San Marcos 12
12
Uvajuc icuentu
1Mit cʉs̈ Jesús chu̱chiu iguitumuquips̈cʉs̈ cuentujat, inʉm:
—Tu'c jayau ini̱p tu'c uvajuc, mit i-acerca̱t mit cujy, itáj tu'c cʉt pa uvacoman, mit iwatey tu'c cuyche's̈ yucmay pa iguicuida̱tcawa'n ayé uvajuc, mit itumuyajcʉs̈ una̱c yos̈watpajyat, mit je' nʉcs̈ yagats. 2Icojy itiempu pa iguitujcawa'n ayé uva, ayé jayau i-ajyu't tu'c mozo pa mam itsʉ̱nga iyos̈watpajyat pa iguimunʉs̈cajawa'n je' iparte. 3Po ayé yos̈watpajyat igui-actángaj ayé mozo, imoyta̱jcau mit i-acpitujcau sin neti. 4Mit ayé jayau i-ajyu't jatu'c mozo, po ayʉ̱́jway ipojcajau mit tsa', i-ajcopacjotcau mit i-apes̈ta̱jcau. 5Mit ayé jayau i-ajyu't jatu'c mozo mit ayʉ̱́jway i-ago'jcau. Mit wename iguiwátcaj mit nu'pʉjʉn jeme i-ajyu'tcʉs̈way, una̱c ipojniguitaugau, mit ja-una̱c i-ago'jcau.
6’Mit je' ijtʉu iway jeme iwano'cway, mit por últimu i-ajyu'tcʉs̈awey, inʉm: “Irespeta̱tcáj tʉnwáy.” 7Po ayé yos̈watpajyat inʉmgau je'jatu: “Ayʉ̱́j ayé imutanámpay nu'pʉjʉn. Ja' na-ago'jca mit nu'pʉjʉn lo que ijtʉpay tanáj pa naje'jat.” 8Igui-actángaj, je' i-ago'jcau mit icucachigau pe'ta̱m de ayé uvajuc.
9Mit cʉs̈ Jesús i-ucyo'tcʉs̈:
—¿Ti iwatáj ijayc ayé uvajuc? Mi'náj mit icʉs̈pʉ'náj ayé yos̈watpajyat, mit imo'áj ayé uvajuc pa jatu'jcat.
10’¿Inganicotscap Dios ilibruni'c mam itsʉ̱na ja'yic?
Ayé tsa' jeme igawangaway tʉcwatpayna'jat,
ayʉ̱́j ayé iyajcámpay esquinani'c pa itsʉmwa'n más.
11Ni'c el Señor iwat ayé,
mit ayé nas̈acnigu-épigʉjʉp.
12Mit ja-iche'ngajau ilaj pa igui-actangawa'n ni'c ijawigau ni'c je'jat iguitu-ampiugau mit ayé cuentu, po ipʉ̱tcau ayé jayaujuc. Mit je'yu icuyaguigau, mit nʉs̈cau.
Te oy nas̈mo'wa'n César tumi̱n impuestu
13I-ajyu'tcau mam Jesús una̱c fariseujat mit Herodes ijayajwat pa igui-ajca'ugawa'n mit lo que inʉmámpay. 14Mit imíngaj, inʉmgajau:
—Amayipay, tʉnjawigap ni'c inyʉmp lo que iyacs̈ta'cway, mit ingapʉ̱tp nepʉn, po niwe'nu is̈-e'pcʉs̈ nu'pʉjʉn jayajwat, mit yacs̈ic is̈ajque's̈a Dios ito̱u. ¿Oy nas̈mo'wa'n tumi̱n impuestu rey César o ca-oy? ¿Natso̱jcáj o nagatso̱jcáj?
15Po Jesús ijawiu ni'c pensa̱tcap mal, mit inʉmgʉs̈au:
—¿Tini'c is̈proba̱tcap? Mumíngajac tu'c tumi̱n pa tʉs̈-e'pwa'n.
16Cʉs̈ iguimumíngajaj, Jesús i-ucyo'tcʉs̈:
—¿Pʉn ayé iretratu mit inʉ'jy jeme tsʉ̱napay ja'yic tumi̱ni'c?
Iguipo'ngau:
—César ayé.
17Jesús inʉmgʉs̈au:
—Moyga César lo que César ije'way, mit moyga Dios lo que Dios ije'way.
Mit nigu-épigʉjʉu ni'c we'n ipo'jn.
Nat ijutucta̱jcawa'n á̱nimajat
18Cʉs̈ mingau mam je' una̱c saduceujat jeme inʉmgapay ni'c cajutucta̱jcáj á̱nimajat, mit i-ucyo'tcau Jesús, inʉmgau:
19—Amayipay, Moisés ija'y yename pa ʉjtsat nas̈watcawa'n: te tu'c jayau o'cp i-ajch mit te iyacp ito's̈ay po igayacp iway, ayé jayau ma nicʉ'pa̱jtʉ mit i-ajch ito's̈ay pa ma ijtʉ iway por i-ajch magacʉs̈ ayé familia. 20It siete muta̱cjéwajyat. Mit jeme más ajchcopacway nicʉ'pa̱jtʉu, mit cʉs̈ o'c mit igayagu iway. 21Mit imajtsʉc jeme iguinatspoguipay ipʉgatu ayé to's̈ay, mit i-o'jc, igayagu-ey iway. Mit we'ney iguijat terceruway. 22Mit inisietejatij ipʉjcau is̈ta'c ayé to's̈ay, o'cpʉ'ngau mit igawatcajawu iway ayé to's̈ay. Mit cʉs̈ o'guey ayé to's̈ay. 23Ijutucta̱jcawa'n nu'pʉjʉn á̱nimajat, ¿pʉn de ayé sietejatway ipʉgáj ayé to's̈ay? ni'c inisietejatij ito's̈ayjatcau.
24Jesús inʉmgʉs̈au:
—¿Ingajawigap nat itsʉ̱na ja'yic Dios ilibruni'c ne ingajawigap ni'c Dios ijtʉp maj? Jemni'c ca-oyap impensá̱tca. 25Cuandu ijutucta̱jcawa'n nu'pʉjʉn á̱nimajat, canicʉ'pa̱tcʉjʉ̱́j ne igawatcáj cʉ'pa't, po tsʉ̱ngáj as̈am ángejlat tsajpni'cway. 26Ingajawigap ni'c jutucta̱jcáj nu'pʉjʉn á̱nimajat ni'c ingani-entendia̱tcap Moisés ilibru, nat iguimucots Dios zarza-awa'tsam, inajau: “Ʉ̱j ayé tʉs̈Dios Abraham, mit tʉs̈Dios Isaac mit tʉs̈Dios Jacob.” 27Dios iga-e'pcʉs̈p ayé jayajwat as̈am o'guijcatway. Je' Dios pa jeme tsʉ̱ngapnajway. Nes̈ʉ̱n ca-oyap impensá̱tca.
Mandamientu más primeruway
28Coy mam Jesús tu'c jayau i-ajque's̈pay ley. Iguimarajw nat icótscaj mit iguijawij ni'c oyo'gu iguipo'ngʉs̈ Jesús, i-ucyo't:
—¿Jʉmay ayé mandamientu más primeruway de nu'pʉjʉn?
29Ipo'n Jesús:
—Ayʉ̱́j ayé mandamientu más primeruway: “Márauga mijchat miIsraejlatway: El Señor ayé naDiosat, mit el Señor tu'gujyu ayé. 30Mit inwa'náj el Señor inDios mit nu'pʉjʉn injo̱jt, mit nu'pʉjʉn imvida, mit nu'pʉjʉn intupensa̱tpay, mit nu'pʉjʉn inmaj.” Ayʉ̱́j ayé mandamientu más primeruway. 31Mit segunduway ayʉ̱́j ayé: “Inwa'náj inmupro̱wije̱way as̈am mi̱ inyiwajnʉ.” Ca-itp jatu'c mandamientu más mʉjway que ayʉ̱́jat.
32Iguinʉjmau ayé jayau:
—Amayipay, oyo'gu impo'jn. Iyacs̈ta'cway lo que inyʉmpay ni'c Dios tu'gujyu ayé, mit ca-itp jatu'c as̈amay je'. 33Mit nas̈wa'nwa'n Dios mit nu'pʉjʉn najo̱jt, mit nu'pʉjʉn natupensa̱tpay, mit nu'pʉjʉn navida, mit nu'pʉjʉn namaj, mit nas̈wa'nwa'n namupro̱wije̱way as̈am naniwajnʉ, ayʉ̱́jat ayé más oyway que nas̈no'cwa'n tu'c aníma̱t pa Dios, o que nu'pʉjʉn nacojtsapay Dios.
34Jesús iguimarajw ni'c oyo'gu ipo'jn, inʉjmau:
—Tomo'c intsʉ̱na pa Dios is̈manda̱táj.
Mit nu'pʉjʉn pʉ̱tcau igui-ucyo'tcawa'n.
Te Cristu David iway
35Igui-ajque's̈cʉ́s̈aj Jesús templuni'c, inʉm:
—¿Tini'c jeme i-ajque's̈capay ley iguinʉmga ni'c Cristu ayé David iway? 36Ni'c Espíritu Santu i-actunʉm David:
El Señor inʉjmau tʉnSeñor:
“Tsʉ́na tʉn-oyimaycʉ'ni'c,
hasta tʉs̈vencia̱twa'n nu'pʉjʉn inmutsuguijnat.”
37Te nije'yu David inʉjmau ni'c Cristu ayé iSeñor jeme iguimanda̱tpay, ¿natpaj iguiwayjatwa'n?
Mit mayo'c jayajwat iwangau iguimaraugawa'n Jesús.
Jesús i-acusa̱tcʉs̈p jeme i-ajque's̈capay ley
38Jesús i-ajque's̈cʉs̈au:
—Mijchat nicuidá̱tcʉjʉ mit ayé jayajwat i-ajque's̈capay ley, ni'c iwangap iguimuyo'ygawa'n yagatsjamuc, mit iwangap jayajwat ma iguisaluda̱tcac plazani'c mit may respetu, 39mit iwano'jcap pa̱ngujat más ojyatway mam i-adora̱tca judíujat, mit iwangap lugajrat más ojyatway mam iguiwatca cayna̱s̈. 40Ayʉ̱́jat ichi'tcajap cu-o'cwájat itʉjcat, mit jego'cp i-orá̱tca pa jayajwat magajawiga ni'c we̱tpajyat. Ayʉ̱́jat Dios igui-actunas̈cáj más.
Cu-o'cwáy itumi̱nwáy
41Jesús nitsʉ̱nda̱jcʉu templuni'c tom mam i-it tu'c cas̈u̱n itucomgapay tumi̱n, mit i-is̈cʉs̈ jayajwat nat iguicómgaj itumi̱jnat cas̈u̱ni'c. Mit mayo'c ricujat icomgau may. 42Mit miney tu'c cu-o'cwáy pro̱wijway, mit icom mechc tumi̱nwájat de cobre jeme valia̱tway tu'c centavu. 43Iguiya̱s̈cʉs̈ Jesús ipʉctampajyat, inʉmgʉs̈au:
—Iyacs̈ta'cway tʉnʉmgʉs̈ap ni'c ayʉ̱j cu-o'cwáy pro̱wijway icom más que nu'pʉjʉn jeme icomgapay cas̈u̱ni'c. 44Ni'c nu'pʉjʉn icomgau jeme igui-atangajaway, po ayʉ̱́jway, majapro̱wi-aj, icombʉ'n nu'pʉjʉn jeme ijtʉway, nu'pʉjʉn jeme itucayámpay.
Currently Selected:
San Marcos 12: PSNT
Highlight
Share
Copy
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
