San Marcos 11
11
Jesús coyp Jerusalén
1Icóygaj tom ayé nʉ'jcopajcat Jerusalén, Betfagé mit Betania mam i-it ayé copac los Olivos, Jesús i-ajyu't mechc ipʉctampajyat, 2inʉmgʉs̈au:
—Nʉ́s̈ca en ayé nʉ'jcopac yajyʉ'nway laj, mit intʉgʉygawa'n jem, impa̱tcáj jaran tu'c burruwáy cujupiyic, mit nepʉn iganitucu'tp ayé burruwáy. Quéjca mit mumínga. 3Mit te tambʉn is̈nʉmgajap: ¿Tini'c is̈quéjca? inyʉmgajáj ni'c el Señor inesita̱tp ayé burruwáy, po i-acpitucnú̱jatu jaran.
4Cʉs̈ nʉs̈cau, mit ipa̱tcau calleni'c tu'c burruwáy cujupiyic tʉc-auni'c, mit iquejcau.
5Mit una̱c jayajwat jeme tsʉ̱ngaway jem iguinʉmgajau:
—¿Tini'c is̈quéjca ayé burruwáy?
6Mit je'jat inʉmgajau lo que iguinʉmgajaway Jesús, mit imoygau laj ma munʉs̈ca. 7Mit imumingau burruwáy mam Jesús, mit i-ajcu'tcajau jamuc iyucuinm, mit Jesús itucu't ayé burru. 8Mit mayo'c itsapcau jamuc to̱uni'c mit ja-una̱c ipus̈cau cuy-awecwájat mit is̈ics̈cau to̱uni'c.
9Mit ya̱s̈cau jeme nʉs̈capay jʉpm mit jeme mingapay mugus̈á̱m, inʉmgau:
—¡Hosanna! ¡Na-oyninʉ́mga ayʉ̱́j jeme igui-ajyu'tway el Señor! 10¡Na-oyninʉ́mga Dios ni'c mi'náj ayé tiempu cuandu imanda̱twa'n as̈am imanda̱jt David nate̱jtat ámbanuway! ¡Na-oyninʉ́mga Dios yucmay!
11Icojy Jesús Jerusalén, je' nʉcs̈ templuni'c. Igui-is̈cʉs̈ nu'pʉjʉn cosajat jem, imupichingʉs̈ ayé doce ipʉctampajyat pa nʉ'jcopac Betania ni'c tsu'jito'ganu.
Higueracujy igawatpay itʉjm
12Mit icus̈ʉwij jatu'c s̈ʉjw, ipíchingaj Betania, Jesús cayo'jcʉu. 13Mit i-is̈ yagatsu tu'c higueracujy jeme ijtʉway i-ajyat, mit oy igui-e'p te ipa̱jtáj itʉjm. Icojy jem, igapa̱jtawu neti. Ijtʉu puru i-ajy, ni'c canije' tiempu pa itʉmwatwa'n. 14Mit imucots ayé higueracujy, inʉjmau:
—Nepʉn pi is̈cajato'jac nunca intʉjm.
Mit imaraugau ipʉctampajyat lo que inʉmway.
Jesús i-acpichingʉs̈p jayajwat templuni'c
15Coygau Jerusalén. Itʉgʉjy Jesús templuni'c, chu̱chiu igui-acpichingʉs̈ jeme to'jcapay mit juygapay templuni'c. Mit i-acchi'tpitujcʉs̈au tumi̱ntigatspajyat ime̱s̈ajat, mit we'ney palomato'cpayna'jat ipa̱ngujat, 16mit igayagu laj nepʉn iguimunas̈tujcawa'n tanti templuni'c. 17Mit i-ajque's̈cʉs̈au, inʉm:
—Ja'yic itsʉ̱na Dios ilibruni'c: “Tʉntʉjc nʉmic pa tu'c lugar mam na-ora̱tcawa'n nanu'pʉjʉjnat.” Po mijchat intigatscau ayʉ̱́j tʉjc, mit impʉjcap as̈am nu'mpajyat itʉjcat.
18Mit imaraugau jeme i-ajque's̈capay ley mit judíujat, mit iche'ngajau ilaj pa igui-ago'jcawa'n Jesús, ni'c ipʉ̱tcau ni'c nu'pʉjʉn jayajwat nigu-épigʉjʉp mit i-ama̱s̈an. 19Po icutsu'ij, Jesús pichin en ayé nʉ'jcopac.
Higueracujy tʉ̱tsp
20Inás̈caj jopoyít, i-is̈cau ni'c tʉ̱tsway ayé higueracujy hasta iticchicni'c. 21Mit iguinijáwij Pedro, inʉjmau Jesús:
—Amayipay, e'pnaj, tʉ̱tsway ayé higueracujy jeme inmaldiciona̱tway.
22Ipo'ngʉs̈ Jesús:
—Cupʉ́jca mʉgʉc Dios. 23Iyacs̈ta'cway tʉnʉmgʉs̈ap ni'c pʉmba'tu jeme inʉjmámpay ayʉ̱́j copac: “Niju'jpʉ mit nica'tstʉ́gʉjyʉ lama̱tjugum”, mit te igaduda̱tp ijo̱tni'c po icupʉcp ni'c jatáj lo que inʉmpay, wenamé ijatwa'n. 24Jemni'c tʉnʉmgʉs̈a: In-ora̱tcawa'n, cupʉ́jca ni'c impʉctsougáj nu'pʉjʉn lo que inyo'tcajapay Dios, mit is̈mingajáj. 25Cuandu in-ora̱tcawa'n, te inaguepcap inmutsuguijnat perdoná̱tca, pa we'n inte̱jtat tsajpni'cway is̈perdona̱tcajámpey ayé mal inwatcaway. 26Ni'c te mijchat migaperdona̱tcap, we'ney inte̱jtat tsajpni'cway is̈caperdona̱tcajámpey inma̱jlat inwatcaway.
I-ucyo'tcap Jesús pʉn iguimanda̱tp
27Pitujcawatu pa Jerusalén. Mit iyo'jy Jesús templuni'c, mingau mam je' judíujat imʉjpa̱nijat, jeme i-ajque's̈capay ley mit na'waywájat. 28Inʉmgajau:
—¿Pʉn is̈manda̱t pa is̈ajque's̈wa'n we'n? mit ¿pʉn is̈moyp laj pa is̈watwa'n ayʉ̱́j cosajat?
29Jesús ipo'ngʉs̈:
—Tʉwatcʉs̈ámpey tu'c pregunta mit te is̈po'ngap, tʉnʉmgʉs̈ámpey pʉn tʉs̈manda̱t pa tʉs̈watwa'n ayʉ̱́j cosajat. 30¿Pʉn iguimanda̱t Juan pa inʉ'gutemwa'n, Dios tsajpni'cway o jayajwat? Po'ngac.
31Mit je'jat ni-ucyo'tcʉjʉu yename:
—Te nanʉmgap ni'c iguimanda̱t Dios tsajpni'cway, nas̈nʉmgajáj: “¿Tini'cpaj is̈cacupʉ́jcaj je'?” 32Mit te nanʉmgap ni'c iguimanda̱tcau jayajwat, napʉ̱tcap ayé jayaujuc, ni'c nu'pʉjʉn je'jat icupʉjcap ni'c Juan tu'c profeta iyacs̈ta'cway.
33Ipo'ngau Jesús:
—Tʉngajawigap.
Mit inʉmgʉs̈au Jesús:
—Ʉ̱ Tʉganʉmgʉs̈ámpey pʉn tʉs̈manda̱t pa tʉs̈watwa'n ayʉ̱́j cosajat.
Currently Selected:
San Marcos 11: PSNT
Highlight
Share
Copy
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
