Matìù 24

Yesò làꞋà ànəa màmbua lob nɨ̧ Mbɔ̧ɔ̧mà

(Mk 13:1-2; Lk 21:5-6)

1Yesò li sà lob nɨ̧ Mbɔ̧ɔ̧mà me ghǎ, bɔkatè tò e kɨꞋɨ̀ me laꞋa ànəa lob mbɔŋ. 2Tà shu abua yɔb nê, “Bɨ̀ lɨ̀ŋkè lob tàa a èbem àpfəè ŋaà la tègème ndze. TsiꞋ è shua wɨ̧ ane nkûŋ nê, bɔɔ li bùù lob te mbɔŋ tègème tè wòt kɨꞋɨ abot tà kà tsi ndzè ka wuê èti lemɔꞋ ane àtetsi.”

NgoꞋ nè mànkɨa àtsəa bòt enɨ

(Mk 13:3-13; Lk 21:7-19)

3Mbɨ̀Ꞌɨ̀ Yesò tseke a ègwet èbȩ Olìf la, bɔkatè tò e kɨꞋɨ shu abua tò a ntsèm nê, “Shu awa àfɨꞋa mènəè maa ègème nàa li ghɨ̀ la, mè nè àghɨa àa nyɨ̀Ꞌtâ nê à bèle yàŋe ekɨꞋɨ, ngɔ̀ŋ mè ngu lìà la.”

4Yesò bɨ̀ɨ̀lè nê, bɨ̀ me ko awɨ̧ mbɨ̀Ꞌɨ̀ wòt kǒ fɨte awɨ̧, 5nkàà nê bòt nyaŋ aa li kɨꞋɨ nɨ èlen laã e me shu nê bɔ wu Fɔ̧̀ wu Mbɔ̧ɔ̧mà yɔꞋ ntsà la, efɨte bòt nyaŋ. 6Bɨ mè ngu zə ndɨ bɔ nùà mèbet a ngèt yɨ̧ la, nè è me endɨ̌. Ka bɨ̀ kâ mbèntê, wu èghɨ e bɔ ndɨ àa ghɨ̀ la, ka è ka wua nyɨ̀Ꞌta nê mèndìa è kɨꞋɨ tê ndɔ̀Ꞌ. 7ÈlaꞋ aa li me nù beko, bèfɔ̧̀ be mè ngu me nù beko. Èchɨɨ aa li lu̧ àbȩ, sitsǎꞋ mè ngu me nyìꞋna nkwèà nyɨŋa bòt a èdzìꞋ ègème. 8Mènəè màà ègème naa li wua nyɨ̀Ꞌta wu ntseit, wuê mbɨ̀Ꞌɨ̀ àvi nàa ngɨ̀ tà me kɨ ebi waã tà bùꞋ me lu̧u̧te la.

9Bɔɔ li baãaã wɨ̧ àfɨꞋa mbɔŋ e ŋa bɔɔ zì àwɨ̧ a ngoꞋ ebɔ bùŋè àwɨ̧. Bòt èlaꞋ ègème aa li me pààbè awɨ̧ ambo yaã. 10Bòt nyaŋ aa li lùùlà am àfɨꞋa mbɔŋ, e mě me jɨ mènàŋ a ègwet bɔnyɨ bɔb, mè mpààbà àwɔb. 11Bòt nyaŋ aa li lɔ̀Ꞌte a si àfɨꞋa mbɔŋ e me fɨta shua nê bɔ wu bèndàꞋàtɔŋ Mbɔ̧ɔ̧mà, ngɨ̀à bòt e fà̧à̧tà èka bɔb. 12Kàbɔ̀ŋ naa li ghe, te e ghɨ̌ èkɔŋ bòt nyaŋ ane Mbɔ̧ɔ̧mà aa yu, 13ka wòt tàa li baãaã èntɨ̧ɨ̧ vi te ghǎ ewu a ndìa la, naa li bɔ mèmpème. 14Bɔɔ li tsɔ̀te Ntu̧ Ntsɔ̧̀ kèfɔ̧̀ Mbɔ̧ɔ̧mà yaa a èlaꞋ ègème a sitsǎꞋ mbɨ̀Ꞌɨ̀ waa waa naa zə, ka ngɔ̀ŋ naa lìa.

ÀfɨꞋa ngoꞋ kèkweelè

(Mk 13:14-23; Lk 21:20-24)

15“Naa li ngu àfɨꞋa mbɔŋ bɨ ye àbɨꞋte àghɨ yu Danià ndàꞋàtɔŋ Mbɔ̧ɔ̧mà li shuê la, a tɨ̧ɨ̧ a èbem lob nɨ̧ Mbɔ̧ɔ̧mà la. (Wòt wu ntɔ èngà̧ waa la nyɔꞋta nko ànəa èngǎ̧ mbɔŋ e shua la.)

16“ÀfɨꞋa mbɔŋ bòt bu a Jùdià la, è luula nkɔꞋ ngà a ègwet tèbȩtsə. 17Wòt tà wu a kɔ̧̀ lob la è ka tsi nchu a si enɨ èghɨ a èbem lob zi. 18Wòt tà wu àbȩ la ka tsi nkua akwèn abàꞋa èmǎ̧ vi. 19Aa li bɨɨ àbâ bèzi bu bɔ kɔte la, nè è bu bɔ̀ɔ nyɔ̀ŋa bɔ̧ la àfɨꞋa mbɔŋ. 20Bɨ̀ tsàꞋte a Mbɔ̧ɔ̧mà nê, àlia mànduula yàà à ka ndi ngu a kètsìà àbɨ̂ŋ kò àliapfəèa Bèjuê leꞋ, 21nkàà nê ngoꞋ kèkweelè naa li wu àfɨꞋa mbɔŋ. Èwuu ngoꞋ mbɔŋ wu ye kà bɔ li tè mè ye mbɨ̀Ꞌɨ̀ ngɔ̀ŋ li mbùꞋ ekɨꞋɨ dzəâ àfɨ̀Ꞌ yaa la. Bòt è ka meè ngu li eye yùà ka ngɔ̀ŋ naa lìa. 22È kà chɨɨme ngu na Mbɔ̧ɔ̧mà lo̧o̧ne èli mbɔŋ tè ndɔ̀Ꞌ la, ko wòt kǒ tàa li peme la ntsě, ka tàà ghǎ ambo bòt bu tà làa ane bi la elo̧o̧ne èli mbɔŋ. 23ÀfɨꞋa mbɔŋ wòt shu abua yɨ̧ nê, ‘Bɨ̀ ye a Fɔ̧̀ wu Mbɔ̧ɔ̧mà yɔꞋ ntsà la àdziꞋ yaa ko àdziꞋ zià leꞋ’ bɨ̀ ka mbɨ̧̀ɨ̧̀ne ànəa tà shua la. 24Bòt aa li lɔ̀Ꞌte a si me fɨta shua nê bɔ wu Fɔ̧̀ mbɔŋ e mě me fɨta shua nê, bɔ wu bèndàꞋàtɔŋ Mbɔ̧ɔ̧mà. Bɔɔ li ghɨ̀ èghɨ a nyɨ̀Ꞌta mètàŋ Mbɔ̧ɔ̧mà la, e mě lute tèkaŋtsə mbɨ̀Ꞌɨ̀ efɨte banɔ̧̀, te e me nyɔ̀Ꞌte a màfɨta bòt Mbɔ̧ɔ̧mà na èlu̧ e wuà la. 25Bɨ̀ zə na mâ shua wɨ̧ àfɨꞋa ntsɔ̧̀ tè ndɔ̀Ꞌ la.

26“È wu ale, bɔ shua wɨ̧ nê, tà wu àbâ àlaꞋ àyuube, bɨ̀ ka ngà, kò wuê nê tà wu a èbem àtsəa lob leꞋ, bɨ̀ ka mbɨ̧̀ɨ̧̀ne ànəa bɔ shua la, 27nkàà nê, Waã Wòt naa li kɨꞋɨ mbɨ̀Ꞌɨ̀ èfaŋ àa ngɨ̀ e kaꞋa ègwelebuule ebuꞋu àbâ yaa eghǎ wu àzia la. 28A bê ngu wuê mbɨ̀Ꞌɨ̀ àpfəꞋte nyà̧ àa ngɨ̀ à nɔ̀ŋke adzìꞋ àgème, tè tèdzǐtsə te wu abot la.

Mènkɨ̀Ꞌɨ̂ Waã Wòt

(Mk 13:24-27; Lk 21:25-28)

29“NgoꞋ kèkweelè yu ane èli mbɔŋ la naa li ntsè, me lɔꞋɔ,

‘Àtaãnyèm a fen,

èŋu è ka tsi fə,

těnto̧tsə a ègwet te kwente a si,

Mbɔ̧ɔ̧mà mè nyìꞋì èghɨ ègème àa ègwet la.’

30“ÀfɨꞋa mbɔŋ, àghɨa àa nyɨꞋte nê, Waã Wòt kɨꞋɨ la, a saꞋ a ègwet, bòt èndà̧ ègème a sitsǎꞋ e bùù mèdɨ̀, mbɨ̀Ꞌɨ̀ bɔ ye Waã Wòt nkɨ̀Ꞌa ègwelebuule a èbem mbàꞋ, nè mètàŋ bɔ̂ mèngùꞋte ènɨ̧ Mbɔ̧ɔ̧mà la. 31Bɔɔ li ntɔ taꞋà èsɔndɨk, tà tsàà bɔntu̧ bi bu a ègwet la àbȩ a bètɔ̀Ꞌa sitsǎꞋ bu bakwì la, bɔɔ ghǎ fete bòt bu tà làa ane ebi la, ebùꞋu àbâ ngɔ̀ŋ ko e ghǎ dzə ayea ko.

Nkɨ̀a ane àyɨt a fik

(Mk 13:28-31; Lk 21:29-33)

32“Bɨ̀ nɨ nkɨà ane àyɨt a fik yaa. Nàa ngɨ̀ è wu àfɨꞋa mèntaãaã tò fen, tà bùꞋ me kɔke tèfəꞋte fi la, bɨ ko nê mènkwenà nàà nkɨ̀Ꞌa. 33Wu wuê èlɨ bɨ yea èghɨ bàà ègème, bɨ ko nê, Waã Wòt kɨꞋɨ tê ntsiꞋa ètsələèꞋ la. 34Ane nkûŋ, tsiꞋ è shua wɨ̧ nê, bòt ngɔ̀ŋ àfɨ̀Ꞌ yaa aa me laꞋ nê bɔɔ ndèma, èghɨ bàagème e ghɨ̌. 35SitsǎꞋ bɔ̂ ègwet naa li lɔ̀Ꞌɔ lìa, ka àghɨ à ka wuê li ekubte ane èngǎ̧ am.

Wòt è ntsě tà ko àlia Waã Wòt nàa kɨꞋɨ la

(Mk 13:32-37; Lk 17:26-30, 34-36)

36“Ka wòt kǒ ntsě tà ko àlia èghɨ bàà àa ghɨ̀ la, ka wuê bɔntu̧ Mbɔ̧ɔ̧mà bu a ègwet la, kò Waã Wòt leꞋ. Wu ndàꞋ Mbɔ̧ɔ̧mà ka tà ko la. 37Èlɨ mènəè li ngɨ̀ àfɨꞋa Noà la, wu ndɨ nàa li ghɨ̌ àfɨꞋa Waã Wòt nàa nkɨ ekɨꞋɨ la. 38È li ngu àfɨꞋa mbɔŋ, mèleb mu è li ndû̧ èdziꞋ ègème nkùŋe èghɨ la, me laꞋ nê yea nkɨ̀Ꞌa, bòt e wua jɨ̀a mè nua, mbâ̧tsə nè bèzi e me yɔꞋɔ awɔb tè ngà dzəè àfɨ̀Ꞌ yu Noà li nyi a èbem ànkànuꞋ yu la. 39Bɔ li bɔ̀ ka ko àghɨa nga e ghɨ̀ la, tè mèleb mu kɨꞋɨ̀ ntuꞋu awɔb bàgème. Eyaa wu ndɨ Waã Wòt nàa li kɨꞋɨ la. 40ÀfɨꞋa mbɔŋ, bòt babe aa li ngua mbȩ, bɔ nɨ wemɔ̀Ꞌ, ntɔ̀ɔ wekǒ. 41Bèzi babe e wua èti ngɔ̀Ꞌɔ̀ ntsəètsə, bɔ nɨ wemɔ̀Ꞌ ntɔ̀ɔ wekǒ.

42“È wu ale, bɨ̀ ghaꞋte àghɨ ayɨ̧ ntsɔ̧̀ nkàà nê, bɨ bakà ko àlia tǎt wɨ̧ nàa kɨꞋɨ la. 43Bɨ̀ ko nê tǎt lob ko àfɨꞋa tsɔŋ nàa kɨꞋɨ ètsəꞋ la, kèlɔ kè ka nyi a èghɨ tò mbɨ̀Ꞌɨ̀ bɔ gha ghɨ̌ nkɨ̀Ꞌɨ̂ mbəèꞋəè lob tò. 44È wu ale, bɨ̀ ye nê, bɨ taŋke awɨ̧ ntsɔ̧̀, nkàà nê Waã Wòt naa kɨꞋɨ àfɨꞋa kà bɨ ko nê tàà nkɨ̀Ꞌâ.

45“WafàꞋ ntsɔ̧̀ tà bɔ èyì la wu we ŋaà? Wu wu tǎt àfàꞋ tò zi atò àtsəa beko nê tà me ŋa wɔb èghɨjɨ àfɨꞋa ntsɔ̧̀ la. 46WafàꞋ ngaa naa taꞋa wùꞋtè àvi, na tǎt àfàꞋ tò me kɨꞋɨ àpfəè ndze atò fàꞋà la. 47Ane nkûŋ, tsiꞋ è shua wɨ̧ nê, ko tǎt àfàꞋ wu naa zǐ atò àtsəa èghɨ bi ègème. 48Ka wafàꞋ mbɔŋ wu we kàbɔ̀ŋ, ko taa shu abua zi zìambɔŋ nê, ‘Tǎt àfàꞋ am tseke nyaŋ,’ 49ale tà bùꞋ me lene bɔfàꞋ ko bu, mè jɨa nùa bɔ̂ èbaala mèlùꞋ. 50Ale, ko tǎt àfàꞋ tò naa kɨꞋɨ ane àlia tà ghɨ̂ tà kà wua nchɨꞋa tò la, nè àfɨꞋa kà tà koê. 51Mbɔ̂ ngu saãaãte atò màꞋa a si, e tsàà atò àdziꞋa bòt bu bɔ̀ɔ shua nê bɔ wu àghɨa kà wu yùà la, è wu la, àdziꞋa bɔ̀ɔ me dɨ̀a nkwèla àsɔŋ yɔb la.

Currently Selected:

Matìù 24: mnf

Highlight

Copy