Lúkas 11

Amawka wis piriyepkaw han

Mt 6.9

1Avim ini hawkri ig Kiyavwiye Jesus piriyepkewne amun paha iwetrit. Pisenwa giviryepkawni, pahavwi gaytakkis gikannuhnivwi aya git:

— Kiyavwiye, uya kannuh usuh piriyepkaw ku samah Joawh Batistamni, ig kannuh gikannuhnivwi piriyepkaw.

2Igme kaytwa giwnkis:

— Ku aysaw yis piriyepkaw, awnanay han: “Wiguh, usuh kabayhap. Pis ka pikiytanisima. Ba ayta kumaduka amadga inin. 3Iknaba wotuh umana takunipti. 4Bayahminaba usuh ariw utaraksan, mmanawa usuh hawata bayahmina hiyeg ku pariye taraksavye ukakuh. Iknaba wotuh wawaygi adahan usuh ka isaksewvima arit mbayka.” Henebaki yis piriyepkaw.

Amawka yis ka miniw ariw yiviryepkawni

Mt 7.7, 15.22; Mk 11.24; Lk 18.1; Jo 14.13; Ro 12.12; Ef 6.18; 1Tes 5.17

5— Amawka ku yis ka miniw ariw yiviryepkawni. Nah akkite abektey yit akak ku pahavwi yaytak makehpene bugut ta git gikagmada. Ig atere git pakwak mitipka, ig aya git: “Nukebyi, nah ayta sunepne mpana bugut pit 6mmanawa pahavwi nukagmada danuhpene nutuh, nahme yuma ariknawnema ay numunuh adahan gamevetni.” 7Igme ner gikagmada ig timapni hene, ig kaytwa giwn arikutak givin. Ig awna git: “Kuri nuvewkan ka ik. Mmanawa lapot kuwis sabuke. Kuwis nah mayeke payak gikakkis madikte nukamkayuvwi. Nah ka hiya nahma kannikaw adahan nah iki pit.” 8Igme, ig iveg givitit gikagmada. Ig ka miniw ariw gayapni git he igme gikagmada kannikaw adahan ig ikene git. Henewatbaki in. Ka innema ku samah ig gikagmadama innema keh ig ikepni git, heneme ig ikepni git awaku ku samah ig ka miniw ariw gayapni git. Ig iki git madikte ku pariye gayapni git. 9Avanenekwa ayepnenekwa kabayka ta git Uhokri. Igme iki yit ku pariye yayapninek git. Ku ig ka iki yit nikwenewatma avim ini, ka sam. Ikawnay kewa pahavwibe ku pariye ivegvene arikna he ig utepni. Ayge nikwe yis utinek ku pariye yimawkan. Ikawnay kewa pahavwibe ku pariye tetesnene anumeku pahavwi gilapota he igme woka ta git. Ayge nikwe ig Uhokri kaytwa yiwnek. 10Mmanawa ku wis aya kabayka git, ikaka wotnek. Ku wis ivegvene ku pariye umawkan git, wis utipninek. Ku wis awna git, ig kaytwa wownek. 11Ig ka kiniswi. Nah kehte abektey. Yis igti, ku pahavwi yikamkayh aya im yit, yis ka iki kaybunema git. Yuma pahavwinema awayg kinis gikamkayh hene. 12Hawata akiw, ku yikamkayh aya antiyan yit, yis kawnata iki akuwma git. 13Ku hiyap yis taraksavye iki kibeyne arikna gitkis yikamkayuvwi, igkata akiw Wigwiy inurikyene? Ig iki kibeynewa gikan wotwiy. He ig iki Gitip givititkis neras ku pariye aya Gitip git.

Jesus ka piyihak akakma wavitye gannu

Mt 12.22; Mk 3.20

14Avim ini hawkri ig Kiyavwiye Jesus pekkisne pahavwi wavitye ku pariye keh pahavwi awayg mownpi. Ku aysaw ig wavitye pese ayteke givititak ner awayg, ig awayg kavusaw awna. Neras hiyeg kabubuknene ayge igkis hiyapni hene, igkis wakaymnibdi ka aynsima.

15Gaytakkisme awna:

— Ig pekkis ner wavitye givititak ner awayg akak wavitye gikivarakis gannu ay givit. Igwa Belzebu ay givit.

16Gaytakkisme hiyeg gihikekten Kiyavwiye Jesus. Igkis kehkis git annut inuriktekne adahan areketni gidatni gitkis kahadbe igkis hiyakgi ba ig ayta giwntakwatma Uhokri.

17Igme Kiyavwiye Jesus hiyak ku pariye abet gihiyekemnikis. Nikwe ig awna gitkis:

— Ku hiyeg avitya pahanene waxri ku igkisweke kerbetpikis, igkis madikekenek. Pakebyekne hawata, ku igkisweke kerbetpikis, igkis hawata madikekenek. 18Wavitye hawata. Ku ig Satanas pekkis gihiyegavu wavitye givititakkis hiyeg, amun ini nikwe gikakwakam ig kerye. Wake ig keh henebe, ig pisenwakam akak gikumadukan. Mmah nikwe yis awna numinuh ku nah pekkis wavitye akak Belzebu gannu ay nuvituh? 19Ya yis yikannuhnivwi? Igkis hawata pekkis wavitye givititakkis hiyeg. Pariye iki gidahankis gannukis? Wake nah pekkis wavitye akak Belzebu gannube, nikwekam ignes yikannuhnivwi hawatakam. Igkisnewa arakak ku yis ka awna wadit. 20Ka ba yis hiyapknima ku nah pekkis wavitye givititakkis hiyeg akak Uhokri gannu ay nuvituh? Inineki arakak ku Uhokri gikumadukan kuwis danuh. 21Ig wavitye gikivarakis ig kewa pahavwi awayg detyebe ku pariye avuriw givin akak madikte giyakok. Ayge nikwe ka ik adahan wis atere kidis gewkanbet. 22Henneme ku pahavwi pi datte patipteke gikak atere, igi wanekbete gihawkan, ig xuwehe giyakok giw ku kavitit ig iveg. Ayteke ig kidise gewkanbet ku pariye ay gimun, ig tivik nikak, ig ibekhepni ta givuwiwkis gidahewektenvu. Henewa nah wanekbete gihawkan ig wavitye gikivarakis. Inneki keh nah detye adahan nah pekkis gihiyegavu givititakkis hiyeg.

Ka ik adahan wis misakwa henenwatma

Mt 12.30

23— Mmahpaki yivewkan yis ka amavan? Ku pahavwi ka amavan, amun ini nikwe ig kuwis kavetunsevun. Ku pahavwi ka darihwak nukakuh, amun ini nikwe ig kuwis suguhpen. Ka ik adahan yis misakwa henenwatma.

Wavitye diyuh givitit pahavwi

Mt 12.43

24— Yis kewa pahavwi awaygbe ku pariye wavitye pestinene givititak. Ig wavitye pes, ig wewvari ku kiney yumanene un. Ig ivegvene pahayku mayeket, heneme ig ka uti. Ig hiyapni hene, ig awna gitwa: “Nah diyuhpite ta nuvinwat, givitit ner awayg ku kitak nah pese.” 25Ig tivik. Ig danuh atere, ig uti givin miyakerik, barewarik, ahegbet adahan pahavwi parak atere. 26Ig hiyapni hene, ig tivik, ig iwap ntewnehker gikebikis wavityempu akiw ku pariye pi mbaytenene gihiyekemnikis giw. Ayteke nikwe igkis diyuh atere misakwa ayge givit ner awayg. Nikwe ner awayg giwskawni pi mbayte ariw pitatye akiw.

Kabayka ay gidahankis ihpenevwi Uhokri giwn

27Ig Kiyavwiye Jesus awna inakni iwit, pahavu tino ayge gibetkis neras hiyeg kabubuknene ayge eg kabayhig akak madikte gawaygi. Eg awna git:

— Nor ku pariye pisayhetni amadgat wayk, ku pariye pisukkisten, egu ka aynsima gubunuga.

28Igme kaytwa guwn:

— Pi kabayte wis awna: “Ku pariye hiyeg timepnevwi Uhokri giwn, ihpenevwi Uhokri giwn ignesnewa ka aynsima gibunugakis.”

Jesus wakaymni adahan ku samah hiyeg ka amavig

Mt 12.38

29Ayteke ka aynsima hiyeg akiw danuh atere git Kiyavwiye Jesus. Igkis kabubuk ganwa. Ayteke nikwe ig awna gitkis:

— Aa, yis hiyeg amadgayavu hawkri. Yis mbeyevye yihiyekemni. Inneki keh yis kehkis annut nutuh adahan areketni nudatni yit. Pahatwowa annut akkaka yitnek, ini annut ku samah Uhokri keh gikak gawneve amekene Jonas. 30Minikwak ku samah ig amekene Jonas wiwhpika abetitak miyaka, in humaw areketni gitkis neras hiyeg avitnenevwi paytwempu Ninive ku ig inyewa ekkene Uhokri giwn. Nah ku pariye wageswe awayg amadgaya inin, nah hawata. Ku aysaw nah wiwhpikanek abetitak miyaka in humaw areketninek gitkis hiyeg ku akak inin ku nah inyewa ekkene Uhokri giwn. 31Aysawnemenek ku aysaw Uhokri gihivetnikis hiyeg ba ignes wadityewatma, ka aynsima hiyeg ayge hiyekevyinek ku yis mbeyevye yihiyekemni. Avim ini nor tino ku pariye gikivarakis amekenegben tiwrikyenevwi egu hiyekevyinek ay givetun Uhokri ku yis mbeyevye yihiyekemni. Eg kane Uhokriyanma eg misakwa piyawakad, hiyaksa eg ayta atan adahan timapno amekene Salomão giwn awaku ig ka gihiyekemnisima. Yisme ka timepkere nuwnuh. Hiyawa nah pi hiyakemnite giw amekene Salomão, heneme yisnewa ka timepkere nuwnuh. 32Hawata akiw neras hiyeg avitya paytwempu Ninive igkis hawata hiyekevyinek ayge givetun Uhokri ku yis mbeyevye yihiyekemni. Mmanawa minikwak igkis ihe amekene Jonas giwn, igkis wagese gihiyekemnikis. Yisme ka iha nuwnuh. Hiyawa nah pi kiyate giw amekene Jonas, heneme yisnewa ka iha nuwnuh.

Ku uhiyekemni kabay, in ke paha abukribe kabutenne ay uvit

Mt 5.15, 6.22

33— Wis ka hakis abukri adahan ayempitnima. Wis ka hakisgu adahan wis asabkeptenma anavi suwyeg. Kawa. Wis ikigu ta inut akekrit adahan eg uguhno madikte hiyeg ku pariye parekwiyes arikut payt. Uhiyakemni hawata. 34Wowtyak kewa paha abukribe adahan uvit. Ku wowtyak makniw, nikwe in ke wotbe uvit ay abet kabutnikibe. Uhiyakemni hawata. Ku in makniw, ayge nikwe in ke wotbe uhiyekemni ay abet kabutnikibe. Hawata akiw ku wowtyak ka makniwnema, nikwe in ke wotbe uvit ay abet amisnavyebe. Uhiyakemni hawata. Ku in patehwevye, ayge nikwe in ke wotbe in ay abet amisnavyebe. 35Avuriwnabay yihiyekemni nikwe adahan yis ka ivegminenema yihiyekemni amin ini misanpiki patehwevye amadgaya inin. 36Ku kabutnikinen ay uvit, ku yuma patahwaki aynesnima ay abet uhiyekemni, ayge nikwe madikte uhawkan kabutenne wis hiyak huwewe ku pariye inyewatnene ke wotbe pahavwi uguhnenebe akak abukri avigku ahin pitati wavit.

Jesus akka farizewkis gitaraksankis

Mt 23.1; Mk 12.38

37Ig Kiyavwiye Jesus kannuhekne ayge, pahavwi farisew danuh atere git. Ig awna git:

— Uya atak ax nukakuh.

Igme Kiyavwiye Jesus ihe giwn. Ig tivik gihapti ta givinekut. Ig danuh atere, ig batahkiswe ahumwa axtet.

38Ig farisew wakaymni gidahan ku samah avit ig ax ig ka sukokaw ku samah amekenegben sukokaw adahan ignes barewvitye giwtrik Uhokri ine ig kawnata sukuheku gigobla ine ig kawnata sukohava gimewkan adahan in barewarikave giwtrik Uhokri.

39Ig Kiyavwiye Jesus hiyap ku samah ig wakaymni hene, ig awna git:

— Yis farisewviyene yis barewarikave yigobla akak yimewkan. Ku pariye awkinenwa yivitiw ini yis barewha. Abetme yihiyekemni yis patahwavye. Yihiyekemni kivun akak amevwiki hawata akak mbeyevye hiyakemniki. 40Yis yuma yihiyekemni. Ka ba yis hiyap ku Uhokri ku pariye keh uvitwiy ig hawata keh uhiyekemniwiy? 41Wake yis ikibe yihiyekemni ta git Uhokri, wake yis amnihbe hiyeg yis kakanhawbe gitkis amadgatak yimewkan, nikwekam madikte yewkanbet barewarikapnekam giwtrik Uhokri.

Farizewkis uti mbeyne ka aynsimanek

Mt 23.1; Mk 12.38

42— Akayih. Aysawnemenek yis farisewviyene yis hiyap mbeyne ka aynsimanek. Yis kakanhaw git Uhokri ariwntak madikte yamutra he madikte nopsanyuvwinene yamutrebdi. Yis wiwh pahakti ariwntak gaytakkis mpuse madikawku adahan yis kakanhewne git Uhokri. Heneme yis ka keh wadit gikakkis yiyakivwi hiyeg. Yis yumahwa Uhokri gamnihra ay abet yihiyekemni. In kabay yis kakanhaw git Uhokri, heneme kiskama yis wew akak inakni gihiyekemni madikte.

43— Akayih. Aysawnemenek yis farisewviyene yis hiyap mbeyne ka aynsimanek avatra ku samah yis batek bat amadga epti pi kiyatenene ariku leglis. Yis batek hiyeg aytnihyi higiwmadga akak kiyathaki.

44— Akayih. Yis hiyap mbeyne ka aynsimanek avatra ku samah yis kewa imewtibe ku pariye kane hiyakka, hiyeg wew nivitiw ignes ka hiyak ba mikahriki ayge ariku. Ku aysaw hiyeg kinetihwa yikak, igkis patahwa akak yihiyekemni igkis ka hiyaknima ku samah.

45Pahavwi gaytakkis neras kannuhekevutnevwi amin amekene Moís gikumadukan, ig timapni inakni iwit hene, ig awna ta git Kiyavwiye Jesus:

— Kiyavwiye, ku aysaw pis awna giminkis farizewkis hene, amun ini pis mahivwihwata usuh kannuhekevutnevwi amin amekene Moís gikumadukan.

46Igme kaytwa giwn:

— Akayih. Yis kannuhekevutnevwi yis hawata hiyap mbeyne ka aynsimanek avatra ku samah yis mpiksaptih hiyeg adahan ignes iha kumadukaki ku pariye mahikonene adahan ignes ihpin, yisme ka ihpin aynesnima. Yis ikaw ke pahavwibe ku pariye mpiksaptih gikebyi adahan ig hiyuh awiyka heneme igwa ka hiyuhkere ini awiyka, ine ig ka daxkerepni akak pahatnema giwak.

47— Akayih. Aysawnemenek yis hiyap mbeyne ka aynsimanek. Yis keh barewyevwi payt adahan gimewkis Uhokri gawnevevu pitatyevwi, neras gawnevevu ku pariye igkisnewa yahawkrivwi umehe. Yis ikaw ke wotbe yis kadniye giharitkisbe.

48 Bawa nutuh ku samah yis barewha gimewkis ini arakak ku yis amava ku samah yahawkrivwi umehpigkis. Igkisme umehpigkis, yisme barewha gimewkis. Yihiyekemni hawata ke igkisbe yahawkrivwibe.

49Inneki keh ig Uhokri awna:

“Nah awahkis nawenyevwi nawnevevu akiw nah awahkis nawenyevwi nuwatnivwi akiw atere giminkis nuhiyegavu. Gaytakkis umahavepkanek. Gaytakkisme hiyapkiska mbeyne gitkisnek.”

Ig awna inakni akak madikte gihiyekemni.

50Nikwe ig Uhokri diyuhkis gimigkisnek neras gawnevevu madikte ku pariye umahavepka ku samah akavuska hawkri. Ig diyuhkis gimigkis ta yivititnek yis ku pariye amedgenevwi hawkri ku akak inin.

51Ig diyuhkis ta yivititnek gimigkis madikte gawnevevu, awenketeke amekene Abew gimig he danuhe arit amekene Zakariyas gimig, ner ku pariye umehpika ayegbi kakanhewket akak Uhokri Givin. Henewa ta yivititwa ig diyuhkis gimigkisnek.

52— Akayih. Yis kannuhekevutnevwi, yis hiyap mbeyne ka aynsimanek. Yis hiyapkiska yitnek avatra ku samah yis kannuhwa amin Uhokri giwn, yis ik adahan yis woka Uhokri gihiyekemni ta gitkis hiyeg heneme yis sabukwin giwkis. Yis ka ihpin ine yis ka isaksa nawenyevwima hiyeg adahan ignes ihpin.

53 Pisenwa inakni giwn ig Kiyavwiye Jesus tivik. Ig pesanten ayteke, neras kannuhekevutnevwi gikakkis neras farizewkis igkis ka aynsima dagawne git. Han pitatit igkis gihikekten akak ayapka 54adahan igkis hiyap ba igkis keh ig awna iwit taraksebet adahan igkis gimetkepten.

Currently Selected:

Lúkas 11: pluPB

Highlight

Copy