sēnt mārk 5

1ēkosi māka ki takopayiwak kwēskakām sākahikanihk ot askiyihk kērasina. 2ispi māka osihk kā ohci kapāt, sēmāk ki nakiskāk nainatowikamikohk ohci nāpēwa ē kikiskākoyit ēkā ē pēkisiyit ahcāhkwa, 3ēwako ē wawikit māna nahinitowikamikohk: ēkosi namawiya ēkwa awiya ki mamācikwapitik, namawāc ahpo piwāpiskwa ohci: 4cikēmā āta mihcētwāw kaskāpiskaikana mina piwāpiskwa ki ohci takopitāw, māka piwāpiskwa ki paskipitam mina kaskāpiskaikana ki pikonam: mina nama awiya ayisiyiniwa ayāyiwa maskawisiwin kita ki yospisiikot. 5mosak māka, tēpiskāyiki mina kiyisikāyiki, nahinitowikamikohk mina wacihk ki tātēpwēw mina ki papēsisoso asiniya ohci. 6ispi māka wiyāpamāt cisasa wāyaw ohci, ki ispatāw ki natawi ocihcihkwanapistawēw; 7ēkosi ē mistahi tēpwēt ki itwēw, kēkway niya kēnawāpamikoyān kiya ohci, cisas kiya okosisa māmawēyas kēhcāyiwit kisēmanito? ē aspimoyān kisēmanito ki wihtamātin, ēkā kita kotakihiyan. 8cikēmā ki itēw, pē wayawi ana ayisiyiniw ohci, kiya ēkā kā pēkisiyan ahcāhk. 9ki kakwēcimēw māka, tānisi ēsiyikāsoyan? ēkosi ki itik, lican nit isiyihkāson; cikēmā ni mihcētinān. 10ēkosi sohki ki kakisimototāk ēkā kita sipwētisaokocik ēkota askihk ohci. 11ēkota māka opimēyāmatin wacihk ki ayāwak ē asēyaticik mihcēt kohkosak ē micisocik. 12ki kākisimototāk māka ē itwēyit, isitisahonān kita natawi pitiskawāyāhkik kohkosak. 13cisas māka sēmāk ki naskomēw, ēkosi ēkā kā pēkisicik ahcāhkwak ki wayawiwak, mina ē ki pitiskawācik kohkosa: ēkosi ē asēyaticik ki pinasiwēpatāwak sākahikanihk nāntaw niswāw kihci mitātomitanaw ki itasiwak; ēkosi ki nistāpāwēwak sākahikanihk. 14aniki māka kā asamācik ki tapasiwak, ēkosi ki ātotamwak otēnāhk, mina ēkota askihk. ki pē wāpahtamwak māka ayisiyiniwak anima kā ki ikiniyik. 15ki otitēwak māka cisasa, ēkosi poti wāpamēwak anihi kā ki kikiskākoyit maci ahcāhkwa ē apiyit, ē kikiskācikēyit mina kwayask ē o mitonēyicikanēyit, anihi oti licana kā ki ayāwāyit; ki sēkisiwak māka. 16aniki māka kā ki wāpahtahkik ki wihtamawēwak kā ki isicikātimiht anihi kā ki kikiskākoyit maci ahcāhkwa, mina anihi kohkosa. 17ēkwa māka ki māci kākisimototawēwak ot askiwāhk kita ohci sipwētēyit. 18ē ati posit māka osihk, anihi kā ki kikiskākoyit maci ahcāhkwa ki natotamāk kita ki wicēwikot. 19māka namawiya ki iyinamawēw, māka itēw, itohtē ki wāskāhikanihk, nāsik ki totēmak, mina wihtamawik kihci kēkwaya kā ki totamāsk kā tipēyihcikēt, mina kā ki isi kitimākināsk. 20ēkosi ki sipwētēw, ē ki sipwē ātotahk māka tikāpolisihk kihci kēkwaya cisasa kā ki totamākot; kahkiyaw māka ayisiyiniwak ki mamaskātamwak.

21ispi māka cisas kwēskitē itēkēkām mina kā isi asowaahk osihk, mihcēt ayisiyiniwa ki pē māwaciitoyiwa ita ē ayāt: kisiwāk māka sākahikanihk ki ayāw. 22ēkota māka ki pē takosin pēyak oyasowēwikimaw ayamihēwikamikohk cēras ē isiyihkāsot; ispi māka wiyāpamāt cisasa, ki pahkisin o sitiyihk, 23sohki ē kākisimototawāt ē itwēt, nitānisis kēkāt nipiw: ki pakosēyimitin kita pē natawi sāminat, kita ki miyo ayāt, ēkosi kita pimātisit. 24ki ati wicēwēw māka; mihcēt māka ē māmawēyatiyit ayisiyiniwa ki pimitisahok mina ki ati papistiskāk.

25pēyak māka iskwēw, ē ki itāspinēt ē ohcikawaniyik o mihko mitātat nisosāp tahto aski, 26nanātohk māka ē ki isi kotakihikot mihcēt maskikiwiyiniwa, ēkosi ē ki mēstinikēt kahkiyaw kēkway kā ki ayāt, ēkā māka awasimē ē ki miyo ayāt māka nawac ayiwāk ē ati isi ayāt, 27ispi piyēhtahk ē ācimimiht cisasa ki pē itohtēw ita ē asi ayāyit ayisiyiniwa ospiskwaniyihk ohci, ēkosi ki sāminamwēw oskotākāyiw. 28cikēmā ki itwēw, kispin sāminamwakē piko oskotākay, ni ka miyo ayān. 29sēmāk māka ki poni ohcikawaniyiw o mihko mina ki mositāw wiyawihk ē iyinikaiht anima kā ki itāspinēt. 30sēmāk māka cisas, ē mositāt anima kaskihēwisiwin wiya ohci ē ki sipwēpayiyik, ki kwēskikāpawiw mēkwāc ita ē asēyatiwiht, mina ki itwēw, awēna kā sāminahk niskotākay? 31o kiskinohamawākana māka ki itik, ki wāpamāwak ē mihcēticik ayisiyiniwak ē papistiskāskik, kit itwān ci māka awēna kā sāminit? 32wāskā māka ki ayitāpiw, kita wāpamāt anihi omisi kā ki totamiyit. 33māka ana iskwēw ē sēkisit mina ē nanamipayit, ē kiskēyitahk anima kā ki totāht, ki pē pahkisin ē isi otiskawikāpawiyit, ki wihtamawēw kahkiyaw ē tāpwēt. 34wiya māka ki itēw, nitānis, ki tāpwētamowin ki ki iyinikaikon; niyā pēyahtakēyimowinihk, ki ka wi miyo ayān kā ki itāspinēyan.

35mēkwāc kēyāpic ē pikiskwēt, takosiniyiwa ayamihēwikamikowi oyasowēwikimāwa o wāskāhikaniyihk ohci, ē itwēyit, kitānis nipiw: tānēhki ahci piko kā mikoskācimat okiskinohamākēw? 36māka cisas, ēkā ē pisiskēyitahk anima kā itwēwiht, ki itēw anihi ayamihēwikamikowi oyasowēwikimāwa, ēkāwiya astāsi, piko tāpwēta. 37namawiya māka awiya iyinamawēw kita pimitisahokot piko pitar mina cēmis mina cān ociwāma cēmis. 38ki ati takosinwak māka o wāskāikaniyit anihi ayamihēwikamikowi oyasowēwikimāwa; ēkosi poti wāpahtamwak ē mikoskātakamikisiwiht mina anihi kā mātoyit mina kā kakwātakatwēmoyit. 39ispi māka kā pihtokēt omisi itēw, tānēki kā mikoskātakamikisiyēk, mina kā mātoyēk? ana awāsis namawiya nipiw, nipāw māka. 40ēkosi māka ki mētawākēyāpiēwak. māka wiya ispi kahkiyaw kā wayawitisawāt, ki ati otinēw otāwiyiwa anihi awāsisa mina okāwiyiwa mina anihi kā wicēwikot, ki ati pihtokēw māka ita anihi awāsisa ē ayāyit. 41ē sakicihcēnāt māka anihi awāsisa ki itēw, tālita komāy; ēwako kā itwēhk, ē itwēstamawātamihk, oskinikiskwēw, waniskā, kit itin. 42sēmāk māka ana oskinikiskwēsis ki waniskāw mina ki pimohtēw; cikēmā nāntaw mitātat nisosāp ki itahto piponwēw, ki māmaskātamwak māka sēmāk kihci māmaskātamowinihk. 43mitoni māka ki ayakwāmimēw ēkā awiya ayisiyiniwa kita kiskēyitamiyit: mina ki itasowēw kita miyimiht kēkway kita miciyit.

Currently Selected:

sēnt mārk 5: KKMR

Highlight

Copy