Jean 18
18
1Tokou Jésus pa tar nèn mbä, nè ke ndjè kao gè tédjé dourou man Cédron. Ndòò éh nou, nè nao mè té ke ndjè kao gè tédjé.
2Judas, doou ke ndjè ndokè, nè ngeré loouè to, mbata Jésus ao nou ke ndjè kao gè tédjé gar baya.
3Tokou ban Judas, gè té ke nè ntaa ndjè pouroudjé ke padjadjé dji tòkou ndjè kòrdjé ke Pharisiendjé té, nè ndé kedè ke lampe, ke ngèl, ke né doo.
4Tokou ban, mbata Jésus geré né toï ke ao dé dè té, nè ntéh ke daka mè ndòò té, nè mpa naredè, Doou di a sésè ao esangèdjé wa?
5Dèdè ntél tar darè, Jésus ke Nazareth. Jésus pa aredè, Ma méh nèn. Judas, doou ke ndjè ndokè, arr kedè tò.
6Tokou ban, tokou nè mpa naredè, ma méh nèn, dèdè ntél ke godè, doso nange.
7Tokou ban nè ntél ndoudjoudè, Doou di a sésè ao esangèdjé wa? Dèdè mpana, Jésus ke Nazareth.
8Jésus tél tar, Ma mpa maresè ma méh nèn. Tokou ban, tokou sésè esangemdjé, ïyaidjédè dèdè nèn, aredè dao.
9Baa ta kare tar ke nè mpa ase ta dé to tar ke tokoro, Dèdè ke i aremdè, mem woei dodè té kada ang.
10Tokou ban Simon Pierre, ke éh ke tòkou kiaa, nè nòrou ntouka né bere lo mbai lo ndjè kòrdjé, ngange mbia ke koi. Ri bere lé na Malchus.
11Tokou ban Jésus pa are Pierre, Etél ke kiaa loi oula bòlè té. Ma ma kaih mè ngonarè té ke Bòi Allah arem ta kaih ang wa?
12Tokou ban ndjè pouroudjé ke ndjè ngem ndjè pouroudjé, ke padjadjé lo Juifdjé, dèdè dwaa Jésus dèdè ntòè.
13Ke dèdè dao sa darè Anne dongor, mbata nè nto bo dènè lo Caïphe, nè ke nto mbai lo ndjè kòrdjé balè tén.
14Caïphe to doou ke ndjè ndedji Juifdjé leo, to madji tokou doou kada a kwoei mbata dooudjé.
15Simon Pierre ke mare ndjè kao go Jésus té kada ndja go Jésus té. Mbata mbai lo ndjè kòrdjé geré ndjè kao go Jésus té ke kada nèn, nè nande ke Jésus kei té lo mbai lo ndjè kòrdjé.
16Pierre arr ta kei té daka. Tokou ban ndjè kao go Jésus té nèn ke mbai lo ndjè kòrdjé geré, nao daka nao mpa tar ke ngonlokisi ke dènè ke ao ngem ta kei, baa ta kare Pierre dé mè té.
17Tokou ban ngonlokisi ke dènè ke ao ngem ta kei, nè mpa nare Pierre, I to ndjè kao go doou té nèn tò wa? Nè mpana, Ma ang.
18Beredjé ke padjadjé darr mbòr pourou mï té, ke nyél, mbata koul ödè. Dèdè dao ndibi pourou nèn, Pierre arr kedè ao ndibi pourou tò.
19Tokou ban mbai lo ndjè kòrdjé doudjou Jésus tar lo ndjè kao gè tédjé, ke tar ke nè ntòdjou.
20Jésus tél pa arè, Ma mpa tar no dooudjé té toï ke nange nèn, mam ntòdjou tar ke ndò toï kei Allah té, ke tokou kei Allah té, loou ke Juifdjé mbona kendé. Ma mpa tar loou kiyèè té kada ang.
21Mbata di a i doudjoum wa? Edoudjoudè, dèdè ke do tar ke ma mpa maredè. Wo, dèdè ngeré né ke ma mpa mbä.
22Tokou nè mpa ban mbä, padja lodè kada ke arr ngosiba ounda Jésus ke dja, pana, I tél tar ke mbai lo ndjè kòrdjé ban wa?
23Jésus tél pa arè, Tokou ma mpa tar ke madjang, etòdjoum né ke to madjang. Bo tokou ma mpa madji, mbata di a oundam wa?
24Tokou ban Anne oulè are Caïphe, mbai lo ndjè kòrdjé.
25Simon Pierre arr nou ao ndibi pourou. Tokou ban dèdè mpa sa na, I to ndjè kao gè té tò wa? Nè mmai, mpana, Ma ang.
26Bere lo mbai lo ndjè kòrdjé kada, ke to ngokö bere ke Pierre gange mbia, nè mpana, Ma moi sa mè ndoo té ang wa?
27Tokou ban Pierre tél mai, loshénè loshénè könra nò.
28Tokou ban dèdè dïya Caïphe, dao ke Jésus kei gange saria té. Loou arè mbä. Dèdè ndja dao mè kei gange saria té ang, mbata dèdè ndiki ta dé madjang ang, baa ta kare dèdè dase kon mourou Pâque.
29Tokou ban Pilate ao kedè daka, pana, Sésè Ounidjé do doou nèn tar di té wa?
30Dèdè ntél mpa darè, Tokou doou nèn to doou ke ndjè né da ke madjang ang, djèdjè dja kwèè kari ang.
31Tokou ban Pilate pa aredè, Sésè ndja wèèdjé ta gange saria la deo tar ndedji té losè. Juifdjé pa sa na, Tar ndedji pana ase kare djèdjè ntòl doou kada ang.
32Baa ta kare tar lo Jésus, ke nè mpa leo ta tòdjou deo kwoei la, ase ta dé to tar ke tokoro.
33Tokou ban Pilate tél ao kei gange saria té, nè mmar Jésus, nè mpa sa na, I to Mbaibé lo Juifdjé wa?
34Jésus tél pana, I pa tar ke mei ndja, aséh mare doou pa tar ari ke rim wa?
35Pilate tél pana, Mam nto Juif wa? Ngaköidjé ke tokou ndjè kòrdjé waai arem. Di a eda wa?
36Jésus tél pana, Béh kö lom éh nange nèn ang. Tokou béh ko lom éh nange nèn, dooudjé lom a da dòò, baa ma ma koso dji Juifjdé té ang, a loshénè béh ko lom to tokou ban ang.
37Tokou ban Pilate pa sa na, I to mbaibé wa? Jésus tél pana, I pana, mam nto mbaibé. Doudjoum mbata yèn, ke mbata yèn mam ndé nange nèn, ta pa tar nadji ke tar ke tokoro. Dooudjé toï ke to ngä tar ke tokoro wo tar lom.
38Pilate pa sa na, Tar ke tokoro to di wa?
Tokou nè mpa ban mbä, nè ntél ntéh nao rò Juifdjé té, nè mpa naredè, Ma mo saria dè té ang.
39Mare tar béh losè to, a ma mïya doou kwaa kada maresè ndò Pâque té ke bo. Tokou ban sésè ndikidjé ta karem mïya Mbaibé lo Juifdjé maresè wa?
40Tokou ban dèdè mpa ke tarr bai, mpana, Doou nèn ang, a Barabbas. Barabbas to ndjè boukou ke bel ang.
Currently Selected:
Jean 18: KL1960
Highlight
Share
Copy
Want to have your highlights saved across all your devices? Sign up or sign in
© 1960, 2018.
To learn more or sign up for email updates about the mission of BFBS, click here:
