Exodus 18
18
Jethro Iahoʼnahtharénaʼse Ne Mahís
1Ne Mahís né rawenónhsa né꞉ne Jethro, né roʼkháres kènʼne ne Midian nónhwe, oriwakwékon wahariwáronhke ne Rawenni꞉io tsi nahotiéraʼse ne Mahís ó꞉ni nonhkweshón꞉ʼa ne lsraerʼroʼnonhʼke nónen sathontasakohiatinekenwe ne Egypt. 2Káti Mahíske niaháre, sakohiatenhawi ne Mahís ró꞉ne Zipporah, né꞉ne thóh tesakotaʼkweniathákwe tsi thóh nónhsohthe ne rawenónhʼsa, 3tánon ne Gershom ó꞉ni ne Eliezer, né꞉ne tenihiáse akohiohokónha. (Ráwen ne Mahís, “Thiwakonhontsáʼteʼkwe kènʼne ne ó꞉ia nónhwe tsohonʼtsáien”; káti saiáta ne roʼiénha ne wahonáthonkwe Gershom. Ne Hebrew ne nènʼneʼe kéntons “Thihiakahontsáthe.” 4Rawènhʼne ó꞉ni, “Ne Raoní꞉io ne rakeníha wahaʼtiénawaʼse ó꞉ni wahaʼtiaʼtanónsthate tsi iáh tehakenonwarhiákon ne Egypt ronhnonhtí꞉io”; káti ne saiáta roiénha ne nenʼné꞉e wahonáhtonkwe Eliezer. Ne Hebrew ne nènʼneʼe kéntons “Rawenni꞉io ratiénawaʼse.”) 5Ne Jethro Mahís ró꞉ne Í꞉nene tánon ne tenihiáse akohiohokónhas tahontenró꞉sen kahentaʼkekó꞉wa niahónhne tsi nónhwe thoʼthatosehrótaʼkwe ne Mahís né꞉ne ononhthatokentíʼke. 6Iehoʼteriwahnieténhni ne Mahís tsi tahónhne, 7Káti ne Mahís iahaʼhiá꞉kenhne niatahoteráhthe, rahohénton watʼtaʼtsákete, tánon wahtoʼnoronhkwáhnion. Wathiaʼthateriwahnónhtonhse onhʼní꞉ioht tsi nonhnhétie tánon ethòne ó꞉nen Mahís rahothoseràkon iahiaʼtáwehʼiate. 8Ne Mahís oriwahkwékon wahoró꞉ri ne Jethro nètho Roiá꞉ner tsi nihohieràse ne Egypt ronhnonhtí꞉io ó꞉ni ne onhkweshón꞉ʼas ne Egypt né nahónton nahonshaʼsakoniákenʼte nIsraerʼró꞉nons. Tánon ó꞉ni wahoró꞉ri tsi nahaʼtironhiáken nonhkweshón꞉á ne tsi nihioháhes tánon ó꞉ni tsi ní꞉ioht ne Roiá꞉ner tsi sashakonónsthaʼte. 9Nónen ne Jethro ohriwakwékon kíʼ ken wahothónteʼne, wahaʼtsenhnónhni 10tánon wahénron, “Tehonwanonhweráhton ne Roiá꞉ner, tsi nikáien ne sahiaʼniákenʼte tsi nòkwah ne Egypt ronhnonhtí꞉io ó꞉ni nonhkweshón꞉ʼas ne Egypt! Tehonwanonhwaráhton ne Roiá꞉ner, tsi rahonʼa sashá꞉koniákenʼthe ne rahonkwetaʼshón꞉as tsi ronwatiʼnaskónhniskwe! 11Ónenh kíʼ onhkateriéntarahʼne nètho Roiá꞉ner tsi sénha roshaststenseroʼwá꞉nen tsi ní꞉ioht nakwékon ne ratiní꞉ios, tsoríwa tsi thóh kí ken nahá꞉iere nónenh ne Egyptró꞉nons wahonwanaʼtewenienʼnakʼsá꞉ten ne lsarerʼró꞉nons tsi nióre tsi ronahʼtenontsisʼtaniráhton.” 12Ethóne Jethro, né꞉ne Mahís rawenónsa, tahátʼkaʼwe ne katshénen nahonwátatʼtse ne Rawenni꞉io tsi enkonwaʼtiatáʼtsaʼahte ó꞉ni nohiásons ní꞉iohtánion ne kariwiʼiosehoʼkónhas nahonwatáʼtse ne Rawenni꞉io; tánon ne Aaron ratikwékon ne sakotiʼhentènse ne lsraerʼró꞉nonhke wahonʼteróhsen né tahonskáhon ne kakhwaʼtokénti skátʼke ne Mahís rahoʼhénton ne Rawenni꞉io ètho ní꞉ioht tsi wahonterénnaien.
Jethro Wahoʼtenikónhron Ne Mahís Nasakoʼhiaʼtarakwenháton Ne Ratiriwènhtha
(Deuteronomy 1.9-18)
13Nó꞉ia sahiórenhne ne Mahís sakoʼtienhaiénnisʼkwe nonhkweshón꞉ʼas tsi natehoʼnaterihotáron, tánon wathonwaweʼienhnárahthe tsi nióre iahòʼkaraʼwe. 14Nónen ne Jethro sahatʼkhátho oriwaʼkwékon tsi nenhoʼhióten ne Mahís, wahariwanónton, “Nahó꞉ten kí꞉ken oriwakwékon tsi seʼhiotènse nonhkweshón꞉ʼa? Notiéren tsi iaʼtesahiaʼtíston, nonhkweshón꞉ʼas kénʼen rónhʼnethe oronhkéne né꞉ne kwáh tshienʼhiókaraʼwe né tashehiatoʼréthaʼse?”
15Ne Mahís wathariwaʼsheràko, “Ónenk kíʼ tsi thóh nèntieʼre tioríwa nonhkweshón꞉ʼas akonhàke nithonʼnétha nahatiʼweientétaʼne tsi nihoʼnikonhróten ne Rawenni꞉io. 16Nónen ne tehionkwétake tehoʼtiriwahkènen, entionkatʼkénshera, tánon tentsiató꞉rethe ónhka ne tenihiáse tieiérits, tánon enkheró꞉ri ne Rawenni꞉io rahorihwaʼtáʼtsheras ó꞉ni ne raoianerénseras.”
17Ethòne ne Jethro wahénron, “Iáh theteshiérits kí꞉ken. 18Thenshaʼtaʼtwisenʼhéiaʼthe né nónhne sáka nonhkweshón꞉ʼa. Só꞉tsi kíʼ ken wèso ne shonʼha꞉ʼak khók iathahisahiaʼtísthe. 19Kíʼ ó꞉nen toʼkonhiatenikónhron ne kanikonhrí꞉io, tánon ensenikweʼkónhaʼke ne Rawenni꞉io. Tkariwaiéri nʼashehiatáʼtsiaʼse nonhkweshón꞉ʼas rahohénton ne Ní꞉io tánon rahónʼa thatsion tsi natehoʼthiriwakenàston. 20Ónenk tsi sherihónhnien ne Rawenni꞉io rahoriwaʼtátʼtsheras tánon shenikonhʼraientàten tsi ní꞉ioht tsi ahonʼnónʼnheke tánon tsi nahontiére. 21Ók né hiehiowènhthe, teshaʼthonwenhtsó꞉ni nashehiataráko ne roʼnathonkweʼtakwahríshion ó꞉ni sehrihón꞉ten nashaʼkotihéntense nonhkweshón꞉ʼa: sakotihéntens ne tewenhniawehetʼtserásens, tewenhniawehʼèhʼkons, wisksʼshonhʼniwásens, oieríshons nahaʼtíhake. Ónenk tsi né꞉ne ronhʼnónhkwe ahonwaʼtsaní꞉sehke ne Rawenni꞉io né nahónton nahontahonwenhneʼthaʼkwe tánon iáh thahatiʼiéna ne thènnen tahonwaʼtitsikheʼtaʼróhse. 22Sheʼríhon né teshaʼkotihiatoʼré꞉tas nonhkweshón꞉ʼas né iahiotʼkhonthakwénhake. Enwá꞉ton ishè꞉ke nahontaʼhatíhaʼwe ne wateriwenhtó꞉res, ók ró꞉nonha tehatihiató꞉ret ne ken nihioriwá꞉sas. Kwáh nenhʼne enwatié꞉senhne ne sariwá꞉ke, tsi enhieshaʼsniéhnon né shaʼhioténsera. 23Tó꞉ka kíʼ thoʼnenhshiere, tsi nihiaʼróhris ne Rawenni꞉io, khaʼnènhne iáh thaʼtashaʼtaʼtwisen꞉héhiate, tánon ratikwékon kíʼ onhkweshón꞉ʼa enwáton nahonsahonténhti tsi wahoʼnateriwasherónhnien tsi natehotinikónhrahre.”
24Ne Mahís waʼhaiéna tsi nahoʼthinikónhron ne Jethro 25tánon waʼshakohiaʼtarahkwenháton ne rohnathonkweʼthakwahríshions tsi natehónteres ne lsraerʼró꞉nons. Waʼshakorihontónhnion nashakotiʼhéntense ne tewenhniawehetʼtserásens, wískʼson niwásens, tánon nʼoierísons nahaʼtíʼhake. 26Waʼteshakotiʼhiatoʼréthaʼse nonhkweshón꞉ʼas né꞉ne iehiotʼkhontákwen, Mahís tahónhion ne wateriwenhtó꞉res ók ronhnónha wathatihiató꞉rethe ne ken nihioriwàsas.
27Ethòne ne Mahís thonsahonónhweron ne Jethro, tánon ne Jethro sahaʼténhti nènhneʼe.
Currently Selected:
Exodus 18: MHK
Highlight
Share
Copy
Want to have your highlights saved across all your devices? Sign up or sign in
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.