Lettre de Jérémie 6
6
Ní nīn nyíǹ ni-ba nì awaa
(Kpèè Yees 40.18-20, 41.21-29, 44.9-20, Ilan 135.15-18, Iciin 13-15, Dani grek 14.1-22)
1Ni yīntiǹ Unimbɔti. An pu ní Babiloon bɔtiu Neebukadineesaar làá cúú-ni kí cùnnì u-tiŋkin kuyuŋu. 2Ni làá kàl̄ niin kí yúntí. Ni làá ŋá niin abin kupaau, anaantitɔntɔkɔ aluli pu. Ama ti-Dindaan bí yii: «Míǹ boonee, m làá yàntī ní nyā niin nì ŋgbansɔŋfi.» 3Babiloon tiŋkin niinee, ni làá ká awaa ŋin bi dū idɔ ki kpítì ki dū animbil kúti nì sindaariya ki nyūntèe. Bi bùkù-ŋi tigbigbipati pu, ní Babiloon yab tɔ́-ŋi tikpil#1.3 Dūú ŋmàntī nì Yeer 10.3-4.. 4An puee ní cúú ni-ba! Ní taa kpántí kii binicambi gbantee. Ní taa fàŋkì bi-waaŋi gbanti 5ni yaa láa ká binib kupaau gbāā bi-yigbeeŋi tūū kitiŋ ŋi-nyɔkɔpu nì ŋi-boonee. Ama ní lì ni-pɔbilin yii: «Ti-Dindaan, an sá sii ní tí jāam̀.» 6Di sá yii ti-Dindaan lī yii: «M-tuuŋŋu bí ni-cee, ŋúǹ di làá nīn wúń ni-pu.»
Awaa kaa máaǹ kí kīil̀ ŋi-ba
7Ukpiŋkpiiti di kpítì awaa gbanti limbiliŋ. Bi dūntì sindaariya nì animbil kúti ní ki nyūntì-ŋi, ama awaa gbanti sá tinyimɔmbɔti ní. Ŋaa ŋūǹ kí sòoǹ. 8Kii usapɔɔn un néeń dinyiŋfaldi ki bɔ́ntí u-bee nín bí puee, míǹ ní binib yòontí sindaariya 9kí dūú mɔ́ɔ́ kibeefuulii kí cíkiń bi-waaŋi. Iyunti ibee ŋi-tandambi yù sindaariya nì animbil ŋin náká ŋi-puee kí dūú ŋá tin bi lèe. 10Bi cáá sindaariya nì animbilee ki pūǹ nnimpulaakpaamu mun bí awaadiinnee. Awaa ŋin sá idɔ nì sindaariya nì animbil kúti gbantee, ní bí dū tiwampeeŋkaal kí pèen̄-ŋi kii unilee. 11Ama ŋaa ŋūǹ kí ŋá tiba kí taa dāmintì àá kí bùkū#1.11 Dūú ŋmàntī nì Mala 3.11, Yoob 13.28.. Bi yaa dū abɔkutimɔnti aman ki pēeǹ-ŋee, 12bi pítí ŋi-nimbiiŋyi kuwaadii kpɔŋkpɔm min gáĺ-ŋee ní. 13Min kamaa diwaal kaa ŋūǹ kí kpɔ̀ u yīntiǹ-dèe, dì ŋúb̀ mbɔtikpandɔ kii kitiŋ kiba bɔsoonliuee ní. 14Dì ŋúb̀ kitàataajiki di-ŋaŋgiilin nì kicɔkɔ. Ama soojab àá binaayub yaa bāańee, dàa ŋūǹ kí wúń di-ba pu. An di yàntī tí béé yii dàa sá inimbɔti. An puee ní taa fàŋkì-dì.
15Kii abɔkati nín kaa bí tiban puee, 16míǹ ní bi-waaŋi ŋin bi dūu síiǹ bi-waadiiŋŋinee bí. Binib bin kóò awaadiinnee nín yòontí ŋkpɔŋkpɔm miŋyee di gál̀-ŋi. 17Unil yaa sīī ubɔtee, bi pìintí-u kudii ní kí kpàl̄ u-pu ki cí ŋyunti ŋun bi làá kpɔ̀-uee. Míǹ mbaantiim ní bitandambi dù punuubi bin pɔ̄ɔ̄yee kí pìin̄ awaadiin ní kí dū tikpàlkaal nì saafiibi kí kpàl̄, án nín làá ŋá pu binaayub ń taa kɔ́ kí yɔ̀ awaayee. 18Bi tùutī fitilab tikpil kí síiń-ŋi ki jítiǹ bin bi sèetī ki sīintí bi-bee. Ama bi-waaŋi kaa ŋūǹ kí wāl̀ bi-kansikin báà ubɔ. 19Awaa gbanti náań nì akaakpal ŋin bi dūu cóoǹ ŋi-waadiikuee kansikin diba ní. Bi lì yii dì sūū poon. Akɔtuu ŋmóò ŋi nì ŋi-wampeeŋkaati, ama ní baa kpáàa béè míǹ. 20Kuwaadii ŋminyiim bɔ̄ntì ŋi-nimbiiŋyi kɔ́ti kɔti. 21Tinanjin nì naakpaapiimbi nì nnɔmbiyaamu mubɔ mun tɔ̄kɔntí ŋi-wunti nì ŋi-yiliŋ pu. Tɔntɔbi mun bí. 22Niin ní ni dūú béé yii ŋaa sá inimbɔti. An puee ní taa fàŋkì-ŋi.
23Ubɔ yaa kaa pítì sindaariya un bi dūu nyūntì-ŋi ki nyáantì-ŋee, ŋíǹ ŋi-ba kaa ŋūǹ kí yàntī ú nīn jìl̀. Ŋyunti ŋun bi nìn bíi dùntī sindaariya ki nyùntī-ŋee, ŋaa nìn gbìl̀ tiba pu. 24Binib dāā-ŋi kudapɔɔu ní. Nì míǹ kɔkɔee, ŋaa cáá kufoou ŋi-ni. 25Kii ŋi nín kaa ŋūǹ kí còom̀ee puee, bi bùkuntí-ŋi ní. An di dàkà báà ŋma yii ŋaa bí tiban. Ŋi kɔ̄ntí bin kpèé-ŋee gba icoo. 26Di sá yii awaa gbanti diba yaa lítì kitiŋee, see bí yòon̄-dì kí síiń. Bi yaa tí dū-dì ki yóoǹaaa, dàa ŋūǹ kí còom̀ di-baba. Dì yaa kpōoǹ, dàa ŋūǹ kí yáatí. An bí kii bitaŋkpiibi ní bi ŋáań saraabi ki tììyee#1.26 Dūú ŋmàntī nì Yees 46.7, Yeer 10.14.. 27Tiwaŋkuti tin bi cáa tòotī awaa gbantee, bitandambi bi-ba di cáa nyáfí kí ká ipaati. Iyunti ibee, an nín bàà sá bí dū tinan gbanti kí tīī bisoodambi nì biwɔfibee, bi-nimpoobi di dù ŋyaam kí pùkū kí ŋmā kí kpāafì-tì. 28Ki kpáaǹ gba binimpoobi bin bíi fùul̀ ŋkpin àá ki dáá màl̄ ki kɔ́ tijɔkɔndinee gbèetī tiwaatootinan gbanti#1.28 Dūú ŋmàntī nì Akoo 12.4, 15.33, 20.18.. Ni ká kí dūú dī tibɔŋmantikaal nee pu yii awaa gbanti kaa sá inimbɔti, an puee ní taa fàŋkì-ŋi.
Binib kaa nyí ní ki yíì-ŋi inimbɔti
29Nì nsan ŋulɔŋu pu ní binib yíì-ŋi <inimbɔti ní>? Di sá yii an sá binimpoobi di jáaḿ awaa ŋin sá sindaariya nì animbil kúti nì idɔee. 30Awaadiinnee, bitandambi kā kitiŋ ní ki pēē tiwan tin cátèe. Bi cáá tiyikpiti ní ki kōol̀ bi-nyimpuliŋ ní ki kōol̀ dibaakpandi. 31Bi gbáà ibiil kii tiwaŋkutee bi-waaŋi nimbiin, a lì kii bi kā ki jīǹ bukpɔsaayee. 32Bitandambi lèekī tiwan tin bi pēetì awaa gbantee ní kí dūú pèen̄ bi-nimpoobi nì bi-biyaamu. 33Ubɔ yaa ŋá awaa gbanti tiŋan àá tikpitilee, ŋaa ŋūǹ kí téeǹ udaan. Ŋaa ŋūǹ kí kàan̄ ubɔti àá kí kpákatí-u. 34Míǹ mbaantiim ní ŋaa ŋūǹ kí tīī unil tigaajati àá animbil. Ubɔ yaa kaa pàn̄ ipoon in u pōoǹ-ŋee, ŋaa làá bàlifì udaan tiba. 35Ŋaa làá ŋmā kí fīī unil kí nyāntí ŋkúm ŋaan, kaa tí ŋūǹ kí fīī uwɔfi kí nyāntí upɔɔl ŋaan. 36Ŋaa làá ŋmā kí yàntī ujɔfu ń wāl̀, kaa tí ŋūǹ kí nyāntí un bí dinimbinaamandinee u-nimbinaamandin. 37Ŋaa làá ŋmā kí sɔ̄ ukpiipu saai, kaa làá tí ŋmā kí ŋá ditaŋkpiibil tiŋan#1.37 Dūú ŋmàntī nì Ilan 68.6-7.. 38Adɔgin ŋin bi dū sindaariya nì animbil kúti ki nyūntèe náań nì ataŋkpee ŋin bi lēeń ajoon puee ní. Icoo làá cúú bin tòotī-ŋee gbòooo. 39Mana ní unil ŋūǹ kí dàkafì àá kí lì yii awaa gbanti sá inimbɔti?
40Kí kūtèe, Babiloon yab bi-ba tandambi kaa tìì-ŋi jilma. Di sá yii bi yaa ká ubɔ kaa ŋūǹ kí sòoǹee, bi cáǹ udaan diwaal Beeli cee, ní kí bí diwaal Beeli yii dí yàntī udaan ń sòoǹ, a lì kii diwaal gbanti ŋūǹ kí gbìl̄ taapuee#1.40 Dūú ŋmàntī nì Maar 7.32-37.. 41Binib gbanti kaa ŋūǹ kí dàkafì kí fá awaa gbanti. Bíǹ bi-ba lóò iciin#1.41 Dūú ŋmàntī nì Yees 46.1.. 42Binimpoobi dù ŋŋmii kí gbìn̄ ní kí cùú kàl̄ adan pu ki sèetī tifeel. 43Usanjitil yaa yíiń bi-kansikin ubɔ ki dōoǹ nì uee ní úǹ kíǹ ki bèel̄ u-bɔɔ bi nín kaa lēē-u kaa gíí ki tīl̀ u-ŋmiiŋuee pu. 44Awaa gbanti bɔti kɔkɔ pée sá tinyimɔmbɔti ní. Mana ní unil ŋūǹ kí dàkafì àá kí lì yii ŋi sá inimbɔti?
45Ukpiŋkpiiti di kpítì-ŋi ní ukúduntil dū tikúti ki dūntì ki nyūntì-ŋi. Ukpiŋkpiiti nín là ŋí nīn bí puee, míǹ ní ŋi bí. 46Bin bin mɔ́ɔ̀-ŋee kaa làá kàl̄ kitiŋ pu kí yúntí. 47Mana ní tiwan tin bi mɔ́ɔ́yee ŋūǹ kí nīn sá inimbɔti? Kun ŋŋal pu tɔntɔnliibi gbanti dūu yāntì bi-biyaamuee di sá tinyimɔmbɔti nì ticoobɔti. 48Kujaau àá nnaabu ŋubɔ yaa jéetì awaa gbanti puee, bitandambi nyàab̀ dicilpu laakin bi làá kpáaǹ-ŋi kí báĺee ní. 49Kin mana ní unil kaa béetí yii ŋaa sá inimbɔti ní? Ŋíǹ ŋi-ba kaa ŋūǹ kí fīī ŋi-ba kujaau àá nnaabu yuntiŋu. 50An sá idɔ ní bi dū sindaariya nì animbil kúti ki nyūntì. Míǹ boonee, ti làá dāá béé yii an sá tinyimɔmbɔti. Atimbun kɔkɔ nì bibɔtiibi làá dāá ká yii awaa kaa sá inimbɔti, ama nisaaleen di mɔ́ɔ́-ŋi. Ŋinee, tiba kaa bí ki nyánní Unimbɔti cee. 51Ŋma di ŋūǹ kí kpákáǹ yii awaa kaa sá inimbɔti?
52Ŋaa ŋūǹ kí kàan̄ ubɔti kitiŋ kiba pu, kaa ti ŋūǹ kí yàntī utaa ń nì kí tīī binib#1.52 Dūú ŋmàntī nì Yeer 14.22.. 53Ŋaa ŋūǹ kí sòoǹ ŋíǹ ŋi-ba bɔti, kaa ŋūǹ kí tūtuǹ unil un bi bíi mùul̄ ibɔsoon poonee#1.53 Dūú ŋmàntī nì Ilan 103.6.. Ŋaa pée kèetī tiba poon. 54Ŋi bí kii digaliŋgaal din ŋàaǹ kutaa puee ní. Ŋŋmi yaa fōō awaa ŋin sá idɔ bi dū sindaariya nì animbil kúti ki nyūntèe diikuee, ŋi-tandambi làá sāǹ ní kí fīī bi-ba. Ama awaa gbanti làá gbíntí ŋŋmi poon niin ní kí wà kii ndɔee. 55Ubɔti àá binannanliibi yaa cáań soojab ki bíi jáà nì ŋi, ŋaa làá ŋmā kí yūĺ kí já nì bi. 56Kin mana ní unil ŋūǹ kí kíí àá kí dàkafì yii ŋi sá inimbɔti?
Awaa kaa kèetī tiba poon
Awaa ŋin sá idɔ bi dū sindaariya nì animbil kúti ki nyūntì gbanti kaa ŋūǹ kí fīī ŋi-ba kí nyā binaayub àá digaŋgandambi ŋaan. 57Binib yaa bíi gbáà mpɔn ki nákatí sindaariya àá tikúti tin bi dūu nyūntì-ŋee ki kpáaǹ tiwampeeŋkaal tin bi dūu bīī ŋi-puee ki búntèe, awaa gbanti kaa ŋūǹ kí fīī ŋi-ba. 58Ubɔti un cáá dibaatandi kujaaunee àá disambil din kèetī di-dindaanee sɔ́ǹ inyimɔn waaŋi nee. Punuu un di wúǹ tin bí kudiinee àá jaantalkub bin di tíkí kubɔtinaakoouee sɔ́ǹ inyimɔn waaŋi gbanti. 59Di sá yii ŋwìiń nì uŋmal nì iŋmalbijaa ŋmíntí ki tīī-ti ní ki tūǹ ditundi din pu bi náań-iee. 60Utaa yaa ŋmɔ́ee, an ŋān̄ nnimbikpee ní. Míǹ mbaantiim ní an sá ki tīī kubuŋu kun jītí an kɔkɔ puee. 61Unimbɔti yaa tīī atagban mara ŋí bìin̄ kitiŋ kɔkɔ puee, ŋi ŋáań míǹ ní. 62Unimbɔti yaa tí tú utaa ú tɔ̄ ajoon nì kubambaŋŋuee, u ŋáań Unimbɔti nín bí yii ú ŋá puee ní. Baa kpáàa mɔ́ɔ́ awaa gbanti ki nántiǹ tiwan tin bɔti ti dáá sòon̄ nee. Ŋaa cáá tiwan gbanti nyaaŋkuɔɔɔ, kaa cáá ti-pɔŋŋu mun. 63Ŋaa ŋūǹ kí sòoǹ kí pɔ̀ unil àá kí ŋá binib tiŋan. An puee, taa ŋūǹ kí dàkafì àá kí lì yii ŋi sá inimbɔti. 64Nimbi ni-ba nyí yii ŋaa sá inimbɔti, an puee ní taa fàŋkì-ŋi.
65Di sá yii ŋaa cáá mpɔn kí tɔ̄ bibɔtiibi mbusu àá kí bìin̄ bi-pu. 66Ŋaa ŋūǹ kí ŋá maamaaci daanti kutaa pu kí dàkà atimbun, àá kí nyā ki pɔ̄ɔ̄ kii ŋwìińee, àá ki ŋmíntí kii uŋmalee. 67Ipeel jítiǹ-ŋi, di sá yii íǹ ŋūǹ kí sāǹ kí báĺ àá kí sāǹ kí fīī i-ba. 68Tíǹ gbanti kɔkɔ tiba kaa dàkà yii ŋi sá inimbɔti. An puee ní taa fàŋkì-ŋi.
69Aputaajul kpaabunee, bi yaa cóoǹ ndɔ ki dū tiwan ki pēeǹ-ŋuee, ŋuaa ŋūǹ kí wúń bukpaayee pu#1.69 Dūú ŋmàntī nì Yeer 10.5.. Míǹ mbaantiim ní binib gbanti waaŋi bí, awaa ŋin sá ndɔ bi dū sindaariya nì animbil kúti ki nyūntèe. 70Bi-waaŋi ŋin sá idɔ bi dū sindaariya nì animbil kúti ki nyūntì gbanti gíti náań nì ikuŋkuŋfi in yú bukpaan ní inoon dòoń ki tɔ̄kɔntí àá dinikpil din bi dūu bíl̀ ŋfalin dibɔmbɔndinee ní. 71Ni yaa láa ká tiwannyaandi nì abɔkutimɔnti ŋin bi dūu pēeǹ-ŋee sūū ki pá ŋi-puee, ni làá gbìl̄ taapu yii ŋaa sá inimbɔti. Kí dāá kúntée, akɔtuu di làá ŋmɔ́-ŋi ní icoo cúú-ŋi kitiŋee pu. 72An sɔ́ unil ń nīn yú nì Unimbɔti deedee kí taa nín̄ cáá awaa. Icoo pée kpá kí cúú udaan.
Currently Selected:
Lettre de Jérémie 6: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.