Luka 17
17
Ifya kukumika
(Mt 18:6-7, 21-22; Mk 9:42)
1Anena alondeshi yaakwe, wati: “Chitangawa siku vya kupona filwisa, leelo akalanda kuli wino afileshile. 2Chingasipila nkani untu wiyo anyepelelwe ifinga lya kushila un-ngalo yaakwe, nu kusumbilwa muli yemba, kuti atononisha umwi apa yanono ya. 3Chenjelini. Ngu nnyonko wakonona, msunde, ngi wafipela, mwelele. 4Ngi wakonona maila saba uku wanda onga, nu kwisa kunuli amaila saba, wati: ‘Nafipela!’ Mwelele.”
5Mitume yanena uMwene, yaati: “Tongeleseshe usumilo.” 6Ngu Mwene wati: “Ngangi mukwite usumilo nanti wa lupeche lwa Aladadi, munganena unsamfu u, muti: Wipuka ukapelwe muli yemba, nao ungamupulika.
7“Lelo uwini pali mwemwe ndi ali nu unnimi nanti kachema wa ng'ombe, angannena lino wapiluka ukufuma uku chalo, ati: ‘Nguna zuwa, wikala ulye ichakulya?’ 8Chene! atangi annena, wati: ‘Ntekela ichakulya, ndye, unyepe umbombele, fika na lino nalya nu kunwa, apano newe ulya nu kung'wa?’ 9Chene! angasamalisha umuofi wiyo, kuno waomba fino wanenilwe? 10Ifino nemwe, lino mwachita ifintu fyoshi fino munenilwe, muti: ‘Sweswe yaomfi tutasifile, tuomfile imilimo yitu ino ituile.’ ”
Yesu waposha antu ikumi aya ntana
11Walangi pano yali un-nsila yalupita ukuya uku Yelusalemu, wapisile apakasi ya Samalia ni Galilea. 12Nga pano waya umunsi umwi, akomengana nantu ikumi aya ntana, yimilile lwa patali. 13Yakusha amaswi yao, yaati: “We Yesu, Mwene nkulu, utukumbukile!” 14Pano wayalola ayanena, ati: “Pitangi mukaulangishe kuli yakapela.” Walangi pano yalupita yaswepa. 15Wenga pano walola fino atapola, apiluka, na kuno alutesha Leesa ukwiswi kulu. 16Nga apona afukime apa mulu yaakwe, asamalisha kunali. Nawe wali unSamalia. 17Nga Yesu afwanga, ati: “Yataswefile yoshi ikumi? Tisa yali kwi? 18Chene! yatalolike yano yapiluka ukwisu tesha Leesa, siku mweni wi?” 19Nga annena, wati: “Katuka, pitanga, usumilo wako wakuposha.”
Kwisa kwa wene-wi-Leesa
(Mt 24:23-28, 37-41)
20Nga pano aFaliseo yamtondosha, yaati: “Uwene-wi-Leesa ulwisa li?” Ayanena, wati: “Uwene-wi-Leesa utalwisa uku kulolwa ningo. 21Nanti yataluti: Lolini, uli pa, nanti, ukuku; kuno lolini, uwene-wi-Leesa uli unkasi yino.”
22Nga anena alondeshi yaakwe, wati: “Amanda yalwisa yano mulukunda ukulola uwanda umwi apa manda ya Mwana-ntu, mutaulola. 23Na kaili yalumunena, yaati: ‘Lolini kuku, lolini ku!’ Mutachitina pano muli, nanti ukuyalondela. 24Kuno fino ulukosha lwa semba lukukosha ukufuma ulusansa mbalinga, nu kufika uku lusansa lunina ulwa mwiyulu, ifino Mwana-ntu aluwa apa wanda wakwe. 25Leelo alutana asanwe na machulo tupu, nu kukanwa nu mpanda u. 26Ndi fino chali um-manda yi Noa, ifino chiluwa apa manda ya Mwana-ntu. 27Yalyanga nu kunwa, yapindulanga nu kupindukwa, kufika na lino Noa wingile um-safina, unnamba wisa wayumola yoshi. 28Chiluwa ndi fino chali um-manda yi Loti, yalyanga nu kunwa, yakalanga nu kukasha, yapelanga nu kukula. 29Leelo uwanda uno Loti waatinile uku Sodoma, kwatonyile moto ni sanku ukufuma umwiyulu, vyayumola yoshi. 30Fiyo kwene ifino chiluwa uwanda uno wacha waloleka uMwana-ntu.
31“Apa wanda uo, wino ali apidali, ni fifya fyaakwe fili un-ng'anda, atalwika ukutola; na wino ali uku fyalo, ifino ataluwela. 32Mwisukile pali nka Loti! 33Untu wensi wino alusita ukufyusha upuma wakwe, aluulofya, na wino waulofya, aluufyusha. 34Ndumunena, usiku uo antu yaili yaluwanga yawisi apa chitala chonga, wenga alutolwa, na wenga alushala. 35Anachi yaili yalushanga apaliponga; wenga alutolwa, wenga alushala.” 36[Antu yaili yaluwa un-chalo, wenga alutolwa; wenga alushala.] 37Yamtondosha, yaati: “Ukwi Mwene?” Ayanena, ati “Kuno ichala chili, akuno amakosi yalukongana.”
Currently Selected:
Luka 17: FNT1988
Highlight
Share
Copy
Want to have your highlights saved across all your devices? Sign up or sign in
New Testament in Fipa © United Bible Societies, 1988. Bible Society of Tanzania.
