1 Maccabées 1
1
Ubɔti Aleekisandir Ukpaan
1Aleekisandir Ukpaan, ubɔti Fiiliipi jipɔɔn, yíkì u-tiŋkin Maseeduwaan kí cùú já kujaau. U jáń ki pɔ́ɔkiǹ Daariyusi, Peersi yab nì Meedeesi yab bɔtiu ní ki fōō u-paaŋŋu ki kpántì ubɔti. Greeki yab beelin ní u nìn dá láá kāl̀ tibɔtiil. 2Aleekisandir nìn jáń tijáti tikpil. U nìn jáń ki fōō ntimu mun bi máń agun ki túee, ki kūū mu-bɔtiibi. 3U cūtì áli duulinya kúntinyɔkɔ, ki fúkúl̀ ntimu tikpil. U nìn cáań ŋgbansɔŋfi ntimu kɔkɔn, ama ní ki dāa dūu kpántì ulambidaan nì kpeefam daan. 4U nìn kóoǹ dijanjakitikpaandi din pɔ̄ɔ̄ tiŋanee ki kpáfì ní ki nìn dū ntiŋgbamu nì atimbun nì bibɔtiibi ki ŋá u-taapu. U nìn páb́ bíǹ gbanti kɔkɔ bí nīn pà lampoo.
5Míǹ boonee ní u lítì iween pu, ní ki ká yii u làá kpú. 6Niinee ní u yíiń u-janjakpilib nì abɔtibil ŋin u nì bin bi lōō tibiyatin mbaantiimee. U nì bi nìn kpáfì ki kpōotì u-beel ŋyunti ŋun u dáá bí dimaŋfalinee.
7Aleekisandir nìn jíń dibeel abin saalaa nì ali ní ki nín kpíì. 8Ní u-janjakpilibee fōō mpɔn ki jíń dibeel bi-timmu mun pu bi nìn kēe. 9Bi-kɔkɔ nìn cíkiǹ ubɔti beefuuliiki u-kúm boon. Míǹ mbaantiim ní bi-jipɔmbi mun ŋá abin abin. An di cáań mbusu kitiŋ kɔkɔ pu.
Juuda yab fōō Greeki yab bimbim
(2 Maka 4.7-17)
10Aleekisandir Ukpaan beel boon bin fōōyee kansikin ní kisutuntuŋ kin lòoǹ tiloolee nyáń. Bíǹ di sá Antiyookuusi Eepiifaani, Antiyookuusi Ukpaan jipɔɔn. Bi dá láá péé ki cúú-u Room tiŋkin. Míǹ boonee ní u dāa kpántì ubɔti Greeki yab beel pu abin 137. 11Ŋyunti gbantee binib bin kaa tɔ́ Unimbɔti marabee kɔ́nní Isirayeel yab kansikin. Bi nìn ŋúń ki ŋmātiǹ binib tikpil, di sá yii bi nìn lì yii: «Yīkìmaan tí cùú ŋá mpèé nì ntincamu mun māntìi tú-tee. Di sá yii ŋyunti ŋun ti yíì kaa bí kii bimbee ní inaabu tikpil jéetì ti-pu.» 12Binib nìn néeń ki pílifí an bɔtee ní. 13Juuda yab kansikin biba nìn ŋá malaa ki cūtìi ká ubɔti. Úǹ nìn pú-bi nsan bí cùú nīn nóó atimbun ŋin kíǹee nín ŋáań puee. 14Niinee ní bi máń mpaaŋkpaan ŋubɔ Jeerusaleem, kii atimbun gbanti nín māā puee. 15Bi nìn bīiǹ bi-kpancaŋŋi pu#1.15 Kpèè 1 Kɔra 7.18.. Bi nìn fātì bi-boon ki tīī mpèé ŋun nìn bí bi nì Unimbɔti kansikinee ki cūtìi nóó bin kaa sá Juuda yabee. Bi nìn dū bi-ba ki nyáfiǹ-bi kí ŋá tikpitil.
Ubɔti Antiyookuusi Eepiifaani cūtì kí já nì Eejipiti yab
16Antiyookuusi nín ká yii u-beel báaǹ inyaan ki pɔ́ɔkèe ní u ká nlandɔkɔ yii u làá kpántí Eejipiti yab bɔtiu kí nīn kíǹ ki jīǹ abee alee pu tibɔtiil. 17U nìn yōoǹ dijanjakitikpaandi diba nì janjatɔrɔkub nì kujaau kuntib nì bitanjakaliibi nì meelab tikpil ki kɔ́ Eejipiti tiŋkin. 18U nìn kíĺ kujaau nì Eejipiti bɔtiu Pitooleemee, ní úǹ túlifì ki sáǹ. U-janjaliibi tikpil nìn fōō tiweendi. 19Antiyookuusi jáń ki fōō Eejipiti timmu mun bi máń agun ki túee ni ki fúkúl̀ mu-wanti kɔkɔ. 20U nín jáń ki pɔ́ɔkiǹ Eejipiti tiŋki abin 143 poonee ní u fātìi gítìń u-tiŋkin. U nìn dū u-ba ki túĺ Isirayeel watil pú ní u nì u-janjakitikpaandee cūtìi nàn̄ Jeerusaleem kunaau.
Ubɔti Antiyookuusi fúkúl̀ kunimbɔtidii
(2 Maka 5.11-21)
21Antiyookuusi nìn kɔ́ kunimbɔtidiin nì dilambil. U nìn yāntì bi yōoǹ sindaariya saraafaŋŋu nì fitilab tɔ́kɔŋkaati nì ti-wanti, 22nì teebil un pu bi pāantí kpɔnɔb bin bi cáa ŋáań Unimbɔti saraayee nì kɔŋkɔmbi bin poon bi ŋáań ndamam ki féeń Unimbɔtee, nì sindaariya sambiliŋ ŋin poon bi ŋáań talaalu ki tùutēe#1.22 Kpèè 2 Bib 7.48-49., nì ŋŋaapìtikaa nì mbeefuulimu. U nìn yāntì bi lēē sindaariya un bi nìn dūu nyáantì kunimbɔtidii nyɔkɔpuee. 23U nìn yōoǹ animbil nì sindaariya nì tiwan tin cáá kudapɔɔuee. U nìn ká tigaajati tin bi dūu bál̀ee ní ki yōoǹ ti mun ki kpáàa búntì. 24Antiyookuusi kóoǹ tiwan kɔkɔ mimmee ní ki nín kùǹ u-tiŋkin. U nìn kūū binib tikpil ní ki nìn sòon̄ tilambibɔti an kaa cáá bí lì.
25Kitiŋee kɔkɔ poonee, binib nìn kāl̀ dikpool
ki yáliŋkì Isirayeel tiŋki pu tikpil.
26Bibɔtiibi nì bitindaŋkpilib nìn yáliŋkì,
bisapɔmbi nì binaacimpɔmbi kaa ti cáá mpɔn,
ní binimpoobi nyaaŋku gáń.
27Binimpucambi calib nìn tóoń ikpiisilan,
ní binimpucambi kā adiinni nì kunimbaau.
28Nnaabu nee kɔkɔ nimbiinee, kitiŋ nìn cīŋkì.
Jaakɔb nibul kɔkɔ nìn kɔ́ icoon.
Bi máń digundi ki tú Jeerusaleem tiŋki
(2 Maka 5.24-26)
29Abin ali boonee, ní ubɔti Antiyookuusi tú ulampoofool Juuda yab timmun. U nì dijanjakitikpaandi di nìn nóó ki kɔ́ Jeerusaleem tiŋkin. 30U nìn sòon̄ nì bin kóò niinee dikiildi poon yii u cāabìń-bi ŋgbansɔŋfi, ní binib fōō-u ki kíí. Dicilpu niin ní u páatìi jéetì kitiŋee pu. U nìn nāaǹ-kì ní ki kūū Isirayeel yab tikpil. 31U nìn fúkúl̀-kì, ki gāā ŋŋmi ki tūū-kì, ki kpéelikì ki-diiŋŋi nì digundi din māntìi tú-kèe. 32U-janjaliibi nìn cúú binimpoobi nì mbiyaamu ki tɔ́ sarka, ní ki yōoǹ tiwaŋkuti.
33Boonee ní bi máń diguŋkpaandi din pɔ̄ɔ̄yee ki māntìi tú Daafiidi tiŋki, ní ki máń sintil difɔkɔŋi ŋin bi máń agun ki túee ní ki dūu ŋá bi-balilaŋki. 34Bi nìn cáań binikpitib dikitil diba ki kāaǹ niin, binib bin dàkà tipɔmbɔtee, ní an dūu kpántì bi-balilaŋki. 35Mpaan gbanti pu ní bi nìn yōontí tijanjawan nì tijikaal. Bi nìn kóoǹ tigaajawan tin bi nìn fúkulìń Jeerusaleem tiŋkinee mun ki síiǹ niin, ní an nìn sá kutaliŋkpaaŋŋu ki tīī Isirayeel yab.
36An nìn baasii sá kutaliŋŋu ní ki tīī kunimbɔtidii,
ní ki nìn kɔ́ǹ Isirayeel yab agìŋ́kpaan poon.
37Bijanjaliibi nìn cáá maanyiibab fatikuu ki yàantí kí màntīí tū
circir kɔŋkooŋŋu kí kɔ́-ŋu tijɔkɔndi.
38Bi-puee Jeerusaleem yab nìn sáǹ kukunsaŋu.
Kitiŋee nìn dūu kpántì binicambi tiŋki.
Kì nìn kpántì kinicantiŋ ki tīī bitindambi
ní bíǹ dāa gīī ki dū-kì ki fá.
39Ki-circir kɔŋkooŋŋu nìn kūń kii kuteeuee,
ní ki-jiŋaalib dūu kpántì kii dikpool wiiŋyee.
Binib nìn kíǹ ki ŋúb́ ki-wiŋŋuŋfikaai ki lāā,
ní ki kpèé kun nìn tìì-kì tinyoolee fám.
40Ki-cooi gíti sá ikpaan ki jítiǹ tinyool tin kì nìn cááyee,
dikpool fōō ki-kpaanti paaŋŋu.
Ubɔti pīiǹ Juuda yab nimbɔtinool saŋŋu
(2 Maka 6.1-11)
41Ubɔti Antiyookuusi nìn yóoǹ mara yii binib bin kɔkɔ kóò u-beelinee ń dūú kpántí dinibubaantiil 42ní báà ŋma ń fá u-yaajatuuŋŋi. Bin kaa nìn sá Juuda yabee nìn ŋá kii ubɔti nín yóoǹ mara bí ŋá puee. 43Isirayeel yab tikpil mun nìn kíí kí nóó ubɔti saŋŋu. Bi nìn tōotì awaa, ní kaa ti tɔ́ ŋwiŋŋuŋfikaa. 44Ubɔti nìn dū kugbɔŋuee ki tú bi cáa cūnnì ki tīī Jeerusaleem nì Juuda timmun yab. U nìn tīī mara bí nīn kíǹ ki nóó kitiŋee yaajakoobiliŋ. 45U nìn pīiǹ-bi nsan bí taa ti ŋá bisaraawɔkaabi nì ŋwiin kamaa saraabi nì tijimpin saraabi nì ndafakaam kunimbɔtidiin. U nìn tīī-bi mara bí taa ti dū ŋwiŋŋuŋfikaa nì jiŋaalib wiiŋyi kí yíiń tiba, 46ní kí kɔ́ǹ circir kɔŋkooŋŋu nì tin bi cáa tūǹ ku-poon ditundee tijɔkɔndi. 47Míǹ boonee Juuda yab ń mā isaraafan nì iwaatootipaan nì awaadiin kí tīī awaa. Bi gíti máaǹ kí dū igbeeti nì tiwaŋkuti tin bi kòóyee kí ŋá saraabi. 48Baa ti cáá nsan kí gíí bi-biyaamu akpancan, ní kí gíti tɔ̄ ntimbiil tuuŋŋi tikpil kí kɔ́ǹ bi-ba tijɔkɔndi. 49Antiyookuusi nìn là yii Juuda yab ń súntí Mooyiisi marab pu ní kí kpántí tin kɔkɔ maree bālifì yii bí ŋée. 50Un kaa tɔ́ ubɔti marauee máaǹ bí kpɔ̀-u ní. 51Ubɔti nìn dū marab gbanti ki ŋmàn̄ ki ŋá kugbɔŋun ki tīī u-beelin yab kɔkɔ, ní ki lēē bikpilib bí nīn kpèé Juuda yab. U nìn gíti tīī mara Juuda timmu kɔkɔn yii bí nīn ŋáań saraabi bin kaa nóó nì Mooyiisi marabee. 52Juuda yab tikpil bin fá Mooyiisi marabee nìn dū bi-ba ki nákáǹ ubɔti kpilibee, ní ki nìn ŋáań tin kaa kítèe kitiŋee poon. 53An nìn yāntì Isirayeel yab bin nìn yú deedeeyee cá ki bāal̀ laakin kamaa bi nìn ŋūǹ kí báĺee.
54Abin 145 poon Kiisileewu ŋmaliu iwiin saalku dal ní bi máń kuwaŋkpitiu kun cāabìń ntimbiilee#1.54 kuwaŋkpitiu kun cāabìń ntimbiilee: Greeki yab waal Seeyusi saraafaŋŋu, dūú ŋmàntī nì Dani 11.31, 12.11, Maat 24.15. saraawɔkaa faŋŋu pu. U nìn gíti yāntì bi máń isaraafan Juuda timmu mun kíǹee poon. 55Binib nìn tùutī talaalub bi-diiŋŋi punyɔmmu nyɔkɔpui nì imɔŋkijaa pu. 56Ubɔti yab yaa nìn ká Mooyiisi marab gbɔŋkuee, bi nìn cátí-ku ní kí dūú tɔ̄ ŋŋmin. 57Bi yaa nìn ká mpèé gbɔŋku ubɔ cee, àá ubɔ nóó Mooyiisi Marabee, bi nìn kù udaan ní kí nóó nì ubɔti marau un u nìn síiǹee. 58Uŋmal kamaa ntimunee, bi nìn dátí Isirayeel yab bin nìn yú deedeeyee tafal ní. 59Uŋmal kamaa poon iwiin mmuŋku nì iŋmoo dalee#1.59 Uŋmal kamaa poon iwiin mmuŋku nì iŋmoo dalee: an nìn sá ŋwiin ŋun uŋmal kamaa poon bi jīǹ ubɔti maaliwiiŋŋu jiŋaaliuee ní (kpèè 2 Maka 6.7)., bi ŋáań Greeki yab waal saraa nsaraafan ŋun bi máń saraawɔkaa faŋŋu puee ní. 60Kí nóó nì Ubɔti marauee, bi nìn kù binimpoobi bin gíí bi-biyaamu akpancanee 61ní kí dū bi-biyaamu gbanti kí kúĺ kí léeń bi-neeŋyi. Bi nìn kù bi-dicaŋŋi yab, nì bin gíí mbiyaamuee akpancanee. 62Nì míǹ kɔkɔee Isirayeel yab tikpil nìn ká dipɔbil ki yúl̀ nì atajal ali kaa jíń tijin tin làá kɔ́ǹ-bi tijɔkɔndee. 63Bi nìn kíí kí kpú ki jítiǹ bí jī tijin tin kaa bí circiree kí nyā circir pèéŋu boon. Bi nìn kūū-bi. 64Ŋyunti gbantee, Unimbɔti ŋuul nìn dàn̄ Isirayeel yab pu ŋkpitimin.
Currently Selected:
1 Maccabées 1: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.