Maak 16
16
Yisa neei kum ni
(Matiu 28.1-8; Luk 24.1-12; Jɔn 20.1-10)
1Ka Vuhim Dabisili dali maa daa ti gari, ka Mariama ŋun daa yi Magdala na la mini Jeemsi ma Mariama ni Salomi daa da tulaale viɛlli ni bɛ chaŋ siliga maa ni ti mihi Yisa. 2Bakɔi piligu dali asibaasi wuntampuhili saha ka bɛ daa chaŋ siliga maa gbini. 3Bɛ ni daa chani maa ka bɛ gbaai tab’ bɔhibu, “Ka ŋuni n-lee ti yɛn biligi kuɣ’ shɛli din yo siliga maa nol’ la ti ti? 4Kuɣili maa daa galisiya pam, amaa ka bɛ daa ti paai nya ka kuɣili maa pun biligimi doya. 5Ka bɛ daa kpe siliga maa ni nti nya ka nachimbil’ so ye binyɛr’ piɛlli ʒi bɛ nudirigu polo, ka di gari ba pam.”
6Ka o yɛli ba, “Di chɛliya ka di gari ya; m mi ni yi bɔrila Yisa Nazarɛt do’ so bɛ ni daa kpahi tabili dapulli zuɣu la. O lan ka kpe, o neei kum ni; nyamiya bɛ ni daa sɔɣ’ o luɣ’ shɛli. 7#Mat 26.32; Maak 14.28 Amaa chamiya ti yɛl’ o nyaandoliba mini Pita ni Yisa daŋ yi tooni chaŋ Galili; nimaani ka yi ni ti nya o kaman o ni daa pun yɛli ya shɛm la.”
8Ka bɛ daa ŋmaligi siliga maa gbini zo yomyom, dama di daa gari ba mi pam ka bɛ ni sɔhira; bɛ mi daa bi yɛli so shɛli sol’ ni, dama dabiɛm daa kpe ba.
Yisa yi Mariama Magdala nir’ la zuɣu
(Matiu 28.9-10; Jɔn 20.11-18)
[ 9Yisa ni daa neei kum ni bakɔi piligu dali asibaasi maa o daa tuui yila Mariama ŋun daa yi Magdala na la zuɣu. Ŋuna n-nyɛ Yisa ni daa kari alizin’ biɛri ayopɔin so zuɣu la. 10Ka o daa chaŋ ti yɛli Yisa nyaandoliba bɛn daa laɣim ʒiya kumdi ka fabindi la ni Yisa neei kum ni. 11Amaa bɛ ni daa wum ni o neei kum ni, ka Mariama ŋun daa yi Magdala na la nya o maa, bɛ daa bi niŋ li yɛda.
Yisa yi o nyaandoliba ayi zuɣu
(Luk 24.13-35)
12Dimbɔŋɔ nyaaŋa ka Yisa biɛhigu daa taɣi, ka o lan yi o nyaandoliba ayi bɛn daa be sol’ ni kuni bɛ ya zuɣu. 13Ka bɛ daa labi nti yɛli bɛ nyaandol’ tab’ la, amaa ka bɛ daa bi niŋ bɛ gba yɛda.
Yisa yi o tuumba piniyini zuɣu
(Matiu 28.16-20; Luk 24.36-49; Jɔn 20.19-23)
14Di nyaaŋa ka Yisa daa ti yi o nyaandoliba piniyini bɛn daa kpalim la zuɣu, ka bɛ ʒimi diri bindirigu. Ka o daa galim ba bɛ ni nyɛ suhutunanim’ mini bɛ biɛhiŋ zuɣu, dama bɛ daa bi niŋ ninvuɣ’ shɛb’ bɛn daa nya o o kum ni neebu nyaaŋa la yɛligu yɛda. 15#Tuma 1.8 Ka Yisa daa yɛl’ o nyaandoliba maa, “Chamiya gili dunia ŋɔ zaa yihi tiliginsim’ lahibal’ suŋ ŋɔ waazu ti sokam. 16Ka ŋunkam ti niŋ yɛda ka deei baptaizibu ni tiligi, amaa ŋun ti bi niŋ yɛda ni mali taali. 17Shihira ŋɔ ni ti be ninvuɣ’ shɛb’ bɛn niŋ lahibal’ suŋ maa yɛda yɛligu ni: Bɛ ni ti mali n yuli karit’ alizin’ biɛri, ka ni ti tɔɣisi tinzun yɛligu balibu kam yɛtɔɣa. 18#Tuma 1.9-11 Bɛ yi ti gbahi tinvura bee n-nyu binshɛli din nyɛ lɔɣu, di ku niŋ ba shɛli; ka bɛ ni ti zaŋ bɛ nuhi pa barinim’ zuɣu ka bɛ kpaŋ.”
Yisa lab’ alizanda ni
(Luk 24.50-53; Tuma 1.9-11)
19Ti Duuma Yisa ni daa tɔɣisi ba yɛtɔɣa ŋɔ naai nyaaŋa ka o labi alizanda ni nti ʒini Naawuni nudirigu polo. 20Ka o nyaandoliba maa daa gindi luɣ’ shɛlikam zaa yihiri waazu, ka ti Duuma daa ʒe bɛ nyaaŋa n-chɛ ka shihir’ shɛŋa din wuhiri ni lahibal’ suŋ maa shiri nyɛla yɛlimaŋli niŋda.]
Currently Selected:
Maak 16: RLDB
Highlight
Share
Copy
Want to have your highlights saved across all your devices? Sign up or sign in
Red Letter Dagbani Bible © Bible Society of Ghana, 2011
