Maak 13
13
Yisa yɛli Naawuni jɛmbu duu wurimbu yɛla
(Matiu 24.1-2; Luk 21.5-6)
1Yisa ni daa yi Naawuni jɛmbu duu maa ni na ka o nyaandoliba ni yino yɛl’ o, “Karimba, nyam’ kuɣa ŋɔ mini duri ŋɔ ni viɛl’ shɛm!”
2Ka Yisa bɔh’ o, “A nya du’ kara ŋɔ zaa bebɔ? Di zaa ni ti wurim hal ka di kuɣ’ yini gba ti ku lan pa di kpee zuɣu.”
Wahala mini nahiŋgu
(Matiu 24.3-14; Luk 21.7-19)
3Ka Yisa daa ti ʒi Olivi Tihi Zoli zuɣu tuhi Naawuni jɛmbu duu, ka Pita mini Jeemsi ni Jɔn ni Anduru bɔh’ o ashilɔni, 4“Ti Duuma, bɔ saha ka dimbɔŋɔnim’ zaa ti yɛn niŋ, ka shihir’ bɔ nti yɛn wuhi dimbɔŋɔnim’ zaa niŋbu saha? Ti bɔri ni a yɛl’ ti.”
5Ka Yisa daa piligi yɛri ba, “Miriya ka yi ti chɛ ka so birigi ya; 6dama niriba pam ni ti zaŋ n yuli kana ti yɛra, ‘Mani n-nyɛ Masia! Mani n-nyɛ Masia!’ Ka bɛ ni ti birigi niriba pam. 7Ka yi yi ti wum ni bɛ tuhiri tɔbu, ka wumdi ŋumaŋuma ni tɔb’ shɛŋa na yɛn tuhi, yin’ di chɛliya ka yi suhiri zɔhira; dama faashee dimbɔŋɔnim’ zaa bahi niŋ, amaa di ti bi yɛn wuhi ni dunia yiɣisibu saha paami maa. 8Dama zuliya kam ni ti tuhiri taba, ka tiŋgbana zuɣulaannim’ ti yiɣisi tuhiri taba; ka tiŋgbani ti damdi bɔb’ shɛŋa polo, ka kum ti luri pam; amaa dimbɔŋɔnim’ zaa ti yɛn bemi kaman paɣipuulan’ wolisibu piligu biɛrim la.
9 Amaa miriya! Bɛ ni ti gbahi ya tahi ʒiishɛhi, ka fiɛbi ya Yɛhudianim’ jɛmbu duri ni, ka zaŋ ya tahi gomnanim’ mini nazuɣuri tooni n zuɣu, ka yi ti niŋ n shɛhiranim’ bɛ sani. 10Amaa di niŋ kamaata ni lahibal’ suŋ ŋɔ waazu yihi ti zuliya kam pɔi. 11#Mat 10.17-20; Luk 12.11-12 Dinzuɣu bɛ yi ti gbahi ya tahi saria karibu shee, yin’ di chɛliya ka yi suhuri zɔhiri yi ni ti yɛn yɛli shɛm zuɣu, amaa ti kul yɛlimiyala yɛtɔɣ’ shɛli din be yi suhuri ni di saha maa, dama pa yimaŋmaŋ’ yɛtɔɣa nti yɛn nyɛ li, amaa di yɛn nyɛla Naawuni Shia Kasi dini. 12Di saha nir’ ni ti yi o mabia nyaaŋa n-chɛ ka bɛ ku o; ka doo ni ti yi o bia nyaaŋa n-chɛ ka bɛ ku o, ka bihi gba ti zaɣisi bɛ banim’ mini bɛ manima, ka zaŋ ba puhi kubu. 13#Mat 10.22 Ka sokam ni ti jɛn ya n yuli zuɣu. Amaa ŋunkam ti niŋ suhukpeeni hal ni wahala ŋɔ bahigu ni ti tiligi.”
Azaaba din ti yɛn kana
(Matiu 24.15-28; Luk 21.20-24)
14 #
Dan 9.27; 11.31; 12.11 Yisa daa lan yɛli ba, “Ka yi yi ti nya ka yɛlibiɛ’ shɛli din chihira ʒe di ni bi simdi ni di ʒe luɣ’ shɛli polo, ŋunkam ti karim sabbu ŋɔ, ŋun’ baŋmi di ni wuhi shɛm! Di saha maa bɛn ti be Judia, bɛn’ zom’ ti du zoya. 15Ka ŋunkam ti be dufahirili zuɣu, ŋun’ di lan siɣina ni o ti kpe o duu kah’ o nɛma. 16#Luk 17.31 Ka so yi ti be puu ni, ŋun’ di lan kuli yiŋa ni o ti zaŋ o binyɛrigu. 17Di saha paɣipuhinim’ mini biliɛrinim’ yɛla ni ti mali nambɔɣu pam! 18Dinzuɣu suhimiya Naawuni ka o chɛ ka yɛla ŋɔ ti ku niŋ tu kikaa saha; 19#Dan 12.1; Kah 7.14 dama Naawuni ni nam dunia ŋɔ hal ni zuŋɔ ka ti nin’ na bi nya wahala shɛŋa zaa ni ti beni, ka di tatabo mi ku lan niŋ. 20Ti Duuma yi di bi filim di dabisa maa, so naan ti ku tiligi; amaa o ninvuɣ’ gahinda bɛn nyɛ o ni pii shɛb’ la zuɣu, o filim di dabisa maa.
21 Di saha maa so yi ti yɛli ya ni Masia be kpe bee kpe ha, yin’ di niŋya li yɛda. 22Dama Masia ʒirinim’ mini anab’ ʒirinim’ ni ti yi palo wuhiri shihira ka tumd’ alahiziba tumtumsa ni bɛ birigi niriba; ka hal di yi ni ti nani, bɛ ni birigi Naawuni ninvuɣ’ gahinda la gba. 23Amaa yinim’ ti miriya! Dinzuɣu ka n daŋ yɛri ya dimbɔŋɔnim’ zaa ka di saha na bi paai maa.
Daadam Bia labbuna
(Matiu 24.29-31; Luk 21.25-28)
24 #
Aiz 13.10; Ɛzɛk 32.7; Joɛl 2.10, 31; 3.15; Kah 6.12 Yisa daa yɛliya, “Amaa dabisa din ti yɛn doli wahala ŋɔ nyaaŋa saha, wuntaŋ’ ni ti zibigi, ka goli ti ku lan piɛla, 25#Aiz 34.4; Joɛl 2.10; Kah 6.13 ka yiko din gbib’ zuɣusaa ni ti dam, ka saŋmarisi yi zuɣusaa luna. 26#Dan 7.13; Kah 1.17 Di saha maa ka bɛ ni ti nya Daadam Bia ka o be sagbana ni kanna ni yiko pam mini jilima. 27Ka o ni ti tim malaikanima ka bɛ chaŋ ti laɣim o ninvuɣ’ gahinda bɛn be dunia ŋɔ ni luɣ’ shɛlikam zaa na.”
Fiig tia kpahimbu
(Matiu 24.32-35; Luk 21.29-33)
28Yisa daa lan yɛli, “Kpahimmiya fiig tia; Yi yi ti kul nya ka di wula puhiri va’ mama, di saha yi baŋya ni siɣili miriya. 29Lala mi n-nyɛ li, yi yi ti nyari ka shihira ŋɔ zaa niŋda, yin’ baŋmiya ni di saha miriya hal ka di ku lan yuui gba. 30Yɛlimaŋli ka n yɛri ya, dimbɔŋɔnim’ zaa ni niŋ ka ʒiɛmani ŋɔ na bi vuui. 31Zuɣusaa mini dunia ŋɔ ni ti yiɣisi, amaa man’ yɛligu ku yiɣisi.”
So bi mi dindali bee di saha
(Matiu 24.36-44)
32 #
Mat 24.36
Yisa daa lan yɛli yaha, “So bi mi dindali bee di saha, hal malaikanim’ bɛn be alizanda ni mini Naawuni Bia la gba bi mi li; faashee o Ba maa kɔŋko n-naɣ’ mi li. 33Gbaamiya yimaŋa ka guhira, ka suhimiya Naawuni, dama yi bi mi di saha. 34#Luk 12.36-38 Daadam Bia kandina ni ti ŋmanila do’ so ŋun daa yɛn go n-chaŋ tinshee katiŋa, ka zaŋ o yili niŋ o yiŋbihi nuu ni ka ti sokam o tuma, ka yɛl’ o yiligula ni o gul’ o yili maa la. 35Dinzuɣu di gbihiriya, dama yi bi mi yil’ yidan’ ni ti yɛn kuna saha shɛli, amii zaawuni bee yuntisuɣu bee nolɔɣu kukoli bee biɛɣ’ asiba; 36dama yi yi gbihira, o ni ti paana libigi ya. 37N ni yɛri ya shɛm ŋɔ, sokam zaa ka n yɛra, Di gbihiriya!”
Currently Selected:
Maak 13: RLDB
Highlight
Share
Copy
Want to have your highlights saved across all your devices? Sign up or sign in
Red Letter Dagbani Bible © Bible Society of Ghana, 2011
