1 Maccabées 3
3
Juudasi Maakabee, Juuda yab kpiliu
1Juudasi un bi gíti yíì Maakabeeyee fōō u-baa yil ki kpántì ukpil. 2U-nabiyaamu kɔkɔ nì bin kɔkɔ nìn bí u-baa jandi púee nìn yúl̀ u-boon ki tíkí-u. An nìn mɔ̄ǹ-bi bí já Isirayeel pu.
3Juudasi nìn kútì u-nibul nyooti.
U yaa nìn dū u-janjawanti ki pēeǹ
ki dū tikúti gbampɔɔl ki páaǹ u-bindi puee,
u nìn náań nì kujawɔkɔu ní.
U nìn gbìǹ u-gbajau ní kí kíĺ ki bíi jáà.
Nì u-tàataajiki ní u nìn cáa wúǹ u-janjaliibi pu.
4U-jaaku poonee, u nìn náań nì gbikinti ní,
a lì kii digbikintipɔmbil di tɔ́ kí cúú upeelee.
5U nìn nyàab̀ bin kaa yú deedee nì Maree ki jì-bi.
U nìn cáá bin páb̀ u-nibulee ki tòó ŋŋmin.
6U nìn kɔ̄ntí binikpitib dinyoondi,
ní bin nìn jáà nì Maree nìn fàŋkí.
Juudasi nìn ŋúń ki fīī u-nibul ki líì.
7U nìn yāntì bibɔtiibi tikpil kɔ́ agìńni,
ama ní u-tuuŋŋi nìn tìì Isirayeel yab dipɔɔpindi.
Binib làá nīn pée téetí u-pu ní ki gà ilan ki pàkà-u baabadal.
8U nìn yìin̄ Juuda yab timmun ki kūū ki céetì binikpitib,
ní ki nyántì Isirayeel yab Unimbɔti ŋuulin.
9U-yindi gbītì ki tin bàn̄ kitiŋ gbeennyɔkɔ.
U nìn kóoǹ bin bi nìn là kí kpɔ̀ee ki kpáfì.
Juudasi jajiliŋ apeekaa
10Apoolooniyuusi nìn kóoǹ bijanjaliibi bin kaa sá Juuda yabee nì Samaarii janjakitiŋ ki kpáfì kí jáǹ Isirayeel yab. 11Juudasi nìn gbìl̄ míǹ ní ki yíkìi túŋkì-u. U nìn jáń ki pɔ́ɔkiǹ Apoolooniyuusi ní ki kūū-u. Binannanliibi tikpil nìn fōō tiweendi ki kpíì ní bin kíǹee sáǹ. 12Juuda yab nìn fúkúl̀-bi, ní Juudasi nìn yōoǹ Apoolooniyuusi tàataajiki. Kíǹ ní u nìn kíǹ ki cáa jáà áli u-kúm dal. 13Siirii yab janjakpiliu Seerɔn gbìl̄ yii Juudasi kóoǹ bin fàŋkí Unimbɔtee dikitil nì bijanjaliibi ki kpáfì u-cee. 14Ní u lī u-ban yii: «M làá nyā diyindi ní bí nīn tìì-mi tinyool dibeel nee poon. M làá cùú jáǹ Juudasi nì u-yab bin kaa fātìi tɔ́ ubɔti marauee.» 15Niinee ní u yōoǹ bijanjaliibi kupaau ki nín cá. An nìn sá Unimbɔti nannanliibi bin nìn là kí tɔ̀ Isirayeel yab ipɔntoonee ní. 16Seerɔn nín tóob́ Beeti-Oorɔn gbantaŋkee ní Juudasi yōoǹ bijanjaliibi ŋwaam pu yéè ki túŋkì-u nsanni. 17Bi nín ká bijanjaliibi dàbìń ki túŋkiń-bee, ní bi bí Juudasi yii: «Taa náaǹ báà fiii. Mana ní ti làá ŋmā kí jáǹ dijanjakitil din pɔ̄ɔ̄ nee? Kí wàatī muee, taa cáá mpɔn, di sá yii taa jíń tiba díǹ.» 18Ní Juudasi kíí yii: «Kinikitiwaai ŋūǹ kí já kí pɔ̄ɔkiǹ dinikitikpaandi din pɔ̄ɔ̄yee sɔkɔmii ní. Unimbɔti ceeyee, an kaa sá binib wíiŋŋu ní u kpèé kí dūú fīī binib. Bi ŋūǹ kí nīn wīikí ki tí ŋūǹ kí taa nīn wīikí. 19Kujaaunee, dijajil kaa nyēeń bijanjaliibi wíiŋŋu pu. Ama Unimbɔti cee ní mpɔn nyēeń. 20Ti-nannanliibi dòoń kí jáǹ-ti nì dibayoondi nì inikpiti ní. Bi là kí kpɔ̀ ti nì ti-nimpoobi nì ti-biyaamu kí yòon̄ ti-gaajawanti ní. 21Ama timbi ti-ba nì marab bin Unimbɔti tīī-tee pu ní ti jáà. 22Unimbɔti làá nà ti-nannanliibi kunaau ti-nimbiin. Taa fàŋkìmaan-bi.»
23Juudasi sòon̄ míǹ ki dóòyee, ní ki dūu gùl̄ Seerɔn nì u-janjaliibi pu kujaau, ní ki nàn̄-bi kunaau. 24Juudasi nì u-yab kùl̄ ki páaǹ bi-boon ki tin sīntì Beeti-Oorɔn áli ki tin bàn̄ ditantakalin. Bi nìn kūū binib alaataa anii, ní bin kíǹee sáǹ ki nín cá Fiiliistii yab tiŋkin. 25Binib nìn kíĺ ki kíǹ ki fàŋkí Juudasi nì u-naalib. Dinyoondi nìn kɔ́ atimbun ŋin māntìi tú-bee. 26Juudasi nìn nyáń diyindi áli an tin bàn̄ ubɔti Antiyookuusi, ní anibul ŋin kíǹee kɔkɔ sòoǹ u-jajiliŋ pu.
Antiyookuusi Eepiifaani lēē Liisiyasi ú nàan̄ Isirayeel
27Ubɔti Antiyookuusi nín gbìl̄ tin bi sòon̄ee, ní u fōō diŋuul tikpil. U nìn tīī mara yii bí kpāfì bijanjaliibi bin kɔkɔ bí u-beelinee. Bi nìn dūu ŋá dijanjakitikpaandi din pɔ̄ɔ̄yee ní. 28U nìn lēē u-nimbidakaaun dibindi diba paati nimbiliŋ ki yākatì u-janjaliibi. U nìn kpáafì-bi bí bɔ́ntí kí nīn cí tin yaa pée bāańee pu. 29Ama boonee u dāa dáań ki ká yii animbil dóò u-dakaaun. Lampoo nimbiliŋ ŋin bi nìn fōō kitiŋgbaŋ gbantinee kaa nìn bí tiban. Di sá yii ubɔti nìn cáań fìkil fikil nì nnaabu ki tɔ́ kitiŋee pu ki kúntì ayaajakoobil ŋin nìn pée bí kitiŋee pu doooo abin abinee. 30Antiyookuusi nìn jīǹ animbil tikpil ki nìn pūǹ binib nì tiniti ki jítiǹ bibɔtiibi bin līntiǹ-uee. U nìn fāŋkì kí taa ti ká ŋŋmam kí ŋá míǹ. 31An bɔtee nìn cáań-u ilandɔkɔ ní u lēē kí cù Peersi tiŋgbammu mun bí niinee kí fōō lampoo kí ŋmā kí báá animbil tikpil.
32Liisiyasi nìn sá dikpambal ní ki nìn sá ubɔti cindin niliu ubɔ. Antiyookuusi nìn lēē-u ú nīn kpèé dibeel bɔti kí yòon̄ Eefiraati mɔɔl kí tin cáá sāā Eejipiti kpaanyɔkɔ. 33U nìn dū u-jipɔɔn Antiyookuusi ki ŋúbiǹ-u ú nīn dàkà-u kí nīn cí u-gítintam. 34U nìn dū u-janjakitil dijandi nì kujaau kuntib ki tīī-u. U nìn tùkū-u u nín máaǹ kí ŋá tin kɔkɔ u dàkā-uee puee, cilinjee Juuda yab nì Jeerusaleem yab pu. 35Liisiyasi máaǹ kí dū dijanjakitil kí tɔ̄ bi-pu dí nàan̄ Isirayeel yab pɔŋŋu, kí kúntí kun kíǹ fiii ki bí Jeerusaleemee, ní kí kpɔ̀ kí céetí binib bin kóò niinee bí taa ti téetí bi-pu. 36U yaa ŋá míǹ ki dóòyee ní ú cáań binicambi kí kàan̄ bi-timmu kɔkɔn kí dū bi-kpaatanti kí yàkatī. 37Ubɔti Antiyookuusi nìn yōoǹ dijanjakitil dijandi din kíǹee ki búntì Antiyɔɔsi, u-beel tiŋyil abin dilaataal nì imuŋku ili nì aluli poon. U dūtì Eefiraati mɔɔl ní ki dūu dī Yilpu pú tiŋkin.
Liisiyasi janjaliibi fōō Juudee tiŋki
(2 Maka 8.8-15)
38Liisiyasi nìn lēē «Ubɔti bɔɔbi» kansikin bin sá biniŋmambee bita. Bíǹ di sá Doormeeni jipɔɔn Pitooleemee nì Niikanɔɔr nì Gɔɔrgiyasi. 39U nìn dū bijanjaliibi bin còom̄ ataa puee kutukub imuŋku ili nì bitanjakaliibi kutukub biluli ki ŋúbiǹ-bi, ní ki dū-bi ki tú Juuda yab tiŋkin bí kúntí-kì kii ubɔti nín tīī mara puee. 40Bikpilib bitee yōoǹ bi-janjakitiŋi kɔkɔ ki búntì. Bi tóob́ Eemaayusi tiŋkee ní ki gāā bi-janjanaapaal dipaal pu niin. 41Bibantiliibi bin bí kitiŋ gbantinee nín gbìl̄ an bɔtee ní bi yōoǹní sindaariya nì animbil tikpil nì ikusaka ki nín cá dijanjanaapaal pu kí dā Isirayeel yab. Idumee janjaliibi nì Fiiliistii yab nìn dɔ́miń ki kútì binannanliibi janjaliibi pu. 42Juudasi nì u-yab nìn ká yii tibɔti nìn bíi pɔ́ɔkí. Di sá yii binannanliibi janjaliibi dɔ́miń ki gāā bi-janjanaapaal Isirayeel tiŋki pu. Bi nìn gíti gbìl̄ mun yii ubɔti Antiyookuusi tīī mara yii bí kúntí bi-nibul kɔkɔ múb. 43Ní bi bíi lì bi-ŋmaniŋma kansikin yii: «Tí pìin̄-bi nsan bí taa ŋmā kí kúntí ti-nibul kɔkɔ míǹ. Tí já ti-nibul nì ti-nimbɔtidiiku pu.» 44Niinee ní bi yíiń samaa kɔkɔ ki kpáfì bí bɔ́ntí dikɔ̀ndi, kí mèè kí bàlifì Unimbɔti ú sɔ̄ bi-saai kí dàkà-bi u-saasɔl nì u-laŋŋaŋfitiiku.
45Jeerusaleem dɔ̄ fám kii kuteeuee.
Bin kóò ki-nee ubɔ kaa kóòyaaa, ubɔ kaa nyēē.
Binib còom̄ kunimbɔtidiin lìbiti libiti kaa fātìi tɔ́.
Binicambi di kíǹ ki kóò kitiŋ pɔ̀ti pu,
ní an dūu kpántì bin kaa sá Juuda yabee kɔŋkooŋŋu.
Dipɔɔpindi kúntì Isirayeel nibul kansikin,
awul nì tibati ŋmíl̀.
Juuda yab bɔ́ntì dikɔ̀ndi
(2 Maka 8.16-23)
46Juuda yab nìn kóoǹ ki kpáfì ki nín cá Miisipa, an bí Jeerusaleem nyɔkɔpu pú. Njaminee ŋwimmeem paaŋŋu ŋubɔ nìn bí niin. 47Yaadalee, bi nìn bóob́ kinyɔkɔ ní ki dū ŋfantam ki pùkū bi-yiliŋ, ní ki cátì bi-wampeeŋkaati ní ki dū kpɔsatab ki pēeǹ. 48Bi nìn kpátì kugbɔŋu kun poon marab kēe kí kàaǹ. Bíǹ kaa ŋáań kii bin kaa sá Juuda yabee nín ŋáań pu ki bàlifī bi-waaŋi ŋin sá akumpooyee. 49Bi nìn cáań asaraaŋabɔkuti nì tijincɔ̀fikaal nì tikpaajin saalaatiiti. Bi nìn kóoǹ bin nìn pōoǹ ipoon ki dū bi-ba ki sú ti-Dindaan bi-yuntiŋu sāāyee ki kpáfì. 50Bi nìn mēē ti-Dindaan mpɔn yii : «Ti làá nín ŋá binib nee mana dee? La ní ti làá nín cáá-bi kí cùnnì dee? 51A-circir diiku kɔ́ tijɔkɔndi, di sá yii binib kpēē-ku fám. A-saraaŋakpiliu bí kunimbaau nì icoo poon. 52Bin kaa sá Juuda yabee kóoǹ ki kpáfì kí kúntí-ti. Sii a-ba nyí tin bi bíi dàkafī kí ŋá-tee. 53Mana ní ti làá ŋmā kí yūĺ bi-nimbiin kí jáǹ-bi sii a-ba yaa kaa dɔ́miń ki tútuǹ-ti?» 54Bi mēē míǹ ki dóòyee ní ki búń akantán ki kúuǹ mpɔn.
55Míǹ boonee ní Juudasi lēē bijanjakpilib. Biba nìn sá binib kutuku kutuku kpilib, ní biba sá binib dilaataal dilaataal kpilib, ní biba mun sá binib ili nì saalaa saalaa kpilib ní bin kíǹ sá binib saalaa saalaa kpilib#3.55 B. 55: dūú ŋmàntī nì Disa 18.21.. 56Kí nóó mara nín bālifì puee#3.56 Kí nóó mara nín bālifì puee...: kpèè Ditee 20.5-9., u nìn yāntì bin kɔkɔ bíi māā adiinee nì bin dáá cáá binimpoobee nì bin dáá cóoǹ fiinyi sufiiyee nì bin muliŋ kaa bōotí mmɔ́ɔn nín kùǹ. 57Niinee Isirayeel yab janjakitil yíkìi nín cá ki bàn̄ ki gāā bi-janjanaapaal Eemaayusi tiŋki ŋgiil pú. 58Juudasi nìn bí-bi yii: «Bɔ́ntímaan ni-janjawanti kí nīn cáámaan dipɔbil. Ní bɔ́ntí kí já nì binib nee. Bi kóoǹ ki kpáfì kí já nì ti kí kúntí-ti ní kí nàan̄ ti-Nimbɔtidiiku. 59An sɔ́ tí kpú kujaaun ki jítiǹ tí nīn bí kí ká ti-nibul nì ti-Nimbɔtidiiku nimɔɔŋyi. 60Unimbɔti nín là miŋyee, míǹ ní u làá ŋá.»
Currently Selected:
1 Maccabées 3: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.