Lik Ejiptơ 20

Jơt bơta sồr lam

(Yal Wơl 5:1-21)

1Tŭ hơ̆ Yàng Tom Trồ đơs jơh ală jơnau do lah: 2“Añ la Jehôwa Yàng Tom Trồ bol mê dê, Bơtau neh cèng bol mê bơh di Ejiptơ, klàs bơh di tiah ơm dĭ.

3Di đap Añ bol mê bañ gơs ală yàng ndai tai.

4 # Lik 34:17; Leb 19:4; 26:1; Yalw 4:15-18; 27:15. Bol mê bañ lơh să tòm he in dô nơm rùp duh khoai lơi gơs rùp să kung be dô nơm phan tòm trồ hơđang, tòm tiah hơđơm, hala tòm ală dà hơđơm ù. 5#Lik 34:6-7; Khà 14:18; Yalw 7:9-10.Bol mê bañ cùn khoai di đap bol gơ, hala duh khoai bol gơ; bơh Añ, Jehôwa Yàng Tom Trồ bol mê dê, la Yàng Tom Trồ ƀoah pơrñat, rơp tài bơh tồi glài ồng pàng dê mơ lơh glài kòn sau jơl tus di pe hala poan rài ală cau gơjrañ di Añ, 6mơya rơp yal tơlik bơta kòñ gơboh jơl tus rbô rài gơwèt hơ ală cau kòñ gơboh di Añ mơ prap gàr ală bơta sồr lam Añ jê.

7 # Leb 19:12. Bol mê bañ ngui sơnđan Jehôwa Yàng Tom Trồ bol mê dê dô bă ò di pal, bơh Yàng Jehôwa rơp ò toh glài cau lơi in ngui sơnđan Kơnràñ dê dô bă ò di pal.

8 # Lik 16:23-30; 31:12-14. Kah tĕ ngai Saƀat#20:8 Saƀat: hala ngai rlô. mơ prap gàr gơ sàng goh. 9#Lik 23:12; 31:15; 34:21; 35:2; Leb 23:3.Tòm prau ngai bol mê lơh sa mơ lơh jơh ală broă bol mê dê; 10mơya ngai poh la ngai Saƀat Jehôwa Yàng Tom Trồ bol mê dê. Tòm ngai hơ̆ bol mê, kòn klau, kòn ùr, cau klau duh broă, cau ùr duh broă, ală phan poan jơng, bal mơ ală cau làng bơdìh ơm tòm hìu bol mê dê rơp ò lơh dô nơm broă lơi. 11#Sơnròp 2:1-3; Lik 31:17.Bơh tòm prau ngai Yàng Jehôwa neh crơng gơs trồ mơ plai ù, dàlềng, bal mơ jơh ală phan tòm hơ̆, mơya Kơnràñ rlô tòm ngai poh. Gen tàng Yàng Jehôwa neh ai lơngai ngai Saƀat mơ lơh gơ in sàng goh.

12 # Yalw 27:16; Mat 15:4; 19:19; Mak 7:10; 10:19; Luk 18:20; Eph 6:2,3. Dòn duh tĕ mè bèp bol mê dê, tồ bol mê in geh kis jŏ jòng tòm lơgar mơ Jehôwa Yàng Tom Trồ bol mê dê ai bol mê in.

13 # Sơnròp 9:6; Leb 24:17; Mat 5:21; 19:18; Mak 10:19; Luk 18:20; Rôm 13:9; Jakơ 2:11. Bol mê bañ tơnchơt cau.

14 # Leb 20:10; Mat 5:27; 19:18; Mak 10:19; Luk 18:20; Rôm 13:9; Jakơ 2:11. Bol mê bañ tìs glài rềs àr bơrnàn.

15 # Leb 19:11; Mat 19:18; Mak 10:19; Luk 18:20; Rôm 13:9. Bol mê bañ ntung kơñau.

16 # Lik 23:1; Mat 19:18; Mak 10:19; Luk 18:20. Bol mê bañ lơh cơng blac di cau ơm rềp mơ bol mê.

17 # Rôm 7:7; 13:9. Bol mê bañ hàm hà hìu cau ơm rềp mơ bol mê. Bol mê bañ hàm kòñ bau ùr cau ơm rềp mơ bol mê, hala cau klau duh broă, cau ùr duh broă khai dê, kơnrồ, alàng, hala phan lơi gơrê bal mơ cau ơm rềp di bol mê.”

18 # Heb 12:18-19. Tòm tŭ làng bol gŏ ntơr kơnàs mơ puhlèp, kơno kơlwòk, mơ gŏ mơnơm gơlik ñhŭ, gen rơm să rngòt ngan, mơ ơm ntào ngài. 19Bol khai đơs mơ Môise lah: “Ồng đơs tĕ mơ bol hi gen bol hi rơp iat, mơya bañ lòi Yàng Tom Trồ đơs mơ bol hi, rngòt bol hi pal chơt.” 20Môise đơs mơ làng bol lah: “Bañ rngòt, Yàng Tom Trồ mù nàng lòng bol mê, tồ bơta duh rngòt di Kơnràñ rơp ơm mơ bol mê nàng sền gàr bol mê ò tìs glài.” 21Làng bol kư̆ ơm bơh ngài, tòm tŭ Môise tus rềp di puk mhwal lơut ngan gơs Yàng Tom Trồ ơm.

Bơta boh lam gơwèt mơ cơnòng duh khoai

22Yàng Jehôwa đơs mơ Môise lah: “Yal tĕ cau Israel in be do: ‘Să tòm bol mê neh gŏ Añ bơh đang trồ đơs mơ bol mê: 23Bañ lơh gơs yàng lơi mơ ơn bal mơ Añ; bañ lơh bol mê in ală yàng mơ priă hala ală yàng mơ màh.’ 24Bơt tĕ Añ in dô nơm cơnòng duh khoai mơ ù, ơn tĕ hơđang hơ̆ ală phan ơn chu pơrguc bal mơ ală phan ơn kah bơta nđàc,#20:24 hala ală phan ơn ring lơngai. ală belàt, be mơ kơnrồ bol mê dê. Tiah lơi Añ kòñ sơnđan Añ geh dòn duh, gen Añ rơp tus mơ bol mê mơ ai lơngai bol mê in. 25#Yalw 27:5-7; Jôs 8:31.Dilah bol mê bơt Añ in dô nơm cơnòng duh khoai mơ lŭ, bañ ngui lŭ neh cau phàt rau, bơh bol mê rơp lơh gơ in ƀơ̆ ƀơl dilah bol mê ngui phan nàng phàt gơ. 26Bañ cơnđòa hào kơnă guh tus cơnòng duh khoai Añ jê, rngòt bơta lòi rồ mê dê rơp ràng tơlik hơđang hơ̆.”

Currently Selected:

Lik Ejiptơ 20: KPM2018

Highlight

Copy