Cantique des trois jeunes 3
3
Ananiya wimmeem
1(3.24) Binib bitee, Ananiya nì Asariya nì Miikayeel#1.1 Asariya nì Ananiya nì Miikayeel: kpèè Dani 1.7. nìn bí ki còom̄ aŋmilimbil poon ki nyɔ́ŋkí Unimbɔti ki jáaḿ ti-Dindaan. 2(3.25) Asariya nìn yú ki mèé, ní ki tábití u-nyɔkɔ ŋŋmi poon ki lì yii:
3(3.26) «Ti-Dindaan ti-baabi Nimbɔtiu, ijaam nì inyɔŋki sá ki tīī-si. A-yindi ń ká inyɔŋki kí nīn cá jaanjaan! 4(3.27) Tin kɔkɔ ní a ŋée sá deedee ní. Atuun ŋin ní a túńee sá deedee tuuŋŋi. A-saŋyi tèen̄ ní a cáá ibaamɔn ki sòoǹ binib bɔti#1.4 Dūú ŋmàntī nì Neey 9.33.. 5(3.28) A nín yāntì tin bāań ti nì ti-baabi circir tiŋki Jeerusaleem puee, a sòon̄ ti-bɔti nì ibaamɔn ní. Di sá yii a cáá mbaamɔn ki cáá nsan kí yàntī tíǹ ń bàń-ti ti-kpitii pu. 6(3.29) Di sá yii ti yīntiǹ-si ki ŋá tin kaa kítèe ní ki fātì ti-boon ki tīī-si. Ti yīntiǹ-si tikɔkɔ poon kaa tɔ́ a-marab. 7(3.30) Taa tɔ́ a-marab, taa ŋúb́-baaa, kaa ŋá kii bi nín bí yii tí ŋá puee mun. Ama ti-ŋanti pu ní a bàà nìn tīī-ti marab gbanti#1.7 Dūú ŋmàntī nì Yees 59.12-13, Neey 1.7.. 8(3.31) Nnaabu ŋun a dūu tɔ́ ti-puee nì tin kɔkɔ a ŋá-tee sá deedee ní, an lafun máaǹ míǹ. 9(3.32) A dū-ti ki ŋá ti-nannanliibi ŋaan, ti-nannanliibi bin sá binikpitib ki sá pɔɔgaatibee. A dū-ti ki líiǹ ubɔti un kaa bí deedee ki sá ukpiti kitiŋ pu bɔtiibi kɔkɔ kansikinee. 10(3.33) An pu ní kɔŋkɔnnee, timbi bin sá a-tɔntɔnliibi ki jáaḿ-see, taa ti ŋūǹ kí wàan̄ kinyɔkɔ gba, icoo kɔ́-ti ní gbòooo. 11(3.34) A-yindi puee, taa dū-ti kí fá talku! Taa kpìtī a-poondi. 12(3.35) Abraam a-bɔɔ nì Isaaki a-tɔntɔnliu nì Jaakɔb un sá circirdaanee puee, taa cúú a-saasɔl kí páatí ti-pu#1.12 Kpèè Yees 41.8, 2 Kroo 20.7, Yaku 2.23.. 13(3.36) A nìn pōoǹ-bi yii a làá bùtī bi-naantiibi bí nīn kíǹ ki wīikí kii iŋmalbijaa nì tiŋku gbandi bulee#1.13 Kpèè Diny 22.17.. 14(3.37) Ti-Dindaan, ti kpántì kitimbulii ní, taa ti pée náaǹ. Díǹ pu nee, ti-kpitii puee, taa ti pée bí tiban. 15(3.38) Díǹ pu nee, taa ti cáá ubɔtaaa, ubɔnaatilaaa, ukpil mun. Taa ti ŋūǹ kí ŋá bisaraawɔkaabaaa, tijimpin saraauaaa, kaa tí ŋūǹ kí tūū talaalutuukaa mun. Taa ti cáá mpaan ŋun pu ti ŋūǹ kí nīn cāabìń ti-jincɔ̀fikaati ki tìì-si kí ŋmā kí ká a-saasɔlee. 16(3.39) Ama ti-pɔbiliŋ nín wīī puee nì ti nín sīntì ti-ba taapu ki tīī-si puee puee, fōō-ti. 17(3.40) Fōō-ti kii ti yaa bàà cáań ipijaa nì inajaa kí ŋá bisaraawɔkaabi kí tīī-see. Yàntī ti-saraabi ń nīn bí a-nimbiin díǹ kii ti yaa bàà cáań apibil ŋin cáá ŋkpamee cutimaanyi kí tīī-see. Tūtuǹ-ti tí ŋmā kí nīn gbíntìi nóó-si, di sá yii icoo kaa cútí bin di dū bi-mákal ki páaǹ a-puee jaanjaan. 18(3.41) Kɔŋkɔnnee, ti nóó-si nì dipɔbil diba, ki fàŋkí-si ní ki nyàab̀-si. 19(3.42) Taa kɔ́ǹ-ti icoo, ama dàkà-ti a-laŋŋaŋfitiiku nì a-poommɔŋŋu! 20(3.43) Ti-Dindaan, ŋá a-maamaaci tuuŋŋi kí fīī-ti, ní kí tīī a-yindi tinyool! 21(3.44) Yàntī icoo ń cúú bin kɔkɔ pée bíi dàkafī kí ŋá a-tɔntɔnliibi tikpitilee! Bí fá bi-nyooti kí taa ti nín̄ cáá mpɔn. Nàan̄ bi-kpabil#1.21 Dūú ŋmàntī nì Ilan 35.26, 40.15.! 22(3.45) Yàntī bí béé yii sii baba di sá ti-Dindaan Unimbɔti, ki cáá tinyool kitiŋ kɔkɔ pu!»
Daniyeel bɔɔbi bitee laŋŋu
23(3.46) Ubɔti tɔntɔnliibi bin nìn dū binaacimpɔmbi bitee ki tɔ́ ŋŋminee nìn cáá aŋɔb nì idɔ ki tòó ŋŋmin kaa gbèentí. 24(3.47) Aŋmilimbil nìn nyēē kipaai yilpu ki bàn̄ kii meetab mmuŋku nì binaa. 25(3.48) Aŋmilimbilee nìn dūu yàl̄ ní ki wùn̄ Babiloon yab bin nìn bí ki māntìi tú kipaayee. 26(3.49) Ama ti-Dindaan tuuŋŋu nìn kpákatì ki kɔ́ kipaai kin poon Asariya nì u-bɔɔbi nìn bée, ní ki nìn cútí aŋmilimbilee ki tòó ki nyāntí kipaayin. 27(3.50) Ŋu nìn yāntì ŋŋmi sɔ̄ŋkì fílfil kii kubuŋu kun yòontí dimalindee nín sɔ̀m̀ puee. Ŋŋmi kaa nìn gbēē-baaa, kaa nìn ŋá-bi tiweendaaa, kaa nìn páb́-bi mun. 28(3.51) Niinee bitaantilee kpáfì ki kíĺ ki bíi pàkà, ki nyɔ́ŋkí ki jáaḿ Unimbɔti kipaayee poon ki lì yii:
29(3.52) «Ti jáaḿ-si ti-Dindaan, ti-baabi Nimbɔtiu.
Sii di máaǹ inyɔŋki nì tinyool kí nīn cáa cá jaanjaan!
Ti-Dindaan, ti jáaḿ-si a-yindi din cáá tinyool ki sá circiree pu.
Ti làá nyɔ̄ŋkì-si ní kí yòon̄ a-yindi yilpu kí nīn cáa cá talku.
30(3.53) Ti làá jāam̀-si a-circir Diiku kun poon ní tinyool gbée ni.
Sii di yì inyɔŋki nì tinyool kí nīn cáa cá jaanjaan!
31(3.54) Ti jáaḿ-si sii un di kā keerubimbi pu
ní ki wāĺ tiŋku taapuee!
Sii di yì ipaka ní ki máaǹ bí yòon̄-si yilpu kí nīn cá talku#1.31 Kpèè Disa 25.22.!
32(3.55) Ti jáaḿ-si, sii un di kā a-beejal puee.
Sii di yì ipaka ní ki máaǹ bí yòon̄-si yilpu kí nīn cá talku!
33(3.56) Ti jáaḿ-si yilpu bɔtiu.
Sii di yì ipaka ní ki máaǹ bí yòon̄-si yilpu kí nīn cá talku!
34(3.57) Ti-Dindaan wannaaŋkaati kɔkɔ, ní jāam̀maan ti-Dindaan.
Ní pàkà-u kí yòom̄maan-u yilpu kí nīn cá talku#1.34 Kpèè Ilan 103.22.!
35(3.58) Kutagbɔŋu, jāam̀ ti-Dindaan!
Pàkà-u kí yòon̄-u yilpu kí nīn cá talku!
36(3.59) Ti-Dindaan tuuŋyi, ní jāam̀maan ti-Dindaan!
Ní pàkà-u kí yòom̄maan-u yilpu kí nīn cá talku!
37(3.60) Inyiŋfi in bí yilpuee, jāam̀maan ti-Dindaan.
Ní pàkà-u kí yòom̄maan-u yilpu kí nīn cá talku#1.37 B. 36-37: kpèè Ilan 148.2-4. !
38(3.61) Ti-Dindaan janjakitiŋ kɔkɔ, jāam̀maan ti-Dindaan.
Ní pàkà-u kí yòom̄maan-u yilpu kí nīn cá talku!
39(3.62) Ŋwìiń nì uŋmal, jāam̀maan ti-Dindaan.
Ní pàkà-u kí yòom̄maan-u yilpu kí nīn cá talku!
40(3.63) Iŋmalbijaa, nyɔ̄ŋkìmaan ti-Dindaan.
Ní pàkà-u kí yòom̄maan-u yilpu kí nīn cá talku#1.40 B. 39-40: kpèè Ilan 148.3.!
41(3.64) Utaa nì dimalindi, jāam̀maan ti-Dindaan.
Ní pàkà-u kí yòom̄maan-u yilpu kí nīn cá talku!
42(3.65) Kubuŋu, jāam̀ ti-Dindaan.
Pàkà-u kí yòon̄-u yilpu kí nīn cá talku!
43(3.66) Ŋŋmi nì ŋŋmifaam, jāam̀maan ti-Dindaan.
Ní pàkà-u kí yòom̄maan-u yilpu kí nīn cá talku!
44(3.67) Nsɔŋfi nì kutuntuŋu, jāam̀maan ti-Dindaan.
Ní pàkà-u kí yòom̄maan-u yilpu kí nīn cá talku!
45(3.68) Dimalindi nì putipuuki, jāam̀maan ti-Dindaan.
Ní pàkà-u kí yòom̄maan-u yilpu kí nīn cá talku!
46(3.69) Tinyati nì iwiimpu, jāam̀maan ti-Dindaan.
Ní pàkà-u kí yòom̄maan-u yilpu kí nīn cá talku!
47(3.70) Ŋwalifi nì abɔmbɔn, jāam̀maan ti-Dindaan.
Ní pàkà-u kí yòom̄maan-u yilpu kí nīn cá talku!
48(3.71) Nnyim min kìl̄ee nì tiwool, jāam̀maan ti-Dindaan.
Ní pàkà-u kí yòom̄maan-u yilpu kí nīn cá talku!
49(3.72) Dinyintaŋkpal nì ntaayim, jāam̀maan ti-Dindaan.
Ní pàkà-u kí yòom̄maan-u yilpu kí nīn cá talku!
50(3.73) Itaaŋmɔŋmɔ nì atagban, jāam̀maan ti-Dindaan.
Ní pàkà-u kí yòom̄maan-u yilpu kí nīn cá talku!
51(3.74) Kitiŋ ń jāam̀ ti-Dindaan.
Kí pàkà-u kí yòon̄ u-yindi yilpu kí nīn cá talku!
52(3.75) Ajoon nì agbantan, jāam̀maan ti-Dindaan.
Ní pàkà-u kí yòom̄maan-u yilpu kí nīn cá talku!
53(3.76) Tin kɔkɔ nyēē kitiŋ puee, jāam̀maan ti-Dindaan.
Ní pàkà-u kí yòom̄maan-u yilpu kí nīn cá talku!
54(3.77) Tiŋkub nì amɔɔ, jāam̀maan ti-Dindaan.
Ní pàkà-u kí yòom̄maan-u yilpu kí nīn cá talku!
55(3.78) Anyimbulnimbil, jāam̀maan ti-Dindaan.
Ní pàkà-u kí yòom̄maan-u yilpu kí nīn cá talku!
56(3.79) Ijɔŋkpaan nì tiwaŋkuti tin kóò nnyiminee, jāam̀maan ti-Dindaan.
Ní pàkà-u kí yòom̄maan-u yilpu kí nīn cá talku!
57(3.80) Inoon, jāam̀maan ti-Dindaan.
Ní pàkà-u kí yòom̄maan-u yilpu kí nīn cá talku!
58(3.81) Ipeel nì tiwaŋkuti, jāam̀maan ti-Dindaan.
Ní pàkà-u kí yòom̄maan-u yilpu kí nīn cá talku#1.58 B. 57-58: kpèè Ilan 148.10.!
59(3.82) Binib, jāam̀maan ti-Dindaan.
Ní pàkà-u kí yòom̄maan-u yilpu kí nīn cá talku!
60(3.83) Isirayeel yab, jāam̀maan ti-Dindaan.
Ní pàkà-u kí yòom̄maan-u yilpu kí nīn cá talku!
61(3.84) Bisaraaŋaliibi, jāam̀maan ti-Dindaan.
Ní pàkà-u kí yòom̄maan-u yilpu kí nīn cá talku!
62(3.85) Ti-Dindaan tɔntɔnliibi, jāam̀maan ti-Dindaan.
Ní pàkà-u kí yòom̄maan-u yilpu kí nīn cá talku!
63(3.86) Deedeedambi fam nì bi-nammu, jāam̀maan ti-Dindaan.
Ní pàkà-u kí yòom̄maan-u yilpu kí nīn cá talku!
64(3.87) Circirdambi nì bin sīntiǹ bi-ba taapuee, jāam̀maan ti-Dindaan.
Ní pàkà-u kí yòom̄maan-u yilpu kí nīn cá talku!
65(3.88) Ananiya nì Asariya nì Miikayeel, jāam̀maan ti-Dindaan.
Ní pàkà-u kí yòom̄maan-u yilpu kí nīn cá talku!
Di sá yii u fīī-ti ki nyántì ditaŋkpiilin,
ní ki fīī-ti ki nyántì ŋkúm ŋaan.
U fīī-ti ki nyántì kipaai ŋmiŋun,
u nyántì-ti ŋŋmi kansikin.
66(3.89) Ní nyɔ̄ŋkìmaan ti-Dindaan, di sá yii u ŋān̄,
ní u-poon mɔ̄ ki cá talku#1.66 Kpèè Ilan 106.1..
67(3.90) Nimbi bin jáaḿ ti-Dindaanee, jāam̀maan inimbɔti kɔkɔ Nimbɔtiu.
Pàkàmaan-u kí nyɔ̄ŋkì-u.
Di sá yii u-poon mɔ̄ kí nīn cá talku#1.67 Kpèè Ilan 136.2.!»
Currently Selected:
Cantique des trois jeunes 3: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.