Mariko 14

Nibarwaja okumwita Yesu

(Mt. 26:1-5; Lk. 22:1-2)

1Wejire jaturao siku ibiri, nduba rusiku rukuru rwa Ipasaka, ne mikate jinu jitarimo cifwimbya. Niwo abagabisi abakuru na bandiki nibaenja obwenge bwo kumugwatira burembeke bamwite. 2Okuba ba:ikire ati, citamugwata ku rusiku rwa marya, batefura aba:nu nibayogana.

Yesu nabambagwa amafuta

(Mt. 26:6-13; Yo. 12:1-8)

3Mbe anu ariga:ri mu Betania mu nyumba ya Simoni omugenge, enyanjire ku biryo, naja omugasi uyo ariga na kayabya ka mafuta go bugusi oburambu muno. Na:ta akayabya, ne:tirira amafuta ku mutwe gwa Yesu. 4Nawe bariga bario abandi banu babiiywe abene:ra, niba:ika ati, ?Amafuta ganu gafwira ki kutyo? 5Okuba amafuta ago bakaturire okugaka:namo siringi magana gasatu na kukirao, bagabire abataka. Nibe:toŋanira muno ku mugasi uyo. 6Yesu na:ika ati, Mumusige. ?Omumusurumbasisya ki? Ankorera ecikorwa co bwana. 7Okuba abataka muri nabo kusiku, na wora mwenda omutura okubakorera ebyo bwana. Nawe anye mutari na:nye kusiku. 8Akora rwa kutyo aturire. Atangata okwitirira amafuta ku mubiri gwani kurwo kusikwa kwani. 9Ni cimari enibabwira ati, mu:si jo:ne enu, Ebigambo byo bwana bira:ikwaga, ne:co mugasi unu akora cira:ikwagako co kumwicuka.

Yuda namuromera Yesu iniku

(Mt. 26:14-16; Lk. 22:3-6)

10Mbe Yuda Isikariote unu ariga:ri umwi wa ekumi na babiri, nagenda ku bagabisi abakuru amuromere iniku. 11Mbe wejire bongwa, nibakonderwa nibamuraga okumuyana jimpirya.

Okwira:ba kwa Ipasaka

(Mt. 26:17-19; Lk. 22:7-13)

12Ku rusiku rwo kwamba orwe mikate jinu jitarimo cifwimbya nirwo rwo kwita Ipasaka, abe:igisibwa bae nibamubu:sya ati, ?Owenda cije a:ki cicumecume enu urari:ra Ipasaka? 13Natuma abe:igisibwa bae babiri, nababwira ati, Mugende mu musi, omujo:bonana no mu:nu unu e:twikire ecitumo ca manji, mumuru:be. 14Enu wo:ne arengira, mubwire omwene nyumba ati, Omwiigisya a:ika ati, ?Risago rya bagenyi riri a:ki munu ndari:ra Ipasaka na be:igisibwa bani? 15Kajo:be:resya risago rinene erya inguru rirebekere. Omwo nimwo jemuci:ra:bire. 16Mbe abe:igisibwa nibagenda nibaja mu musi, nibasanga rwa kutyo ababwiriye nibe:ra:ba Ipasaka.

Ipasaka yo kumarisya

(Mt. 26:20-25; Lk. 22:14-18; Yo. 13:1-35)

17Mbe wejire kwaba ke:goro naja na rikumi na babiri. 18Anu bariga benyanjire ku biryo, Yesu na:ika ati, Ni cimari enibabwira ati, Oumwi kwimwe kaja okundomera iniku. 19Nibamba okusurumbara no kumubu:sya umwi umwi ati, ?Si nanye? 20Nababwira ati, Oumwi kwikumi na babiri, unu ke:nirisya nanye ku rutuba, oyo niwe. 21Omwana wo mu:nu kagenda rwa kutyo andikiywe, nawe jirimubona omu:nu uyo ara-muso:ka Omwana wo mu:nu mu ciwi. Kwakabee kwa bwana omu:nu uyo atake:buywe.

Okusangira Okweru

(Mt. 26:26-30; Lk. 22:19-20; 1 Bakor. 11:23-26)

22Anu bariga bacarya, nagega omukate, nasabwa, nagubeganya nabayana, na:ika ati, Mugege. Gunu nigwo mubiri gwani. 23Nagega ecikombe one, nasi:ma, nabayana, nibanywako bo:ne. 24Nababwira ati, Ganu ni manyinga gani aga indagano inya:ya ganu agaurura kurwa ba:nu ba:fu. 25Ni cimari enibabwira ati, Nitarisuba kunywa ku matwasyo ge mijabibu na katyari, okukinga ku rusiku urwo ndiganywa gari maya:ya mu bukama bwa Nyamuanga. 26Wejire bamara okwimba orwimbo nibauruka okuja ku ci:ma ce Mijeituni.

Yesu naraga eja Petero kumwiga:na

(Mt. 26:31-35; Lk. 22:31-34; Yo. 13:36-38)

27Mbe Yesu nababwira ati, Omujo:sinirirwa bo:ne. Okuba jandikirwe ati, Ndibuma omure:fi, na ji:na:ma jirinyarambuka. 28Nawe ariba namara okusu:ka, ndibatangatira okugenda Galilaya. 29Nawe Petero namubwira ati, Nakabee bo:ne barisinirirwa, nawe anye uri. 30Yesu namubwira ati, Ni cimari enikubwira ati, Awe rero mu ngeta inu, iŋoko eijo:ba icari kurira kwiya kabiri, oujo:nyiga:na kwiya kasatu. 31Nawe omwene neyongesya muno okwaika ati, Norwo kunyiire okufwira aamwi nawe, nitakukwiga:na na katyari. Na bo:ne niba:ika kutyo.

Yesu nasabwa mu Getesemane

(Mt. 26:36-46; Lk. 22:40-46; Yo. 18:1)

32Nibakinga anu atogwaga risi:na ryendeo ati, Getesemane. Nababwira abe:igisibwa bae ati, Mwinyanje anu, nimare okusabwa. 33Nagega Petero na Yakobo na Yoana aamwi nage, namba okuwa omwoyo no kurumwarumwa muno. 34Nababwira ati, Omwoyo gwani gurino butaka bwafu bwo kunyita. Mube anu mutengeje. 35Naribatao kuto:to, nagwa a:si kabundare nasabwa ati, araba bitatami:sye omwanya ogwo gumutureko. 36Na:ika ati, Abba Rata, awe outura byone. Nso:syako ecikombe cinu, nawe tari rwa kutyo anye enenda, nawe rwa kutyo awe owenda. 37Naja nabasanga baongee, nabu:sya Petero ati, ?Simoni, waongee? ?Utatura kutengeja saa na imwi? 38Mutengeje musabwe, korereki musige kwingira mu kusakwa. Omwoyo nigwo ogwenda, nawe omubiri gurengaae. 39Nasubayo rindi, nasabwa misango ejo ejo. 40Nasuba rindi nabasanga baongee okuba ame:so gebwe gariga gabondere. Nibaremo:menya ogwo kuindura. 41Naja orwa kasatu, nababwira ati, Wori muongere:ra, mwi-syo:mwoyo. Je:ya, omwanya gwakinga. Mbe Omwana wo mu:nu katu:rwa mu maboko ga be bibi:bi. 42Mwimuke cigende. Rora unu kandomera iniku ajo:kukinga.

Yuda naja ne cise okugwata Yesu

(Mt. 26:47-56; Lk. 22:47-53; Yo. 18:3-10)

43Aonao anu ariga aca:ika, Yuda, niwe oumwi kwikumi na babiri, na:ja ne cise aamwi nage bari ne binyambutu na masimbo, nibaso:ka ku bagabisi abakuru na ku bandiki na bakaruka. 44Na unu amuromee iniku ariga abayae ecibarikisyo na:ika ati, Unu ndanyunya mbe ati niwe, mumugwate mumugege kisi. 45Mbe wejire akinga, aonao namu:jako na:ika ati, Rabbi Rabbi. Namunyunya muno. 46Nibamutako amaboko gebwe nibamugwata. 47Nawe oumwi ku banu bariga bemereguyu ao nasoora ecinyambutu cae, namutema omugaya wo mugabisi Omukuru, namutemako okutwi. 48Yesu naindura na:ika ati, ?Mwanyijira rwa banu abe:jira omusa:kusi mune binyambutu na masimbo okungwata? 49Nabaga nemwe mu yekaru kusiku niniigisya, nimuremo:kungwata. Nawe byaba kutya korereki binu byandikirwe bikumire. 50Mbe niwo bo:ne nibamuwako nibe:ruka. 51Omumura umwi namuru:ba, ariga ambae omwenda gwa ikatani gwenyere ku mubiri, nibamugwata, 52Nabasigira omwenda gwa ikatani, ne:ruka tuyu.

Yesu mu ci:na co mugabisi omukuru

(Mt. 26:57-68; Yo. 18:12-14, 19-24)

53Nibasira Yesu ku mugabisi Omukuru, nibamwikofyanyisyako abagabisi abakuru bo:ne na bakaruka na bandiki. 54Mbe Petero namuru:ba e:bere:rere kura okukinga munda mu rugo rwo mugabisi omukuru. Ariga enyanjire na bakosi nabira omuriro. 55Mbe abagabisi abakuru na ba mu cirwaji bo:ne nibaenjako Yesu ecikayo korereki bamwite, nawe batacibwene. 56Okuba ba:fu bamukurisisye ebyo rurimi, nawe no kukurisya kwebwe kutariga kumwi. 57Mbe abandi nibe:muka nibamukurisya ebyo rurimi, niba:ika ati, 58Eswe camunguywe na:ika ati, Ndifumya iyekaru inu, inu yakorerwe na maboko, na mu siku isatu ndyumbaka eindi inu itarikorwa na maboko. 59Nawe no kwaika kwebwe one kutariga kumwi. 60Omugabisi Omukuru nemereguru aagati, nabu:sya Yesu ati, ?Awe utakuindura na katyari? ?Ni misango ki jinu banu abakurega? 61Omwene najibira atamuinduye na katyari. Omugabisi Omukuru namubu:sya rindi ati, ?Nawe Kristo, Omwana wa Rikusyo? 62Yesu na:ika ati, Nanye oyo, nemwe murirora Omwana wo mu:nu enyanjire ku kuboko kwe buryo okwa Managa, naja na me:re ga ku rwire. 63Omugabisi Omukuru natemura emyenda jae, na:ika ati, ?Cikenere ba ki abo kumwaikako rindi? 64Mwongwa okufuma kwae, ?muna gaya? Bo:ne nibamutemera eci:na ati, e:ire kwitwa. 65Abandi nibamba okumufuburira amafwefu, no kumufundigisya ame:so, no kumubuma ebifu:fi, nibamubwira ati, Nurage. Abakosi nibamusasa amai.

Petero namwiga:na Yesu

(Mt. 26:69-75; Lk. 22:54-62; Yo. 18:15-18, 22-27)

66Mbe Petero anu ariga:ri mu rugo, oumwi wa bagayagasi bo mugabisi omukuru na:ja. 67Mbe wejire arora Petero nabira omuriro, namurore:rera na:ika ati, awe one wariga aamwi na Yesu Munajareti. 68Nawe mwene ne:ga:na na:ika ati, Nitakumenya jinu owaika, amwi ntakusombo:kerwa. Nauruka anja mwibindo, iŋoko nikokoroma. 69Mbe omugayagasi namurora, namba rindi okubwira banu bariga bemereguyu ao ati, Unu ni we:ja:bo. 70Omwene ne:ga:na rindi. Mbe wejire gwaitao mwanya muto:to, banu bemereguyu ao nibabwira Petero rindi ati, Ni cimari uri we:ja:bo, okuba uri Mugalilaya. 71Omwene namba okwifuma no kuraira ati, Omu:nu unu omwaika nitakumumenya. 72Aonao iŋoko nikokoroma rwa kabiri. Petero ne:cuka omusango gunu Yesu amubwiriye ati, Iŋoko eijo:ba icari kurira kwiya kabiri oujo:nyiga:na kwiya kasatu. Mbe ejire e:ganirisya kutyo narira.

Currently Selected:

Mariko 14: KIJ1960

Highlight

Copy