DOOGIN 7
7
Mojes la Aaron Parog Dookub Haanam
1Hoo At Sw Mojesnvn benum, “Kaato, ngo nam Parog agaho Pwnbo hvb mvpa kun, hoo noqg vbw Aaron noqgab nyiqry benbov. 2Ngo hoggv nam gaml jipan mwlwngam no betayin, hoo noqg vbw Aaron Paronvn betayin Israel nyiilungam mwwg gvda hoqgv tolin tuku. 3Hvbmabde ngoqg kaaka-taka maanam mam la swrdorxeqkam naleqgo Ijipt gvdaho ngo nyisjaqkam, hoo ngo Parog hangam kamtwr mvtayin. 4Paro nam tvjw ram. Ho ngoqg alaqkv Ijipt ho ngo laqdaq tayin hoo ngoqg dvparam, ngoqg nyiilu Israelwg ko tulungam, Ijipt gvda hoqgv koi jaqb pw-hwwnam bonam nyigdvl boolin tayin. 5Hwdlo ngoqg alaqkam Ijiptam ngo ceekol hoo Israel nyiilungam bulug pengko hoqgv boolin yin, ngo At Swv hvl Ijipt nyi tulungv cengtayin.” 6Mojes la Aaron hvb nyinum; At Sw bulam gaml jinam hvb bulv nyinum. 7Hwdlo bulv Paronvn agam gooyikho, Mojes vnyw cam piin gob akam kunum, hoo Aaron vnyw cam piin leq nywum gob axa kunum.
8Ho At Sw Mojesnvn la Aaronnvn benum, 9“Hwdlo Paro nulam betayin, ‘Nulv atv swrdorxeqb bonam nyigdvl nulv ham kaakin kaato,’ ho no Aaronnvn beto, ‘Noqg beqnyiangam naagdvl hoo ham Parog agaho hurp to, ho hoqhv tvb soogwb nyitayin.’” 10Ho Mojes la Aaron Paro dookub wnum hoo At Swg gaml bekjaqb nyinum. Aaron mwwg beqnyiangam Paro gvla mwwg nyera tulug agaho hurpnum, hoo hv tvb soogwb nyiknum. 11Ho Paro nyijwq-nyegam bo nyi tulungam, hoo nyioky nyub tulungam, hoo Ijipt gv gwwn-nyiqry kaanbo tulungam goqkumnum, hoo bulv kam ai dvb hvb nyinum. 12Nyi vxiv mwwg beqnyiangam hurpnum, hoo hoq tuluhv tvbwb nyinum. Hvbmabde Aaron gv beqnyiangv bulug beqnyiangam dvmeqnum. 13Hvbsujaqkam Parog hangv kamtwrnum, hoo mwv bulug benam mam tamanum, At Sw hoggub benum hvb nyinum.
Otuqcob Swlin-mominam: Issiv Uiyib Nyikubnam
14Ho At Sw Mojesnvn benum, “Parog hangv kamtwr dvn; mwv nyiilungam tolin tvl wmram. 15Soram Paro dookub wn, mwv iss pobub lengl haatayin. Nail pobu sugurho mwam kvvrwq dvb daqta, hoo tvbwb nyikubo beqnyia ham noqg alaqho bwwto. 16Hoo no mwam betayin, ‘Hibrug Pwnbo, At Sw, noqg dookub ngam kanam pa, hoo begamv, “Ngoqg nyiilungam tolin tukbv, ho bulv ngam deexa-rara alo xumtayin. Hvbmabde sija godab no tvjw kuma.” 17Soq sib At Sw bedo, “Ngo jaq At Swv hvl soq nyinam soqgv no cengtayin: kaato, ngoqg alaq beqnyia lvgab Nail pobu issam jwwdaq tayin, hoo hv uiyib nyikub tayin. 18Nail pobu ho doonbo nguiyv sitayin, hoo Nail pobungv naaiya tayin, hoo Ijipt nyiilungv Nail pobu hoqg issam twwdwb bos sorab tayin.” ’ ” 19Hoo At Sw Mojesnvn benum, “Aaronnvn beto, ‘Noqg beqnyiangam naato hoo noqg alaq lvgab Ijipt gv iss aoho tvdaqto, bulug pobu tulug aoho tvdaqto, bulug silam tulug aoho tvdaqto, hoo bulug sviyin hengpnam aoho tvdaqto, hoo bulug sokum mwlwho tvdaqto, ho hoq mwlwhv uiyib nyikub tayin, hoo Ijipt gvda mwlwho ui rooxo tayin, uppum-uddu ho hoo wlw uppum ho apnam iss mwlwngv uiyib nyitayin.’ ”
20Mojes la Aaron At Swg gaml bekjaqb nyinum. Paro vnyiq kaagaho hoo mwwg nyera tulug vnyiq kaagaho mwv beqnyiangam lwwrab banv Nail pobu issam jwwdaqnum, hoo Nail pobu issiv uiyib nyikub kunum. 21Hoo Nail pobu ho doonbo nguiyv sinum, hoo Nail pobungv naaiyanum, ho Ijipt nyi tulungv Nail pobu hoq issam twwny kumanum. Hoo Ijipt gvda mwlwho ui rooxo kunum. 22Hvbmabde Ijipt gv gwwn-nyiqry kaanbo tulungv bulug guunam-panam hoqgv ai dvb hvb nyinum. Ho Parog hangv kamtwr tvl hvraqb doonum, hoo mwv bulug benam mam tamanum, At Sw hog hvl benum. 23Paro mwwg nammwb wkur kunv wknum, hoo mwv soq sam mwwg hangho hog gobkam mwwmanum. 24Hoo Ijipt nyi tulungv Nail pobu sugurho sokum dukanum, hoggab bulv Nail pobu issam twwny kumanum.
25At Swg Nail issam jwwdaq jwwxo kokw so aal kvn bumpw go dooknum.
Currently Selected:
DOOGIN 7: NYISBSI
Highlight
Share
Copy
Want to have your highlights saved across all your devices? Sign up or sign in
Nyishi Bible - DVRWQ PVVB
Copyright © 2015 by The Bible Society of India
Used by permission. All rights reserved worldwide.
