1 Maccabées 4
4
Isirayeel yab jáń ki pɔ́ɔkiǹ bi-nannanliibi
(2 Maka 8.23-29,34-36)
1Gɔɔrgiyasi nìn yōoǹ bijanjaliibi bin còom̄ ataa puee kutukub biŋmoo, nì bitanjakaliibi bimɔmmɔntiibi kutuku. Bijanjaliibi gbanti nìn yíkì kunyeeu ní, 2kí cùú túuǹ Juuda yab bi-janjanaapaal pu, kí kìtīí bìin̄ bi-pu. Bin nìn kóò Jeerusaleem tiŋkin sintil difɔkɔku puee di nìn kpòotī-bi. 3Juudasi gbìl̄ mimmee, ní ki mun yōoǹ u-janjaliibi ki kíĺ nsan. U nìn là kí já kí pɔ̄ɔkiǹ ubɔti janjakitil din bí Eemaayusi tiŋkinee 4ŋyunti ŋun u-janjaliibi bí ki dátiǹ bi-janjanaapaalee. 5Gɔɔrgiyasi nì u-janjakitil bàn̄ Juuda yab janjanaapaal pu kunyeeuee, baa ká báà ubɔ. Ní bi kíĺ ki bíi lì yii: «Juuda yab sáǹ-ti». Niinee ní bi kíĺ ki bíi nyàab̀-bi ajoon pu.
6Kutaa wúntèe, Juudasi nì binib kutukub bita nyáń bi-pu dipaal pu. Ama baa nìn cáá tijanjawan nì ntàataajimu mun bi bàà là kí nīn cááyee. 7Isirayeel yab nìn ká yii bin kaa sá Juuda yabee janjaliibi bíǹ nìn pēē agbampɔɔ, ní bitanjakaliibi bin mántiǹ kujaauee wúń bi-pu. 8Ní Juudasi bí u-janjaliibi yii: «Taa fàŋkìmaan dijanjakitikpaandi nee. Bi yaa kíĺ ki bíi jáà nì nee, ní taa màtifìmaan. 9Téetímaan yii Eejipiti yab bɔtiu Faaroo nì u-janjakitil nín nìn kùl̄ ki bīiǹ ti-naanjab boon Tikati mɔɔlinee, bi nìn ká difiil#4.9 Kpèè Disa 14.. 10Kɔŋkɔnnee, tí kúum̀maan kí yíiń Unimbɔti. U yaa dàkā-ti u-laŋŋaŋfitiikuee, u làá téetí mpèé ŋun u nìn ŋá nì ti-naanjabee pu, ní kí nà dijanjakitil nee kunaau díǹ ti-nimbiin. 11U yaa ŋá míǹ, atimbun kɔkɔ làá béé yii ubɔ bí ki fìil̄ Isirayeel.» 12Binicambee ká yii Juuda yab còom̄ ki túŋkiń-bi. 13Kpalaayee bi nyáń bi-janjanaapaalin kí já nì Juuda yab. Juudasi janjaliibi nìn búń dikantándi 14ní ki mun tātìi gbāaǹ kujaau pu. Bi nìn jáń ki pɔ́ɔkiǹ bi-nannanliibi ní bíǹ sáǹ ki nín cá dipaal pu. 15Juuda yab nìn kūū bin pá boonee kɔkɔ. Bi nìn kùl̄ ki páaǹ bi-nannanliibi boon áli Geeseer ní ki nìkī ki tin bàn̄ Idumee paal pu nì Asidoodi nì Jamina. Binib kutukub bita nyɔkɔm ní bi nìn kūū niin.
16Juudasi nín jìn̄ binannanliibi ki fàtīi gítińee, 17ní u bí u-yab yii: «Ní taa láá dàkafì yii ni làá cùú fūkul̀ bi-gaajawanti. Di sá yii kujaau kubɔ mun bíi bɔ́ntí ki cí-ti. 18Gɔɔrgiyasi nì u-janjakitil bí dijool pu doo ki pìlīǹ-ti. Tí taa pɔ̄ ti-nannanliibi mpaan, tí jáǹ-bi. Míǹ boonee ní ni nín ŋūǹ kí fūkul̀ bi-gaajawanti kí taa nín̄ fàŋkí tiba.» 19Juudasi sòon̄ kaa láá ŋmíl̀ ní bi ká binannanliibi janjaliibi nyánní dijool pu ki páaǹní. Bíǹ nìn bíi nyàab̀ kí béé tin bíi jītée. 20Bi dáań ki ká yii bi-janjakitil máaǹ ki sáǹ ní bi-janjanaapaal mun fōō ŋŋmi. Di sá yii ŋŋminyiim min nìn yíkí ki jɔ́ḿ kutaayee nìn dàkà míǹ. 21Bi ká mimmee ní ki fāŋkì. Bi kpēē dipaal mun puee, Juudasi janjaliibi di bíi bɔ́ntí kujaauee. 22Niinee ní bi-kɔkɔ sáǹ ki kɔ́ Fiiliistii yab tiŋkin. 23Juudasi nìn nín gítiń binannanliibi naapaal pu ki fúkúl̀ tiwan. Juuda yab nìn yōoǹ sindaariyab tikpil nì animbil nì iŋaamɔnti in máǹee nì in sɔ̀m̀ee, nì tigaajawan tiba mun tikpil. 24Juuda yab nín nìn fàtīi gítińee, bi nìn gà ilan ki nyɔ́ŋkí ti-Dindaan. Bi nìn jáaḿ-u ki lì yii: «Ti-Dindaan ŋān̄ ní u-neendi bí ki cá jaanjaan.» 25Ŋwiin gbantee, Isirayeel yab nìn ká difiikpaandi.
26Binannanliibi janjaliibi binicambi bin nìn sáǹee nìn cūtìi tùkū Liisiyasi tin kɔkɔ jítèe. 27U nín gbìl̄ tin bi máafì-uee, ní u-pɔbil bíil̀ ní u-wunti yɔ̄tì. Di sá yii kujaau kun u-yab jáń nì Isirayeel yabee kaa cōom̀ kii u nín bàà là puee. Kujaauee nín cōom̀ puee kaa nóó nì ubɔti nín tīī mara bí ŋá puee.
Juudasi jáń ki pɔ́ɔkiǹ u-nannanliibi Beeti-Suur
(2 Maka 11.1-12)
28Dibindi bíntèe ní Liisiyasi kóoǹ u-janjamɔntiibi ki kpáfì binib kutukub imuŋku ita, nì bitanjakaliibi kutukub biŋmoo kí cùú já nì Juuda yab. 29Bi nìn cūtì Idumee ní ki gāā bi-janjanaapaal niin. Juudasi nìn yōoǹ binib kutukub saalaa ki nín túŋkí-bi. 30U nín ká binannanliibi janjakitikpaandi nì di-pɔŋŋuee, ní u mēē ŋwimmeem nee yii: «Isirayeel yab Fiiliu, sii di yì inyɔŋki. Sii di nìn dī a-tɔntɔnliu Daafiidi pu ki yāntì Gooliyaati kujawɔkɔu nín nìn wúliń puee ŋá fám. Sii di nìn dū Fiiliistii yab janjakitil ki ŋá Saayuul jipɔɔn Joonatan, nì u-tɔntɔnliu un nìn ŋúb̀ u-janjawantee ŋaan#4.30 Gooliyaati kujawɔkɔu: kpèè 1 Sami 17.4-54. - Joonatan : kpèè 1 Sami 14.1-23.. 31Míǹ mbaantiim ní ti mèé-si yii á dū binannanliibi janjakitil nee ki ŋá a-nibul Isirayeel yab ŋaan. Yàntī bi-janjaliibi nì bi-tanjakaliibi ń kɔ́ǹ-bi icoo! 32Bí fàŋkì kí taa já! Nàan̄ dimákal din bi cáá bi-pɔŋŋu puee. Yàntī bi yaa dākafì ki téetì yii bi làá já kí pɔ̄ɔkiǹ-bee, bi-wunti ń nīn jìkì. 33Yàntī bin néeń-see tàataajimmu ń kpɔ̀-bi. Mimmee bin nyí a-yindee làá nīn gà ilan ki nyɔ́ŋkí ki pàkà-si.»
34Ajanjakiti alee dūu gùl̄ kujaau pu, ní bi kūū Liisiyasi janjaliibi kutukub biŋmoo. 35Liisiyasi nín ká yii bi làá já kí pɔ̄ɔkiǹ u-janjaliibi, ní Juudasi janjaliibi bíi jáà nì dibaatandi ki kíí kí kpú àá kí nīn bée ní u nín gítí Antiyɔɔsi. Antiyɔɔsi tiŋkin niinee ní u fōō binicambi bí kpántí bijanjaliibi kí gítiń Juudee tiŋkin, bijanjaliibi bin wīikíǹ bipeepeekaabee.
Bi ŋá kunimbɔtidii circir
36Niinee Juudasi nì u-nabiyaamu bí yii: «Kɔŋkɔnnee ti jáń ki pɔ́ɔkiǹ ti-nannanliibi sɔ́kɔ sɔkɔ. Tí cùmaan kí ŋá kunimbɔtidii circir, kí fàtīí gíiǹ-ku kí sú Unimbɔti.» 37Bijanjaliibi kɔkɔ nìn kóoǹ ki kpáfì ní ki nín jɔ́ḿ Siiyɔn jool pu. 38Bi nìn ká yii kunimbɔtidii dɔ̄ fám kii kuteeuee. Bi nìn kɔ́ǹ nsaraafan tijɔkɔndi, ní punuubi wùn̄ ŋŋmi. Nsubiyaamu nìn nyáń dicindin kii kubambaŋŋun, àá dijool puee. Adiin nìn lítì. 39Bi nìn dáaĺ ki cátì bi-wampeeŋkaati, ki súń tikpil, ní ki dū ŋfantam ki pùkū bi-yiliŋ. 40Bi nìn tātìi gbāaǹ bi-yigbeeŋi tūū kitiŋ. Bi dāa búń dikantándi ki tīī kudaaŋŋuee, ní bi kíĺ ki bíi gbáà ibiil ki yíì Unimbɔti.
41Míǹ boonee ní Juudasi tīī u-janjaliibi biba mara yii bí jáǹ binib bin bí kitiŋ pɔ̀ti pu laakin bi máń digundi ki túee ŋyunti ŋun bi bíi ŋáań kunimbɔtidii circiree. 42U nìn lēē bisaraaŋaliibi bin ŋúb́ Mooyiisi marab tiŋanee, bin pu baa kāntí tibɔkpitil tibee. 43Bisaraaŋaliibi nìn ŋá kunimbɔtidii circir, ní ki yōoǹ ataŋkpee ŋin kɔ́ tijɔkɔndee ki cáa cūnnì laakin sá tijɔkɔndi paaŋŋu puee#4.43 tijɔkɔndi paaŋŋu: kpèè Akoo 14.40-41.. 44Bi nìn bíi bàlifī bi-ba kí kpèè bi nín làá ŋá nsaraafan ŋun bi kɔ́ǹ tijɔkɔndee puee. 45Bisaraaŋaliibi nìn ká nlandɔkɔmɔnti ŋun pu bi làá dī kí wīī-ŋu án taa kɔ́ǹ bíǹ bi-ba icooyee. Bi nìn gbáń ki wīī-ŋu, kun puee bin kaa sá Juuda yabee nìn kɔ́ǹ-ŋu tijɔkɔndi. 46Bi nìn dū ŋu-taŋkpeeŋi ki bíl̀ laakin kítèe kunimbɔtidii gbantaŋki pu kí nīn cí Unimbɔti bɔnaatiliu ubɔ ń dāá sòoǹ bi nín làá dū-ŋi kí ŋá puee. 47Isirayeel yab nìn yōoǹ ataŋkpee ŋin baa kpítèe, kii mara nín bàlifī puee#4.47 Kpèè Disa 20.25 nì tin bi ŋmàn̄ kugbɔŋu faaku taapuee., ki máń nsaraafan mpɔɔn kii ŋkpikee nín nìn bí puee. 48Bi nìn ŋáŋkì kunimbɔtidii nì ku-poon, ní ki ŋá ku-ciŋŋi circir. 49Bi nìn fātìi mɔ́ɔ́ saraabi sambiyaamu mpɔmu, nì fitilab tɔ́kɔŋkaati nì nsaraafan ŋun pu bi tùutī talaalubee nì teebil un pu bi pāantí kpɔnɔb bin bi dūu ŋá Unimbɔti saraayee ki síiǹ. 50Bi nìn tūū talaalutuukaa nsaraafan pu, ki tūū fitilab bin tɔ́kɔ́ bi-tɔkɔŋkaati pu ki ŋmíntí kunimbɔtidii poonee. 51Bi nìn dū kpɔnɔb ki páaǹ teebil pu, ní ki dū iŋaapìtikaa ki sākaǹ. Bi nìn dóò atuun ŋin kɔkɔ bi nìn kíĺee.
52Abin 148, uŋmawawati, an dàkà yii Kiisileewu poon iwiin mmuŋku nì iŋmoo dal ní Juuda yab yíkì kutaafaau pɔ̀lpɔl, 53ki nóó nì Mooyiisi marau. Bi nìn ŋá bisaraawɔkaabi nsaraafan mpɔɔn ŋun bi nìn máńee pu. 54An tú dibindi din bin kaa sá Juuda yabee kɔ́ǹ nsaraafan tijɔkɔndee ní bi dū-ŋu ki sú Unimbɔti. Bi nìn gà ilan ki bɔ̀ɔ́ tibati nì túmbab nì cancakantib. 55Báà ŋma nìn tātìi gbāaǹ u-yigbeel tūū kitiŋ ki jáam̀ Unimbɔti. Míǹ boonee ní bi nyɔ́ŋkì-u u nín tīī-bi dijajilee pu. 56Juuda yab nìn dū iwiin inii ní ki jíń bi nín dū nsaraafan ki sú Unimbɔti puee jiŋaaliu. Nì dipɔɔpindi poon ní bi nìn ŋá bisaraawɔkaabi nì mpèé nì inyɔŋki saraabi ki tīī Unimbɔti. 57Bi nìn dū sindaariya beefuulimmu ki nyáantì kunimbɔtidii nyɔkɔpu ní ki gíti nyáantì-ku mbamin mun, ní ki ŋáŋkì mpunyɔmu nì adiin, ní ki fātìi gíiǹ punuubi ki cóoǹ bi-laŋki. 58Dipɔɔpindi gbí Juuda yab tikpil, ki pítì icoo in bin kaa sá Juuda yabee nìn kɔ́ǹ-bee. 59Juudasi nì u-nabiyaamu nì Isirayeel yab kɔkɔ lēē yii bí nīn jīǹ nsaraafan jiŋaaliu u-yuntiŋu, dibindi kamaa, uŋmal un bi yíì Kiisileewuyee poon iwiin mmuŋku nì iŋmoo dal. Bí dū iwiin inii kí jī nsaraafan jiŋaaliu gbanti nì dipɔɔpindi nì mmɔn.
60Ŋyunti gbanti ní bi máń digundi din fɔ̀kɔ̀ ki pɔ̄ɔ̄yee ki māntìi tú Siiyɔn jool, án nín làá ŋá pu bin kaa nyí Unimbɔtee ń taa ti ŋmā kí kɔ́nní niin kí tāā pùb kii bi nín nìn dòoń ki ŋáań pu dooooyee. 61Juudasi nìn dū bijanjaliibi ki yóoǹ bí nīn cí kunimbɔtidii. Bi nìn máń digundi ki tú Beeti-Suur tiŋki. Mimmee Isirayeel yab nìn kíǹ ki cáá kitiŋ kin bi máń digundi ki túee ki bíitiǹ Idumee tiŋki.
Currently Selected:
1 Maccabées 4: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.