Mariko 15
15
Yesu mu ci:na ca Pilato
(Mt. 27:1-2, 11-26; Lk. 23:1-15; Yo. 18:28-40; 19:1-15)
1Mbe wejire bwaca katondo, aonao abagabisi abakuru na bakaruka na bandiki na ba mu cirwaji bo:ne nibarwaja, nibaboya Yesu, nibamugega nibamure:ta ku Pilato. 2Pilato namubu:sya ati, ?Nawe Omukama wa Bayaudi? Namuindura ati, Rwomwo wa:ikira. 3Abagabisi abakuru nibamurega myafu. 4Pilato namubu:sya rindi ati, ?Utakuindura na katyari? Rora misango myafu jinu abakurega. 5Nawe Yesu atainduye musango rindi, ndijei Pilato marugu:ra.
Yesu amwi Baraba
(Mt. 27:15-26; Lk. 23:17-25; Yo. 18:38-40)
6Mbe ku rusiku orukuru abata:tiriraga muboywa umwi unu bendaga. 7Mbe ariga:rio mu:nu natogwa Baraba, unu aboyerwe na be:ja:bo bo rwango, banu be:tire aba:nu mu rwango orwo. 8Mbe ebise nibaja nibamba okumusabwa abakorere rwa kutyo abakoreraga. 9Mbe Pilato nabaindura na:ika ati, ?Omwenda nibata:tirire Omukama wa Bayaudi? 10Okuba ariga amenyere ati abagabisi abakuru bamugwatiye rwiso. 11Nawe abagabisi abakuru nibakungirisya ebise ati, Baraba niwe aja:bata:tirire. 12Pilato naindura rindi nababu:sya ati, ?Mbe ka nje:mukore atiki unu omutoga Omukama wa Bayaudi? 13Nibamwaya rindi ati, Mumubambe ku musaraba. 14Pilato nababu:sya ati, ?Kubaki, akorere bubi:bi ki? Nibeyongesya okumwaya ati, Mumubambe ku musaraba. 15Mbe Pilato nenda okukondisya ebise, nabata:tirira Baraba, namubuma Yesu jisanyu, namuso:sya ajo:bambwa ku musaraba.
Nibajimya Yesu
(Mt. 27:27-31; Yo. 19:1-3)
16Mbe abasirikare nibamusira munda mu rugo ndutogwa ati, Puraitorio nibakofyanya basirikare bo:ne. 17Nibamufwafya omwenda mutukurasi, nibaruka orutenga rwa mawa, nibamutera ku mutwe. 18Nibamba okumuke:sya ati, Kasinge Mukama wa Bayaudi. 19Nibamubuma risa:ru mu mutwe, nibamufuburira amafwefu, nibe:fukama nibamuramya. 20Wejire bamara okumujimya, nibamufu:ra omwenda omutukurasi, nibamufwafya emyenda jae. Nibamugega nibamuurusya okujo:mubamba ku musaraba.
Yesu nabambwa
(Mt. 27:32-44; Lk. 23:26-43; Yo. 19:16-27)
21Ariga:rio mu:nu naitiŋana, niwe Simoni wende Kurene, oyo ariga naso:ka mu ndimiro, esemwene Alekisanda na Rufo. Nibamusinyirisya oyo okugega omusaraba gwae. 22Nibamure:ta anu atogwaga Gologota, obugajuro bwagwo ati, Aweciyanga. 23Nibamuyana okunywa amanji ge mijabibu gasasisyemo omugaju, nawe omwene atagaramiye. 24Nibamubamba ku musaraba nibagabana ebifwaro byae, nibe:tongya, cinu omu:nu wo:ne aragega. 25Jariga jiri saa esatu anu bariga nibamubamba. 26Mbe inyaruba ya intambara yae niyandikwa inguru yae ati, omukama wa Bayaudi. 27Na basa:kusi babiri nibabambirwa aamwi nage, oumwi ku kuboko kwae okwe buryo, no undi ku kwe bumosi. 28Mbe nigakumisibwa ganu ga:ikire ati,
Abariywe aamwi na bakai.
29Na banu baitiŋanaga nibamufuma, nibasingisya emitwe jebwe niba:ika ati, A:haha, awe rufumya yekaru no kuyumbaka mu siku isatu, 30ionya omwenikiri, ika ku musaraba. 31Nyaburiko na bagabisi abakuru one nibamugomberera abene aamwi na bandiki niba:ika ati, Aonyaga abandi, atakutura kwiyonya omwenikiri. 32Kristo Omukama wa Israeli naso:ke woryanu ku musaraba, korereki cirore ci:kirisye. Na banu babambiywe aamwi nage one nibamufuma.
Okufwa kwa Yesu
(Mt. 27:45-56; Lk. 23:44-49; Yo. 19:28-37)
33Wejire je:ya saa eta:nu na imwi, niciba cisu:te ku:si yo:ne kukinga ku saa ya kata:nu na kana. 34Mbe mu saa ya kata:nu na kana Yesu nakunga na buraka bunene ati, Eloi Eloi, rama sabakesani? Obugajuro bwagwo ati, Nyamuanga wani, Nyamuanga wani, ?wansigira ki? 35Abandi banu bariga bemereguyu ao, wejire bongwa, niba:ika ati, Rora, kabirikira Eliya. 36Mbao umwi nabirima, ne:na rifwo mu siki, narita kwisa:ru, namuyana anywe, na:ika ati, Siga cirore araba Eliya ka:ja okumwisya. 37Yesu nakunga na buraka bunene omwoyo niguwamo. 38Mbe risaenge rya mu yekaru niritemukamo maba:ra gabiri kuso:ka inguru kukinga emwaro. 39Omukuru wa basirikare unu ariga e:mereguyu ao be:mirire:ne, wejire arora omwoyo gwae niguwamo kutyo, na:ika ati, Ni cimari omu:nu unu ariri Mwana wa Nyamuanga. 40Bariga bario abagasi mbarora be:bere:rere kura. Mwabo ariga:rimo Maryamu Magadalene, na Maryamu nyiramwene Yakobo omuto:to na Yose, na Salome. 41Abo nibo baengyanyaga nage mbamufurubendera anu ariga:ri mu Galilaya. Na bagasi abandi ba:fu bariga bario banu be:jire Yerusalemi aamwi nage.
Yesu ne:swa mu fwa
(Mt. 27:57-61; Lk. 23:50-56; Yo. 19:38-42)
42Mbe wejire kwaba kegoro, okuba rwariga rusiku two kwira:ba, nirwo rusiku runu orutangatira isabato, 43Yusufu owende Arimataya, omu:nu we cibaro mu cirwaji unu ariga narindirira obukama bwa Nyamuanga, oyo nengira ku Pilato no buba:si, nasabwa ecitundu ca Yesu. 44Pilato narugu:ra okungwa ati afu:ye bwangu, nabirikira omukuru wa basirikare, namubu:sya araba omwanya gwaitiŋeneo anu akafwiriye. 45Wejire ongwa ku mukuru wa basirikare, nayana Yusufu ecitundu. 46Omwene nagura omwenda gwa ikatani, namwisya, namusinga mu mwenda ogwo namuta mu:fwa inu yariga irimire ku rutare. Nairingisisyako ribui ku muryango gwa i:fwa. 47Maryamu Magadalene na Maryamu nyiramwene Yose nibarora anu ateeywe.
Currently Selected:
Mariko 15: KIJ1960
Highlight
Share
Copy
Want to have your highlights saved across all your devices? Sign up or sign in
Kijita New Testament © The British and Foreign Bible Society and The Bible Society of Tanzania, 1960.