San Marcos 10
10
Te oy nas̈cuyaguiwa'n nato's̈ay
1Ipichijn jem Jesús, nʉcs̈ pa Judeajway na̱s̈ tuganʉ-ájw Jordán. Mit nigutomigʉjʉwatu mam je' tu'c jayaujuc, mit i-ajque's̈cʉs̈awatu as̈am iguiwatí̱c. 2Icóygaj mam je' una̱c fariseujat, i-ucyo'tcau pa iguiproba̱tcawa'n, inʉmgau: ¿Oy tu'c jayau iguicuyaguiwa'n ito's̈ay? 3Jesús ipo'ngʉs̈:
—¿Nat is̈manda̱tcau Moisés pi watca?
4Je'jat iguinʉmgajau:
—Moisés inʉm ni'c tu'c jayau oyap iguiwat yos̈tʉcm tu'c noc pa iguicuyaguiwa'n ito's̈ay.
5Jesús inʉmgʉs̈au:
—Is̈manda̱tcau we'n Moisés ni'c micopacmʉgʉgo'jcat. 6Po cuandu Dios iguiwajt ayʉ̱́j mundu, je' iwat qui'chay mit to's̈ay. 7Jemni'c tu'c jayau iyagáj ite̱t mit ima̱m pa iguipʉcwa'n ito's̈ay. 8Mit we'n ayé mechcatway tu'gujyu ijatcawa'n. Jemni'c cajaje' mechcat, po jatcau tu'gujyu. 9Jemni'c jeme Dios i-acnipʉjcʉs̈ʉway, maga-acniguyáguijyʉ nepʉn.
10Icóygaj itʉcmat, igui-ucyo'tcawatu ipʉctampajyat ti inʉmo'jcʉp ayé inʉmway. 11Jesús inʉmgʉs̈au:
—Pʉmba'tu jeme icuyaguiyámpay ito's̈ay mit te ipʉcp jatu'c, ichajyo'jyap ito's̈ay. 12Mit te tu'c to's̈ay icuyaguip ina'u mit te ipʉcp jatu'c jayau, ichajyo'jyap ina'u.
Jesús ibendiciona̱tcʉs̈p ya̱waywájat
13Mit imumingajau Jesús ya̱waywájat pa ma yajcʉs̈a icʉ'jat iyucuinmat, po ipʉctampajyat iche'cta̱jcau jeme imumingaway. 14Igui-is̈ we'n Jesús, awa'niu mit inʉmgʉs̈au:
—Moyga laj ma minga ya̱waywájat mam ʉ̱. Camatujcawit ni'c jayajwat jeme jatcámpay as̈am ayʉ̱́j ya̱waywájat tʉgʉygáj mam imanda̱t Dios. 15Iyacs̈ta'cway tʉnʉmgʉs̈ap ni'c jeme igacupʉcpay as̈am tu'c ya̱wáy ni'c Dios manda̱táj, catʉgʉyáj mam Dios imanda̱t.
16Iguiyucme'tcʉs̈, iyajcʉs̈au icʉ'jat iyucuinmat mit ibendiciona̱tcʉs̈.
Tu'c ya̱wayna' ricuway
17Ipichijn jem Jesús pa iguipʉcwa'n to̱u, pujʉ'c imijn tu'c ya̱wayna' mit nicos̈atenda̱jcʉu iwiná̱m Jesús, mit i-ucyo't:
—Amayipay oyway, ¿ti tʉnwatáj pa tʉs̈aguepwa'n vida jeme cacʉs̈ámpay?
18Ipo'n Jesús:
—¿Tini'c ʉ̱ is̈najap Amayipay oyway? Solo itp tu'c jeme oyway, mit ayé Dios. 19Injawip lo que Dios imanda̱tpay: “Camago'cwit, camchajyo'ywit, camnu'mwit, camwe̱twajta nepʉn, campʉcwit jayje', oyninʉm inte̱t mit inma̱m.”
20Ayé ya̱wayna' inʉjmau Jesús:
—Amayipay, nu'pʉjʉn ayé tʉnguarda̱tway desde tʉyauya̱waymijn.
21Jesús igui-is̈ je', i-ayo̱wis̈o'c, mit inʉjmau:
—Tu'c cosajyu is̈togoyp: nʉs̈, to'cpʉ'n nu'pʉjʉn inaguepay, mit moygʉs̈ pro̱wiwájat mit mitsʉ̱náj oy tsajpni'c ni'c ayé as̈am tu'c riqueza más oyway, mit mi'n mit ʉ̱, pi tsʉ̱na dispuestu is̈tunas̈wa'n mit we'n oyap is̈natspoguip.
22Iguimarajw we'n ayé ya̱wayna', cajaji'gu ijo̱jt. Tu'no'c ijo̱jt mit nʉcs̈nuw jaran, ni'c je' ricujo'c.
23Mit Jesús igui-is̈cʉs̈ nu'pʉjʉn, inʉmgʉs̈au ipʉctampajyat:
—Majo'c itʉgʉygawa'n mam imanda̱t Dios jeme itcʉjʉpay may tumi̱n.
24Mit nigu-épigʉjʉu ipʉctampajyat ni'c we'n iguinʉjm, po Jesús inʉmgʉs̈awatu:
—Jayajwat, majo'c pa itʉgʉygawa'n mam imanda̱t Dios jeme confia̱tcapay mit itumi̱jnat. 25Más fácil tu'c camellu inas̈wa'n agu̱s̈acʉtwayni'c que tu'c ri̱cu itʉgʉywa'n en ayé lugar mam imanda̱t Dios.
26Mit nigu-épigʉjʉu más, mit i-ucyo'tcau:
—¿Pʉmpaj oyáj inisalvá̱jtʉ.
27Igui-is̈cʉs̈ Jesús, inʉm:
—Jayajwat ca-oyap inisalvá̱tcʉjʉ je'jatu, po caje' we'n mit Dios, ni'c Dios oyap iguiwat nu'pʉjʉn.
28Mit Pedro chu̱chiu iguinʉ́jma:
—Marau, ʉjtsat tʉncuyaguigaway nu'pʉjʉn mit tʉnatspoguigap mi̱.
29Ipo'n Jesús:
—Iyacs̈ta'cway tʉnʉmgʉs̈ap ni'c pʉmba'tu iyagámpay itʉjc, i-ajchat, itsʉ'jat, ima̱m, ite̱t, iwajyat mit ina̱s̈at ni'c más tʉs̈wamp mit iwampey tʉn-oyway noticia, 30je' ipʉctsowáj premiu cien veces más en ayʉ̱́j jinapay tiempu, mit ijtʉ̱́j itʉjcat, i-ajchat, itsʉ'jat, ima̱jmat, iwajyat mit ina̱s̈at, po jayajwat iguipo'ctangáj. Po en ayé tiempu mi'námpay ayé jayau ipʉctsowáj vida jeme cacʉs̈ámpay. 31Mit mayo'c jeme iwangaway itangawa'n jʉpm, tangáj mugus̈á̱m. Mit jeme tsʉ̱ngapay mugus̈á̱m, tangáj jʉpm.
Jesús inʉmpatu ni'c o'gáj
32Inʉ́s̈caj to̱uni'c pa Jerusalén, Jesús nʉcs̈ jʉpm mit ipʉctampajyat iguinatspoguigau, mit nigu-épigʉjʉu mit pʉ̱tcau. Iguimunʉs̈cʉ́s̈atu aparte ipʉctampajyat, chu̱chiu iguinʉmgʉ́s̈a lo que iguijatámpay. 33Inʉm:
—Márauga, nanʉs̈cap pa Jerusalén, mit ʉ̱ jeme tʉjatway jayau tʉs̈yajcáj icʉ'jugujmat judíujat imʉjpa̱nijat mit jeme i-ajque's̈capay ley, mit tʉs̈ac-ago'jcʉjʉ̱́j, mit tʉs̈yajcáj icʉ'jugujmat pe'ta̱may jayajwat, 34mit tʉs̈tus̈i̱jcáj, tʉs̈raunipʉ'ngáj, tʉs̈cutsujcu'tcáj mit tʉs̈ago'jcáj. Po imutu̱gupay s̈ʉjw, tʉjutucta'gáj.
Jacobo mit Juan iyo'tcap favor
35Mit nigutomigʉjʉu mam Jesús Jacobo mit Juan, Zebedeo iwajyat, inʉmgajau:
—Amayipay, tʉnwangap pi is̈watcajac lo que tʉyo'tcajámpay.
36Jesús inʉmgʉs̈au:
—¿Ti inwangap tʉwatcʉs̈awa'n?
37Je'jat iguipo'ngau:
—Cuandu intsʉ̱nawa'n oymanac mit Dios, moygac laj tʉmechcat pa tʉtsʉ̱ngawa'n tu'c in-oyimaycʉ'ni'c, mit jatu'cway in-anajyimaycʉ'ni'c.
38Po Jesús inʉmgʉs̈au:
—Ingajawigap ti inyo'tcapay. ¿Oyáj is̈tu-ú̱jca ayé vasu jeme ʉ̱ tʉntu-u'gámpay? Ayé inʉmo'jcʉp ni'c tʉ-o'gáj. ¿Oyáj intsʉ̱nga nʉ'gutemic as̈am ʉ̱ tʉtsʉ̱nawa'n nʉ'gutemic? Ayé inʉmo'jcʉp ni'c tʉntunas̈áj.
39Je'jat iguipo'ngau:
—Oyap.
Jesús inʉmgʉs̈au:
—Iyacs̈ta'cway intu-u̱jcáj ayé vasu jeme tʉntu-u'gámpay ni'c mi-o'jcáj, mit mitsʉ̱ngáj nʉ'gutemic as̈am ʉ̱ tʉtsʉ̱nawa'n nʉ'gutemic ni'c intunas̈cáj. 40Po ca-oyáj tʉmoygʉs̈ laj intsʉ̱ngawa'n tʉn-oyimaycʉ'ni'c ne tʉn-anajyimaycʉ'ni'c, ni'c oyaguic itsʉ̱na ayé lugar pa jeme Dios icupiugʉs̈way.
41Iguimáraugaj we'n ayé diez pʉctampajyat, imu-awa'nigau jaran Jacobo mit Juan. 42Iguiya̱s̈cʉs̈ Jesús, inʉmgʉs̈au:
—Injawigap ni'c jeme imanda̱tcapay pe'ta̱majyat, manda̱tcap mʉgʉc, mit we'ney mʉjayajwat manda̱tcapey mʉgʉc. 43Po cajatáj we'n mit mijchat. Po pʉn iwa'námpay ijatwa'n mʉj mam mijchat, je' itp ti is̈servia̱tcajáj. 44Mit pʉn iwa'námpay ijatwa'n primeru mam mijchat itp ti iguiservia̱tcʉs̈awa'n nu'pʉjʉn. 45Mit we'ney ʉ̱ jeme tʉjatway jayau tʉgaminu pa jayajwat tʉs̈servia̱tcajáj, po tʉmín pa tʉs̈servia̱tcʉs̈awa'n mit pa tʉs̈yacwa'n tʉmvida pa tʉs̈tso̱jcʉs̈awa'n nu'pʉjʉn jayajwat ima̱jlat jeme tʉs̈cupʉjcámpay.
Jesús i-ac-e'pta̱cp Bartimeo
46Mit coygau Jericó. Mit Jesús pichin jem mit ipʉctampajyat mit iguinatspoguigau mayo'c jayau. Mit tu'c winch inʉ'jyway Bartimeo, Timeo iway, tsʉ̱nau to̱u-auni'c pa iguiyo'twa'n limosna. 47Iguimarajw je' ni'c mimp Jesús Nazaretway, chu̱chiu ya̱s̈pay, inʉm:
—¡Jesús, mipichin David ifamiliani'c pa is̈salva̱tcáj, ayo̱wis̈ac ʉ̱!
48Mit mayo'c jayajwat iche'cta̱jcau ayé winch pa ma tis̈to'p, po je' ya̱s̈ más mʉgʉc, inʉm:
—¡Jesús, mi̱ David ifamiliani'cway, ayo̱wis̈ac ʉ̱!
49Itentajn Jesús, inʉm:
—Ya̱s̈ca ma mi'n.
Iguiyá̱s̈caj ayé winch, inʉmgajau:
—Ma ji'c injo̱jt ni'c is̈ya̱s̈p je', ca's̈ʉ'gama.
50Iguiyajc ima'n, nitenda̱jcʉu jaran mit nʉcs̈ mam Jesús. 51Mit Jesús i-ucyo't:
—¿Ti inwamp tʉwajtawa'n?
Mit ayé winch iguinajau:
—Amayipay, tʉnwamp tʉ-e'pta'cwa'n.
52Jesús inʉjmau:
—Nʉs̈, mi-oytanway ni'c ʉ̱ is̈cupʉcp.
Cʉs̈ e'pta̱c jaran, mit inatspoguiu Jesús to̱uni'c.
Currently Selected:
San Marcos 10: PSNT
Highlight
Share
Copy
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
