sēnt mārk 4

1 # lok 5:1-3 mina māka ki māci kiskinohamākēw sisocāyihk sākahikanihk. ēkota māka ki māwasako nātik kihci mihcēt ē māmawēyatiyit ayisiyiniwa, ēkosi ki posiw osihk, mina ki apiw ēkota sākahikanihk; kahkiyaw māka kā māmawēyatiyit ayisiyiniwa ki ayāyiwa mocihk sisocāyihk sākahikanihk. 2mihcēt māka kēkwaya ki kiskinohamāwēw āwēcikanihk, omisi māka ē ki itāt o kiskinohamākēwinihk, 3natohtamok; mātika, okistikēw ki natawi pakitinikēw: 4ki ayikin māka mēkwāc ē pakitinikēt ātiht kistikāna ki pakitinwa mēskanāhk, ēkosi piyēsisak ki pē mosakatamwak. 5ātiht māka ki pakitinwa asiniskāhk ita ēkā mistahi asiski ē ayāk; sēmāk māka ki sākaskiwa cikēmā ēkā ē ayāki ē kispakaskamikāk; 6māka ispi pisim ēti ispaahk ki kisitēwa, ēkosi ēkā ē ocēpikiwiki ki nipomakanwa. 7ātiht māka mēkwā okāwiminakasihk ki pakitinwa, okāwiminakasiyak māka ki opikiwak mina ki ayiwikistamwak, ēkosi namawiya ki minisiwanwa. 8kotaka māka ki pakitinwa ita ē miywāsik aski ēkosi ki minisiwanwa, ē opikihki mina ē yakiomakahki; ēkosi ē isi nihtāwikihki; ātiht nistomitanaw, ātiht nikotwāsomitanaw, ātiht mitātahtomitanaw iyikohk. 9ēkosi māka ki itwēw, awēna wētawakāt kita pēhtahk, kiyām kita pētam.

10ispi māka piyēyakot, anihi kā wāskāskākot asici anihi mitātaht nisosāp kā ihtasiyit, ki kakwēcimik oma āwēcikan. 11omisi māka ki itēw, kiyawāw isa ki miyikawināwāw anima kā wanimotahk kisēmanito ot otēnawiwinihk; māka aniki wayawitimāyihk kā ayācik kakiyaw ohi awēcikanihk ayitotamawāwak: 12#aysāya 6:9,10ē wāpicik kita wāpahtahkik ēkā māka kita nasitotakik; kēka nāntaw iyikohk kita kwēskipimātisicik ēkosi kita ponēyitamācik. 13ki itēw māka, nama ci ki kiskēyitēnāwāw oma āwēcikan? tānisi māka kē ki isi kiskēyitamēk kahkiyaw awēcikana?

14okistikēw kistikātam itwēwin. 15ēwakwanik māka oki mēskanāhk ita itwēwin kā pakitinikātēk; ispi māka kā pētakwāwi sēmāk pē itohtēw sētan ēkosi ē otinahk itwēwin o tēhiwāhk kā ki kistikācikātēyik, 16ēkosi māka mwēhci wistawāw aniki asiniskāhk kā kistikāticik; aniki ispi kā pētakwawi itwēwin kiyipa mamahtākosiwinihk otinamwak; 17ēkā māka ēwakwanik ē ocēpikiwicik, aciyaw piko ayākwamisiwak; ēkwa ispi ayimisiwin ahpo kakwātakitāwin pēsikomakaki itwēwin ohci, sēmāk nayētāwi totamwak. 18kotakak māka kā kistikāticik mēkwāc kāwiminakasiskahk; ēwakwanik aniki kā pēhtahkik itwēwin, 19māka ē mikoskātēyitamiiwēk oma aski, mina ē wayēsiiwēki wēyotisiwina, mina ē maci mostawēyitamihk kotaka kēkwaya, ē pihtokēmakaki ayiwikistamomakanwa itwēwin, ēkosi namawiya minisiwan. 20aniki māka wiya kā kistikāticik anita ē miywāsik aski; ēwakwanik kā pēhtahkik itwēwin mina kā otinahkik mina kā minisiwicik, ātiht nistomitanaw, ātiht nikotwāsomitanaw mina ātiht mitātahtomitanaw iyikohk.

21 # mātyo 5:15; lok 11:33 ēkosi ki itēw, pētāniwan ci wāsaskotēnikan sipā makakohk kita astāhk, ahpo sipā nipēwinihk? ēkā māka wāsaskotēnikanāpiskohk kita cimatēk? 22#mātyo 10:26; lok 12:2cikēmā namawiya kēkway kātāniwan, ēkā kē payatēnākotāniwahk; mina namawiya kēkway ki kimoci kanawēyicikātēw piko kita moskimakahk wāsēyāhk. 23kispin awiyak ayisiyiniw wētawakākwē kita pēhtahk kiyām kita pētam. 24#mātyo 7:2; lok 6:38ēkosi ki itēw, mēyākwām kēkway kā pēhtamēk; anima ē isi tipahikēyēk, ēkosi kē isi tipahamākawiyēk; kiyawāw māka kā pēhtamēk awasimē ki miyikawināwāw. 25#mātyo 13:12; 25:29; lok 19:26cikēmā ana kā ayāt ēwako ana kē miyiht: ana māka ēkā kā ayāt, ēwako ana kē maskamiht wāwāc anima kā isi ayāt.

26omisi māka ki itwēw, ēkosi mwēhci ētēyitākwahk kisēmanito ot otēnawiwin, tāpiskoc ayisiyiniw wēpinahk kistikānisa askihk, 27ēkosi nipāt mina waniskāt ē tipiskāyik, mina ē kisikāyik, anihi māka kistikānisa sākaskiki mina nihtāwikiki, ēkā ē kiskēyitahk tānisi isi. 28ayis aski kēhciwāk nihtāwikicikēmakan, nikān maskosi, ēkwa ostikwānaskosi, ēkwa ē moskinēt pakwēsikanikān ostikwānaskosihk. 29#coil 3:13māka ispi ē minisiwit ētisoci, sēmāk astāniwan manisikan, cikēmā māwacicikēwin otihcipayiw.

30omisi mina ki itwēw, tānisi kē isi āwētāyahk kisēmanito ot otēnawiwin? ahpo kēko āwēcikan kē ki ohci kiskinawatēyitākotāyahk? 31itēyitākwan tāpiskoc pēyak aspacikani kistikānis, ēwako, kispin ē kistikātamihk askihk, āta ē māwaci apisāsik tahto kistikānisa askihk kā ayāki, 32ēyiwēhk kā pakitinikātēki, kiyipikin, mina māwac sokēyitākwan tahto kistikācikana kā ayāki, mistahi siswēpakiw, ēkosi piyēsisak kā papāmiyācik ki ayāwak sipā ē siswēpakik.

33mihcēt māka ēko towi āwēcikana ki ohci wawitamawēw itwēwiniyiw ē isi kaskitāyit kita natohtamiyit: 34māka namawiya ayamiēw ēkā ē āpacitāt āwēcikan: māka ispi nēsikato ayātwāwi o kiskinohamawākana ki wawitamawēw kahkiyaw.

35ēwako māka ē kisikāyik ispi ē ati otākosik, ki itēw, māhti akāmihk isicimētāk. 36ē nakatācik māka kā māmawēyatiyit ayisiyiniwa, ki posiēwak, ē isi ayāyit, osihk. kotaka māka osa ki witaomikwak. 37ēkota māka ki misi pakiciyowēpayiw, ēkosi ki pāposāan osihk, piyis osi ē ati moskinēk. 38wiya māka otākētakohk ki ayāw, ē nipāt ē aspisimot yoskaawācikan: ēkosi ki koskonēwak mina ki itēwak kēskinohamākēyan, nama nāntaw ci kit itēyitēn kita nisiwanātisiyahk? 39ki waniskāw māka, ki kitotam yotin, omisi mina ē ki itahk sākahikan, pēyatak, kiyāmi ayā. ēkosi māka ki kipihci yotin, mina mistahi ki aywāstin. 40ki itēw māka, tānēki kā sēkisiyēk? namēska ci kit ayānāwāw tāpwētamowin? 41mistahi māka ki sēkisiwak, ēkosi ki ayititowak, awēna awa, ahpo yotin mina sākahikan kā nanaitākot.

Currently Selected:

sēnt mārk 4: KKMR

Highlight

Copy