sēnt mātyo 23

1ēkosi māka cisas ki ayamiēw kā māmawēyatiyit ayisiyiniwa, mina o kiskinohamawākana, 2omisi ē itwēt, masinahikēwiyiniwak mina parasiyak, apiwak mosisa ot apiwiniyihk; 3ēwako māka ohci, kahkiyaw kēkway kā isi wihtamākoyēkok kita totamēk, ēwako totamok mina kisitak; māka ēkāwiya kiskinawapamikok ot atoskēwiniwahk; cikēmā itwēwak, namawiya māka totamwak. 4cikēmā takopitamwak ē kosikwaniyiki nayacikana, mina ē kotakipakaki kita nayatamihk, ē nayataacik māka ayisiyiniwa o titimaniyihk; māka wiyawāw tipiyawē namawac kanakē pēyak o cihciwāw wi ohci āhtinamwak. 5#mātyo 6:1; tiyotaranami 6:8; nampars 15:38māka kahkiyaw ot atoskēwiniwawa totamwak piko kita wāpamikocik ayisiyiniwa; mina ayakāskitawak ot aspitāpiskakaniwawa, mina ē mamisatacik ē nēyēkikwatēyiki oskotakawawa, 6mina ē sakihtācik ē ispāyiki apiwina wihkohtowinihk, mina kēstēyitākwaki apiwina ayamihēwikamikohk. 7mina atamiskatowina atatowinihk, mina kita isiyihkātikocik ayisiyiniwa, rāpay, 8māka ēkāwiya kiyawāw rāpay wiitikosik; cikēmā pēyako kokiskinohamakēmiwāw; kahkiyaw māka kociwāmitonāwāw. 9mina ēkāwiya awiyak notāwinan itihk ōta askihk; cikēmā pēyako piko kotawiwāw, ēwako kihci kisikohk kā ayāk. 10ahpo mina ēkāwiya okimāw wi isiyihkātikosik; cikēmā pēyako piko kit okimamiwāw, ēwako Christ. 11#mātyo 20:26,27; mārk 9:35; 10:43,44; lok 22:26māka kā kihcāyiwit oma kā itasiyēk, ēwako kē ot atoskēyākaniyēk. 12#lok 14:11; 18:14awēna māka kē kistēyimisokwē, kita tapatēyimoāw; awina māka kē tāpatēyimohisot, kita kistēyitakoaw.

13māka ki kakwātakisināwāw kiyawāw masinahikēwiyinitik mina parasitik, otayamihēkāsoskak! cikēmā ki kipahamwanāwāw ayisiyiniwak kihci kisikowi otēnawiwin, cikēmā namawiya kiyawāw ki wi pitokānāwāw, namawiya māka mina kit iyinamawāwāwak aniki kā wi pihtokēcik kita pihtokēcik. 14ki kakwātakisināwāw isa kiyawāw masinahikēwiyinitik, mina parasitik, otayamihēkāsoskak! cikēmā ki nisiwanācitānāwāw sikāwak wikiwāwa, mina kayēsiiwēwinihk piko kinwēs kohci ayamihānāwāw; ēwako māka kē ohci kaskitamāsoyēk awasimē kihci nānipomikowin. 15ki kakwātakisināwāw kiyawāw, masinahikēwiyinitik, mina parasitik, otayamihēkāsoskak! cikēmā ki wāskāskēnāwāw kihcikami mina aski, kita osiayēk pēyak okwēskipimātis, ispi māka kā osiāyēko, kit isiwawāw niswāw iyikohk awasimē kita ot awāsimisimikot iskotēw ispic kiyawāw. 16ki kakwātakisināwāw kiyawāw, ēkā kā wāpiyēk opimotaiwēwak, omisi kā itwēyēk, awiyak kē aspi kihci itwēkwē kihci ayamihēwikamik, namawiya nānitaw ihkin; māka kispin awiyak kē aspi kihci itwēkwē osāwisoniyāw kihci ayamihēwikamikohk, masinahikēw! 17kiyawāw okakēpatisak, mina ēkā kā wāpiyēk; tānima nawac kēhcayiwahk, anima osāwisoniyāw ahpo anima kihci ayamihēwikamik kā ohci kanātisit osāwisoniyāw? 18mina, awiyak kē aspi kihci itwēkwē pakitinasowinapisk, namawiya nānitaw ihkin; māka kispin awiyak kē aspi kihci itwēkwē anima mēkiwin ēkota kā ayāk maci totam isa. 19kiyawāw okakēpātisak, mina ēkā kā wāpiyēk; tānima nawac kēhcāyiwahk, mēkiwin, ahpo anima pakitinisowinapisk kā kanācitāmakahk mēkiwin? 20ēwako māka ohci awiyak kē aspi kihci itwēkwē pakitinasowinapisk, aspi kihci itwēw ēwakwēyiw, mina kahkiyaw kēkway ēkota kā ayāyik. 21awiyak māka kē aspi kihci itwēkwē kihci ayamihēwikamik, aspi kihci itwēw, mina anihi ēkota kā wikiyit. 22#aysāya 66:1; mātyo 5:34ana māka wiya kē aspi kihci itwēt kihci kisik, aspi kihci itwēw kisēmanito ot okimāwapiwin, mina anihi ēkota kā apiyit. 23#lipitikas 27:30ki kakwātakisināwāw kiyawāw masinahikēwiyinitik mina parasitik, otayamihēkāsoskak! cikēmā ki tipaēnāwāw mitātat iyikohk mint mina anisi mina kamin, ēkosi māka wiya ē ki pataamēk awasimē ēspitēyitākwaki itasowēwinihk, oyasowāsiwēwin, kisēwātisiwin, mina tāpwēwakēyitamowin; ēwakwani isa ohi ki ka ki totēhtawāw namawiya māka kotaka ēkosi kita isi pataamēk ēkā kata totamēk. 24kiyawāw ēkā kā wāpiyēk opimotaiwēwak! kā sikopātināyēk ēyikos, mina kā misiwēpayihāyēk piskwāwikanēwipisiskiw. 25ki kakwātakisināwāw kiyawāw masinahikēwiyinitik mina parasitik otayamihēkāsoskak? cikēmā waskic piko ki kanācitānāwāw mikisiyakanis, mina kā aspastēk, māka wiya pihci sākaskinēw anima kāsakātisiwin mina āsponēyimowin. 26kiya ēkā kā wāpiyan parasi! kanācitā nistam anima pihci mikisiyakanisihk ēyāk mina kā aspastēk, ēkosi māka mina waskic kita kanatanwa. 27#isihcikēwiniwāwa 23:3ki kakwātakisināwāw kiyawāw masinahikēwiyinitik mina parasitik, otayamihēkāsoskak! cikēmā tāpiskoc anihi kā wāpiskipēikātēki yikwahaskāna kit isinākosināwāw, anihi tāpwē waskic nāspic kā miyonakwaki, māka wiya pihci sākaskinēwa nipowiiyiniwikana, mina kahkiyaw ēkā kā pēkahk. 28ēkosi māka mwēhci kiyawāw waskic ē isi kwayaskātisistawāyēkok ayisiyiniwak, māka wiya pihciyaw ki sākaskinēskākonāwāw ayamiēkāsowin mina maci itiwin. 29ki kakwātakisināwāw kiyawāw masinahikēwiyinitik mina pārasitik otayamihēkāsoskak! cikēmā kositāwānāwāw o yikwahaskāniwāwa okiskiwēhikēwak mina ki wawēsitāwānāwāw o yikwahaskāniwāwa okwayaskitātisiwak, 30mina ē itwēyēk, kispin ki ayāyāhk mēkwāc ē o kisikāmicik notāwinānak namawiya ni ka ki wiciātanānak o mikoyihk okiskiwēhikēwa. 31ēkota māka kohci ācimostāsonāwāw, kiyawāw ē ot awāsimisimikoyēkok kā ki nipahācik okiskiwēhikēwa. 32sākaskinatāwāhk māka o kaskitamāsowiniwāw kotāwiwāwak. 33#mātyo 3:7; 12:34; lok 3:7kiyawāw kinēpikwak kiyawāw kā otawāsimisimikoyēkok kinēpikwak, tānisi kē ki isi tapasitāyēk kē oyasowātikawiyēk iskotēhk isi.

34ēkosi māka, cist, kit isitisaamātināwāw okiskiwēhikēwak, mina iyinisiwi ayisiyiniwak, mina masinahikēwiyiniwak; ātiht māka ki ka nipahāwāwak mina ki ka cistāskwātwāwāwak; mina ātiht ki ka papasastēwāwāwak kit ayamiiwēkamikowāhk, mina kita āyāsowi kakwātakiayēkwaw nanatohk otēnāhk. 35#cēnisis 4:8; 2 akinē ācimowina 24:20,21kiyawāw māka kita pakamiskākoyēk kahkiyaw anima kwayask isiwēpisiwini mihko kā sikinikātēk askihk, anita ohci o mihko kanātisiwi ēpil piyis o mihko sākarāyas okosisa pārakaias, kā ki nipahāyēk tāstawāyihk ci ayamihēwikamikohk mina pakitināsowināpiskohk; 36tāpwē kit itināwāw, kahkiyaw ohi kēkwaya kita pakamiskākwak oko kā aniskē pimātisicik.

37ā cērosalam, cērosalam, kiya kā nipaacik okiskiwēhikēwak mina kā pimwāpiskaacik kā ki pē isitisaamākawiyan, tānitahtwāw kā āta wi māmawi māwaciakik kit awāsimisak, tāpiskoc misiyēw kā isi māwacihāt o misiyēsisima sipā otatakwanihk, māka namawiya kit itēyitēnāwāw! 38#cērimāya 22:5cist māka, ki wāskāhikan ki nakatamākawin ē pisisikwastēk. 39#nikamona 118:26cikēmā niya kit itināwāw, namawikāc mina ki ka wāpamināwāw, pātimā piko itwēyēko, sawēyitākosiw kā pē itohtēt kā tipēyihcikēt ot isiyihkāsowinihk.

Currently Selected:

sēnt mātyo 23: KKMR

Highlight

Copy