Марк 5

ЯТФЭНЭРЭШЪХЬ

Исус джынапцӀэ зыхэс лӀы горэ зэригъэхъужьыгъэр

(Маттэ 8:28-34; Лука 8:26-39)

1Галилей псыхъураем иадрабгъу ит хэкоу къалэу Гадарэ епхыгъэм нэсыгъэх. 2Исус къуашъом къызэрикӀэу, джынэпцӀэ Ӏае зыхэс лӀы горэ къэунэхэм алъэныкъокӀэ къикӀи, къыпэгъокӀыгъ. 3А лӀыр къэунэхэм ахэсыгъ. ГъучӀ Ӏэхъу-лъэхъу пытэ зыми тырилъхьан ылъэкӀыщтыгъэп. 4Сыда пӀомэ, гъучӀ Ӏэхъу-лъэхъу бэрэ тыралъхьэщтыгъ, ау Ӏэхъур ээпичыщтыгъ, лъэхъури зэпиутыщтыгъ. Аущтэу зыми а лӀыр ыгъэуцун ылъэкӀыщтыгъэп. 5Чэщи мафи къэунэхэри Ӏуашъхьэхэри къыкӀухьэ зэпытыщтыгъ, куомэ-кӀыизэ, мыжъохэмкӀэ зэожьыщтыгъ.

6ЧыжьэкӀэ а лӀым Исус зелъэгъум, къачъи, лъэгъонджэмышъхьэкӀэ ыпашъхьэ къитӀысхьагъ. 7МэкъэшхокӀэ куозэ, къыӀуагъ:

– Исус, Тхьэу анахь Лъагэм ы Къу, сыда уиӀофэу къысхэлъыр? Тхьэм ыцӀэкӀэ сыолъэӀу, къин сэмыгъэлъэгъу!

8А лӀым аущтэу зыкӀиӀуагъэр, Исус джынапцӀэм, «О джынэпцӀэ Ӏай, мы лӀым хэкӀыжь!» риӀуагъэти ары.

9– Сыда о пцӀэр? – еупчӀыгъ Исус а лӀым.

– Сэ сцӀэр Дзэ, – пэгъокӀ къытыжьыгъ, – сыда пӀомэ, бэ тэхъушъ ары.

10ЕтӀанэ Исус ахэр а хэкум римыфынхэу лъэшэу къелъэӀугъэх.

11А чӀыпӀэ дэдэм къо Ӏэхъогъушхо Ӏошъхьэ нэпкъым щыхъущтыгъ. 12Джащыгъум джынэпцӀэ Ӏаехэр Исус къелъэӀугъэх:

– Къохэм адэжь тыгъакӀуи, ахэмэ апкъыхэм тахэгъахь.

13Исус ахэр фит ышӀыгъ. ДжынэпцӀэ Ӏаехэр лӀым хэкӀыжьхи, къохэм апкъыхэм ахэхьагъэх. Къо Ӏэхъогъур Ӏошъхьэ нэпкъ зандэм ечъэхи, псыхъураем хэлъэдагъ, псыми ытхьэлагъ. Ахэр минитӀу фэдиз хъущтыгъэх.

14Къуахъохэр хэхьажьхи, къалэмрэ къуаджэхэмрэ хъугъэ-шӀагъэр щаӀотэжьыгъ, цӀыфхэри хъугъэр зэрагъэлъэгъунэу къэкӀуагъэх. 15Ахэр Исус дэжь къызэкӀохэм, джынэпцӀабэхэр къызхэкӀыжьыгъэ лӀыр фэпагъэу, иакъыл ыгъотыжьыгъэу, а чӀыпӀэм щысэу алъэгъугъ ыкӀи къэщтагъэх. 16Джащыгъум къэхъугъэр зылъэгъугъэ цӀыфхэм джынапцӀэхэр зыхэсыгъэ лӀымрэ къохэмрэ къяхъулӀагъэр цӀыфхэм араӀотэжьыгъ. 17ЦӀыфхэм ар зызэхахым, Исус яхэку ыбгынэнэу къелъэӀугъэх.

18Исус къуашъом итӀысхьажь зэхъум, джынапцӀэхэр къызхэкӀыжьыгъэ лӀыр ащ къелъэӀугъ:

– Гъусэ сызыфэшӀ.

19– О уибынхэм адэжь уиунэ кӀожьи, Зиусхьаным къыпфишӀэгъэ шӀугъэшхомрэ гукӀэгъу къызэрэпфишӀыгъэмрэ яӀотэжь, – риӀуагъ Исус ар фимыдэу. 20Аущтэу ар кӀуи, Исус къыфишӀагъэр КъэлипшӀ#5:20 КъэлипшӀ – еплъ Маттэ 4:25. зыцӀэ хэкум щиӀуатэу ыублагъ, цӀыфхэми зэкӀэ агъэшӀэгъуагъ.

Исус Иаир ыпхъоу лӀагъэр къызэригъэтэджыжьыгъэр; Исус ищыгъын къынэсыгъэ бзылъфыгъэр зэригъэхъужьыгъэр

(Маттэ 9:18-26; Лука 8:40-56)

21Исус къуашъомкӀэ Галилей псыхъураем иадрабгъу къызызэпырэкӀыжьым, цӀыф купышхо ежь дэжь къыщызэрэугъоигъ. Исус псы Ӏушъом Ӏутэу, 22Иаир зыцӀэ синэгогу пащэ горэ къэкӀуагъ. Ащ Исус зелъэгъум, ылъакъохэм адэжь зыкъыщыридзыхи, 23лъэшэу къелъэӀугъ:

– Сэ спхъу цӀыкӀу малӀэ пэт. Хъужьынышъ, псаоу къэнэжьыным пае, къакӀуи, пӀэхэр телъхь.

24Джащыгъум Исус а лӀым дежьагъ. ЦӀыф купышхор Исус ыуж итэу зэтезэрэгъэгуагъэхэу кӀощтыгъэх. 25А цӀыфхэм бзылъфыгъэ горэ ахэтыгъ. Илъэс пшӀыкӀутӀо бэрэ лъы къыкӀэкӀэу ар гуӀэщтыгъ. 26Ӏэзэ Ӏаджи еплъыгъагъ, къиныби рагъэщэчыгъагъ. Бзылъфыгъэм иӀэ пстэури ахэмэ атыригъэкӀодэгъагъ, ау нахь Ӏае хъущтыгъэ нахь, яшӀуагъэ къэкӀуагъэп. 27Ащ Исус икъэбар зэхихыгъэти, цӀыф купышхом хэтэу ыкӀыбкӀэ къакӀуи, ищыгъын къынэсыгъ; 28сыда пӀомэ, а бзылъфыгъэм мыщ фэдэу ыгукӀэ ыӀощтыгъ: «Исус ищыгъынхэм санэс къодыеми, сыхъужьыщт». 29Ардэдэм лъыкӀэкӀыныр уцужьыгъэ, зэрэхъужьыгъэри ыпкъыкӀэ зэхишӀагъ.

30Исус кӀуачӀэ зэрэхэкӀыгъэм гу лъитагъ. ЦӀыф купышхом хэтэу зыкъызэригъэзэкӀи, ариӀуагъ:

– Хэта сищыгъынхэм къанэсыгъэр?

31– ЦӀыф купышхор къызэрэптезэрэгъэгуагъэхэр плъэгъузэ, етӀани «Хэта къызнэсыгъэр?» оӀуа? – къыраӀуагъ игъогу рыкӀохэрэм.

32Ау Исус ар зышӀагъэр ылъэгъуным пае, зиплъыхьэщтыгъ. 33Джащыгъум бзылъфыгъэм къехъулӀагъэр ешӀэти, щтагъэу, кӀэзэзэу къыӀухьи, Исус ыпашъхьэ зыкъыщыридзыхи, шъыпкъэр зэкӀэ къыриӀуагъ.

34– Сипшъашъ, – риӀуагъ Исус, – уишӀошъхъуныгъэ уигъэхъужьыгъ. Гъогу маф, гупсэф уиӀэу опсэу. Узынчъэу ухъужьыгъ.

35Исус джыри ахэр къыӀозэ, лӀы заулэ синэгогу пащэм иунэ къикӀыгъэхэу, къакӀохи, Иаир къыраӀуагъ:

– Ппхъу дунаим ехыжьыгъ. Дин гъэсакӀом сыд пае джыри къин ебгъэлъэгъужьыра?

36Ау Исус ахэмэ къаӀуагъэр зэрэзэхихэу, синэгогу пащэм риӀуагъ:

– Умыщын, шӀошъхъуныгъэ зигъэӀэ къодый.

37ЕтӀанэ Петри, Якъуби, ащ ыш Иуани нэмыкӀ зыдимыщэу, Исус кӀуагъэ. 38Синэгогу пащэм иунэ зынэсхэм, Исус цӀыфхэр бырсырхэу, хьэдагъэ къаӀэтэу, пыхьэхэу ылъэгъугъ. 39Исус унэм къызехьэм, ариӀуагъ:

– Сыд пае бырсыр къэшъуӀэтэу, хьадагъэ шъушӀыра? Пшъэшъэжъыер лӀагъэп, мэчъые нахь.

40Исус ар къызеӀом, къыдэхьащхыгъэх. Ау Исус зэпстэури унэм къыригъэкӀи, пшъэшъэжъыем ятэ-янэхэмрэ игъусищрэ зыдищэхи, пшъэшъэжъыер зэрылъ унэм ихьагъ. 41ЕтӀанэ пшъэшъэжъыем ыӀэ ыубыти, риӀуагъ:

– Талита кум! (Ащ къикӀырэр, – Сипшъэшъэжъый, сэ осэӀо, къэтэдж!)

42Пшъэшъэжъыер ардэдэм къэтэджыжьи, унэ кӀоцӀыр къыкӀухьагъ. Ар илъэс пшӀыкӀутӀум итыгъ. Ар залъэгъум, лъэшэу агъэшӀэгъуагъ. 43Ау Исус хъугъэр зыми рамыӀотэжьынэу унэшъо пытэ афишӀыгъ. ЕтӀанэ пшъэшъэжъыер агъэшхэнэу ариӀуагъ.

Currently Selected:

Марк 5: AdgNT14

Highlight

Copy