Хьунухь 41
41
Фиръавандин ахварар
1Кьве йис алатна, ва фиръавандиз ахвар акуна: гуя ам Нилдин къерехдал акъвазнава, 2Нилдайни ирид кал экъечӀзава. Гуьрчег, якӀа-чӀарчӀе авай абуру къерехда экъечӀнавай къалин кул-кус незва. 3Гуьгъуьнал алаз вацӀай ирид маса кал экъечӀзава, яхун, зайиф, гьабурун патав акъваззава. 4Ингье, и зайиф, яхун калери гуьрчег ва куьк калер незва! Фиръаван ахварай аватна. 5Мад ахварал хъфей чӀавуз, маса ахвар акуна: са тандал техилдин ирид кьил экъечӀна, хъсан, ацӀай. 6Абурун гуьгъуьнал алаз пичӀи, зегьем гару янавай ирид кьил экъечӀна. 7Ингье и пичӀи кьилери хьайи, тваррив ацӀанвай ва хъсан кьилер туькьуьнна! Фиръаван ахварай аватна. Адаз акур ахвар гьа ихьтинди тир.
8РикӀик къалабулух акатай ада пакамахъ Мисридин вири суьгьуьрбазар ва арифдарар кӀватӀна, абуруз вичин ахвар ахъайна, амма абурукай гьич садавайни адаз и ахвардин мана ачухариз хьанач. 9И чӀавуз чехир цадайбурун чӀехида фиръавандиз лагьана: «Фиръаван, вун сагърай. Зи рикӀел виликдай хьайи гунагь хтана! 10Са гъилера ваз чакай пис хъел атанай – ва зун фу чрадайбурун чӀехидахъ галаз санал яракь гвай къаравулрин чӀехидан кӀвале къазамат авун эмир ганай. 11Садра чаз кьведазни ахварар акунай – гьарда вичин ахвар, вичин кьилдин мана авай. 12Чахъ ана яракь гвай къаравулрин чӀехидан лукӀ тир иври вач-хъша яз галкӀурнавай. Чна адаз чи ахварар ахъайнай, адани чаз абурун мана ачухарнай – гьар садаз адан ахварди вуч къалурзаватӀа лагьанай. 13Ада чаз гьикӀ лагьанайтӀа, гьакӀ хьунни авуна: зун жуван виликан чкадал эхцигнай, ам куьрсарнай».
14Фиръаванди Юсуфан гуьгъуьниз ракъурна. Ам тади гьалда къазаматдай акъудна, чӀарар туна, цӀийи пек-партал алукӀна ва ам фиръавандин вилик акъвазна. 15Фиръаванди адаз лагьана: «Заз ахвар акуна, амма садавайни адан мана ачухариз жезвач. Вуна лагьайтӀа, заз ван хьайивал, ахвар ахъайнамазни, гьасятда адан мана ачухарзава». 16«Фиръаван, вун сагърай. Кар алайди зун туш, – жаваб гана Юсуфа. – Ви хийирдиз ахвардин мана Аллагьди ачухарда».
17Фиръавандини Юсуфаз икӀ ахъайна: «Заз ахварай зун гуя Нилдин къерехдал акъвазнаваз акуна, 18Нилдайни ирид кал экъечӀзава. Куьк, гуьрчег абуру вацӀун къерехда авай кул-кус незва. 19Гуьгъуьнал алаз вацӀай ирид маса кал экъечӀзава, яхун, зайиф, са хамни кӀарабар, заз Мисрида гьич санани ахьтин мурдар калер акурди туш. 20Яхун ва зайиф и калери ирид куьк кал незва. 21Эхиримжибур абурун руфунра квахьзава, амма руфунар ацӀанвайди малум жезвачир: калер гьа виликдай хьиз яхун яз амукьнавай. Зун ахварай аватна. 22Ахпа заз маса ахвар акуна: са тандал техилдин ирид кьил экъечӀна, хъсан ацӀай тварар. 23Адан гуьгъуьнал алаз миже квачир, пичӀи, зегьем гару канвай техилдин ирид кьил экъечӀна. 24И пичӀи кьилери са затӀни тун тавуна хъсан ирид кьил туькьуьнна! За жуван ахвар суьгьуьрбазриз ахъайна, амма абуру зун са куьнинни гъавурда тунач».
25«Им кьве ахвар туш – сад я, – лагьана Юсуфа. – Аллагьди ваз Вичи идалай кьулухъ вуч ийидатӀа къалурна. 26Хъсан ирид кал – им ирид йис я, ва техилдин хъсан ирид кьил – гьамни ирид йис я. Гьавиляй им гьа са ахвар я.
27Абурун гуьгъуьнал алаз экъечӀай яхун ва мурдар калер лагьайтӀа – им ахпа алукьдай ирид йис я. Зегьем гару канвай техилдин ирид кьилини гьадан гьакъиндай лугьузва – кашан ирид йис. 28Гьавиляй за ваз гьа икӀ лагьанай: Аллагьди Вичи вуч ийидатӀа, гьам ваз къалурна.
29Мисридин вири чилерал мублагьвилин ирид йис алукьзава, 30амма абурулай гуьгъуьниз кашан ирид йис къвезва – вични гьихьтин – виликан булвал гелни галачиз квахьда. Каша уьлкве барбатӀда, 31виликан мублагьвилин гьич гелни тадач – каш гьакьван зурбади жеда. 32Ахвар кьве гъилера тикрар хьана, вучиз лагьайтӀа Аллагьди и кар кӀевелай кьетӀнава ва и мукьвара кьилизни акъудда.
33Гьавиляй акьул авай ва виликамаз дериндай фагьум ийиз жедай са кас хкяна, ам Мисри идара авун патал тайинара. 34-35Ва вири уьлкведа алукьзавай мублагьвилин ирид йисуз халкьдивай бегьердин вадай са пай къахчудайвал, ва техил шегьерра, ви гьамбарханайра кӀватӀ ийидайвал, гьукуматдин къуллугъдарар тайин ая. 36И чӀавуз уьлкведа Мисрида алукьдай кашан ирид йисуз игьтият патал хвенвай суьрсет жеда – ва уьлкведи и каш эхи ийида!»
Юсуф фиръавандин куьмекдар хьун
37Юсуфан гафар фиръавандиз ва адан мукьуванриз хуш хьана.
38«Ихьтин маса кас жагъидани кьван? – лагьана фиръаванди вичин мукьуванриз. – Адак Аллагьдин руьгь ква».
39Ахпа ада Юсуфаз лагьана: «Аллагьди ваз вири и кӀвалахар чирнаватӀа, валай акьул авай ва виликамаз фикир ийиз жедай кас авач. 40Къедлай кьулухъ вуна зи гъилик квай вири чкаяр идара ийида, ва зи халкьди ви гафуниз яб гуда. Анжах пачагьдин дережадалди зун валай вине жеда».
41«Килиг, – лагьана фиръаванди Юсуфаз, – за вакай вири Мисридин гьаким ийизва!» 42Ада вичин муьгьуьр алай тупӀал галудна, ам Юсуфахъ акална. Адал лап кьелечӀ кушдин парталар алукӀна ва адан гарданда къизилдин занжур туна. 43Адав уьлкведин чӀехибурукай кьвед лагьай кас аваз къекъведай кьве чарх квай дапураг вугана. Ам ада акьахна къекъведай чӀавуз Юсуфан вилик «МетӀерал!» лугьуз гьарайдин ван жедай.
Гьа икӀ фиръаванди Юсуфакай вири Мисридин гьаким авуна. 44«Зун фиръаван я, – лагьана ада Юсуфаз. – Гьавиляй къедлай кьулухъ ви ихтияр авачиз Мисридин вири чкайра садавайни гьич чӀарни юзуриз жедач!»
45Фиръаванди Юсуфал цӀийи тӀвар эцигна, Сафнат-Панеах, ва адаз паб яз Андин ибадатханада диндин къуллугъдар ПатӀи-Фарадин руш Асенат хкяна. Юсуфни Мисри идара ийиз эгечӀна. 46Юсуфа фиръавандиз, Мисридин пачагьдиз, къуллугъ ийиз гатӀунайла, адан къанни цӀуд йис тир. Фиръавандин патавай экъечӀна, Юсуф вири Мисридин чил тирвал къекъуьн патал рекье гьатна.
47Мублагь ирид йисан девирда чили бул бегьерар гана. 48И йисара Мисрида кӀватӀай вири техил Юсуфа шегьерриз пайнай: гьар са шегьердиз – адан къерехра авай чуьллерин бегьер. 49Ада гьуьлуьн къум кьван техил кӀватӀнай – акьван гзаф авай хьи, гьич гьисабиз хъхьанач: гьисабиз тежедай кьван.
50И вахтунда, гьеле каш алукьдалди, Андин диндин къуллугъдар ПатӀи-Фарадин руш Асената Юсуфаз кьве хва хана. 51Сифте хциз Юсуфа Манаше#41:51 Манаше – чӀувуд чӀалалди – «рикӀелай алудиз тун» ибарадиз мукьва я. тӀвар гана, вучиз лагьайтӀа ада лугьудай: «Аллагьди зав гьам зи вири гъамар, гьамни бубадин кӀвал рикӀелай алудиз туна». 52Кьвед лагьайдал Ифраим#41:52 Ифраим – чӀувуд чӀалалди – «аялар аладунин гьунар авалди» ибарадиз мукьва я. эцигна, вучиз лагьайтӀа ада лугьудай: «Зи азабрин чилел Аллагьди закай гзаф аладдайди авуна».
Юсуфан стхаяр сад лагьай гъилера Мисридиз атун
53Мисрида мублагьбур тир ирид йис эхирдал атана. 54Юсуфа виликамаз лагьайвал, кашан ирид йис алукьна. И каша вири уьлквейриз зарар гана, амма Мисридин гьар чкада игьтият патал хвенвай техил авай. 55Ахпа каш Мисридани хьайила, мисривийрини фиръавандивай фу тӀалаб авурла, ада лагьана: «Юсуфан кьилив алад ва Юсуфа лагьайвал ая».
56Мисридани каш къвердавай артух жезвай. Вири дуьньяда каш гьатнавай. Юсуфа гьамбарханаяр ахъайна ва мисривийриз техил маса гуз хьана.
57Къунши уьлквейрайни Мисридиз Юсуфавай къуьл маса къачуз инсанар къвезвай, вучиз лагьайтӀа вири чкайра каш къати хьанвай.
Currently Selected:
Хьунухь 41: ЛезПК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010-2024
