Hechos 9

Sauluta Jesús yuripunqan

Hechos 22.6-16; 26.12-18

1Saulunam Señor Jesúspa discïpulunkunata wañutsiyta munar mas mandakuq sacerdötiman aywaykur 2nirqan: <<Ordinta rurapayämay Damascuchö sinagögakunaman aywar Diospa Nänin qatiraqkunata#9.2 Diospa Nänin qatiraqkunapaq parlarqa Jesucristuman creyikuqkunapaqmi parlaykan. warmita ollqutapis Jerusalénman prësu apamunäpaq>>.

3Peru Damasco markaman chaykaptinnam ciëlupita aktsi illaqpita atsikyaykurqan. 4Tsaymi patsaman Saulo ishkiskir wiyarqan <<Saulo, Saulo, ¿imanirtan qatikachämanki?>> nimuqta.

5Saulunam tapurqan: <<¿Taytay, pitan kanki?>>

Tsaymi nimurqan: <<Noqaqa qatikachaykanqayki Jesúsmi kä. [Qaruchapa puntanta töru jaytar däñakunqannömi kikillayki däñakuykanki>>.

6Tsayta wiyaykurmi mantsakaywan tsuktsukyarraq Saulo nirqan: <<Taytay, ¿imatatan rurashaq?>>

Señor Jesúsnam nirqan:] <<Sharkur Damascuman ayway. Tsaychömi imata ruranaykipaqpis willashunki>>.

7Parlamuqta wiyarpis pitapis mana rikarmi Sauluwan aywaqkuna alläpa mantsakäyarqan. 8Saulunam shikwanqanpita sharkurnin rikachakuyta munarpis ni imata rikarqantsu. Tsaymi paqtan aywaqkuna janchashqalla Damascuman chätsiyarqan. 9Tsaychömi kimsa junaq qaprayashqa kar mikuyta mikurqantsu ni yakutapis upyarqantsu.

10Damascuchömi juk discïpulu täkurqan Ananías shutiyuq. Paytam Señor Jesús yuripuskir nirqan: <<¡Ananías!>>

Niptinmi nirqan: <<Taytay, ¿imallatatan?>>

11Señor Jesúsnam nirqan: <<Derëcha niyanqan cälliman sas ayway. Judaspa wajinman chaykur tapukunki Tarso markapita Saulo runapaq. Tsay wajichömi Dios Yayata mañakur kaykan. 12Paymi revelacionchö rikäshushkanki ñawin kutikänanpaq makikita umanman churaykur mañakuykanqaykita>>.

13Ananíasnam nirqan: <<Taytay, tsay runapaqqa atskaqmi parlayan qamman creyikamuqkunata Jerusalénchö alläpa ñakatsinqanta. 14Kananqa mandakuq sacerdötikunapa ordinninwanshi kayman shamushqa qamman creyikuqkunata prësu apananpaq>>.

15Señor Jesúsnam nirqan: <<Ayway. Willakuynïta willakunanpaqmi tsay runata akrashkä. Paymi willakunqa juklä nación runakunata, reykunata y Israel majinkunatapis. 16Paytam musyatsishaq noqa rayku alläpa ñakananpaq kanqanta>>.

17Tsaynö niptinmi Saulo kaykanqan wajiman Ananías aywarqan. Chaykurmi Saulupa umanman makinta churaykur nirqan: <<Wawqi Saulo, nänichö yuripushunqayki Señor Jesúsmi kachamashqa qaprayanqaykipita kutikänaykipaq y Espíritu Santupa poderninchö kanaykipaq>>.

18Tsaymi jina höra Saulupa ñawinpita pescädupa escämannö shikwaskiptin ñawin kutikaskirqan. Tsaypitanam bautizakuskir 19mikuyta mikuskiptin kallpan yuriskirqan. Damascuchömi discïpulukunawan#9.19 Discïpulukunapaq parlarqa Jesucristuman creyikuqkunapaqmi parlan. ishkay kimsa junaq quëdayarqan.

Jesúspaq Damascuchö Saulo willakunqan

20Tsaypitanam Dios Yayapa Tsurin Jesús kanqanta sinagögakunachö Saulo willakur qallaykurqan. 21Tsaynö willakunqanta wiyarmi runakuna mantsakashqa niyarqan: <<¿Manaku kay runaqa Jesúsman creyikuqkunata Jerusalénchö qatikacharqan? ¿Manaku kaymanpis shamushqa prësu achkuskir mandakuq sacerdötikunaman apananpaq?>>

22Waran waranmi Saulo mas tantiyakur Jesús salvamaqnintsik Cristo kanqanta willakurqan. Tsaynö willakuptinmi Damascuchö täkuq Israel runakuna ima niytapis puëdiyarqantsu.

Israel runakunapita Saulo qeshpir aywakunqan

23Tsaypita unaytanam Israel runakuna Sauluta wañutsiyänanpaq willanakuyarqan. 24Wañutsiyta munar paqasta junaqta marka yarquna punkuchö shuyaräyanqantam Saulo musyarqan. 25Tsaymi discïpulukuna juk paqas jatun canastaman wiñarkur markapa murällan waqtanpa Sauluta bäjatsiyarqan.#2Cor. 11.32-33.

Jerusalénchö Saulo willakunqan

26Jerusalénman Saulo chaykurmi Jesúspa discïpulunkunawan qorikayta munarqan. Peru Jesúsman creyikunqanta mana creyirmi paywan qorikayta mantsakuyarqan. 27Bernabénam apostolkunawan reqinakuyänanpaq Sauluta pusharqan. Tsaychömi Señor Jesús nänichö Sauluta yuripunqanta y parlapanqanta willarqan. Tsaynöllam willakurqan Damascuchö mana mantsakur Jesúspa shutinchö willakunqanta. 28Tsaynöpam apostolkunawan Jerusalénchö Saulo purir Jesúspa shutinchö mana mantsakur willakurqan. 29Tsaynö willakurmi griego idiömata parlaq Israel runakunawan piñanakuyarqan. Tsay runakuna Sauluta wañutsiyta munayanqanta 30musyarmi wawqikuna y panikuna Cesarea markaman pushayarqan. Tsaypitanam markan Tarsuman aywakunanpaq despachayarqan.

31Jesúsman creyikuqkunanam Judeachö, Galileachö y Samariachö alli päsakuychöna kawakuyarqan. Dios Yayapita mantsakur pay munanqannö kawayänanpaq Espíritu Santu yanapaptinmi mas atskaqna kayarqan.

Eneasta Pedro kutikätsinqan

32Pedrunam creyikuq majinkunata maytsaypa watukar purirnin Lida markaman charqan. 33Tsaychömi Eneasta tarirqan puriyta mana puëdir pusaq watana cämallanchö ujuraykaqta. 34Pedrunam nirqan: <<Eneas, Jesucristum kutikätsishunki. ¡Sharkuy! ¡Cämaykita qoriy!>>

Tsaynö niptinmi Eneas jina höra kutikashqana sharkurqan. 35Tsayta rikarmi Lidachö y Sarónchö täkuq runakuna Señor Jesucristuman creyikuyarqan.

Tabita kawamunqan

36Jope markachömi juk discïpulu Tabita shutiyuq warmi täkurqan. Tabita ninanmi griego idiömachö Dorcas ninan. Tsay warmim imaypis allillata ruraq y waktsakunatapis yanapaq. 37Qeshyaykar wañuskiptinmi armaskatsir waji jananchö cuartuman sutayarqan.

38Jopipita Lida markamanqa amänullam karqan. Tsaymi Lidachö Pedro kaykanqanta musyaskir ishkaq runakunata discïpulukuna kachayarqan rugakur niyänanpaq: <<Jopimanshi saslla aywaykulläshun>>.

39Tsaymi paykunawan Pedro aywar chaykuptin aya sutaraykanqan cuartuman yaykatsiyarqan. Tsaychömi Tabita yanapanqan viüdakuna waqar Pedruta rikätsiyarqan paykunapaq ruranqan llatapankunata. 40Tsaymi tsaychö kaykaqkunata waqtaman qarquskir qonqurikuykur Dios Yayata Pedro mañakurqan. Mañakuskirmi ayata nirqan: <<¡Tabita, shäriy!>>

Tsaynö niptinmi wañushqa sutaraykanqanpita jina höra kawaskamur Pedruta rikarkur jamarkamurqan. 41Tsaynam makinpita achkurkur Pedro ichirkatsirqan. Tabita kawamunqanta rikäyänanpaqmi waqtachö kaykaq viüdakunata y wawqikunata y panikunata qayarqan.

42Tabita kawamunqanta entëru Jope markachö musyaskirmi Señor Jesúsman atskaq creyikuyarqan. 43Tsay markachömi suëla ruraq Simónpa wajinchö atska junaq Pedro quëdarqan.

Currently Selected:

Hechos 9: qxn

Highlight

Copy