Bel et le Dragon 1
1
Daniyeel nì Beeli saraaŋaliibi
1Ubɔti Aastiiyaagi nín kpíì ki cūtìi ŋàl̄ u-baabee, upeersija Siirusi di fōō u-yil ki kpántì ubɔti. 2Daniyeel nìn sá ubɔti bɔɔmɔntiu ní ki nìn jítiǹ u-bɔɔbi kɔkɔ. 3Babiloon yab mun nìn cáá diwaal diba bi yíì-dì Beeli. Ŋwiin kamaayee, bi nìn tìì-dì ŋyim kiiloobi alaataa aŋmoo nì ipii imuŋku ili nì ndamam liitirib alaataa ali nì imuŋku ili nì saalaa nyɔkɔm. 4Ubɔti nìn tìì-dì disíndi ní ki nìn jáaḿ-dì. Daniyeel úǹ nìn jáaḿ u-Nimbɔtiu ní. Dalbee ní ubɔti bālifì-u yii: «Ba pu ní aa jáaḿ Beeli ní?» 5Ní Daniyeel kíí-u yii: «Kun puee maa jáaḿ awaa ŋin unil dū u-ŋal ki máńee, ama Unimbɔti un bí dimaŋfalin, ki náań kutagbɔŋu nì kitiŋ#1.5 awaa ŋin unil dū u-ŋal ki máńee: kpèè Yees 44.9-20, Yeer 10.3-5, Ilan 115.4-8. - ki náań kutagbɔŋu nì kitiŋ: kpèè Diny 1.1, Yees 51.16, Ilan 146.6., ní ki cáá tiwan tin kɔkɔ cáá kufoouee pu mpɔnee ní m jáaḿ.» 6Ní ubɔti bí-u yii: «Mimmee a là kí lì yii Beeli kaa sá unimbɔti un bí dimaŋfalinee deeyaaa? Aa kāntí tin kɔkɔ u jīǹ ki nyù ŋwiin kamaayeeee?» 7Ní Daniyeel láń ní ki lī yii: «Ti-baa ubɔti, taa mɔ̄ntì a-ba! An sá kuyɔkɔu ní bi dū tasa kúti ki nyūntì ki bīiǹ#1.7 Dūú ŋmàntī nì Dani 2.32-33.. Waa pée jíń ki nyùn̄ tiba ki ká jaanjaan.»
8Niinee ubɔti fōō mbum ní ki yíí u-saraaŋaliibi ki bí-bi yii: «Ni yaa kaa tùkū-mi un di jīǹ tin ti cāabìńee, ni làá kpú ní. 9Ama ni yaa ŋúń ki dàkā-mi yii Beeli nín jīǹ-tèe, Daniyeel di làá kpú, di sá yii u sòon̄ ki ŋèen̄ nì Beeli.» Ní Daniyeel bí ubɔti yii: «A nín lī puee, án ŋá míǹ!» 10Beeli saraaŋaliibi nìn bí binib imuŋku ita nì saalaa, ní kí nín kūtì binimpoobi nì mbiyaamu. Ubɔti nìn kpáaǹ Daniyeel ki cūnnì diwaal Beeli diikun. 11Beeli saraaŋaliibi nìn lī yii: «Ti-baa ubɔti, kpèè ti làá nyā dee. Nyàab̀ tijin nì ndamam min bi bɔ́ntèe kí síiń kuwaadiin. Míǹ boonee á dū kipunyɔkɔ kí pìin̄ kí kpàl̄ ní kí dū a-jaliiki kí nyīī. 12Fool kutaafaau, a yaa fu dɔ́miń ní ki dáań ki ká yii diwaal Beeli kaa jíń tijin gbantee, á kpɔ̀-ti. Ama dì yaa fu dū tijin gbanti ki jíńee, Daniyeel di làá kpú, kun puee u mɔ́ntì.» 13Bisaraaŋaliibee nìn cáá bi-ba pu dimákal an kaa cáá bí lì, kun puee bi nìn gbìn̄ mbòó ní an tin nyáń teebil taapu kuwaadiin. An puee bi nìn pée ŋūǹ kí kɔ́ niin ŋyunti ŋun bi yaa nìn lèe kí yòon̄ tisaraajin tin bi nín̄ cáa tɔ̄kɔntí teebil puee.
14Ŋyunti ŋun bisaraaŋaliibee nyáńee ní ubɔti nyàab̄ saraa jinti ki síiǹ diwaal Beeli. Míǹ boonee ní Daniyeel tīī u-tɔntɔnliibi mara yii bí cáań ŋfantam. Bi cáańee ní bi dūu yāaǹ kuwaadiin. Ubɔti baba di nìn bí niin ki ká. Míǹ boonee ní bi-kɔkɔ nyáń ní bi dū kipunyɔkɔ ki pīiǹ ki kpàl̄ ní ki dū ubɔti jaliiki ki nyīī#1.14 Dūú ŋmàntī nì Dani 6.18., ní ki búntì. 15Kunyeeuee ní bisaraaŋaliibee nì bi-nimpoobi nì bi-biyaamu dɔ́miń ki jíń ki nyùn̄, kii bi nín kpààa ŋáań puee.
16Kutaafaau pɔ̀lpɔlee ní ubɔti yíkìi cūtì kuwaadiin ki kpáaǹ Daniyeel. 17Niinee ní ubɔti bālifì yii: «Daniyeel, kijalii kin bi dūu nyīīyee dáá gbíntìi bí ki-laŋkaaa?» Ní Daniyeel kíí yii: «Ki dáá gbíntìi bí ki-laŋki, ti-baa ubɔti.» 18Ŋyunti ŋun bi pée pīitì kipunyɔkɔee, ubɔti kpēē teebil puee ní ki téeń mpɔn yii: «A sá ukpaaneeee! diwaal Beeli. Baa kāntí inaamuul a-ni!» 19Ama Daniyeel úǹ nìn kíĺ ki bíi lāā, ní ki pīiǹ nsan ubɔti ń taa kɔ́ poon ní ki bí yii: «Kpèè kudii taapu, a nyí bin yì ataa ŋin dɔ̄ neeee?» 20Ní ubɔti bí yii: «M wāĺ bininjab nì binimpoobi nì mbiyaamu taaŋi!»
21Ní ubɔti fōō mbum ní ki yāntì bi cúú bisaraaŋaliibi nì bi-nimpoobi nì bi-biyaamu. Bisaraaŋaliibi dāa gīīyee ní ki dàkā-u nsan ŋun bi dì ki kóò ki jīǹ tijin tin bi cáa tɔ̄kɔntí teebil puee. 22Niinee ní ubɔti yāntì bi kūū-bi, ní ki dū diwaal Beeli ki tīī Daniyeel, ní úǹ gbáń ki wīī#1.22 Dūú ŋmàntī nì Yees 46.1-2. dì nì di-diiku.
Daniyeel nì ukookpaan bɔti
23Ukookpaan ubɔ mun nìn bí ní Babiloon yab nìn jáaḿ-u. 24Ní ubɔti bí Daniyeel yii: «Aa ŋūǹ kí lì yii u nee úǹ kaa sá unimbɔti un bí dimaŋfalinee. Míǹ puee, gbàan̄ kí jāam̀-u!» 25Ní Daniyeel bí yii: «Ti-Dindaan m-Nimbɔtiu baba ní m làá jāam̀#1.25 Kpèè Ditee 6.4,13, Maat 4.10., di sá yii úǹ baba di bí dimaŋfalin. 26Ama ti-baa ubɔti yaa kíí, maa làá dū kitàataajiki àá ndɔ ní kí kpɔ̀ ukookpaan nee.» Ní ubɔti kíí yii: «Too, m pú-si nsan.» 27Ní Daniyeel yōoǹ aŋɔ nì ŋkpam nì tikuti ki tɔ́kɔǹ dicilpu ki ŋá kalaabi ní ki dūu ŋá ukookpaanee nyɔkɔn. Ukookpaanee dūu ŋmɔ́ee ní ki lítìi kpíì. Ní Daniyeel bí yii: «Kpèèmaan kun ni jáaḿee!»
28Babiloon yab nín gbìl̄ tibɔti gbantee ní bi gíí diŋuul ŋkpitim pu. Bi nìn kóoǹ ki múkúǹ ubɔti pu ní ki bí-u yii: «Ubɔti kpántì ujuudaja! U gbáń ki wīil̀ diwaal Beeli, ki kūū ukookpaan ní ki kūū ki céetì bisaraaŋaliibi.» 29Míǹ boonee ní bi nín cá ubɔti cee ki bí-u yii: «Dū Daniyeel kí ŋá ti-ŋaan, an yaa kaa sá míǹ, ti làá kpɔ̀ sii a-ba nì a-dicaŋkun yab kɔkɔ.» 30Ubɔti nín ká yii bi kā u-pu an kaa cáá tinaacinee, u là waa là, see u nín dū Daniyeel ki ŋá bi-ŋaanee. 31Babiloon yab nìn dū Daniyeel ki tɔ́ gbikintib bookun#1.31 Dūú ŋmàntī nì Dani 6.17.. U nìn kāl̀ niin iwiin iluu ní. 32Mbòó gbantinee, gbikintib biluli di nìn bí. Bi nìn tìì-bi ŋwiin kamaa anikpil ali nì apibil ali ní. Ama min bí neeyee, baa nìn tīī-bi tiba, án nín làá ŋá pu bí bàà cúú Daniyeel kí ŋmɔ́ee.
33Unimbɔti bɔnaatiliu Abakuuki nìn bí Juudee tiŋkin. U nìn ŋá nnyuntum miba ki càkā kpɔnɔb ki ŋá disambil diban ki bàà cáǹ kí tīī bijincaliibi kusaau. 34Ti-Dindaan tuuŋŋu nìn bí-u yii: «Yòon̄ tijin tin a tú nee kí cùnnì kí tīī Daniyeel. U bí Babiloon tiŋkin, gbikintib bookun.» 35Ní Abakuuki bí yii: «Ti-Dindaan, maa cūtì Babiloon tiŋkin ki ká, kaa tí nyí mbòó gbanti mun.» 36Ní ti-Dindaan tuuŋŋu cúú u-yikpiti, ki sáǹ malaa malaa ki jítiǹ kubuŋu pu ki cáá-u ki cūnnì Babiloon tiŋkin. 37Abakuuki téeń ki lī yii: «Daniyeel! Daniyeel! Fōō tijin tin Unimbɔti cáań-see!» 38Daniyeel bí yii: «Unimbɔti, a téetì m-puɔɔ! Aa dù bin néeń-see kí fá#1.38 Kpèè Ilan 9.11, 27.9-10.!» 39Ní Daniyeel kíĺ ki bíi jīǹ. Ŋyunti gbantee, ti-Dindaan tuuŋŋu kpáàa fātìi yōoǹ Abakuuki ki gíiǹ u-dumpu.
40Iwiin iluli dalee, ubɔti dɔ́miń kí sɔ̄ Daniyeel kpool. U bāań ki kpēē kubòóu poonee, Daniyeel di kēe. 41Niinee ní ubɔti téeń mpɔn ki bí yii: «Ti-Dindaan, Daniyeel Nimbɔtiu, a sá ukpaaneeee! Aa cáá juti!» 42Niinee ní u yāntì bi dáaĺ Daniyeel ki nyántì mbòó poon. Ama bin nìn nyàab̀ kí kpɔ̀ Daniyeelee, u nìn cúú-bi ki tɔ́ mbòó poon, ní gbikintib cúú-bi ki tɔ̄ntì niin niin niin u-nimbilin#1.42 Dūú ŋmàntī nì Dani 6.24-25..
Currently Selected:
Bel et le Dragon 1: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.