Susanne 13
13
Susaani maam
1Uninja ubɔ nìn kóò Babiloon tiŋkin, bi yíì-u yii Yooyakiim. 2U nìn cáá Eelkiyaasi bisal Susaani. Unimpuee nìn ŋān̄ kunyaaŋŋu ní ki nìn fàŋkí ti-Dindaan. 3U-baabi nìn sá deedeedambi, ní ki nìn dàkā bi-bisal ki nóó nì Mooyiisi Marau. 4Yooyakiim nìn cáá tigaajati tikpil. U nìn cáá bukpaa bubɔ, bu dɔ̄ ki pìlīǹ u-dumpu. Juuda yab nìn cá u-cee kun puee u nìn sá unikpaan ní bi-kansikin.
5Dibindi gbantee, bi nìn lēē samaa kpilib kansikin bikpilib bili bí nīn sá bibɔsoonliibi. Ti-Dindaan nìn sòon̄ bi-pu yii: «Ikpiti nyánní Babiloon tiŋkin ní ki dūu dīń bikpilib bin sá bibɔsoonliibi ki mɔ́ntí yii bi kpòotī dinibulee pu ní.» 6Bikpilib gbanti mun nìn dòoń Yooyakiim dumpu, ní binib bin kɔkɔ cáá tibɔti ki là bí sòoǹ kí tīī-bee nìn cá bi-cee. 7Too, binib yaa nìn nín kùǹ kuwiŋkuluuee, Susaani nìn kóò u-cal kpaabun ki còom̄ ki fòol̄ kubuŋu. 8Bikpilib bilee nìn kāntí-u u nín kóò baabadal ki còom̄ ki fòol̄ kubuŋuee, ní bi-landɔkɔŋu gítì u-pu. 9Bi-landɔkɔi nìn gátì. Bi nìn fātì bi-nimbikpeeŋu kaa nìn là kí kpèè Unimbɔti un bí yilpuee, án nín làá ŋá pu bí taa téetí deedee bɔsooŋyi in u làá dāá sòoǹee pu. 10Bi-liitilee kɔkɔ nìn bí ki kúù u-pu, ama baa nìn lēē tin bí bi-ni ki páb́-bee ki dàkā tɔb. 11An nìn cáá-bi icoo bí lēē tin bi nìn dàkafēe kí páań mpaampiin pu, di sá yii báà ŋma nìn pée là kí dòon̄ nì u ní. 12Baabadalee bi pée cɔ́ŋkí kí pée ŋmā kí wāl̀-u. 13Dalba kuwiŋkuluuee ní bi bí tɔb yii: «Tí kpì, di sá yii kuwiŋkuluu yuntiŋu bāań», ní báà ŋma nyáń ki nín cá u-laŋki. 14Ama míǹ boonee, bi fātìi nín gítiń ní ki dāa dūu kpáfì ki kíǹ ki yú ki kpèé tɔb. Bi bíi bàlifī tɔb kun pu ní bi fātìi gítìńee ní ki dāa dūu bīitì ibaamɔn pu. Niinee ní bi kpáfì kinyɔkɔ kí ŋmā kí nyàab̀ ŋyunti ŋun bi làá ŋmā kí ká-u u-babee.
Bikpilib bíi kɔ́kɔĺ Susaani
15Bi pée bíi cɔ́ŋkí ki nyàab̀ ŋyuntimɔntee, dalbee Susaani dūu kɔ́nní bukpaan kii u nín nìn ŋá iwiin ili in jítèe puee. Bisapɔmbi bili ja di nìn céeǹ-u. U nìn ká nlandɔkɔ yii u làá fàl̀, di sá yii an nìn tùm̀. 16Báà ubɔ kaa nìn bí niin, asee bikpilib bilee di nìn bál̀ ki bíi cɔ́ŋkí-u. 17Susaani nìn bí bisapɔmbee yii: «Cùú cáaḿmaan-mi ŋkpam nì talaalub. Ni yaa nyánnée, ní dū bukpaa punyɔɔjaatimu kí pìin̄ kí kpàl̄ ḿ ŋmā kí fàl̀.» 18Ní bisapɔmbee ŋá kii u nín bí yii bí ŋá puee. Bi nìn dū bukpaayee punyɔɔjaatimu ki pīiǹ ki kpàl̄, ní ki dūu dī dijandi diba pú punyɔkɔki ki nyáń kí cùú nyàab̀ tin u bālifì-bi bí cáańee. Baa nìn ká bikpilibee, di sá yii bi nìn bál̀ ní. 19Ŋyunti ŋun bisapɔmbee nyáń kpalaayee, ní bikpilib bilee yíkì ki nín cá u-cee 20ki bí-u yii: «Kpèè bi dūu bukpaa punyɔjaatimu ki pīiǹ ki kpàl̄, ní ubɔ mun kaa wāĺ-ti. Ti baasii là-si ní, an puee kíí tí dòon̄ nì si. 21A yaa yíì, ti làá cùú lì yii sii nì kinaacimpɔmbiki kiba di bí, an pu gba ní a jìn̄ bisapɔmbi ki nyántì.»
22Niinee ní Susaani fáá diniindi ki téeń yii: «An māntìi gíb́-mi an kɔkɔ pu. Di sá yii m yaa kíí ki ŋá míǹ, m làá kpú. M yaa ti yíì, maa làá ŋmátí kí nyā ni-ŋaan. 23Ama an sɔ́ ḿ taa ŋá tin bí nee kí kɔ́ ni-ŋaan ki jítiǹ ḿ yìntīǹ ti-Dindaan#1.23 Dūú ŋmàntī nì Diny 39.9, 2 Sami 24.14..» 24Niinee Susaani fáá mbiil mpɔn ní bikpilib bilee mun bíi kūuntí ki kɔ́kɔĺ-u. 25Ní bi-kansikin ubɔ sáǹ ki cūtìi pīitì bukpaa punyɔmmu ki wāaǹ. 26Ŋyunti ŋun bitɔntɔnliibi bin bí mmɔŋkee gbìl̄ ibiil gbanti puee, ní bi sáǹ ki nín cá bukpaan ki dūu dī dijandi diba pú punyɔkɔki kí kpèè kun di ŋá Susaanee. 27Ní bikpilibee dūu tin bi nyée ki máafì-bi. Icoo nìn cúú bitɔntɔnliibee, di sá yii ubɔ kaa láa pée sòon̄ tibɔti tin bí kii tineeyee Susaani pu.
28Kutaa wúntèe, samaa kóoǹ ki kpáfì u-cal Yooyakiim cee. Bikpilib bilee mun nìn dūu bāań ki bɔ́ntì tibɔkpitil Susaani pu kí kpɔ̀-u. 29Bi nìn sòon̄ samaa nimbiin yii: «Tɔ̄maan bí yíiń Eelkiyaasi bisal Susaani, Yooyakiim nimpuu.» 30Susaani nìn bāań ki kpáaǹ u-baabi nì u-biyaamu nì u-nabiyaamu kɔkɔ. 31Susaani nìn bí ní gbàlgbal ní ki ŋān̄ kunyaaŋŋu an kaa cáá bí lì. 32Susaani nìn dū ŋŋaabiiŋkaa ki bīiǹ. Ama bikpitib gbanti nìn tīī mara yii ú cúú ŋŋaabiiŋkaa ŋun u nìn bīīyee kí bìitī, án nín làá ŋá pu bí gíti ŋmā kí ká u-nyaaŋku kí kpèèyee. 33U-dicaŋkun yab nì bin kɔkɔ nìn ká-uee nìn sūǹ ní.
34Bikpilib bilee nìn yíkì samaa kansikin ní ki dū bi-ŋalii ki páaǹ Susaani yil pu#1.34 Dūú ŋmàntī nì Akoo 24.14.. 35Ama úǹ nìn pée bí nsiim pu ní ki wáaǹ ki kpēē kutaa, di sá yii u nìn cáá ti-Dindaan pu ní dimákal. 36Bikpilibee nìn lī yii: «Ti nìn bí bukpaan ti-baba ki yìiǹ, ŋyunti ŋun ní u nì bisapɔmbi bili táá ki kɔ́nnée. U nìn dū mpunyɔmu ki pīiǹ ki kpàl̄ ní ki jìn̄ bisapɔmbee ki nyántì. 37Niinee ní kinaacimpɔmbiki kiba bál̀ laaba ki nyánní ki dɔ́miń u-cee ní ki dōoǹ nì u. 38Ti nìn bí bukpaan ŋfaŋfakam laaba. Ti nín ká ikpiti gbantee ní ti sáǹ ki nín cá bi-cee. 39Ti ká-bi bi bíi dɔ̀ nì tɔb, ama taa ŋúń ki cúú kinaacimpɔmbikee, di sá yii kì pɔ̄ɔ̄ ki jítiǹ timbi. Niinee ní u cúú bukpaa punyɔmmu ki pīitì ní kì sáǹ ki kátì. 40Ama ti ŋúń ki cúú unimpu ní ki bālifì-u ú tùkù-ti un di sá kinaacimpɔmbiki gbantee. 41Ama u yíì kaa tùkū-ti un ní an sée. An puee ti lēē mmɔ́ɔn tibɔti gbanti pu.»
Samaa nìn fōō tin bi sòon̄ee ki kíí, kun puee bíǹ di nìn sá samaa kpilib nì bibɔsoonliibi. Bi nìn sòon̄ ki kūū Susaani bɔti yii bí kpɔ̀-u. 42Niinee ní Susaani téeń mpɔn ki lī yii: «Talku Nimbɔtiu, sii un di nyí tibɔbalkaal#1.42 Dūú ŋmàntī nì Ilan 33.13-15, Alaŋ 15.11, Eebru 4.13. ní ki nyí tiwan kɔkɔ kí wàatī ní tí nín bàńee! 43A nyí tiŋan yii an sá dibɔgabil ní bi túǹ-mi. Kpèè m làá kpú dee kaa kpáàa ŋá tin bi dū ntoonam poon ki bɔ́ntì ki túǹ m-puee.»
44Ti-Dindaan nìn gbìl̄ u-kuŋkuutii pu.
Daniyeel sòon̄ ki pɔ̀n̄ Susaani
45Ŋyunti ŋun bi cáǹ-u kí kpɔ̀ee ní Unimbɔti lūkutì kinaacimpɔmbiki kin bi yíì yii Daniyeelee fam#1.45 Daniyeel ciiŋyi nì u-nyil puee, kpèè Dani 4.5, 5.11-14.. 46U nìn kíĺ ki bíi kūuntí mpɔn yii: «Maa là unimpu nee fatikuu kpuulool ń gítí m-pu.» 47Niinee samaa kɔkɔ fātì u-watil pú ní ki bālifì yii: «A là kí lì yii ba dee?» 48Ama ní úǹ yáatìi yúl̀ bi-kansikin ní ki bí yii: «Isirayeel yab, ni-yiliŋ lábitì níii? Ni sòon̄ ki kūū uisirayeelnimpu bɔti kaa nyɔ̄kɔfì ki kpēē tibɔti nín sá puee kí béé ibaamɔnaaa? 49Fàtīí gítímaan kubɔsoondiin! Di sá yii bin bí nee túǹ-u dibɔgabil ní.»
50Niinee samaa kɔkɔ fātìi nín gítí malaa, ní bikpilib bí Daniyeel yii: «Dāá kàl̄ ti-kansikin kí tùkù-ti a-landɔkɔŋu nín sá puee, di sá yii Unimbɔti tīī-si bikpilib ciiŋyi ní.» 51Ní Daniyeel bí-bi yii: «Ní yàkatī bininjab bili nee bí nīn dátiǹ tɔb, m làá sòoǹ bi-bɔti.» 52Ŋyunti ŋun bi cúú-bi ki yākatiǹ tɔbee, ní u yíiń bi-kansikin ubɔ ní ki bí-u yii: «Sii un ŋá ikpiti áli ki tin kpáàa púĺee, ikpiti in a ŋá an jítèe jìn̄ ki cúú-si ní nee. 53Aa nìn sòon̄ tibɔti ibaamɔn. A sòon̄ ki kūū maanyiibab bɔti, ki pɔ̀n̄ dibɔkpil daan. Ama ti-Dindaan nìn lī yii: <Ní taa kpɔ̀ maanyiiba nì deedeedaan#1.53 Kpèè Disa 23.7..> 54Too kɔŋkɔnnee, a yaa lafun cúú Susaani nì kinaacimpɔmbikee, tùkū-ti disucil din taapu ní a cúú-bi bi bíi dɔ̀ nì tɔbee.» Ní uninjee kíí-u yii: «An sá seeni subu taapu.» 55Daniyeel bí-u yii: «Kpèè nnyimɔn ŋun làá fàtīí gítí a-puee dee! Di sá yii Unimbɔti tīī u-tuuŋŋu mara yii ú cúú-si kí búkutí mili.»
56Daniyeel jìn̄-uee ní ki yāntì bi yíiń un kíǹee. U nìn bí-u yii: «Sii un sá Kanaan yab naantiiu kaa sá Juuda yɔuee, kunyaaŋŋu yāntì a-yil gátì, ní nnimbitaataam yāntì a wáŋkì. 57Dooooyee ni nín nìn ŋáań Isirayeel nimpoobi puee dee, ní bi nín nìn fàŋkí-ni puee, bi nìn kíikí ki dɔ̀ nì ni. Ama Juuda tiŋki nimpuu kaa kíí ní ŋá ni-kpitii gbanti. 58Too kɔŋkɔnnee, tùkù-mi, disucil dilal taapu ní a cúú-bi bi bíi dɔ̀ nì tɔb?» Ní u kíí-u yii: «Diseensɔmbil taapu.» 59Ní Daniyeel bí-u yii: «Kpèè a-nyimɔŋŋu nee làá fàtīí gítí a-yil pu ní! Di sá yii Unimbɔti tuuŋŋu ŋúb́ kitàataajiki u-ŋaan kí pùtī-si mili, ní kí kpɔ̀ ni-liitil.»
60Niinee Isirayeel samaau kɔkɔ kúuǹ mpɔn, ki bíi nyɔ́ŋkí Unimbɔti un fìil̄ bin máká u-puee#1.60 Kpèè Ilan 17.7.. 61Niinee samaa fātìi dūu nyáń bikpilib bilee pu. Di sá yii Daniyeel nìn dū tin bi sòon̄ee pu ní ki dàkā yii bi lēē nnyimɔn seerau. Bi nín nìn dākafì ntoonam poon kí ŋá bi-juti puee, míǹ ní bi ŋá-bi. 62Bi nìn ŋá ki nóó nì Mooyiisi marau nín nìn lī puee ní#1.62 B. 61-62: kpèè Ditee 19.16-21.. Bi nìn kūū-bi ní ki fīī maanyiiba maŋfal ŋwiin gbanti. 63Eelkiyaasi nì u-nimpuu nìn nyɔ́ŋkì Unimbɔti bi-bisal Susaani pu, ki kpáaǹ u-cal Yooyakiim nì bi-nabiyaamu kɔkɔ. Kun puee baa nìn ká tibɔkpitil tiba kí sòoǹ Susaani pu.
64Ŋwiin gbanti kí nīn cée ní Daniyeel dūu kpántì unikpaan samaa nimbiin.
Currently Selected:
Susanne 13: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.