Hechos 1
1
Espíritu Santuta chaskiyänanpaq willanqan
1Tayta Teófilo,#Luc. 1.1-4. punta kaq libruchömi Jesús llapan ruranqankunata y yachatsinqankunata qellqamurqä. Tsaykunatam rurarqan y yachatsikurqan willakur qallanqanpita 2hasta ciëluman aywakunqan junaqyaq. Ciëluman manaraq aywakurmi akranqan apostolninkunata Espíritu Santupa poderninwan imata rurayänanpaqpis tantiyatsirqan. 3Wañunqanpita kawaskamurmi chusku chunka (40) junaqyaq paykunata yuripurqan. Rasunpa kawamunqanta creyiyänanpaqmi tukuynöpa tantiyatsirqan. Tsaynöllam Dios Yayapa mandakuyninpaqpis shumaq tantiyatsirqan.
4Apostolninkunawan kaykarmi Jesús nirqan: <<Willayanqaqnöllam prometiyäshunqaykita#Luc. 24.49. Taytä kachamunqa. Tsayta manaraq chaskirqa Jerusalénpita ama aywakuyankiraqtsu. 5Juanqa yakullawanmi bautizarqan. Peru qamkunam sïqa Espíritu Santuwan bautizashqa kayanki. Bautizashqa kayänaykipaq wallka junaqllanam faltan>>.#Mat. 3.11; Mar. 1.8; Luc. 3.16; Juan 1.33.
Ciëluman Jesús kutinqan
6Jesúswan qorikashqa kaykaqkunam tapuyarqan: <<Taytay, ¿kananpitaqa Israel nacionpa mandakuqninku kanki?>>
7Jesúsnam nirqan: <<Tsaykunataqa manam musyayänaykitsu. Imay junaq imay höra tsaykuna päsananpaq kanqantaqa Dios Yayallam musyan. Payllam poderyuq kaykan munanqan höra tsaykunata rurananpaq. 8Peru tsaynö kaptinpis Espíritu Santu qamkunaman shamuptinmi poderninta chaskiyanki. Chaskiskirnam willakuynïta willakuyanki Jerusalénchö, entëru Judeachö, Samariachö y maytsay markakunachöpis>>.#Mat. 28.19; Mar. 16.15; Luc. 24.47-48.
9Tsaynö parlayta ushaskirmi pallarikar qallaykurqan. Rikaraykäyaptinmi pukutay tsapaskiptin illakaskirqan.#Mar. 16.19; Luc. 24.50-51. 10Tsaynö kaykäyaptinmi yuraq llatapashqa ishkay runakuna illaqpita yuriskir 11niyarqan: <<Galilea runakuna, ¿imanirtan ciëlupa rikaraykäyanki? Puntaykikunapita ciëluman aywanqannöllam Jesús yapay kutimunqa>>.
Judaspa rantin apóstol kananpaq Matíasta akrayanqan
12Tsaypitam Olivos lömachö kaykäyanqanpita apostolkuna Jerusalénman kutiyarqan. Tsay lömapita Jerusalénmanqa manam alläpa karutsu karqan, sinöqa jamay junaqchö puriyanqannöllam.#1.12 Jamay junaq junaqchömi Israel runakuna ishkay waranqa (2,000) japayllata puriyaq. Tsaypita mastaqa manam puriyaqtsu. Ishkay waranqa japayqa juk kilömetrupita ichik masllam. 13Chaykurnam patsakuyanqan altusman lätayarqan. Paykunam kayarqan Pedro, Juan, Santiago, Andrés, Felipe, Tomás, Bartolomé, Mateo, Alfeupa tsurin Santiago, Zelote niyanqan Simón y Santiagupa tsurin Judas.#1.13 Bartolomépa jukaq shutinmi karqan Natanael (Juan 1.45-49; 21.2). Santiagupa tsurin Judaspa jukaq shutinmi karqan Tadeo (Mat. 10.3; Mar. 3.18). 14Paykunam Jesúspa maman Maríawan, Jesúspa wawqinkunawan y wakin warmikunawanpis Dios Yayata mañakuyänanpaq imaypis qorikäyaq.
15Tsay junaqkunam Jesúsman creyikuqkuna pachak ishkay chunkanö (120) qorikäyaptin Pedro ichirkur nirqan: 16<<Wawqikuna y panikuna, musyanqantsiknömi runakunata Judas pusharqan Jesústa prësu achkuyänanpaq. Tsaynö kananpaq kanqanta qellqananpaqmi Espíritu Santu rey Davidta tantiyatsirqan. Tsaymi Judasta päsananpaq Dios Yayapa palabran ninqannölla kanan cumplishqa. 17Judasqa noqakunawanmi purirqan. Paytapis apóstol kananpaqmi Jesús akrarqan>>.
18(Jesústa rantikunqan qellayta Judas kutitsinqanwanmi chakrata rantiyarqan. Judasqa pachanpis pashtat uray senqapa shikwaskiptinmi aqashninpis witsikaskirqan. 19Tsayta musyaskirmi Jerusalénchö täkuq runakuna tsay chakrapa shutin churayarqan Acéldamata. Paykunapa idiömanchömi Acéldama ninanqa Yawar Pampa ninan.)#Mat. 27.3-8.
20<<Judasta päsananpaqmi Salmo libruchö nin:
<< <Wajinpis tsunya katsun.
Tsaychö pipis ama täkutsunnatsu>.#Sal. 69.25.
Tsaynöllam mastapis nin:
<Pay rurananpaq kaqta jukna ruratsun>.#Sal. 109.8.
21<<Tsaymi juktana churashun Judaspa rantin apóstol kananpaq. Tsay runa katsun Jesús willakur qallanqanpita noqakunawan puriq. 22Tsaynölla Jesústa Juan bautizanqanpita#Mat. 3.16; Mar. 1.9; Luc. 3.21. ciëluman kutinqanyaq#Mar. 16.19; Luc. 24.51. qatiraq katsun. Tsay runata churashun noqakunanö apóstol kar Jesús kawamunqanta willakur purinanpaq>>.
23Tsaynö niptinmi ishkaq runakunata akrayarqan. Jukmi Matías karqan. Jukaqnam José karqan. Wakin runakunam Joséta Barsabás niyaq y wakinnam Justo niyaq. 24Tsaypitam Dios Yayata mañakur niyarqan: <<Dios Yaya, qammi musyanki runakunapa shonqun imata yarpanqantapis. Kanan mayqantapis akranqaykita musyaykatsiyämay. 25Akranqayki runam apostolniki kanqa Judas Iscariotipa rantin. Apóstol kayninta mana cumpliptinmi Judaspa supaynin apashqa>>.
26Tsaynö mañakuskir sortiyayaptinmi Matíaspaq suerti shikwarqan. Matíaswanmi apostolkuna yapay chunka ishkayna kayarqan.
Currently Selected:
Hechos 1: qxn
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
