San Marcos 9
9
1Jesús inʉmgʉs̈awey:
—Iyacs̈ta'cway tʉnʉmgʉs̈ap ni'c una̱c jeme tsʉ̱ngapay yam ca-o'jcáj hasta tega-e'pcap imi'nwa'n ayé tiempu imanda̱twa'n Dios mit maj.
Jesús tigatsp iforma
2I-íjtʉj seis s̈ʉjwat, Jesús imunʉs̈cʉs̈ Pedro, Jacobo mit Juan, mit imunʉs̈cʉs̈ itu'gujmatu en tu'c yucmay copac, mit jem jat oymanac Jesús, je'jat iwindugʉtʉjmat. 3Mit cuquijan ijamuc mit po'p ijajt as̈am nieve, hasta nejʉmay putspay ca-oyap igui-acpo'pi más po'p. 4Mit iguique's̈ta̱jcajau Elías mit Moisés, imu-ampiugap Jesús. 5Mit Pedro inʉjmau Jesús:
—Amáyipay, oyo'gu natsʉ̱́nga yam. Tʉnwatcáj tu̱gup tʉcwájat, tu'c pa mi̱, tu'c pa Moisés mit jatu'c pa Elías.
6Pedro inʉm we'n ni'c ni-apʉ̱tigʉjʉu, mit je' igajawiwu ti inʉmámpay. 7Mit min tu'c wintuc jeme iguicutujcaway je'jat, mit imaraugau ni'c cotsp Dios wintucni'c, inʉmgʉs̈au:
—Ayʉ̱́j ayé tʉnwáy jeme tʉnwampay, mijchat márauga je'.
8Mit iyuc-e'pca, igaja-is̈cawu nepʉn mit je'jat, ja-itu'gumu Jesús.
9Imanactá̱jcaj en ayé copac, Jesús inʉmgʉs̈au: Camnʉmgaja nepʉn lo que in-is̈caway hasta ʉ̱ jeme tʉjatway jayau tʉjutucta'cwa'n mam itsʉ̱nga á̱nimajat. 10Mit ijayaumaygau lo que iguinʉmgajaway po ni-ucyo'tcʉjʉu je'jatu tini'c iguinʉm ni'c jutucta'gáj mam itsʉ̱nga á̱nimajat. 11Mit i-ucyo'tcau Jesús:
—¿Tini'c iguinʉmga jeme i-ajque's̈capay ley ni'c itp ti imijnʉ'cwa'n ayé profeta Elías?
12Mit Jesús ipo'ngʉs̈:
—Iyacs̈ta'cway Elías mijnʉ'cp pa igui-oyajcʉs̈wa'n nu'pʉjʉn cosajat. Po we'ney itsʉ̱na ja'yic Dios ilibruni'c ni'c ʉ̱ jeme tʉjatway jayau tʉntunas̈áj mit tʉs̈-ano'jcáj jayajwat. 13Mit tʉnʉmgʉs̈ap ni'c minway Elías mit je'jat iguiwatcajau tigapa'tu as̈am itsʉ̱na ja'yic Dios ilibruni'c lo que iguijatámpay je'.
Tu'c qui'chna' ijtʉpay demo̱nyu
14Icojy Jesús mam itsʉ̱́ngaj japu̱t ipʉctampajyat, i-is̈ ni'c mayo'c jayau tsʉ̱nau apitucje̱guic mam je'jat, mit una̱c jeme i-ajque's̈capay ley imuninʉmgʉjʉu je'jat. 15Mit igui-ís̈caj Jesús, nu'pʉjʉn ayé jayajwat nigu-épigʉjʉu jaran, mit ipujʉ'jcaj mam je', isaluda̱tcau. 16Mit Jesús i-ucyo'tcʉs̈:
—¿Tini'c inyinʉ́mgʉjʉ?
17Mit iguipo'n tu'c jayau tsʉ̱naway jayau-awa'tsam, inʉm:
—Amayipay, tʉmumijnau tʉnwáy ni'c igui-ajcu-u̱mip tu'c demo̱nyu, 18mit jʉmgapa'tu mam igui-actamp, igui-ajca'p mʉgʉc, mit qui'chna' iyacp au-o'pac mit i-ajcʉrrʉchp itʉ̱jtsat, mit cumʉgʉguip. Mit tʉnyo'tcʉs̈au impʉctampajyat ma acpíchingaja ayé demo̱nyu, po ca-oyawu.
19Ipo'ngʉs̈ Jesús:
—¡Ayʉ̱́j jinapay jayajwat cacupʉjcap nes̈ʉ̱n! ¿Hasta jutim tʉtsʉ̱nawa'n mit mijchat? ¿Hasta jutim tʉmajmoygʉs̈wa'n mijchat? Mumíngajac ayé qui'chna'.
20Mit cʉs̈ imumingajau qui'chna'. Po demo̱nyuna' igui-is̈ Jesús, ayé qui'chna' igui-actupʉc s̈e'm mit igui-ajca'u na̱s̈ni'c, mit quitawí̱c mit iyac au-o'pac. 21Mit Jesús i-ucyo'jtau qui'chna' ite̱t:
—¿Pʉjʉn tiempujanu i-íjtʉj desde iguijat ayʉ̱́j?
Iguipo'n ayé jayau:
—Desde titicwáynaj, 22mit mayo'c viaje iguica'tstʉgʉyp jʉngʉtʉm mit nʉ'jugum pa igui-ago'gáj. Po te oyap mi̱ is̈wat tanti, ayo̱wis̈cac mit majyigac.
23Jesús inʉjmau:
—Te oyap incupʉc. Ni'c te nacupʉcp, oyap nas̈wat nu'pʉjʉn cosa.
24Mit cʉs̈ qui'chna' ite̱t ya̱s̈ mʉgʉc, inʉm:
—Tʉngupʉcp po majyiyac pa tʉcupʉc más.
25Igui-is̈ Jesús ni'c iguicutomibʉ'ngap ayé jayaujuc, iche'cta̱c demo̱nyuna', inʉjmau:
—Mi̱ inajcu-u̱migʉs̈p jayajwat mit inga-acmaraugʉs̈p. Tʉnʉjmap, pichin mam je' mit camjatʉgʉyatu mam je'.
26Mit cʉs̈ demo̱nyuna' ya̱s̈, mit i-actupʉgatu s̈e'm ayé qui'chna', mit pichin mam je'. Mit iyajcau qui'chna' as̈am o'guic, hasta mayo'c jayajwat inʉmgau ni'c o'guiganu. 27Po Jesús, igui-actájnaj icʉ', i-ajca's̈ʉ'c, mit qui'chna' nitenda̱jcʉu.
28Itʉgʉjy Jesús tujugum, igui-ucyo'tcau ipʉctampajyat itu'gujmatu, inʉmgau:
—¿Tini'c ʉjtsat ca-oyawu tʉs̈acpíchingaja ayé demo̱nyu?
29Jesús ipo'ngʉs̈:
—Itp ti na-ora̱twa'n mit na-ayuna̱twa'n, ni'c solo we'n oyap nas̈acpichin demo̱nyujat as̈am aye'way.
Jesús inʉmgʉs̈apatu ni'c o'gáj
30Ipíchingaj jem, nas̈cau Galileajway na̱s̈, po Jesús igawanu nepʉn ma jawi, 31ni'c i-ajque's̈cʉs̈au ipʉctampajyat, inʉm:
—Ʉ̱ jeme tʉjatway jayau tʉs̈yajcáj jayajwat icʉ'jugujmat, mit tʉs̈ago'jcáj. Po cuandu tʉs̈ago'jcáj, tʉjutucta'gáj imutu̱gupay s̈ʉjw. 32Po je'jat igajawigawu lo que inʉmway Jesús, mit ipʉ̱tcau igui-ucyo'tcawa'n.
Pʉn más manda̱táj
33Mit coygau Capernaum. Itsʉ̱́naj tujugum, Jesús i-ucyo'tcʉs̈:
—¿Ti inyʉmdacmingau to̱uni'c?
34Po je'jat igapo'ngawu neti, ni'c to̱uni'c inʉmdacmingau pʉn más manda̱táj. 35Initsʉ̱ndá̱jcʉj Jesús, iya̱s̈cʉs̈ ayé doce pʉctampajyat, inʉmgʉs̈au:
—Te tu'c jayau iwamp imanda̱twa'n más, itp ti itanwa'n más mugus̈á̱m de nu'pʉjʉjnat, mit itp ti iguimajyigʉs̈wa'n.
36Igui-actajn tu'c qui'chwáy, iyac mam je'jat itsʉ̱nga. Mit iguiyucme'jt ayé qui'chwáy, inʉmgʉs̈au:
37—Pʉmba'tu jeme ipʉctsowámpay tu'c qui'chwáy as̈am ayʉ̱́jway ni'c ʉ̱ tʉs̈wamp, casi ʉ̱ tʉs̈pʉctso̱p. Mit jeme tʉs̈pʉctsowámpay ʉ̱, tʉs̈capʉctsowáj ʉ̱jyu, po ipʉctsowámpey Dios jeme tʉs̈ajyu'tway.
Jeme nas̈ca-atujcapay ʉjtsat
38Juan iguinʉjmau:
—Amayipay, tʉn-is̈cau tu'c jayau ni'c i-acpichimp demo̱nyujat inyʉ'jyni'c, mit tʉngamoygawu laj ni'c je' catsʉ̱nap mit ʉjtsat.
39Po Jesús inʉm:
—Camatujcawit, ni'c te tu'c jayau iwatp milagru tʉnyʉ'jyni'c, ca-oyáj tʉs̈tucotsp. 40Ni'c jeme nas̈ca-atujcapay ʉjtsat, najawigap ni'c ʉjtsat nas̈mutʉgʉygap. 41Iyacs̈ta'cway tʉnʉmgʉs̈ap ni'c pʉmba'tu jeme is̈moygámpay tu'c vasu nʉ' ni'c mijchat inmutʉgʉygau Cristu, Dios iguitso'gáj.
Jeme nas̈actuwatpay mal
42’Pʉmba'tu i-actuwatámpay mal tu'c de ayʉ̱j jayawájat jeme tʉs̈cupʉjcapay, más oy nacutsúmijya tu'c pa̱wan iyo'cni'c mit naca'tstʉgʉy lama̱tjugum. 43Mit te incʉ' is̈actuwatp mal, mejor camjatutsʉc ayé mal as̈am impus̈tucpay incʉ'. Ni'c más oy intʉgʉywa'n cʉ'tuguic mam i-it vida cacʉs̈ámpay que inyʉs̈wa'n mit mechc incʉ' pa jʉngʉtʉm mam nunca igapi'ch. 44Mit jem iguitunas̈cawa'n maljayajwat mam jʉjn nunca igapi'ch. 45Mit te inta'n is̈actuwatp mal, camjayo'y mam i-it ma̱jlat as̈am impus̈tucpay inta'n. Ni'c más oy intʉgʉywa'n cu̱s̈u mam i-it vida cacʉs̈ámpay que is̈aguepwa'n mechc inta'n pa is̈comgáj jʉngʉtʉm. 46Mit jem iguitunas̈cawa'n maljayajwat mam jʉjn nunca igapi'ch. 47Mit te inwijn is̈actuwatp mal, camja-e'p ayé mal as̈am inchi'tpay inwijn. Ni'c más oy intʉgʉywa'n en ayé lugar mam imanda̱t Dios mit tu'gu inwijn que is̈aguepwa'n mechc inwijn pa is̈comgáj jʉngʉtʉm. 48Mit jem iguitunas̈cawa'n maljayajwat mam jʉjn nunca igapi'ch.
49’Ni'c nu'pʉjʉn iproba̱tcáj mit jʉjn, mit nu'pʉjʉn aníma̱t icotstʉgʉygajapay Dios, iproba̱tcámpey mit jʉjn. 50Oy ayé ca̱n, po te ca̱n cajapa'c, ¿nat igui-ac-o'mpiwa'n cayan? Mit as̈am ayé ca̱n i-oyi, wename-ey oy pi tsʉ̱nga en paz minu'pʉjʉjnat.
Currently Selected:
San Marcos 9: PSNT
Highlight
Share
Copy
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
