Luke 2
2
Chapter 2.
1WAIGIEN althsgai shantlanai gut hēt-tligai gu tl haada is wautliwon kyē tl kālung-ai un Cæsar Augustus tuking-gogang-an.
2Aū tlishinūt tl kyē tlang-a tl kālang-an Quirinius Syria tligai un itladāgandlu-a.
3Waigien tl wautliwon-hun kyang kālung-die un ilnagai ā ung-a ijan.
4Waigien Joseph ishin Nazareth ilnagai Galilee tligai gu is sta, David gia ilnagai Bethlehem hin kyas Judæa tligai gu is ā kulthaian, David gia haadgai swon il ijan altha;
5Kyang isgien, Mary, nung il īnā-ung-kasha-gan kyē ishin il kālung-die una; waudlu Mary dulthgiāgan.
6Waigien hawun gu il isūgundān, il kai-ungkasas waudlu ēlan.
7Wāigien il ketlagang-an lang-a ilthing-āgan; waigien la odō il tilthgalan gien, geudan gin ai sta lthdanūs ai la il dlisdlaian, lthdanou nuhgai ā gum lūm la un kang-gang-āwon altha.
8Waigien althji tligai gu lumadō kechitlēalung kwulthkotis ā nāang-an gien, algwau lumadōgai ā ung-a tl lthotsaian.
9Waigien Shalana gia angelgai swon la kwulth giāāwon gien, Shalana un yāgudung-gai la odō kokēshgadāwon; waigien il lthwaugulth-euon-āwon.
10Waigien nung angelgas hin il shudāwon, Gum lth lthwaugang-ū; gwokeng, gialthang lā, alth tl gudung-ai lā-euon-ai un, dalung ga lth gialthindang, waigien tl haada wautliwon un isishang:
11Aiat David gia ilnagai gu Nung alth tl koguns, Christ Shalana isis, dalung un tl kais altha.
12Waigien adshi ū dalung un kang-ūdsadāgung; Nung āḵutsūs odō gin tilthgalas gien, geudan gin ai sta lthdanūs ā il tīdas dalung keāashang, hin anung angelgas il shudāwon.
13Waigien umlthīstan nung angelgas alth sha-tligai haade shkūlīlth-euon-an gien, Shanung-itlagadas ā tl kil-lāgan gien, hin tl shouon,
14Shanung-itlagadas sha āgwī is un lth yāgudung-ū, waigien hēt-tligai gu tl haada alth il gudung-ai las shū lth gudung-ai dlaia isdū, hin tl shouon.
15Waigien tlistleuon ga angelgasgai shi ga la sta isāwon silīd, lumadō kēchitlē-alung hin gu shudaian, Bethlehem ā wēt talung istīidsun, Shalana tliku gin edan un itil ūnshi-dultbdas talung kang-gai una, hin gu il shudāwon.
16Waigien hawīdan il istla-āwon gien, Mary isgien, Joseph ishin, nung āḵutsūs geudan gin ai sta lthdanūs ā tīdas ishin il keng-āwon.
17Waigien tlistleuon il keng-āwondlu, anung āḵutsūs edē gin la ga tl shudāwon unsta il shu-āwon.
18Waigien lumadō kēchitlē-alung gin shudai-an ga gudang-an-gai wautliwon wau un kuldang-an.
19Waigien Mary a gin tl shudaian wautliwon duman kang-an gien, odō il kwulthalan.
20Waigien lumadō kēchitlē-alung silthgang stēlan gien, gin il gudung-āwon isgien, gin il keng-āwon wautliwon ishin sing Shanung-itlagadas un il yagudung-āwon gien, la ā il kil-lā-āwon, tliku la ga tl shu-āwon ging-an-a.
21Waigien la tl circumcise-die un shin stan-sbang-ā-ūlthaiandlu, Jesus hin la tl kyādaian, la tl dulthgīgai konast nung angelgas il kyādaian ging-an-a.
22Waigien tliku Moses gia king-go-gungai shouon ging-an, tlistleuon ung tl tla-shkwūnagulai shantlanai waudlu ēlandlu, Jerusalem ā la tl dlāalthaian, Shalana ga la tl isdie una,
23(Tl īlthansida wautliwon tl kedlaguns ū Shalana un nung las hin tl kyādāashang, tliku Shalana gia king-go-gung-ai kālung-as ging-an-a;)
24Waigien kaltsada stung isgien pigeon stung ishin ga hun tl hāasie un ū tl ijan, tliku Shalana gia king-go-gung-ai shūs ging-an-a.
25Waigien nung ilthing-a Jerusalem gu ijan, Simeon hin ū il kyāgan; waigien anung ilthing-as lāgan gien, Shanung-itlagadas un il gudung-ai lāgan, waigien Israel haade gudung-ai wau shagadang-ases da il khatsūgang-an; waigien nung Hants Las la ing-gu ijan.
26Waigien Shalana gia Christgai il kang-gai konast gum il kotulthang-ases Hants Las un il ūnshidulthdaian.
27Waigien Hants Las alth temple-gai ai il kudsaian; waigien tlistleuon Jesus yāalung, tliku lau-gai shūs ging-an la un il wauawē un, ai la il dlistl-dsāwondlu,
28Itan la il dligīgan gien, Shanung-itlagadas ā il kil-lāgan, waigien hin il shouon,
29Shalana, dung shouon ging-an, wēt gīt-sadang gudung-ai dlaia alth dung kilkaidung;
30Hung-ung alth dung gia kogunai lth keng-gun altha,
31Tl haada wautliwon hang-gu gin dung tla-ēlthdaian-a;
32Alth tliga kulat haade otgēlths gien, Israel dung gia haadgai is alth un yagudunggai una, hin il shouon.
33Waigien la edē gin tl shudaian un il aung isgien il ou ishin kuldung-āgan;
34Waigien Simeon gūshou lā la ā shudāwon gien, hin ilou Mary il shudaian, Gwokeng, Israel haade kwon dl-dulduns gien tl kalthou-gadung-ai un ishin anung āḵutsūs ijung; waigien hanltha tl gūshue un kang-ūdsada ishin il ijung;
35Waigien shich dung althandai ai tl kitsāashang; tliku tl kwon kwulthilths kang-gēle una, hin la il shudaian.
36Waigien Asher gwaigang-ai swon, Phanuel gūjang-a jada prophetga ijan, Anna hin kyāgan (il kē-ilthdsilthīgan, waigien il lāinēlan sta tuda jikwau tlal-ung kwulth il ijan,
37Waigien tuda tlāalē stanshang-ā waugu stunshung il dli-ang-an), waigien algasdlu isgien shantlansdlu ishin gum temple-gai sta il kaidang-gang-an, waigien kēsal alth isgien, gin ginang alth ishin singlth-gang il gūshu-gang-an.
38Waigien althsgai ashkoshgadai gut il katlalthaian gien, Shanung-itlagadas ā il killāgan, waigien Jerusalem tl kogundie da tl khatsūgang-an wautliwon ā la edē il gūshouon.
39Waigien tlistleuon tliku Shalana gia king-go-gung-ai shūs ging-an il wau-gī-āwondlu, Galilee tligai gwī il stilthāwon gien, gyang ilnagai, Nazareth hin kyāgan, un il istla-āwon.
40Waigien nung āḵutsūs īnastlas gien, il dugwīēlan gien, kudang alth il stahgan; waigien Shanung-itlagadas gudung-ai ligai la ing-gu ijan.
41Waigien tuda wautliwon gut-hun il yāalung passover lagunung-ai ak Jerusalem ā ijang-an.
42Waigien la da tuda tlāalth waugu stang-andlu, tl lagunung-kāguns ging-an il istal-lthāwon;
43Waigien tlistleuon shantlanai tlan-ēlandlu, silthgang il stīlthāwondlu, Jesus nung īlthing-a ḵutsū isis Jerusalem gu ung tutlistldaian; waigien il yāalung gum un ūnshidangan;
44Waigien tla alth-hun il ising il gudungāwon althū, shin shoshgu il istalāwon; waigien tou-alung shū-wīt isgien, gi un il ūnshitwos shū-wīt ishin, la da il di-ing-āwon;
45Waigien tlistleuon la da il dī-inchgāwondlu, Jerusalem gwī silthgang il stīlthāwon gien, la da il dī-ing-āwon.
46Waigien shin lthōnulth-ēlandlu, templegai ā la il kēi-āwon, gin shkotadālē-alung shū il kou-os gien, tl kil ā il geulans gien, tla alth il kiānung-gang-an;
47Waigien il kil ga gūdang-an wautliwon gin un il ūnshits isgien, tliku hanglthang il shūs ishin un kuldang-an.
48Waigien tlistleuon la il keng-āwondlu, la un il kuldung-āwon; Lthken, gushintlou tliku itil un dung ēdung? gwukeng, dung aung isgien lthā ishin gudan stī alth dung da dī-ing-gun, waigien hin il ou il shudaian.
49Gushintlou di da dalung dī-ing-ūjang? gum gu Aung-ung gia nai ā lth itsgai las un dalung ūnshidang-ūja? waigien hin la il shudāwon.
50Waigien gin il shudas gum un lang-a il ūnshidang-āwon.
51Waigien la alth il kaidalthāwon gien, Nazareth gu il istla-āwon; waigien la kilth ging-an il etūgang-an; waigien il ou a gin il shudagang-an wautliwon gudung-ung alth un ung ūnshitgang-an.
52Waigien Jesus kudung-ēlan gien, il dlakonēlan, waigien Shanung-itlagadas isgien tl haada ishin la alth gudung-ai lāgan.
Currently Selected:
Luke 2: HAIDA
Highlight
Share
Copy
Want to have your highlights saved across all your devices? Sign up or sign in
First published by the British and Foreign Bible Society 1891-1899.
