DOOGIN 8
8
Lwnyi dvb Swlin-mominam: Tvtwq Tulu
1Ho At Sw Mojesnvn benum, “Paro dookub wgdvl mwam beta, ‘Soq sib At Sw bedo, “Ngoqg nyiilungam tolin tukbv, ho bulv ngam xumtayin. 2Hvbmabde no ngoqg nyiilungam wwm mvma baloqkam, kaato, ngoqg gvdaho ngo tvtwq lvgab swlin-momin mvtayin. 3Nail pobu hoqgv tvtwq twqtwngv lengtayin ho hv noqg namho haatayin hoo noqg yubk cwwrwb hoo noqg kartam nan ao hookam hoo noqg nyera tulug namho hoo noqg nyiilug namho, hoo noqg pwcwho hoo noqg loora ho uraho haal dootayin. 4Tvtwq tulungv noqg aoho hoo noqg nyiilug aoho hoo noqg nyera tulug aoho poqca tayin.” ’ ” 5Hoo At Sw Mojesnvn benum, “Aaronnvn beto, ‘Noqg alaqkv ilin gvdwl noqg beqnyia lvgab pobu tulug aoho, silam tulug aoho hoo sokum tulug aoho tvdaqto, hoo Ijipt gvdaho tvtwq tulungam lengdwb mvto!’ ” 6Ho Aaron mwwg alaqkam ilin banv Ijipt gv iss tulug aoho tvdaqnum, hoo tvtwq tulungv lengnum hoo Ijipt gvda mwlwngam pumlupnum. 7Hvbmabde Ijipt gvda hoqg gwwn-nyiqry bo tulungv bulug guunam-panam hoqgv tvtwq twqtaqkam Aaron lengdwb mvnam hvb ai dvb hvb mvnum.
8Ho Paro Mojes nvla Aaronnvn goqnv hoo benum, “At Swn modu gvdwl ngoqg soqgv la ngoqg nyiilu soqgv tvtwq tulu sam naapaq mvtbv, hoo At Swn pwr jim dvb ngo nyiilungam tolin tayin.” 9Mojes Paronvn benum, “Noqgab ngam gaml jim dvb hemp to hoo ngoqg nyera tulu gab hoo noqg nyiilu gab ngo xumj tayin, ho tvtwq tulungv noqg la noqg nam hoqgv niita yukun hoo Nail pobu aro ho dootayin.” 10Hoo mwv benum, “Aaram mam xumto.” Mojes benum, “Noqg bekwb nyimto, ho ngulug Pwnbo At Sw hvb nyinbo akjijaqkam dooma dvn hvl no cengtayin. 11Tvtwq tulungv noqg hoqgv hoo noqg nam hoqgv hoo noqg nyera tulu hoqgv hoo noqg nyiilu hoqgv wleq tayin. Bulv Nail pobu aro alo dootayin.” 12Ho Mojes la Aaron Parog dook hoqgv lengknum, hoo mwv Paro lvgab loor minsnam bvrwq gab, Mojes At Swn tvtwq tulu gab xabl benum. 13Hoo At Sw Mojesg gomcwr benam hvb nyiknum. Tvtwq tulungv namho, bootu-baagho, hoo rongo ho sinum. 14Hoo bulv hoq tulu ham lvkin gob dorkuml paal apnum, hoo gvdangv naiya suunum. 15Hvbmabde hwdlo tvtwq tulungv sixaq dukub Paro kaapa yin, mwv mwwg hangam kamtwr mvnum hoo bulug benam mam tvjw maanum, At Sw benum hvb nyinum.
Luum dvb Swlin-mominam: Tosub-toiyub Tulu
16Ho At Sw Mojesnvn benum, “Aaronnvn beto, ‘Noqg alaqkv ilin gvdwl hoo swcwg diimwram jwwdaqto, ho hoq tuluhv Ijipt gvda mwlwho tosub-toiyub tulu gob nyitayin.’ ” 17Hoo bulv hvb nyinum. Aaron mwwg alaqkam ilin banv mwwg beqnyia lvgab swcwg diimwram jwwdaqnum, hoo tosub-toiyub pv nyiingam la svdin tulungam pumbumnum. Ijipt gvdag ked diimwr mwlwngv tosub-toiyub tulu gob nyiknum. 18Gwwn-nyiqry bo tulungv bulug guunam-panam hoqgv diimwram tosub-toiyub gob mvdwb nyikanum, hvbmabde bulv nyinyi maanum. Ho nyiingam la svdin tulungam tosub-toiyub pv pumbumnum. 19Ho Paro gwwn-nyiqry bo tulungam benum, “Soq si Pwnbog lvqcw ponyi nvmv.” Hvbmabde Parog hangam kamtwr mvnum, hoo mwv bulug benam mam tvjw maanum, At Swg benum hvb nyinum.
Lwpy dvb Swlin-mominam: Eka Tviyw Tulu
20Ho At Sw Mojesnvn benum, “Komc mikab gorab gvdwl no atv Parog dookub wto, mwv pobu issib haaikam, hoo mwam beta, ‘Soq sib At Sw bedo, “Ngoqg nyiilungam tolin tuku ho bulv ngam xumtayin. 21Ho hvb mabaloqkam, ngoqg nyiilungam no wwm mvma baloqkam kaato, ngo eka tviyw ywwtwngam noqg aoho hoo noqg nyera tulug aoho hoo noqg nyiilug aoho, hoo noqg nam uraho kanam tayin. Hoo Ijipt nyi tulug nam uraho eka tviywngv pumteq tayin, hoo bulug daqk deela hookam eka tviywngv puml yvtayin. 22Hvbmabde hoq aalam ngo Gosen gvdangam mwbwql aptayin, hogloq ho ngoqg nyiilungv doodwn, ho hoqho eka tviyw cigkam jarl yvram, ho swcw nvg pengko so ngo jaq At Swv hvl no cengtayin. 23Ho ngoqg nyiilu ngvla noqg nyiilug pengko ho ngo mvpin-mvral pvvtayin. Aaram mam soq swrdorxeq si nyitayin.” ’ ” 24Hoo At Sw hoqhvb nyinum. Parog namho hoo mwwg nyera tulug nam uraho eka tviyw ywwtwngv puml yvnum. Ijipt gvda mwlwngam eka tviyw ywwtwngv domyu-damcanum.
25Ho Paro Mojes nvla Aaronnvn goqnv hoo benum, “Gvda uraso wgdvl nulug Pwnboam pwr jita.” 26Hvbmabde Mojes benum, “Hoqhv hvb nyidwb kvtaq ma, hoggab ngulug Pwnbo At Swn pwr aky jinamv Ijipt nyi tulu gab bulum-kac dvb nyido. Ngulv Ijipt nyi tulungam bulug vnyiq kaagaho bulum-kac dvb pwr aky jibnyiloqkam bulv ngulam wlw huram yv? 27Ngulv hoggub nyijaqkam aal loum deexa-rarab wnam gob wl ngulug Pwnbo At Sw ngulam bekinam hvb pwr jiyin do.” 28Ho Paro benum, “Ngo nulam nulug Pwnbo At Swnvn deexa-rara alo wl pwr jim tayin; hvbmabde nulv aado jaqb wmabv. Ngoqgab xumj tvb.” 29Ho Mojes benum, “Kaato, noqg dook soqgv ngo lvvgwb wde kun At Swn xumta deen eka tviyw ywwtwngam Parog hoqgv, mwwg nyera tulu hoqgv, hoo mwwg nyiilu hoqgv aaram mam wpaq mvdkub xumnum. Ho nyiilungam wl At Swn pwr jim mvma dvb Paron lokta vm mvvm kumabv.” 30Ho Mojes Paro dook hoqgv lengk nv hoo At Swn xumnum. 31Hoo At Sw Mojesg bekjaqb nyinum, hoo eka tviyw ywwtwngam Paro dook hoqgv, mwwg nyera tulu hoqgv hoo mwwg nyiilu hoqgv cikin gokam doom kumab mvpaq kunum. 32Hvbmabde Paro mwwg hangv soq mood soorub kamtwrnum, hoo nyiilungam tolin kumanum.
Currently Selected:
DOOGIN 8: NYISBSI
Highlight
Share
Copy
Want to have your highlights saved across all your devices? Sign up or sign in
Nyishi Bible - DVRWQ PVVB
Copyright © 2015 by The Bible Society of India
Used by permission. All rights reserved worldwide.
