San Marcos 13
13
I-acyʉnʉnmanajcáj ayé templu
1Ipichíjn Jesús templuni'c, iguinʉjmau tu'c ipʉctampay:
—Amayipay, ¡e'pnaj, que oymanac ayé tsa'jat templuni'cway! ¡Qué oymanac ayé templu mit tʉjcat itpay jem!
2Po Jesús inʉjmau:
—¿Inyijatp ayé majatway tʉjcat? Po itp ti iyʉnʉnmanajcawa'n ayé tʉjcat, mit catanáj netu'c tsa' ʉ'pic.
Nat icʉs̈wa'n ayʉ̱́j mundu
3Nitsʉ̱nda̱jcʉu Jesús en ayé copac los Olivos mam na-e'pnʉs̈ mam i-it ayé templu, mit igui-ucyo'tcau aparte Pedro, Jacobo, Juan mit Andrés, inʉmgau:
4—Nʉmgajac, ¿jutim ijatwa'n ayʉ̱́j cosajat jeme is̈nʉmgajaway? ¿Mit ti tʉn-e'pcáj pa tʉs̈jawigawa'n ni'c tom pa icumplia̱tcawa'n?
5Jesús inʉmgʉs̈au:
—Nicuidá̱tcʉjʉ pi is̈cawe̱jta̱jcac nepʉn. 6Ni'c mingáj mayo'c we̱tpajyat mit i-ataynʉmgáj ni'c je'jat Cristu, mit iwe̱jta̱jcáj mayo'c jayajwat.
7’Mit inmaraugáj ni'c itp tsuguin mit is̈nʉmgajáj ni'c itámnaj más tsuguin, po campʉ̱tcawit, ni'c itp ti ijatwa'n wename, po canije' tiempu pa icʉs̈pʉ'nwa'n nu'pʉjʉn. 8Ni'c jayajwat en tu'c na̱s̈ imutsuguinwatcáj jayajwat jatu'c na̱s̈atway, mit tsuguinwatcáj rejyat. Mit nas̈áj us̈ mʉgʉcway jʉmgapa'tu, mit itáj yu' mit pʉ̱tna̱s̈. Mit ijatwa'n wename, ayé ni'c chu̱chipnaj iguitunas̈ca jayajwat.
9’Nicuidá̱tcʉjʉ mijchat ni'c is̈yajcáj icʉ'jugujmat judíujat ijefejat, mit is̈raunipʉ'ngáj mam i-adora̱tca judíujat, mit je'jat is̈munʉs̈cáj pa mam itsʉ̱nga gobernadojrat mit mam reyna'jat ni'c ʉ̱ is̈wangap, mit we'n oyáj is̈nʉ́mgaja lo que incupʉjcapay. 10Antes icʉs̈pʉ'nwa'n nu'pʉjʉn, itp ti nas̈nʉmdacyo'jyʉ'cwa'n Jesucristu i-oyway noticia pa nu'pʉjʉn jayajwat. 11Po cuandu is̈munʉs̈cáj pa autoridajat icʉ'jugujmat, campensa̱tca ti inyʉmgámpay, po inyʉmgáj lo que Dios is̈moygámpay en ayé hora, ni'c caje' mijchatu micotscáj, po is̈ajcotscáj Espíritu Santu. 12Mit tu'c jayau i-ac-ago'jcʉ̱́j imajtsʉc, mit jatu'c jayau i-ac-ago'jcʉ̱́j iway, mit ya̱wayna'jat imutsuguinwatcáj ite̱jtat mit i-ac-ago'jcʉjʉ̱́j. 13Mit nu'pʉjʉn is̈-angáj mijchat ni'c is̈cupʉjcap ʉ̱, po jeme imajmo'ámpay hasta icʉs̈pʉ'nwa'n nu'pʉjʉn jeme jatámpay, ayé nisalva̱jtʉ̱́j.
14’Po in-e'pcáj jeme i-actogoyda̱jcapay sin winchu̱jc cosa oyway, mit ayé tsʉ̱náj en ayé templu i-oyninʉmway Dios. We'n iguinʉjm ayé profeta Daniel mit jeme icotspay ayʉ̱́j noc, ma entendia̱t. Wejpu'n jeme tsʉ̱ngapay Judeajway na̱s̈ ma po'jca pa copac-awa'tsam. 15Mit jeme tsʉ̱napay tʉcyucuinm ma po'c jaran, magatʉgʉywit itujugum pa igui-acpichinwa'n tanti. 16Mit jeme tsʉ̱napay camni'c, magapitucwit pa iguipʉcwa'n ima'n. 17¡Pro̱wij de ayé to's̈ajyat jeme wáyajatway, mit jeme way-acye'jcapay en ayé s̈ʉjwat! 18Orá̱tcaja Dios maga-it payic cuandu impo'jcawa'n. 19En ayé s̈ʉjwat itáj pʉ̱tna̱s̈, ni'c desde Dios iguiwajt ayʉ̱́j mundu hasta jinap, nunca cani-itp pʉ̱tna̱s̈ as̈am ayʉ̱́jway, ne caja-itáj nunca wename. 20Mit ma jegate ayé s̈ʉjwat pa iguitunas̈cawa'n, nepʉnate catsʉ̱náj salva̱tic. Po Dios iga-acjegáj ayé s̈ʉjwat ni'c iwangʉs̈p jeme icupiugʉs̈way.
21’Mit wejpu'n te tambʉn is̈nʉmgajap: “¡E'pca, yam itsʉ̱na Cristu!” o te is̈nʉmgajap: “¡E'pca, jem itsʉ̱na!”, camcupʉjcawit. 22Ni'c mingáj we̱tpajyat, inʉmgáj ni'c je'jat Cristu, mit inʉmgámpey ni'c Dios igui-ajyu'tcau, mit iwatcáj majatway milagrujat mit is̈acnigu-epigʉjʉ̱́j, mit te oyap iwe̱jta̱jcájate hasta jeme Dios icupiugʉs̈way. 23Po mijchat nicuidá̱tcʉjʉ. Tʉnʉmgʉs̈away nu'pʉjʉn antes ijatwa'n.
Nat imi'nwa'n Jesús
24’Po en ayé s̈ʉjwat, icʉs̈wa'n ayé pʉ̱tna̱s̈, s̈ʉwáy cuchitimiyáj, mit po'wáy cajata'cs̈áj. 25Mit ma̱tswájat ca'ugáj tsajpni'c, mit nu'pʉjʉn cosa ijtʉpay poder tsajpni'c s̈is̈cada'gáj. 26Mit wejpu'n tʉs̈-e'pcáj ʉ̱ jeme tʉjatway jayau, ni'c tʉmi'náj wintucjugum mit mayo'c poder, mit oymanac tʉmi'nwa'n. 27Mit wejpu'n tʉnajyu'tcʉs̈áj tʉn-ángejlat mit i-apʉcmujcáj nu'pʉjʉn tʉncupiugʉs̈way jʉmgapa'tu mam itsʉ̱nga en ayʉ̱́j mundu.
28’Tʉntumuquips̈áj tu'c higueracujy pa pi jawiga. I-ayawiwa'n i-awec mit ipichinwa'n iyau-ajy, injawigap ni'c tominup s̈ʉutim. 29Wename-ey cuandu is̈-e'pcawa'n ni'c jatnup lo que tʉnyʉmpay, injawigáj ni'c tomo'ganu pa icʉs̈pʉ'nwa'n nu'pʉjʉn. 30Iyacs̈ta'cway tʉnʉmgʉs̈ap ni'c jinapay jayajwat cani-o'jcáj hasta ijatwa'n nu'pʉjʉn tʉnyʉmway. 31Cʉs̈áj tsajp mit na̱s̈, po tanáj pa siempre lo que tʉnyʉmpay.
32’Nepʉn igajawip ti s̈ʉjw ne ti hora icʉs̈pʉ'nwa'n nu'pʉjʉn, ne ángejlat tsajpni'cway igajawigapey, ne Dios iway. Solo tʉnte̱t Dios ijawip.
33’Nicuidá̱tcʉjʉ, tsʉ̱́nga prepara̱tic mit orá̱tca, ni'c ingajawigap jutim icojawa'n ayé tiempu. 34Mit ayʉ̱́j jatáj as̈am tu'c jayau jeme nʉcs̈way yagats, iyac itʉjc, mit itumuyajcʉs̈ iyos̈watpajyat, mit cada jayau itumuyac iyos̈, mit imanda̱t ayé tʉcmutampayna' ma cuida̱t. 35We'ney mijchat, pi tsʉ̱nga prepara̱tic, ni'c ingajawigap jutim imi'nwa'n tʉcna' ijayc, te icutsu'iwa'n, o te pu̱jtsu'm, o te i-ʉwa'n ca̱yuna' jopoytsu'mnaj, o te jopoyít. 36Magami'n jaran, is̈cupa̱tigáj mima̱gap. 37Mit lo que tʉnʉmgʉs̈apay mijchat, tʉnyʉmgʉs̈apey nu'pʉjʉjnat: Tsʉ̱́nga prepara̱tic.
Currently Selected:
San Marcos 13: PSNT
Highlight
Share
Copy
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
