San Mateo 25
25
Diez quis̈ajyat icuentu
1’Mit tʉntumuquips̈áj nat imanda̱twa'n Dios. Ayé as̈am diez quis̈ajyat jeme imunʉs̈caway igascándi̱jlat pa iguipa̱jtsougawa'n noviona' jeme nicʉ'pa̱jtʉ́mpay. 2Mit cinco ayé quis̈ajyat pensa̱tcau oy, mit jacinco quis̈ajyat capensa̱tcawu oy. 3Ni'c ayé quis̈ajyat jeme capensa̱tcaway oy imunʉs̈cau igascándi̱jlat, po igamunʉs̈cawu may gas. 4Po ayé quis̈ajyat jeme pensa̱tcaway oy imunʉs̈cau igascándi̱jlat, mit imunʉs̈cawey gas ilime̱tani'jcat. 5Mit jego'c pa icojawa'n ayé novio, mit ayé quis̈ajyat ma̱gutotscau mit cʉs̈ ma̱gau. 6Mit pu̱jtsu'm imaraugau ni'c ya̱s̈cap, inʉmgau: “¡Yam imi'n noviona'! ¡Nʉs̈ pa̱jtsóuga!” 7Mit cʉs̈ ca's̈ʉ'jcau nu'pʉjʉn ayé quis̈ajyat, mit i-oyajcau igascándi̱jlat. 8Mit ayé quis̈ajyat jeme capensa̱tcaway oy inʉmgajau ayé quis̈ajyat jeme pensa̱tcaway oy: “Moygac s̈ʉ̱n gas ni'c pi'chcanup tʉngascándi̱jlat.” 9Po ayé quis̈ajyat jeme pensa̱tcaway oy iguipo'ngau: “Tʉnje'jat igapa'támpey pa ʉjtsat. Mejor nʉ́s̈ca mam iguito'jca mit júyga gas pa mijchat.” 10Mit ijanʉ́s̈caj iguijúyga, coy noviona', mit ayé cinco quis̈ajyat prepará̱tijcatway tʉgʉygau mit je' mam iguiwatca cʉ'pa't. Mit i-atucta̱jcau ayé tʉc-ájw. 11Cʉs̈ mingawatu jacinco quis̈ajyat, mit inʉmgau: “¡Señor, Señor, awa̱tscajac tʉc-ájw!” 12Po je' ipo'ngʉs̈: “Iyacs̈ta'cway tʉnʉmgʉs̈ap, tʉga-is̈capcʉs̈p.”
13Mit Jesús inʉm:
—Jemni'c tsʉ̱́nga prepara̱tic ni'c ingajawigap ti s̈ʉjw ne ti hora tʉmi'nwa'n ʉ̱ jeme tʉjatway jayau.
Tumi̱jnat icuentu
14’Mit tʉnʉmgʉs̈áj nat imanda̱twa'n Dios. Ayé as̈am tu'c jayau jeme nʉcs̈way yagats, mit iya̱s̈cʉs̈ imozojat, mit imoygʉs̈ itumi̱n pa ma tuyos̈watca.
15’Tu'c imozo imoy cinco mil pesu, mit jatu'c imoy dos mil pesu, mit jatu'c imoy mil pesu. Imoygʉs̈ cada mozo pʉjʉn i-oyawa'n iguituyos̈watca, mit cʉs̈ nʉcs̈ yagats. 16Mit ayé mozo jeme ipʉctso̱way cinco mil pesu nʉcs̈ mit ituyos̈wat ayé tumi̱n, mit itu-actsʉ̱nau jacinco mil pesu. 17We'ney ayé mozo jeme ipʉctso̱way dos mil pesu itu-actsʉ̱nau jados mil pesu. 18Po ayé mozo jeme ipʉctso̱way mil pesu, nʉcs̈ mit itáj tu'c cʉt na̱s̈ni'c mit icuyu'jtsau ijayc itumi̱n.
19’I-íjtʉj may tiempu, min ijaycat ayé mozojat, mit i-acpichingʉs̈au icuentajat. 20Mit icojy ayé mozo ipʉctso̱way cinco mil pesu, imumin jacinco mil pesu, mit inʉm: “Señor, ʉ̱ is̈tumuyac cinco mil pesu. Yam is̈aguep, mit tʉntu-actsʉ̱nau jacinco mil pesu.” 21Mit iguinajau ijayc: “Oyo'gu is̈wajt. Mi̱ mi tu'c mozo oyway mit micumplia̱tp. Intuwat oy s̈ʉ̱nu tʉtumuyacway, jinap tʉtumuyagáj más may. Jinap ji'gámpey injo̱jt mit ʉ̱.” 22Icojyey ayé mozo jeme ipʉctso̱way dos mil pesu, inʉm: “Señor, ʉ̱ is̈tumuyac dos mil pesu. Yam is̈aguep, mit tʉntu-actsʉ̱nau jados mil pesu.” 23Iguinajau ijayc: “Oyo'gu is̈wajt. Mi̱ mi tu'c mozo oyway mit micumplia̱tp. Intuwat oy s̈ʉ̱nu tʉtumuyacway. Jinap tʉtumuyagáj más may. Jinap ji'gámpey injo̱jt mit ʉ̱.” 24Po icojy ayé mozo jeme ipʉctso̱way mil pesu, inʉm: “Señor, tʉ-is̈cap mi̱ as̈am tu'c jayau manda̱tpay mʉgʉc. Migayos̈watp incamni'c po incosecha̱tp, mit impʉctso̱p ayé cosecha po ingani̱pu mi̱. 25Jemni'c tʉpʉ̱jt, mit oy tʉs̈cuyu'ts inmil pesu na̱s̈cʉtʉm. Yam is̈aguep lo que inje'way.” 26Iguipo'n ijayc: “¡Mi̱ mi tu'c mozo ma̱lway mit micandʉ'n! Injawip ni'c tʉncosecha̱tp lo que tʉngani̱pay. 27Jemni'c oyate is̈cayajc tʉntumi̱n bancuni'c, mit tʉmi'nwa'n tʉmpʉctso̱pate lo que tʉnje'way, mit tʉnactsʉ̱nájate más.” 28Mit inʉmgʉs̈au jeme tsʉ̱ngaway jem: “Chi'tcaja ayé mil pesu mit moyga ayé mozo jeme ijtʉpay diez mil pesu. 29Ni'c jeme ijtʉpay, imoygáj japu̱t mit ijtʉ̱́j más. Mit jeme ca-ijtʉpay may, ichi'tcajáj nu'pʉjʉn ijtʉpay.” 30Inʉm Jesús:
—Ayé mozo jeme caservia̱tpay ica'tspichingáj chitimicni'c pe'ta̱m. Jem jayajwat ijʉygawa'n mit iguitunas̈cawa'n mʉgʉc.
Ijuzga̱táj nu'pʉjʉn jayajwat na̱s̈ni'cway
31’Ʉ̱ jeme tʉjatway jayau tʉmi'náj oymanac mit nu'pʉjʉn tʉn-ángejlat, mit wejpu'n tʉnitsʉ̱nda̱jcʉ̱́j tʉntrononi'c oymanacway. 32Mit tʉnapʉcmujcʉs̈áj nu'pʉjʉn jayajwat na̱s̈ni'cway mam ʉ̱ tʉtsʉ̱nawa'n, mit tʉnaparta̱tcʉs̈áj ayé jayajwat as̈am tu'c borregucuida̱tpayna', ni'c je' i-aparta̱tp borregujat tu'c laj mit chibujat jatu'c laj. 33Ni'c borregujat as̈am oyjayajwat mit tʉnyajcʉs̈áj tʉn-oyimaylajni'c, mit chibujat as̈am maljayajwat mit tʉnyajcʉs̈áj tʉn-anajyimaylajni'c. 34Wejpu'n ʉ̱ tʉtsʉ̱náj as̈am rey mit tʉnyʉmgʉs̈áj a é oyjayajwat jeme tsʉ̱ngapay tʉn-oyimaylajni'c: “Yam minga ni'c is̈-oyninʉmgap tʉnte̱t Dios, mit je' is̈pʉctsougáj mam imanda̱twa'n, ni'c ayé lugar oyaguic pa mijchat desde ichu̱chij ayʉ̱́j mundu, mit je' is̈-e'pcáj as̈am is̈wajyat. 35Ni'c tʉcayo'jcʉu mit is̈moygau cayan. Tʉnʉ-u̱go'jcʉu mit is̈moygau nʉ'. Tʉyo'y jaynʉ'jcopacni'c mit is̈pʉctsougau oymanac. 36Tʉnga-aguepu jamuc mit is̈moygau jamuc. Tʉtu'jnʉu mit is̈tʉcyo'ygau. Tʉtsʉ̱nau cuytujugum mit oy is̈-e'pcap mam tʉtsʉ̱́naj.” 37Mit cʉs̈wa'n jeme iwatcaway oy tʉs̈po'ngáj: “Señor, ¿mu̱tij tʉ-ís̈caj ni'c micayo'jcʉu mit tʉmoygau cayan? mit ¿mu̱tij inyʉ-u̱go'jcʉj mit tʉmoygau nʉ'? 38Mit ¿mu̱tij tʉ-ís̈caj ni'c miyo'y jaynʉ'jcopacni'c mit tʉpʉctsougau oymanac? mit ¿mu̱tij is̈ca-aguejp jamuc mit tʉmoygau jamuc? 39Mit ¿mu̱tij tʉ-ís̈caj mitu'nij mit mitsʉ̱nap cuytujugum, mit oy tʉ-e'pca mam intsʉ̱naj?” 40Mit ʉ̱ tʉmpo'ngʉs̈áj: “Iyacs̈ta'cway tʉnʉmgʉs̈ap ni'c as̈am is̈wátcajaj oy tu'c ayʉ̱́j tʉnhermanujat más titicway, casi ʉ̱j ayé is̈watcajaway oy.”
41’Mit cʉs̈wa'n tʉnyʉmgʉs̈ámpey ayé maljayajwat jeme tsʉ̱ngapay tʉn-anajyimaylajni'c: “Niju'pcʉjʉ mam ʉ̱ ni'c mimaldicioná̱tijcat. Tʉ́gʉyga en ayé jʉjn capi'chpay nunca, mit ayé oyaguic pa Awayagatsna' mit we'ney pa i-ángejlat ma̱jlatway. 42Ni'c tʉcayo'jcʉu mit is̈camoygawu cayan. Tʉnʉ-u̱go'jcʉu mit is̈camoygawu nʉ'. 43Tʉyo'y jaynʉ'jcopacni'c mit is̈capʉctsougawu. Tʉnga-aguepu jamuc mit is̈camoygawu jamuc. Tʉtu'jnʉu mit tʉtsʉ̱nau cuytujugum mit ca-oyu is̈-e'pcap.” 44Mit cʉs̈wa'n tʉs̈po'ngámpey: “Señor, ¿mu̱tij tʉ-ís̈caj ni'c micayo'jcʉu, minʉ-u̱go'jcʉu, miyo'y jaynʉ'jcopacni'c, inga-aguepu jamuc, mitu'jnʉu, mitsʉ̱nau cuytujugum, mit tʉgamajyigawu?” 45Mit cʉs̈wa'n tʉmpo'ngʉs̈áj: Iyacs̈ta'cway tʉnʉmgʉs̈ap ni'c as̈am is̈cawátcajaj oy tu'c ayʉ̱́j tʉnhermanujat más titicway, casi ʉ̱j ayé is̈cawatcajaway oy. 46Mit ayʉ̱́jat iwatcaway mal nʉs̈cáj pa iguitunas̈cawa'n pa siempre. Mit jeme iwatcaway oy nʉs̈cáj mam i-it vida jeme cacʉs̈ámpay.
Currently Selected:
San Mateo 25: PSNT
Highlight
Share
Copy
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
