KUMA 5
5
Mose na Aluni me mbee wa Valao
1Na ĩtina wa ũu Mose na Alunĩ maenda, na mamwĩa Valao, Ũũ nĩw’o Yeova, Ngai wa Isilaeli, ũnũkwasya, Lekya andũ makwa mathi, methĩwe na mboka weũnĩ kwondũ wakwa. #Kuma 10.9. 2Na Valao asya, Yeova nũũ, nĩthukĩĩsye wasya wake nĩlekya Isilaeli mathi? Ndimwĩsĩ Yeova, o na ndikalekya Isilaeli mathi. #Kuma 3.19; 2 Asu 18.35; Yovu 21.15. 3Na mamwĩa, Ngai wa Aevelania nũnakomanie naitũ: nĩtũũkwĩsũva, ũtũlekye tũthi weũnĩ kyalo kya mĩthenya ĩtatũ, tũthembee Yeova, Ngai waitũ, ndakese kũtũvalũkĩlya mũimũ, kana ũvyũ. #Kuma 3.18. 4Na mũsumbĩ wa Misili amea, Nĩ ũndũ wa kĩ inyw’ĩ, Mose na Aluni, mũũtuma andũ matia mawĩa moo? Endai mũsyokee mĩio yenyu. #Kuma 1.11. 5Na Valao amea, Sisya, andũ ma nthĩ yu nĩ aingĩ, na nĩmũũtuma mathũmũia mĩio yoo. #Kuma 1.7,9. 6Na mũthenya o ũsu Valao ameaĩa aũngamĩi ma andũ, na anene moo, akĩmea, #Kuma 3.7; 5.14,15. 7Mũikanenge andũ ũa ĩngĩ ta tene, wa kũmba mavali: nĩmaende memanthĩe ũa mo ene. 8Na ũtalo wa mavali, ala mombaa tene, manengei o w’o; mũtikanyivye o na vanini: nĩkwĩthĩwa nĩ atulu; kwondũ wa ũu nimeũlonzan’ya, na kwasya, Tũendei tũmũthembee Ngai waitũ. 9Andũ nĩmanengwe wĩa wĩ vinya mbee, motethye; na matikethukĩĩsye ndeto sya ũvũngũ.
10Na aũngamĩi ma andũ, na anene moo, maumaala, na maneena na andũ, makĩmea, Ũũ nĩw’o Valao ũnũkwasya, Ndimũnenga ũa. 11Endai inyw’ĩ, mũkemanthĩe ũa o vala mũtonya kũwona; nũndũ wĩa wenyu o na wĩva ndũkaoleka. 12Kwondũ wa ũu andũ manyaĩĩkwa nthĩ yonthe ya Misili mamanthe mavuthĩ vandũ va ũla ũa. 13Na aũngamĩi mamakalaata mũno, makĩmea, Ianĩsyai mawĩa menyu, mawĩa ma kĩla mũthenya, o ta yĩla ũa waĩ vo. 14Na anene ma ana ma Isilaeli, ala aũngamĩi ma Valao mamaiĩte, makũnwa, makĩwa, Nĩ ũndũ wa kĩ muineanĩsya wĩa wenyu wa kũmba mavali ĩoo, o na ũmũnthĩ, ta tene?
15Nĩvo ĩndĩ anene ma ana ma Isilaeli mathi manũĩĩa Valao, makĩmũkũlya, Wĩĩka na athũkũmi maku ũu nĩkĩ? 16Ithyĩ athũkũmi maku tũtinengawe ũa, nao metwĩa, Ũmbai mavali: na, sisya, athũkũmi maku nĩtũkũnawa; ĩndĩ ĩvĩtyo yĩ kwa andũ maku mwene. 17Ĩndĩ amea, Mwĩ atulu, mwĩ atulu: kwondũ wa ũu mwĩasya, Tũendei tũmũthembee Yeova. 18Endai yu ĩndĩ, mũtethye wĩa; nĩkwĩthĩwa mũikanengwa ũa, ĩndĩ mũkeanĩsye ũla ũtalo wa mavali. 19Na anene ma ana ma Isilaeli moona atĩ me ũndũnĩ ũthũku, yĩla matavĩw’e, Mũtikaole o na vanini mavali menyu, ũtalo wa kĩla mũthenya. 20Na makyuma kwa Valao makomana na Mose na Aluni, ala maũngeme nzĩani: 21na mamea, Yeova amũsisye, na kũsila; nũndũ nĩmũtũnyungĩtye naĩ kũla kwĩ Valao, na kũla kwĩ athũkũmi make, kũmanenga ũvyũ mokonĩ moo matũae. #Kuma 6.9.
Mboya ya Mose
22Na Mose amũsyokea Yeova, na amwĩa, Mwĩaĩi, ũmekĩte andũ aa naĩ nĩkĩ? Ũndũmĩte nĩkĩ? #Mot 11.11. 23Nũndũ kuma navika kwa Valao nĩneene syĩtwanĩ yaku, nũmekĩte andũ aa naĩ; o naku ndũmathonoketye andũ maku nongi.
Currently Selected:
KUMA 5: Mbivlia
Highlight
Copy
Compare
Share
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
