DOOGIN 9
9
Lwng dvb Swlin-mominam: Ijipt Nyi Tulug Tuun-meengv Sinam
1Ho At Sw Mojesnvn benum, “Paro dookub wgdvl hoo mwam beta, ‘Soq sib Hibrug Pwnbo, At Sw bedo, “Ngoqg nyiilungam tolin tuku, ho bulv ngam xumtayin. 2ho no bulam hvraqb wwm mvmab mvturl ho parl ap baloqkam, 3kaato, At Swg alaqkv vc loodab noqg tuun-mee nyoro alo yvnbo ao lo laqdaq tado, svpur tulungam, svdam tulungam, svjin tulungam, sibin-svv tulungam, hoo sviya pvtwngam. 4Hvbmabde At Sw Israel gvla Ijipt nyi tulug tuun-meengam vp-vpwb mwbwq tayin, ho Israel nyiilu gv dorg kam siram.” ’ ” 5Hoo At Sw moodam xibwqnv begamv, “Aaram mam At Sw soq pagoq sam gvda so nyitayin.” 6Hoo aal loogwn so At Sw soq pagoq sam nyiknum. Ijipt nyi tulug tuun-mee mwlwngv sinum, hvbmabde Israel nyiilu gv dorkin gokam simanum. 7Hoo Paronvn betamnum, kaato Israelwg tuun-meengv dorkin gokam sima. Hvbmabde Parog hangv kamtwrnum, hoo mwv nyiilungam tolin kumanum.
Lwx dvb Swlin-mominam: Hil-pwp
8Hoo At Sw Mojes nvla Aaronnvn benum, “Wm mui loq alaq yumgub naato, hoo ham Parog vnyiq kaagaho Mojesnvn dooiho taaca mvto. 9Hoqhv Ijipt gvda mwlwho albo diimwr akwb nyitayin, hoo Ijipt gvda mwlwho hil-pwpv nyiam la svdin tulug aoho pwlin tayin.” 10Ho bulv wm muiyam naalayil hoo Parog agaho daqnum. Hoo Mojes hoqham dooiho taacanum, hoo hoqhv hil-pwp gob nyiknv nyiam la svdinam unv giilup kunum. 11Hoo gwwn-nyiqry bo tulungv Mojesg agaho daqnyi kumanum hoqg hil-pwp pwgam gab, hoggab hil-pwpv gwwn-nyiqry bo tulug aoho hoola Ijipt nyi tulug aoho haanum. 12Hvbmabde At Sw Parog hangam kamtwr dvb mvnum, hoo mwv bulam tvjw maanum, At Sw hoggub Mojesnvn benum hvb nyinum.
Kvn dvb Swlin-mominam: Nyodo Taa
13Ho At Sw Mojesnvn benum, “Komcib gorab gvdwl hoo no atv Parog dookub wno hoo mwam beta, ‘Soq sib Hibrug Pwnbo At Sw bedo, “Ngoqg nyiilungam tolin tuku ho bulv ngam xumtayin. 14Soq mood so ngo ngoqg swlin-mominam tulungam noqg aoho, hoo noqg nyera tulug aoho hoo noqg nyiilug aoho kanam tayin, swcw nvg aoso ngoqg hvb nyinbo akjijaqkam dooma dvn hvl no cengtayin. 15Soq mood nagub ngoqg alaqkam ngo laqrabl nam hoo noqg nyiilungam dooi-palam lvgab jwwk nyiloqkam, no swcw ao soqgv twrp kun pv. 16Hvbmabde soq pagoqkam ngo nam swwl doom dvn, ho swcw nvg aoso ngoqg eminam yuupy mvdwb. 17No atv-atam jooiyin-joorab sul ngoqg nyiilungam ceekol hoo bulam wwm mvma. 18Kaato, aaram soq mood so ngo vc loodab nyodo taangam hom dvb mvtayin, hoqhv Ijipt gvdag swwlin yik hoqgv jaq soolo godab nyika maanam gob nyitayin. 19Hoqgab sija kanam to noqg tuun-mee nyoro alo yvnbo mwlwngam nam cumciq golo boocum mvto, hoggab nyiam la tuun-mee nyoro alo yvnbo hoo nammwb boocum maanam tuluhv sitayin hwdlo bulug aoho nyodo taangv hodaq yin.” ’ ” 20Ho hiyv xeq At Swg gomcwram Parog nyera tulug pengko hoqgv bosbov mwwg nyera tulungam hoo mwwg tuun-meengam nam urab boocum mvdwb nyebia jaqb kanamnum, 21hvbmabde hiyv xeq At Swg gomcwram tagab maanbov mwwg nyera tulungam la mwwg tuun-meengam nyoroho yvmnum.
22Ho At Sw Mojesnvn benum, “Noqg alaqkv doa aob ica to, ho Ijipt gvda mwlwho nyodo taangv hol tayin, Ijipt gvdag nyi tulug aoho hoo tuun-meeg aoho hoo nwmw-nwsin nyoro svvn tulug aoho hodaq tayin.” 23Ho Mojes mwwg beqnyiangam doa aob hwcanum, hoo At Sw doogum-taiyamb bioqlwl wmv swcw nvg aoso bioqdaqnv nyodo taangam kanamnum. Hoo At Sw Ijipt gvdaho nyodo taa-ngam yaqlnum. 24Nyodo taa yaql ko pengko ho nyodo taa ngvla taiyam wmv bioqdul doonum, hoqhv Ijipt gvdag nyob akwb swwlin yik hoqgv jaq soolo godab nyika maanam gob nyinum. 25Nyodo taangv nyiam la svdin tulungam Ijipt gvdag nyoro hoq hog mwlw yvnboam hox kunum. Hoo nyodo taangv rongog hog mwlwngam hoo nyorog svvn mwlwngam yvqtwr-yvqbwr dvb holnum. 26Israel nyiilug dook Gosen gvda aro ho nyodo taangv yaql maanum.
27Ho Paro nyi kanamnum hoo Mojes nvla Aaronnvn goqa mvnum hoo bulam benum, “Soq mood so ngo nyic nyit kuba; At Sw jvqtw do, hoo ngo la ngoqg nyiilungv nyimur paku. 28At Swn xumto, hoggab Pwnbog taiyam lvgab nyodo taa hol mvnamv henla kuma. Ngo nulam tolin jitayin, hoo nulv so doodu kuram.” 29Mojes mwam benum, “Ngo bopam soqgv lvvgwb lengleql kalam, ngoqg alaqkam ngo At Swn ica jitayin. Ho taiyamv bioqngin tayin, hoo nyodo taa hokram. Ho swcw si At Sw gv hvl no cengtayin. 30Hvbmabde nam la noqg nyera tulungam, ngo cengdo nulv sija godab Pwnbo At Swn bos maado.” 31(Pudam la tanyeqkam jwwtab xaanum, hoggab tanyeqkv poqlin kunum hoo pud svvnv opu puudunum. 32Hvbmabde wtw am mam la temiam muiyu-mvca maanum, hoggab hoq tuluhv nyinyiaqb swwrabnum.) 33Ho Mojes Parog dook bopam hoqgv lvvgwb lengknv hoo At Swn mwwg alaqkv icanum, hoo taiyam mvla nyodo taangv hongin kunum, hoo swcw aoho nyodongv hongin kunum. 34Hvbmabde hwdlo nyodongv la nyodo taangv hoo taiyamv ningngin dvb Paro kaapa yin, mwv lokta nyic nyinum hoo mwwg hangv kamtwrnum, mwv la mwwg nyera tulungv tamynum. 35Ho Parog hangv kamtwrnum, hoo mwv Israel nyiilungam tolin kumanum, At Sw Mojes lvgab hoggub agam gooknam hvb nyinum.
Currently Selected:
DOOGIN 9: NYISBSI
Highlight
Share
Copy
Want to have your highlights saved across all your devices? Sign up or sign in
Nyishi Bible - DVRWQ PVVB
Copyright © 2015 by The Bible Society of India
Used by permission. All rights reserved worldwide.
