Maak 14

Yisa kubu nia lɔbu

(Matiu 26.1-5; Luk 22.1-2; Jɔn 11.45-53)

1 # Yibu 12.1-27 Di ni daa ti kpalim daba ayi ni bɛ puhi Yaɣigari Chuɣu, bɛ ni lan booni shɛli Bɔrɔbɔro din ka Dabindi Chuɣu la, ka maligumaaniba kpamba mini Naawuni zaligubaŋdiba daa bɔri so’ shɛli bɛ ni yɛn doli sɔɣ’ gbaai Yisa ku o; 2ka daa lee yɛli, “Ti di niŋ li chuɣu maa dali, dama di pa shɛli ka niriba ti taai duŋ o gbaabu maa zuɣu.”

Paɣ’ so niŋ tulaale ʒe Yisa

(Matiu 26.6-13; Jɔn 12.1-8)

3 # Luk 7.37-38 Yisa daa ti be Bɛtani Saimɔn ŋun daa nyɛ kɔŋlan’ la yiŋa n-ʒiya diri bindirigu, ka paɣ’ so daa zaŋ luɣulu’ viɛlli din pali tulaale alali ka Yisa sanna ti yoo’ li kpaai niŋ o zuɣu ni. Bɛ ni booni ti’ shɛli naad la ka bɛ daa zaŋ mali tulaale maa, ka di mali shaara pam. 4Ka di daa ku ninvuɣ’ shɛb’ suli pam ka bɛ yɛri bɛ suhuri ni, “Bɔzuɣu ka paɣ’ ŋɔ saɣim tulaale ŋɔ lala? 5Dama tulaale ŋɔ naan tooi kɔhi gari tumtumda yuun’ muni tuma yɔri ka bɛ zaŋ li ti nandaamba.” Ka bɛ daa ŋumdi bɛ kparima ni niŋdi paɣ’ maa.

6Di saha ka Yisa daa yɛli ba, “Chɛliya paɣ’ ŋɔ baalim! Bɔ n-niŋ ka yi kaɣil’ o lala? Tuun’ suŋ ka o tum ma maa. 7#Zal 15.11 Dama nandaamba kul ni be yi sani sahakam, ka yi yi bɔri ba din viɛli niŋbu, yi ni tooi niŋ ba saha shɛlikam; amaa man’ kul ku be yi sani sahakam. 8Paɣ’ ŋɔ niŋ ma o kpiɔŋ tariga, dama o zaŋ tulaale ŋɔ niŋ ma n-gula n sɔɣibu. 9Yɛlimaŋli ka n yɛri ya, bɛ yi ti yihi lahibal’ suŋ ŋɔ waazu dunia ŋɔ ni luɣ’ shɛlikam zaa, bɛ ni yɛli paɣ’ ŋɔ ni tum tuun’ shɛli ŋɔ teer’ o yɛla.”

Judas saɣiya ni o ni yi Yisa nyaaŋa

(Matiu 26.14-16; Luk 23.3-6)

10Di saha maa ka Yisa nyaandoliba pinaayi la ni yino ŋun yuli daa booni Judas Isikariɔt la daa chaŋ maligumaaniba kpamba sani ni o ti yi Yisa nyaaŋa chɛ ka bɛ gbaag’ o. 11Bɛ ni daa wum Judas ni yɛli shɛm maa, ka di niŋ ba nyaɣisim pam, ka bɛ lo o alikauli ni bɛ ni ti o liɣiri. Ka o daa piligi bɔri so’ shɛli o ni yɛn doli yi Yisa nyaaŋa chɛ ka bɛ gbaag’ o.

Yaɣigari Chuɣu puhibu

(Matiu 26.17-25; Luk 22.7-14; Jɔn 13.21-30)

12Ka Bɔrɔbɔro din ka Dabindi Chuɣu la piligu dali daa ti paai, bɛ ni daa yi kɔrigiri Yaɣigari Chuɣu piɛbihi dahin shɛl’ la, ka Yisa nyaandoliba bɔh’ o, “Ya polo ka a lee bɔri ni ti mali ʒiishee ti a ka a puhi Yaɣigari Chuɣu ŋɔ?”

13Ka o daa tim o nyaandoliba ayi n-yɛli ba, “Chamiya fɔŋ ni; yi yi ti chirigi do’ so sol’ ni ka o ʒiri koyuli, yin’ doliy’ o. 14O yi ti kpe yil’ shɛli, yin’ yɛlimiya yili maa yidana ni yi karimba n-tim ya na ni yi ti bɔh’ o ni du’ din’ ni ka o min’ o nyaandoliba lee yɛn ʒini puhi Yaɣigari Chuɣu ŋɔ ka di di bindirigu? 15O ni ti wuhi ya jirambisa du’ kar’ shɛli bɛ ni pun malimali binshɛɣukam zali, ka yi mali chuɣu maa shili nimaani gul’ ti.”

16Ka o nyaandoliba maa daa chaŋ fɔŋ maa ni nti shiri nya Yisa ni yɛli ba shɛm maa zaa, ka mali Yaɣigari Chuɣu maa bindirigu dibu shili.

17Ka di daa ti niŋ zaawun’ yuŋ ka Yisa min’ o nyaandoliba pinaayi maa laɣimna. 18#Yila 41.9 Bɛ ni daa ti ʒini n-diri bindirigu maa ka Yisa yɛli ba, “Yɛlimaŋli ka n yɛri ya, m mini yinim’ bɛn laɣim diri ŋɔ ni yino ni yi n nyaaŋa.”

19Ka di daa niŋ ba suhugarigu, ka bɛ gbaag’ o bɔhibu yinoyino, “Mani? Mani?”

20Ka Yisa yɛli ba, “Di nyɛla m mini yi pinaayi ŋɔ ni yino ŋun laɣim mali bɔrɔbɔro suɣiri ʒiɛri la’ yin’ ni ŋɔ. 21Dama di ni niŋ Daadam Bia kaman di ni sab’ o yɛla shɛm la; amaa mbusim be ŋun ti yɛn yi Daadam Bia nyaaŋa maa zuɣu! Hal bɛ yi di daa bi dɔɣ’ o gba, di naan so o zuɣu.”

Ti Duuma Bindirigu dibu gbinni

(Matiu 26.26-30; Luk 22.14-20)

22Yisa min’ o nyaandoliba maa ni daa ʒiya diri bindirigu maa ka o zaŋ bɔrɔbɔro niŋ alibarika niŋ di ni, ka ŋmahiŋmahi li zaŋ ti ba ka yɛli, “N niŋgbuŋ m-bala; zaŋmiya li ŋubi.”

23Ka lan zaŋ wain pipia n-niŋ alibarika niŋ di ni, ka zaŋ li ti ba ka bɛ zaa nyu. 24#Yibu 24.8; Jɛr 31.31-34 Ka o yɛli ba, “Dimbɔŋɔ nyɛla Naawuni daalikauli pal’ shɛli o ni lo n ʒim ni. Dina n-nyɛ n ʒi’ shɛli din ti yɛn yi n niŋgbuŋ ni niriba pam zuɣu. 25Yɛlimaŋli ka n yɛri ya, n ku lan nyu tiwala kom ŋɔ naɣila dahin’ shɛli ka n ni ti nyu di zaɣ’ palli Naawuni nam ni.”

26Ka bɛ daa yili Naawuni paɣibu yilli naai, ka naanyi yi n-chaŋ Olivi Tihi Zoli zuɣu.

Yisa wuhi Pita ni yɛn chihi ni o bi mi ŋun’ Yisa shɛm

(Matiu 26.31-35; Luk 22.31-34; Jɔn 13.36-38)

27 # Zak 13.7 Ka Yisa daa yɛli ba, “Yi zaa ni ti zo ka chɛ ma, dama di sabiya ni Naawuni yɛliya, ‘N ni ku piɛgula, ka piɛri wurim.’ 28#Mat 28.16 Amaa n yi ti neei kum ni, n ni daŋ yi tooni chaŋ Galili.”

29Ka Pita yɛl’ o, “Hal sokam zaa yi ni zo ka chɛ a, man’ kul ku zo ka chɛ a.”

30Ka Yisa yɛl’ o, “Yɛlimaŋli ka n yɛr’ a, zuŋɔ yuŋ ŋɔ a ni ti chihi siɣimsiɣim buta ni a bi mi ma, ka nolɔɣu na bi kum buyi.”

31Ka Pita lan yɛl’ o ni nimmoo, “Hal bɛ yi ni ku m min’ a gba, n ku chihi ni m bi mi a.”

Ka Yisa nyaandoliba maa zaa daa yɛl’ lala.

Yisa be Gɛtsɛmani suhiri Naawuni

(Matiu 26.36-46; Luk 22.39-46)

32Ka Yisa min’ o nyaandoliba daa chaŋ luɣ’ shɛli din yuli booni Gɛtsɛmani la ka o ti yɛli ba, “Ʒinimiya kpe ka n chaŋ ti suhi Naawuni.”

33Ka o daa zaŋ Pita mini Jeemsi ni Jɔn pah’ omaŋ’ zuɣu, ka suhugarigu mini suhusaɣiŋgu daa gbaag’ o pam 34ka o yɛli ba, “N suhu saɣimya pam, hal di ŋmanila n yɛn kpimi. Yinim’ kpalimmiya kpe guhima!”

35Ka o daa tirisi tooni biɛla ha nti teei dɔn’ o pul’ zuɣu suhiri Naawuni ni di yi ni nani, saha ŋɔ din’ miligim’ o zuɣu. 36Ka yɛra, “M Ba, m Ba, binshɛɣukam nand’ a sani. Vuum’ pipia ŋɔ ka chɛ ma; amaa chɛ ka a yubu niŋ, pa n dini.”

37Ka o daa ti lab’ o nyaandoliba maa sanna nti nya ka bɛ gbihirimi ka o bɔhi Pita, “Saimɔn, yi gbihirimi? Yi ku tooi gali gom biɛla n zuɣu? 38Yirigimiya yimaŋ’ zuɣu, ka suhimiya Naawuni ni yi di ti lu zahimbu puuni, yi suhuri din’ bɔra, amaa ka yi niŋgbuna lee ka yaa.”

39Ka Yisa daa lan labi nti suhiri Naawuni n-kul yɛrila yɛtɔɣ’ yini maa o suhigu maa ni. 40Ka o daa ti lan labina nya ka o nyaandoliba maa lan gbihirimi, dama gom n-daa wum ba pam, ka bɛ daa bi mi bɛ ni yɛn yɛl’ o shɛm.

41Ka Yisa daa ti lan lab’ bɛ sanna pahi buta m-bɔhi ba, “Yinima na kul gbihirimi ka vuhiri jɛlinsi? Di saɣ’ lala, saha maa paaya; so pun yi Daadam Bia nyaaŋa ka zaŋ o niŋ alahichinim’ nuu ni. 42Yiɣisimiya ka ti chaŋ; nyamiya, ŋun yi n nyaaŋa maa paana.”

Yisa gbaabu

(Matiu 26.47-56; Luk 22.47-53; Jɔn 18.3-12)

43Yisa ni daa kul yɛri maa, o noli daa na bi lu tiŋa, ka o nyaandoliba pinaayi la ni yino ŋun yuli daa booni Judas la m-pahi maligumaaniba kpamba mini Naawuni zaligubaŋdiba ni tiŋ’ maa ni kpamba ni daa tim salo pam shɛba ka bɛ nyaɣiri takɔbiri ka gbib’ kpahi la dii paana. 44Ka Judas ŋun daa yi Yisa nyaaŋa maa daa pun wuhi ba shihir’ shɛli yɛli, “N yi ti kul puhi so ka mɔɣis’ o kpariŋ, ŋuna m-bala; yin’ gbaamiy’ o zaŋ o chaŋ.”

45Judas ni daa ti paana o dii shiri chaŋmi ti zani Yisa tooni ka yɛli, “Karimba! Ka mɔɣis’ o kpariŋ.” 46Ka bɛ daa dii gbaai Yisa. 47Ka bɛn daa ʒe Yisa sani maa ni yino ŋoog’ o takɔbi chɛ shɛligi maligumaaniba zuɣulan’ dabili tibili bahi. 48Ka Yisa bɔhi ba, “Mani ka yi nyaɣi takɔbiri ka gbib’ kpahi kana ni yi ti gbaai kaman ŋmɛnditoli n-nyɛ ma maa? 49#Luk 19.47; 21.37 M mini ya n-yi be Naawuni jɛmbu duu dabisili kam ka n wuhiri ya, ka yi bi gbaai ma. Amaa dimbɔŋɔ niŋmi ni Naawuni Kundi yɛligu la niŋ pali.”

50Ka o nyaandoliba maa zaa daa zo ka chɛ o.

51Ka nachimbil’ so daa gɔb’ chinchin’ piɛlli kɔŋko doli Yisa, ka bɛ daa yɛn gbaag’ o gba, 52ka nachimbil’ maa fuɣ’ o chinchini maa bahi, ka guui ni nyɔfindili.

Yisa zani jitɔriba tooni

(Matiu 26.57-68; Luk 22.54-55, 63-71; Jɔn 18.12-24)

53Ka bɛ daa zaŋ Yisa tahi maligumaaniba zuɣulan’ yiŋa. Ka maligumaaniba kpamba mini tiŋ’ maa ni kpamba ni Naawuni zaligubaŋdib’ zaa daa laɣimna. 54Ka Pita daa puɣisiri doli Yisa nyaaŋa m-mali ti paai maligumaaniba zuɣulan’ maa yiŋ’ dundɔŋ ni nti ʒi yili maa ni dunɔguliba sani wuɣisiri buɣim. 55Ka maligumaaniba mini bɛ jintɔriba zaa daa bɔri daliri shɛli din ni chɛ ka bɛ tɔɣisi luhi Yisa ka ku o, amaa ka daa lee bi nya di daliri. 56Niriba pam daa di o shɛhira kpɛma, amaa ka bɛ shɛhira maa daa lee bi doli taba.

57Ka shɛb’ daa yiɣisi zani dir’ o shɛhira kpɛma yɛra, 58#Jɔn 2.19 “Ti daa wumya ka o yɛli ni o ni wurim bɛ ni daa zaŋ nuhi me Naawuni jɛmbu du’ shɛl’ la, ka me din pa nuhi mɛbu zali daba ata sunsuuni. 59Amaa ka bɛ shɛhira maa zaa daa kul bi bahi doli taba.

60Ka maligumaaniba zuɣulan’ maa daa yiɣisi zani salo maa sunsuuni m-bɔhi Yisa, “A ka noli din ni garigi? Shɛhira bɔ ka bɛ lee dir’ a ŋɔ?”

61Amaa ka Yisa shini ka bi garigi shɛli. Ka maligumaaniba zuɣulan’ maa lan bɔh’ o, “Nyini n-nyɛ Masia ŋun nyɛ Naawuni Alibarikalan’ Bia la?”

62 # Dan 7.13 Ka Yisa garigi yɛl’ o, Iin, lala n-nyɛ ma; ka yi ni ti nya Daadam Bia ka o ʒila Kpiɔŋlan’ Naa nudirigu polo m-be sagbana ni kanna.”

63Ka maligumaaniba zuɣulan’ maa darigi cheeg’ omaŋmaŋ’ binyɛrigu ka yɛli, “Bɔ ka ti lan bɔri shɛhiranim’ ni ti niŋ yaha? 64#Lɛv 24.16 Yi zaa wum o ni mɔri Naawuni shɛm. Yi lee zahimla wula?” Ka sokam yɛli, “O simdila kubu!”

65Di saha ka shɛb’ dii tuhiri nintɔri viɛr’ o, ka pɔb’ o nina ka ŋmɛr’ o ka yɛra, “Wuhim’ ti a daanabitali ni nyɛ shɛm.” Ka bɛn daa guli Yisa maa gba ŋmɛr’ o.

Pita chihibu yɛla

(Matiu 26.69-75; Luk 22.54-62; Jɔn 18.15-18, 25-27)

66Di saha Pita daa ʒila maligumaaniba zuɣulana Kaiafas yiŋ’ maa dundɔŋ ni, ka maligumaaniba zuɣulan’ yiŋ’ bipuɣin’ so ti kana 67nya ka Pita ʒiya wuɣisiri buɣim, ka o lih’ o ka yɛli, “A gba yi bela Yisa Nazarɛt doo ŋɔ sani.”

68Ka Pita chihi yɛli, “Man’ bi mi bee m-baŋ a ni yɛli shɛm maa gbinni.” Ka zo n-yi nti ʒe dunol’ ni, ka nolɔɣu dii kum.

69Ka bipuɣiŋga maa daa ti lan nya o ka yɛli bɛn ʒe nimaani maa, “Doo ŋɔ gba nyɛla bɛ ni yino.” 70Ka Pita lan chihi yaha.

Ka di daa bi tooi biɛla, ka bɛn ʒe nimaani maa yɛli Pita, “A shiri nyɛla bɛ ni yino, dama a nyɛla Galili tiŋbia.”

71Ka Pita dii gbaai kari ka pɔri pɔri yɛra, “Hal man’ bi mi do’ so yi ni yɛri maa gba.”

72Di saha ka nolɔɣu dii kum pahi buyi, ka Pita teei Yisa ni daa yɛl’ o ni nolɔɣu ti yɛn kum buyi o ni chihi siɣimsiɣim buta ni o bi mi ŋun’ Yisa la yɛla. Ka di daa niŋ Pita suhugarigu ka o kum pam.

Currently Selected:

Maak 14: RLDB

Highlight

Copy