Maak 15

Yisa zani Gomna Pailɛt tooni

(Matiu 27.1-2, 11-14; Luk 23.1-5; Jɔn 18.28-38)

1Biɛɣu ni daa ti neerina ka maligumaaniba kpamba mini tiŋ’ maa ni kpamba ni Naawuni zaligubaŋdiba ni bɛ jintɔriba zaa daa to jina naai noli, ka lo Yisa mihi zaŋ o tahi Gomna Pailɛt sani. 2Ka Gomna Pailɛt daa ti bɔh’ o, “A shiri nyɛla Yɛhudianim’ naa?”

Ka Yisa garigi yɛl’ o, “A ni yɛli shɛm maa n-nyɛ li.”

3Ka maligumaaniba kpamba maa daa fiɣis’ o pam; 4ka Gomna Pailɛt lan bɔh’ o yaha, “A ka noli din ni garigi? A bi wum bɛ ni fiɣisir’ a shɛm maa?”

5Amaa ka Yisa kul shini; ka di daa gari Gomna Pailɛt pam.

Bɛ bahi noli ni bɛ kum’ Yisa

(Matiu 27.15-26; Luk 23.13-25; Jɔn 18.39—19.16)

6Yaɣigari Chuɣu kam puhibu saha daa yi ti paai, Gomna Pailɛt yihirila dansarika so niriba ni bɔri bahi. 7Dansarika so daa beni ka o yuli booni Barabas; o daa nyɛla bɛn daa taai duŋ ku nir’ ni yino. 8Ka salo maa daa vu m-miri Gomna Pailɛt nti yɛl’ o ni o niŋmi ka o ni yi pun niŋdi ba shɛm la.

9Ka Gomna Pailɛt bɔhi ba, “Yi bɔri ni n yihila Yɛhudianim’ Naa ŋɔ bahi?” 10O daa mi ni nyuli ka maligumaaniba kpamba maa zab’ Yisa zaŋ o tahi maa na.

11Amaa ka maligumaaniba kpamba maa daa dim salo maa tiba ni yɛli ni bɛ yɛlim’ o ni o yihimila Barabas bahi, ka pa ni Yisa. 12Ka Gomna Pailɛt daa lan bɔhi ba yaha, “Ka wula ka yi lee bɔri ni n niŋ yi ni booni so Yɛhudianim’ Naa ŋɔ?”

13Ka bɛ kuhi pam yɛl’ o, “Kpahim’ o tabili dapulli zuɣu!”

14Ka Gomna Pailɛt bɔhi ba, “Bɔzuɣu? Tuumbiɛ’ bɔ ka o lee tum?’

Ka bɛ maan mɔhi vuri pam yɛli, “Kpahim’ o tabili dapulli zuɣu!”

15Gomna Pailɛt ni daa bɔri ni o niŋ niriba maa suhu yubu zuɣu ka o daa yihi Barabas bahi, ka chɛ ka bɛ fiɛb’ Yisa, ka o naanyi zaŋ o ti ba ni bɛ ti kpah’ o tabili dapulli zuɣu.

Tɔbbihi mali Yisa ansarisi

(Matiu 27.27-31; Jɔn 19.2-3)

16Ka tɔbbihi daa zaŋ Yisa kpe Gomna Pailɛt yiŋ’ dundɔŋ ni nti laɣim bɛ tɔbbi’ tab’ zaa na. 17Ka bɛ daa ti zaŋ kpar’ ʒiɛɣu yɛl’ o, ka wuɣ’ gɔhi zuɣupiligu pil’ o; 18ka gbaag’ o ansarisi malibu yɛra, “Ti puhir’ a, nyin’ Yɛhudianim’ Naa!” 19Ka bɛ daa zaŋ kaɣili fiɛb’ o zuɣu ni, ka tuhiri nintɔri viɛr’ o, ka damdir’ o tooni puhir’ o. 20Bɛ ni daa mal’ o ansarisi maa naai ka bɛ pirigi kpar’ ʒiɛɣu maa, ka zaŋ omaŋmaŋ’ binyɛrigu yɛl’ o zaŋ o chaŋ ni bɛ ti kpah’ o tabili dapulli zuɣu.

Bɛ kpahi Yisa tabili dapulli zuɣu

(Matiu 27.32-44; Luk 23.26-43; Jɔn 19.17-27)

21 # Rom 16.13 Ka Alikizanda mini Rufus ba ŋun daa nyɛ Sairiini nira, ka o yuli booni Saimɔn la daa yi tinshee garita; ka bɛ daa bol’ o na nti muɣis’ o ni o ʒim’ Yisa dapulli maa. 22Ka bɛ daa zaŋ Yisa tahi luɣ’ shɛli din yuli booni Goligɔta la. Di gbinni nyɛla Zuɣuŋmaŋ Shee. 23Ka bɛ daa zaŋ mɛɛr din to kaman yabiga la gari wain ni ti o ni o nyu; amaa ka o daa zaɣisi li. 24#Yila 22.18 Bɛ ni daa kpahi Yisa tabili dapulli maa zuɣu ka bɛ zaŋ o binyɛra pumpu n-sɔŋ tɔri tɛte#15.24 TƐTE: Di saha maa bɛ daa yi yɛn pirigi nɛma ti taba bɛ tɔrila tɛte ni bɛ nya bɛ yɛn pirigi li shɛm bee sokam ni yɛn deei shɛli. ni bɛ nya bɛ zaa yinoyino ni yɛn di shɛli. 25Asiba kurig’ awɛi saha ka bɛ daa kpah’ o tabili dapulli zuɣu maa. 26Ka bɛ daa sab’ bɛ ni yɛli ni Yisa tum taal’ shɛli maa tabil’ o dapulli maa zuɣusaa. Di ni daa sab’ shɛm m-bɔŋɔ: “Yɛhudianim’ Naa.” 27Ka bɛ daa kpahi tayiɣis’ ayi gba tabili dapula n-zaŋ sa m-pahi Yisa zuɣu: Yino o nudirigu polo, ŋun’ la mi o nuzaa polo. [ 28#Aiz 53.12 Ka Naawuni Kundi ni yɛligu shɛli din daa yɛli ni bɛ kal’ o pahila tuumbiɛrinim’ ni la niŋ pali.]

29 # Yila 22.7; 109.25; Maak 14.58; Jɔn 2.19 Ka bɛn daa gariti nimaani gba yɛri Yisa zilima, ka gbaɣisiri bɛ zuɣuri niŋd’ o ka yɛra, “Nyin’ ŋun wurindi Naawuni jɛmbu duu ka lan mɛri li daba ata sunsuuni ŋɔ, 30siɣim’ dapulli maa zuɣu na tilig’ amaŋa!”

31Lala ka maligumaaniba kpamba mini Naawuni zaligubaŋdib’ gba daa maan’ o ansarisi ka yɛri taba, “O daa tiligi shɛba ka lee ku tooi tilig’ omaŋa. 32Chɛliya ka Masia ŋun nyɛ Izraɛlnim’ Naa ŋɔ siɣi dapulli ŋɔ zuɣu na pumpɔŋɔ, ka ti nya ka niŋ o yɛda.”

Ka bɛ ni daa kpahi shɛb’ tabili dapula m-pah’ o zuɣu la gba yɛr’ o zilima.

Yisa kum yɛla

(Matiu 27.45-56; Luk 23.44-49; Jɔn 19.28-30)

33Luɣ’ shɛlikam zaa daa zibigimi agbaa dɛde zaŋ ti paai kurig’ ata saha. 34#Yila 22.1 Kurig’ ata maa saha ka Yisa daa kuhi pam yɛli, “Ilɔi, Ilɔi, lama sabakitani?” Di gbinni nyɛla, “N Duuma Naawuni, n Duuma Naawuni, bɔ n-niŋ ka a chɛ ma?”

35Ka bɛn daa ʒe nimaani maa shɛb’ wum lala ka yɛli, “Nyamiya, o boonila Anabi Ilaija.” 36#Yila 69.21 Ka bɛ ni yino zo n-chaŋ ti zaŋ gumdi tim komihigu ni zaŋ kaɣili gbab’ li zaŋ ti o ha ni o nyu ka lan yɛli, “Chɛliya ka ti guhi pɔi nya Anabi Ilaija ni kana nti siɣis’ o na bee o ku kana.”

37Di saha ka Yisa daa kuhi pam ka naanyi bahi.

38 # Yibu 26.31-33 Ka chinchin’ shɛli din daa yili Naawuni jɛmbu duu sunsuuni la daa cheei di zuɣusaa hal ti siɣi di tiŋli. 39Ka sapashin’ kpeen’ so ŋun daa ʒe nimaani nya Yisa ni daa kuhi lala ka bahi maa yɛli, “Yɛlimaŋli, doo ŋɔ shiri nyɛla Naawuni Bia.”

40Paɣ’ shɛb’ gba daa ʒe kpaŋ’ ha yuuni Yisa; Mariama ŋun daa yi Magdala na la mini Jeemsibila ni Jɔsis ma Mariama ni Salomi daa be bɛ ni. 41#Luk 8.2-3 Dama Yisa ni daa be Galili la, bɛna n-daa dol’ o ka sɔŋd’ o; ka paɣiba pam bɛn daa dol’ o na hal ni Jɛrusalɛm la gba beni.

Yisa sɔɣibu

(Matiu 27.57-61; Luk 23.50-56; Jɔn 19.38-42)

42Dindali maa daa nyɛla Vuhim Dabisili dazɔhigu dali, ka di daa ti niŋ zaawun’ yuŋ, 43Ka Yisifu Arimatia tiŋbia ŋun daa nyɛ bilichin’ titali ka lan nyɛ Yɛhudianim’ jintɔriba ni yino ka daa guli Naawuni nam kandina saha la daa niŋ suhukpeeni n-chaŋ Gomna Pailɛt sani ti suh’ o soli ni o chɛ ka o zaŋ Yisa ti sɔɣi. 44Gomna Pailɛt ni daa wum ni Yisa pun kpi maa ka di gar’ o pam, ka o daa boli sapashin’ la na nti bɔh’ o ni Yisa shiri kpiya? 45Ka sapashini maa ni daa yɛl’ o ni Yisa shiri kpiya maa, ka Gomna Pailɛt daa saɣi ni Yisifu zaŋm’ Yisa ti sɔɣi. 46Ka Yisifu daa da bimpiɛlli chaŋ ti siɣisi Yisa dapulli maa zuɣu na n-zaŋ bimpiɛlli maa niŋ o n-zaŋ o ti sɔɣ’ silig’ shɛli bɛ ni daa chib’ tampiŋ ni la, ka bilim kuɣ’ titali na ti yo siliga maa noli. 47Ka Mariama ŋun daa yi Magdala na la mini Jɔsis ma Mariama daa nya bɛ ni sɔɣi Yisa luɣ’ shɛli maa.

Currently Selected:

Maak 15: RLDB

Highlight

Copy