawa nahnewa.

14Ku samah nah yikivara yikannuhten ikaw kewa pahavwi ibuktibe yidahan nah sukuhne yikugku, amawka ku yis hawata yis ikaw ke ibuktibe adahan kehne kabayka pawtak.

15Nahnewa yikannuhten yiwtrik adahan yis ikaw tuwatavye ke nahbe.

16 Ku samah nahwa yikivara yawahkisten ikaw tuwatavye amawka yis hawata. Ihanabay inakni nuwnuh. Henewatbaki in. Pahavwi ibukti ka kiyatema mpiy gikivara. Ine pahavwi iwatnit ka kiyatema mpiy gawahkisten.

17Kuri yis hiyak kabayntiwa ku samah ini nuhiyekemni. Ku yis wew akak ini tuwatka, yis uti ka aynsima kabaykanek.

Jesus akki ku pariye gikamaykiswitni

Mt 26.21; Mk 14.18; Lk 22.21

18— Heneme pahavwi ay yaytak ig ka uti kabaykanek. Nah hiyakni mmanawa nah kuwis hiyak ku pariye ay abet yihiyekemni yis nukanyanvu. Heneme nah kaniyi ku pariye nukanyanvu kahadbe in danuh ku samah Uhokri gannasan awna numinuh. In awna:

“Pahavwi ku pariye axne pavetunak nukakuh igi wageswevye nuvetunyanek.”

Ku avim inin inakni iwit metakwa in kahayak.

19Heneme avit in kahayak nah akkamnihni yit kahadbe ku aysaw in kahayaknek yis hiyakni ku nah igyewa Uhokri gikamkayh.

20Ku pahavwi amava nuwatni, amun ini nikwe in ke wotbe ig kuwis amavanbe hawata. Ku pahavwi namevepten, amun ini nikwe in ke wotbe ig kuwis amavabe ku pariye nawahkisten atan amadgat inin hawata. Ihanabay inakni nuwnuh. Henewatbaki in.

21Ayge amun ini ig Kiyavwiye Jesus katiw avit giyakni. Ig awna:

— Pahavwi yaytak ay igi kamaykiswenek gitkis nuvetunyavu. Ihanabay inakni nuwnuh. Henewatbaki in.

22 Igkis gikannuhnivwi timapni hene, igkis misekwe he ivegbet pawtak. Igkis ka hiyak ku karit ig awna inakni.

23 Nahme ayge bat gihumwa Kiyavwiye Jesus mmanawa ig batek nukakuh.

24Ayteke Simawh Pedru hiyapni hene, ig tawanha akak gitew. Ig minimni nutuh:

— Ayapnig ku karit ig awna.

25 Nah timapni hene, nah ataybiswa git Kiyavwiye Jesus. Nah ayavgi:

— Kiyavwiye, pariyekig?

26Igme kaytwa nuwnuh:

— Ku karimkat nah akaki bugut, ignewatbaki.

Ayteke nikwe ig subuke bugut ahakwa im araku, ig akekepni gimkat Judas Iskariyotismin ku pariye amekene Simawh gikamkayh.

27Igme axe ini bugut. Pisenwa gaxni, ner wavitye gikivarakis Satanas kawihpig. Ig Kiyavwiye Jesus hiyapni hene, ig awna git:

— Iwawhawnaba. Hiyawa pis keh ku pariye pis kehkere.

28 Igkis ayge aranwa axtet usuh ka pukuha ku samah ig awna inakni git.

29Gaytakis givewkankis adahan ig isimne im adahan fet. Gaytakisme givewkankis adahan ig ikene karukri gitkis madiptavye. Igkis kiyemina hene mmanawa ig Judas Iskariyotismin avuriwne ukakura.

30Igme Judas Iskariyotismin pisenwa gaxni ini bugut, ig tivik kibehtenwa. Avim ini kuwis tiyegem.

Jesus ekkewviye

31Ig pesantenwa wowntak, igme Kiyavwiye Jesus awna gitkis:

— Kuri Nah, ku pariye wageswe awayg amadgaya inin, nah me kawihe nukiytanimet. Ig Uhokri ig hawata ig kiyathaka awaku ini kabayka ku pariye nukehni ku avim inin.

32Amun ini nahme kiyathaka awaku ini kabayka ku pariye Uhokri gikehni. Kennesa ahawkanavrik adahan ig ikene nukiytani.

33Nukamkayuvwi kibeynevwi, nah ka misakwa ayivwadima ay yikak akiw. Kuwewanek yis ivegvanek heneme waditnevyenenek. Ku samah nah kuwis awna gitkis neras judeyenevwi giwewkistenkis nah awna yit hawata: “Ku kitwiye nah, yis ka hiya yisma danuh atere.”

Batekaknabay pawtak

Mt 22.39; Jo 15.12; Gal 5.14; 1Ped 1.22; 1Jo 3.11, 4.7

34— Kuri nah ikene yit nukune yihiyekemni. Batekaknabay pawtak. Batekaknay hawata ku samah nah batek yikak.

35Ku yis batekak pawtak, ayge amun ini nikwe madikte hiyeg hiyakni ku yis nukannuhnivwi.

Jesus akki git Pedru ku igme wiwhwevye giw

Mt 26.31; Mk 14.27; Lk 22.31

36Ayteke Simawh Pedru ayavgi:

— Kiyavwiye, kitwiyekap?

Igme kaytwa giwn:

— Ku kitwiye nah, pis ka hiya pisma atak nuhapti kuri. Heneme aysawnemenek pis danuh aterenek.

37Ig Pedru timapni hene, ig awna git:

— Kiyavwiye, mmahki nah ka hiya nahma atak pihapti? Hiyawa pis umehpika, heneme nah ahegbet adahan nah umahkiswa payak pikak.

38Igme kaytwa giwn:

— Mmah inyewatki ku pis ahegbet adahan pis umahkiswa payak nukakuh? Ped, ku avim inin mitipka pis wihwe nuwuhnek. Avit takarak awna pahaywowa gawnan, pisme ayiva wihwe nuwhunek mpamavut. Ihanaba inakni nuwnuh. Henewatbaki in.

Currently Selected:

Joawh 13: pluPB

Highlight

Copy