San Mateo 24
24
Jesús inʉmp ni'c ca'wáj ayé templu
1Ipichijn Jesús templuni'c mit inʉjcs̈, iguicutomigau ipʉctampajyat pa igui-actu-e'pcáj ayé templu mit tʉjcat itpay jem. 2Po Jesús inʉmgʉs̈au: ¿Inyijatcap nu'pʉjʉn ayé? Iyacs̈ta'cway tʉnʉmgʉs̈ap ni'c yʉnʉnmanajcáj ayé tʉjcat, mit catanáj netu'c tsa' ʉ'picway.
Nat icʉs̈pʉ'nwa'n nu'pʉjʉn
3Nitsʉ̱nda̱jcʉu Jesús en ayé copac los Olivos, mit iguicutomigau ipʉctampajyat anu'mu, mit iguinʉmgajau: Nʉmgajac ¿jutim ijatwa'n ayʉ̱́j cosajat, mit ti tʉn-e'pcáj pa tʉs̈jawigawa'n ni'c mimimp, mit jutim icʉs̈wa'nnu'pʉjʉn?
4Jesús ipo'ngʉs̈: Nicuidá̱tcʉjʉ pi is̈cawe̱jta̱jcac nepʉn. 5Ni'c mingáj mayo'c we̱tpajyat, mit i-ataynʉmgáj ni'c je'jat Cristu, mit iwe̱jta̱jcáj mayo'c. 6Mit inmaraugáj ni'c itp tsuguin mit is̈nʉmgajáj ni'c itámnaj más tsuguin, po campʉ̱tcawit ni'c itp ti ijatwa'n wenamé, po canije' tiempu pa icʉs̈pʉ'nwa'n nu'pʉjʉn. 7Ni'c jayajwat en tu'c na̱s̈ imutsuguinwatcáj jayajwat jatu'c na̱s̈atway, mit tsuguinwatcáj rejyat, mit mayo'c jayajwat tu'ngʉjʉ̱́j, itáj yu', mit nas̈áj us̈ jʉmgapa'tu. 8Mit ijatwa'n wename, ayé ni'c chu̱chipnaj iguitunas̈ca jayajwat.
9’Wejpu'n is̈actunas̈cáj, is̈ago'jcáj mit is̈-angáj nu'pʉjʉn jayajwat ni'c ʉ̱ is̈wangap. 10Mit jayajwat icuyaguigáj lo que icupʉjcaway, nitraiciona̱tcʉjʉ̱́j mit ni-angʉjʉ̱́j. 11Mit mingáj mayo'c we̱tpajyat, inʉmgáj ni'c Dios igui-ajyu'tcau, mit iwe̱jta̱jcáj may jayajwat. 12Mit may jayajwat caniwangʉjʉ̱́j ni'c mayo'c mal i-itwa'n. 13Po jeme imajmo'ámpay hasta icʉs̈pʉ'nwa'n nu'pʉjʉn jeme jatámpay, ayé nisalva̱jtʉ̱́j. 14Mit inʉmdacyo'ygáj jʉmgapa'tu ayʉ̱́j oyway noticia ni'c Dios manda̱táj, pa we'n ijawigáj nu'pʉjʉn jayajwat en ayʉ̱́j mundu mit wejpu'n cʉs̈pʉ'náj nu'pʉjʉn.
15’Mit in-e'pcáj ayé jeme i-actogoyda̱jcapay sin winchu̱jc cosa oyway, mit ayé tsʉ̱náj en ayé templu i-oyninʉmway Dios. We'n iguinʉjm ayé profeta Daniel. Jeme icotspay ayʉ̱́j noc ma entendia̱t. 16Wejpu'n jeme tsʉ̱ngapay Judeajway na̱s̈ ma po'jca pa copac-awa'tsam. 17Jeme tsʉ̱napay tʉcyucuinm ma po'c jaran, magatʉgʉywit itujugum pa igui-acpichinwa'n tanti. 18Mit jeme tsʉ̱napay camni'c magapitucwit pa iguipʉcwa'n ijamuc. 19¡Pro̱wij de aye to's̈ajyat jeme wáyajatway mit jeme way-acye'jcapay en ayé s̈ʉjwat! 20Orá̱tcaja Dios maga-it payic cuandu impo'jcawa'n, ne magajat po'cs̈ans̈ʉuni'c. 21Ni'c wejpu'n itáj tu'c mʉjway pʉ̱tna̱s̈, ni'c cani-itp tu'c pʉ̱tna̱s̈ ni-as̈amu desde ichu̱chij ayʉ̱́j mundu hasta jinap, ne caja-itáj ni-as̈amu. 22Mit majégate ayé s̈ʉjwat pa iguitunas̈cawa'n, nepʉnate ca-oyáj inisalva̱jtʉ, po ni'c Dios iwangʉs̈p jeme icupiugʉs̈way, iga-acjegáj ayé s̈ʉjwat.
23’Wejpu'n te tambʉn is̈nʉmgajap: “¡E'pca, yam itsʉ̱na Cristu!” o “¡Jem itsʉ̱na!” camcupʉjca ayé. 24Ni'c mingáj we̱tpajyat inʉmgámpay ni'c je'jat Cristu, mit mingáj we̱tpajyat, inʉmgáj ni'c Dios igui-ajyu'tcau, mit iwatcáj majatway milagrujat mit is̈acnigu-epigʉjʉ̱́j. Mit te oyap, iwe̱jta̱jcájate hasta jeme Dios icupiugʉs̈way. 25Jinap que tʉnʉmgʉs̈away nu'pʉjʉn antes ijatwa'n. 26Jemni'c te is̈nʉmgajap: “¡Nʉs̈i e'pca! Cristu tsʉ̱nap mam iga-it tʉjcat.” Camnʉs̈cawit jem. Mit te inʉmgap: “¡E'pca! Yam itsʉ̱na cuyu'tsic Cristu.” Camcupʉjca jeme is̈nʉmgajapay we'n. 27Ni'c as̈am ániway iquijan desde mam ipichin s̈ʉjw hasta mam itʉgʉynu, wename-ey ijatwa'n cuandu tʉmi'nwa'n ʉ̱ jeme tʉjatway jayau, ni'c nu'pʉjʉn jayajwat i-e'pcáj tʉmi'nwa'n. 28Ni'c mam itsʉ̱nawa'n tu'c á̱nima, jeméy ica'ugawa'n nu'pna'jat. Mit we'ney mam itsʉ̱nga maljayajwat, jem ayé icastiga̱twa'n Dios.
Nat imi'nwa'n Cristu
29’Icʉs̈wa'n ayé pʉ̱tna̱s̈ en ayé s̈ʉjwat, s̈ʉwáy cuchitimiyáj, mit po'wáy cajata'cs̈áj, mit ma̱tswájat ca'ugáj tsajpni'c, mit nu'pʉjʉn cosa ijtʉpay poder tsajpni'c s̈is̈cada'gáj. 30Mit wejpu'n que's̈áj ayé milagru tsajpni'cway, mit ayé tʉnwatáj ʉ̱ jeme tʉjatway jayau, mit jʉygáj nu'pʉjʉn jayajwat na̱s̈ni'cway mit tʉs̈-e'pcáj ʉ̱ jeme tʉjatway jayau cuandu tʉmi'nwa'n tsajpni'c mit poder, mit oymanago'c tʉmi'nwa'n. 31Mit tʉnajyu'tcʉs̈áj tʉn-ángejlat mit ya's̈áj mʉgʉc tu'c trompeta mit je'jat i-apʉcmujcáj nu'pʉjʉn tʉncupiugʉs̈way jʉmgapa'tu mam itsʉ̱́nga en ayʉ̱j mundu.
32’Tʉntumuquips̈áj tu'c higueracujy pa pi jáwiga. I-ayawiwa'n i-awec mit ipichinwa'n iyau-ajy, injawigap ni'c tominup s̈ʉutim. 33Wename-ey cuandu is̈-e'pcawa'n ni'c jatnup lo que tʉnyʉmway, injawigáj ni'c tomo'ganu pa icʉs̈pʉ'nwa'n nu'pʉjʉn. 34Iyacs̈ta'cway tʉnʉmgʉs̈ap ni'c cani-o'jcáj jinapay jayajwat hasta ijatwa'n nu'pʉjʉn lo que tʉnyʉmway. 35Cʉs̈áj tsajp mit na̱s̈, po tanáj pa siempre lo que tʉnyʉmpay.
36’Nepʉn igajawip ti s̈ʉjw ne ti hora icʉs̈pʉ'nwa'n nu'pʉjʉn, ne igajawigap ángejlat tsajpni'cway, solo tʉnte̱t Dios ijawip.
37’Mit as̈am ayé tiempu itsʉ̱naj Noé, wename-ey ijatwa'n cuandu tʉmi'nwa'n ʉ̱ jeme tʉjatway jayau. 38Ni'c as̈am ayé s̈ʉjwat antes ipatscunas̈ mundu mit nʉ', jayajwat caygau, u̱jcau, mit nicʉ'pa̱tcʉjʉu, mit i-acnicʉ'pa̱tcʉjʉu iquis̈ajyat hasta ayé s̈ʉjw itʉgʉjy Noé barcuni'c. 39Mit igawatcawu cuenta hasta ipatscunas̈ mundu mit nʉ', mit ayé nʉ' imunʉs̈cʉs̈ nu'pʉjʉn jayajwat. Wename-ey ijatwa'n cuandu tʉmi'nwa'n ʉ̱ jeme tʉjatway jayau, ni'c tʉmi'náj de repente. 40Wejpu'n mechc jayajwat tsʉ̱ngáj camni'c. Tu'c imunʉs̈cáj mit tu'c iyajcáj. 41Mechc to's̈ajyat jʉtscáj pa̱wani'c. Tu'c imunʉs̈cáj mit tu'c iyajcáj.
42’Tsʉ̱́nga prepara̱tic ni'c ingajawigap ti hora imi'nwa'n el Señor. 43Pi jawiga ayʉ̱́j. Ni'c tu'c jayau tʉ́jcajway ma jawiate ti hora imi'nwa'n nu'mpayna', je' cuida̱tájate mit igamo'ájate laj ma iguitʉctʉgʉyac. 44Jemni'c mijchatey pi tsʉ̱nga prepara̱tic ni'c ʉ̱ jeme tʉjatway jayau tʉmi'náj cuandu is̈cajawigawa'n.
Tu'c mozo cumplia̱tpay mit tu'c mozo ma̱lway
45’Tʉ-actujawigʉs̈áj tu'c mozo cumplia̱tpay mit jeme i-is̈capay. Ijayc itumuyajcʉs̈ ifamiliajat ayé mozo, mit je' imoygʉs̈ icayan en ayé hora itucaygámpay. 46Oyninʉmic ayé mozo te we'n iguiwat cuandu imi'nwa'n ijayc. 47Iyacs̈ta'cway tʉnʉmgʉs̈ap ni'c ayé tʉ́jcajway itumuyagáj ayé mozo nu'pʉjʉn ijtʉpay. 48Po te ayé mozo pichimp mal, inʉmáj ijo̱tni'c: Tʉnjayc jego'gámnaj pa imi'nwa'n. 49Je' chu̱chip iguimoyta̱jcʉs̈ imumozoje̱wajyat, mit imucaygʉs̈p mit imu-u̱jcʉs̈p mu'gajayajwat. 50Te iwatp wename ayé mozo, mi'náj ijayc en tu'c s̈ʉjw igatsʉ̱nawa'n prepara̱tic, mit en tu'c hora iguigajawiwa'n. 51Mit icastiga̱táj mʉgʉc, mit i-actutso'gáj ayé mozo as̈am tu'c we̱tpay, ni'c we̱tpajyat jʉygáj mit itunas̈cáj mʉgʉc.
Currently Selected:
San Mateo 24: PSNT
Highlight
Share
Copy
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
