Матфейица бицараб Рохалил хабар 28

28 бетӏер

Гӏиса хабалъ ватичӏо

1Шамат къо индал, анкьил тӏоцебесеб къоялъул рогьалилъ, Гӏисал хабаде рахине рачӏана Магдалаялдаса Марямги ва дойцояй Марямги. 2Зобалаздасан гьениве рещтӏун вуго Бичасул малаик. Хабал картӏида цун лъун букӏараб гамачӏги нахъе босун, гьелда тӏад гьев гӏодов чӏедал, кутакалда ракь багъарана. 3Пириялъул гӏадаб сурат букӏана гьев малаикасул, гӏазухъахӏаб ретӏелги букӏана гьесда тӏад. 4Гьесукьа хӏинкъун хъаравулзаби сородана ва хварал чагӏи гӏадин лъугьана. 5Гьел руччабазда малаикас абуна:

– Нуж хӏинкъуге! Хъанчида ван хвезавурав Гӏиса нужеца валагьулев вукӏин лъала дида. 6Гьев гьанив гьечӏо. Гьес абухъе, хваралъуса вахъана Гӏиса. Гьанире рачӏа гьев вукъун вукӏараб бакӏалде ралагьизе. 7Гьабсагӏат ун нужеца Гӏисал муридазда абе, гьев хваралъуса вахъун вугин, нужедаса цеве Галилеялде щвезе вугин ва гьенив вихьилин нужеда гьев. Гьале гьадин абулеб буго дица.

Гьел руччабазда вихьула Гӏиса

8Гьеб хобалдаса рикӏкӏалъизе гӏедегӏана гьел, ва хӏинкъиялъги рохиялъги куркьбал гъурал руччаби рекерун ана муридазда гьеб хабар лъазабизе.

9Гьале, рорчӏамиянги абун, гьезда данде вачӏана Гӏиса. Аскӏоре ун, гьел руччаби, Гӏисае сужда гьабун, гьесул хӏатӏазда хурхана. 10Гӏисаца гьезда абуна:

– Нуж хӏинкъуге! Инеги ун, дир вацазда абе Галилеялде аян. Дова вихьила гьезда дун.

Хъаравулзабаз бицунеб буго

11Гьел руччаби нахъе аралго, дол хъаравулзабазда гьоркьоса цо чанго чи шагьаралде ана ва чӏахӏиял кашишзабазда бицана доба ккарабщиналъул хӏакъалъулъ. 12Гьебмехалъ чӏахӏиял кашишзабиги чӏухӏби-хӏакимзабиги данделъана щиб гьабилебали дандбазе. Цинги, гӏурабгӏан гӏарацги хъаравулзабазе кьун, 13гьезда абуна:

– Нужеца бице: «Ниж кьижун ккараб мехалъ сардилъ рачӏун Гӏисал муридаз жаназа бикъун ана», – ян. 14Нагагь сардарасде гьеб хабар щвани, нижеца рекъезабила гьесулгун иш ва нужее гьелъул щибго къварилъи ккезе биччаларо.

15Босун гьеб гӏарацгун, гьел рагъухъабазги жидеда малъухъе гьабуна. Ва жугьутӏазда гьоркьоб жакъа къоялде щвезегӏанги тӏибитӏун буго гьеб хабар.

Гӏиса Галилеялда вихьула муридазда

16Гӏисал анцӏила цо мурид, Галилеялде ун, гьес бихьизабун букӏараб магӏарде рахана. 17Гӏиса вихьидал, гьел суждаялда чӏана, цо-цоязул рекӏелъ щаклъиги бижана. 18Аскӏове вачӏун Гӏиса гьезда гаргадизе лъугьана. Гьес абуна:

– Зобалазул ва ракьалъул тӏолабго ихтияр дихъе щвана. 19Гьединлъидал киналго халкъазухъе ун, дир рагӏи тӏибитӏизабе, ва Инсулги, Васасулги, Илагьияб Рухӏалъулги цӏаралдалъун, лъадалъ ччун рахъун, гьезул мунагьал чуризаре. 20Дица нужее гьабунщинаб амру тӏубазабизе малъе гьездаги. Дуниял ахирлъизегӏан щибаб къоялъ дун нужеда цадахъ вугевлъиги лъай.

Амин!

Currently Selected:

Матфейица бицараб Рохалил хабар 28: AvrNT

Highlight

Copy