Pigólí 1

Uŋun wó Ufúlúʼtú wó Yə́sus yɛɛ́gágɛn pɔɔ́n pə́ə́ŋ pá maʼtom

1Sɔ́g waam wo ɔʼtɛ́m Tiofíil. A kálaʼtaʼ yaam ɛ na oʼto na oʼto yɛ́ njígudílən#1.1 Kálaʼtaʼ yɛ́ɛnɛ ɛ Pigólí pɛ́ pɔɔ́n pá maʼtom ɛlɛ kɛɛnanan kó Tɔsɔm Tólaŋ tó ufúlúʼtú Lóʼkas yiídílə. Nyɔ́lɛ́ ogo úmmuʼ aa yiídílə yɛ́ɛnɛ. Kólɛ́ aa alɛɛ́ əgusəə ɔnɔ́ a yəəŋ ɛ na oʼto na oʼto, nyɔ́lɛ́ yiídílə kɔ əgín pɛbán piim pɛ́ Yə́sus ayɛ́ɛ́lɛ, na nkə kiim kɛ́ ayáʼkánánɛ pɔɔd., nyiídílə kɔ pɛbán piim pɛ́ Yə́sus ayɛ́ɛ́lɛ, na nkə kiim kɛ́ ayɛ́ɛ agaaʼkananɛ pɔɔd, kəə́bə́ə́ əgín wɔnɔ́ ná əyə́bə́ə́líí pigólí piə́ŋ, 2agɛɛn əgiig a wɔɔ́s wó Táán əyímusiə́d a mɔɛn. Náa, a kóonɛ lɛ́ ə́díin abag náan a mɔɛn, yɛɛ́dɛánánɛ na pɔɔ́n pə́ə́ŋ pá maʼtom pá əyííyid, wɔnɔ́ ná pə́díinií pɛ́ɛlɛ a ngim yəəŋ. Ayɛ́ɛ́lɛ náan a toɛn tó Uŋun wó Ufúlúʼtú. 3A ngim ɛ kugu kuə́ŋ, ná ayɛ́ɛ əə́ʼkiim álon a kəəniʼ, na pɔ́lɛ́ aa ayɛ́ɛ́n ogoóloodi pɛnɛŋ wɔnɔ́ pɛnɛŋ, a mədúg əʼtin ábaan má ayɛ́ɛ́lɛ, agɛɛlɛ lɛ́ pálɛŋ fɔ́lɔ́b fɔ́lɔ́b lɛ́ nyɔ́lɛ́ alɛ ongóm, aábodɛ́ananɛ pɛbán pɛ́ a Nɛlaamɛʼ nɛ́ Táán.

4Wɔɔ́s wúmmú wó páyɛ́ɛ agonɛ́ɛnɛ, yiísə́ə́ ɔnɔ́ na pɔ́lɛ́: «Údə́ən pólɔb áanɛ a Yolósalɛm. Póŋáan nkə kɛ́ Mbáa ayɛ́bogágɛn, mɛɛ́nyɔ́amɔɛ́d tɛn mbáabodɛ́anɛ kɛ́lɛ́ na unuʼ waam, nyɔʼkɔ́: 5Na məní má məní aa Sɛ́aŋ ayɛ́ɛ agosɔgɛna pɔɔd. Náa, a mədúg má mə́ndəgimií, na Uŋun wó Ufúlúʼtú aa Táán alɛ́ɛ́ koboósɔgɛnɛɛ́.»

Yə́sus yɛɛ́bág a mɔɛn

6Paaʼkan pá páyágɔnyɛdɛn na nyɔ́lɛ́ pááság kumuŋíən pɔ́nɔ́ əə: «Sə́dúk, a kɛnɛŋ kɛ́ɛnɛ kɛ́ tɛlɛɛ́ a kɛ́lɛ́ aa wəə́ndəgiʼkini kogónɛ́ɛ́ Nɛlaamɛʼ nɛ́ Ɛ́sɛlayɛl a#1.6 Pódála tɛn náan a kálaʼtaʼ yɛ Ámo 9.11-12; Lóʼk 19.11 ?» 7Əyíbuyúlísíni ɔnɔ́ na pɔ́lɛ́: «Kɛ́dɛɔ́gɔ lɛ́ pəŋi pólɛŋ naanɛ́g áa pɛbán pɛ́ɛb pɛ́agaáyɛ́ɛlɛ, ɔmbɔ́ lɛ́ a wɔɔ́s igə, lɛ́ Paabá yiídə́nígi pɛ́lɛ́ a toɛn tuə́ŋ tó nyɔ́lɛ́nyɔ́əsíŋ. 8Náa pəŋi, Táán alɛ́ɛ́ koboyɛ́ʼkɛn toɛn ná Uŋun wó Ufúlúʼtú úbuyíimin. Polɛ́ɛ́ kɛʼtɛ́lɛmɛn mbaasɔ́ áanɛ a Yolósalɛm, na a əʼkúu a Siudə́ə əngim, na a Səməlíi kɛ́, súʼtə́ə́ a əʼkid yɛ́ nsí əngim.»

9Ná ayɛ́ɛ aáʼkoman kosɔyɔ náan, əə́bə́ə́ kobag a mɔɛn a əngis á paaʼkan pə́ə́ŋ, páamodɛ́ʼtɛg, aábod amɛ́ɛn ənímin a kɛbɛd a kaadɛ. 10Pə́ʼkudíin anɛ́ɛ́n pə́yəlim kɔ agodɛ́ʼtɛg wɔnɔ́ ná Yə́sus aáʼkobágɛ́ɛ́ a mɔɛn, nto ɛ pɔɔd ɛ́baan foáy, yaáʼkodɛ́lɛm a ɛbá yɔ́ɔ́bɔn na pilə́ə́ pifúlúʼtú. 11Náa pɔɔd póob pɔ́nɔ́ na pɔ́lɛ́: «Pəŋi, pibíəniʼ pɛ́ Kalilə́ə, nkə aa puə́ʼkudíinií púyəlim áay agodɛ́ʼtɛg mbálámɔɛn ə́? Yə́sus nyóon nyɔ́ aáʼkobágɛ́ɛ́ a mɔɛn náan, alɛ́ɛ́ kimbuúlini tɛn əgín náan wɔnɔ́ ná pomámoodála aábag.»

Ondáŋ ó pɔɔ́n pá maʼtom

12Oʼkon ogo wó páyɛ́ɛ a wólɛ́, páyɛ́ɛ agodɔ́ŋɔn lɛ́ «Oʼkon ó pa Olifiyə́ə.»#1.12 Pódála nkə aa kɛ́lɛɛ́ «olifiyə́ə» a Mə́l 11.1 Ódɛʼkɛ́ɛ laálá na pálɛ́ɛg ɛ Yolósalɛm, óyɛ́ɛ yoom náanɛ wɔnɔ́ míníid niʼtin na mówád má ongɛn. Pɔɔ́n pá maʼtom pááság kiim pə́suu əguúlini a Yolósalɛm. 13Ná pə́yíím pə́suu, pɛ́ɛ́bág a nɛsom nɛ́ yoog nɛ́ mɔɛn. Kɔ a nɛ́lɛ́ aa páyɛ́ɛ paágɔnyɛla pɔ́lɛ́ piim. Páyɛ́ɛ kɔ lɛ́ na Píɛ, na Sɛ́aŋ, na pa Sɛ́ag pɔ́lɛ́ ná Əndələ́ə, pa Filíib pɔ́lɛ́ ná Tómas, pa Pəʼtələmíi pɔ́lɛ́ ná Maʼtɛ́as, na Sɛ́ag tɛn nyummú, mɔɔ́n wo Əlifə́ə, na Simɔ́ɔŋ nyɔ́ ayábáámɛ́ɛ́ agɛɛlɛ lɛ́ nigúu nɛɔ́bɔn níɛn na nɛlaamɛʼ a oʼto wɔ́ɔ́bɔn, na Síud, mɔɔ́n ó Sɛ́ag. 14Pɔ́lɛ́ piim pə́yə́yíísin, pɔ́ɔgɔɔ́sɔ́gɔlɔn Táán unuʼ wɔ́ɔ́bɔn úmmuʼ, ondáŋ na ngab ɛ pagɛ́ɛd yimmú, na pomóŋŋí pá Yə́sus, na ŋŋí wəəŋ Malɛ́a.

Pə́yííyid Maʼtɛ́as əguyə́əgi oʼkɔɔ wó Siudáa yiídí

15Wɔɔ́s wúmmú a mədúg mágo móom, pəə́liʼtiniʼ páyágɔnyɛdɛn. (Páyɛ́ɛ náanɛ wɔnɔ́ əʼtin á pɔɔd áʼtáan na úmmuʼ.) Náa Píɛ aádɛ́ɛmɛn kidə́níʼtən a kɛgaágadɛ kɛɔ́bɔn, ɔnɔ́: 16«Pomóŋŋí, nkə kɛ́ kíyə́dílə́ə́ a Kálaʼtaʼ ɛ Táán kíígóodi lɛ́ kɛ́as: Kɛ́lɛ nkə kɛ́ Uŋun wó Ufúlúʼtú óyɛ́ɛ́lɛ lɛ́ Tə́fid ə́səə a noá na Siudáa#1.16 Pódála tɛn náan a kálaʼtaʼ ɛ Pɛʼk 41.10 nyɔ́ əyíím ə́súidə pɔɔd əgiim əgumin Yə́sus. 17Ayɛ́ɛ na pəsi, əə́gud tɛn na pəsi. 18Náa, na mɔɔnɛ́ má páyɛ́mosáábɔn a pigólí piə́ŋ pɛ́ pɛbɛ́ pɛ́ ayɛ́ɛ́lɛ, ayóóŋɛ́nɛ kɛsom kɛ́ nsí na mɔ́lɛ́. Yiídə́əŋ kɔ a kɛ́lɛ́ na oʼto, kaadɛ kə́ə́ŋ káásaalɛg, todɔ tuə́ŋ túmə́súgíníí a nsí, əə́gú. 19Ungim a Yolósalɛm ayóób kɛbán kɛ́ɛg. Kólɛ́ aa pɛ́ɛ́lóg kɛsom kɛ́ nsí kɛ́go kɛ́ɛg a tɔgɛ́ɛ́ toɔ́bɔn lɛ́ “Áʼkɛ́ldáma”, áay lɛ́ “kɛsom kɛ́ nsí kɛ́ maŋɔ́.” » 20«Táá nkə kɛ́ kíyə́dílə́ə́ a Kálaʼtaʼ ɛ pɛʼkwáá a kɛ́ɛnɛ lɛ́:

“Noádɛʼ nuə́ŋ nólɔb iyó,

mɔɔd ədində́ndin a nólɛ́.” »

«Kɛ́lɛ tɛn kidiídílə́ kɔ a Kálaʼtaʼ yɛ́ɛy lɛ́:

Wɛndɛ́ŋ ádɛ́lɛm a pigólí piə́ŋ#1.20 Kɛ́lɛ náan a kálaʼtaʼ ɛ Pɛʼk 69.26; 109.8 »

21-22«Kíəguunə anɛ́ɛ́n lɛ́ tíiyid mɔɔd wɛndɛ́ŋ nyɔ́ aádɛ́lɛm mbaasɔ́ wɔnɔ́ pəsi lɛ́ Yə́sus aálón fɔ́lɔ́b a kəəniʼ. Mɔɔd ogo ogóódi kɛɛn mɔɔd nyɔ́ ayɛ́ɛ yiim ə́biyə́njən kɛnɛŋ kiim ná Yə́sus ayɛ́ɛ na pəsi, a kəə́bə́ə́ a wɔɔ́s wó Sɛ́aŋ ayɛ́moyɛ́ʼkɛn ɔsɔgɛn, agɛɛn əgiig a wɔɔ́s wó yɛɛ́bág a mɔɛn.»

23Pááság kodɔ́ŋɔn nto ɛ pɔɔd ɛ́baan lɛ́ na Maʼtɛ́as, na Yósɛb nyɔ́ páyɛ́ɛ agodɔ́ŋɔn tɛn lɛ́ Palsábas, pɛnyɛʼtɛ́nɛ́n piə́ŋ lɛ́ Síústus. 24Pɔ́yɔ́sɔ́gɔ́lɔ́nɛ́ɛ́ Táán, pɔ́nɔ́: «Sə́dúk, wɛ nyɔ́ waálɛŋ ntɛ́m ɛ pɔɔd piim, íbilóódi, a nto yɛ́ɛnɛ ɛ́baan, oyaán áa umííyid 25lɛ́ yɛ́ɛn mɔɔ́n o maʼtom, ádɛ́lɛm a oʼkɔɔ wó Siudáa yiídí ə́mə́dí, agɛɛn kɛnɔ kɛ́ yiígóodi lɛ́ yɛ́ɛn.» 26Pɛ́ɛ́lá ntɔŋ agolɛŋ ánɛ aa pə́siədií. Ntɔŋ yaáság kudə́əŋ a Maʼtɛ́as. A kəə́bə́ə́ áay, pááság komosɔ́dɛ a ondáŋ ó pɔsɔ́g pɔɔ́n pá maʼtom pá pówád na úmmuʼ pá páyɛ́ɛ páʼkolɔb.

Currently Selected:

Pigólí 1: yatDBL

Highlight

Copy