MWAMBĨLĨLYO 29
29
Yakovo aithũkũma Lavani ũndũ wa Lakeli na Lea
1Nĩvo Yakovo wakwatie nzĩa, na avika nthĩ ya ana ma wumĩlonĩ wa syũa. #Mot 23.7; Asi 6.3. 2Nake oona, na, sisya, kĩthĩma kĩsesinĩ, na, sisya, ndĩthya itatũ sya malondu itindiĩte ũtee wakyo; nũndũ kĩthimanĩ kyu nĩmanyithasya ndĩthya: na ĩvia yĩla yaĩ mũomonĩ wa kĩthima yaĩ ĩnene. 3Na ndĩthya syonthe syoombanĩaw’a vo: na mavingilitasya ĩvia kuma mũomonĩ wa kĩthima, na mainyithya malondu, na maitũnga ĩvia mũomonĩ wa kĩthima vandũ vayo. 4Na Yakovo amakũlya, Ana‐a‐asa, inyw’ĩ mwĩ ma va? Nao masũngĩa, Twĩ ma Aalani ithyĩ. #Mwa 27.43. 5Na akũlya, Nĩmũmwĩsĩ Lavani mwana wa Naoli? Nao masũngĩa, Nĩtũmwĩsĩ. 6Na amakũlya, Nĩ kũseo kwake? Nao masũngĩa, Nĩ kũseo: na, sisya, Lakeli mwĩĩtu wake wũkĩte na malondu. 7Nake amea, Sisya, no kũkye, na ti ĩvinda ya kũmban’ya indo: nyithyai malondu, na ĩndĩ endai mũkaĩthye. 8Na masũngĩa, Tũitonya, mũvaka ndĩthya syonthe syũmbanw’e, na maivingilitya ĩvia yume mũomonĩ wa kĩthima; nĩvo ĩndĩ tũnyithasya malondu. 9Akĩneena nao, Lakeli ooka na malondu ma ĩthe; nũndũ nĩwe waĩthasya. #Kuma 2.16. 10Na kweethĩwa Yakovo oona Lakeli mwĩĩtu wa Lavani mwana‐a‐ĩthe wa inyia wake, na malondu ma Lavani mwana‐a‐inyia wa inyia wake, Yakovo athengeea, na avingilitya ivia yume mũomonĩ wa kĩthima, na anyithya malondu ma Lavani mwana‐a‐inyia wa inyia wake. #Kuma 2.17. 11Na Yakovo amũmumunya Lakeli, na ookĩlya wasya, na aĩa. 12Na Yakovo atavya Lakeli kana we nĩ mwana‐a‐ĩthe wa ĩthe, na nĩ mwana wa Leveka: nake asemba na atavya ĩthe. #Mwa 13.8; 14.14.
13Na kweethĩwa, Lavani eew’a ũvoo wa Yakovo mwana wa mwĩĩtu‐a‐inyia aemba amũthaũe, na amwĩvĩtĩĩsya, na amũmumunya, na amũete kwake nyũmbanĩ. Nake amũtavya Lavani maũndũ asu onthe. #Mwa 24.29. 14Na Lavani amwĩa, Nĩ w’o wĩ ĩvĩndĩ yakwa na mwĩĩ wakwa. Na ekala kwake ĩvinda ya mwei. #Mwa 2.23; Asi 9.2; 2 Sam 5.1; 19.12,13. 15Na Lavani amwĩa Yakovo, Nĩkwĩthĩwa wĩ mwana‐a‐asa, we, kwondũ wa ũu ũnthũkũme mana? Ndavya, ĩtuvi yaku yĩkeethĩwa kyaũ? 16Na ĩndĩ Lavani aĩ na eĩtu elĩ: ũla mũkũũ syĩtwa yake eetawa Lea, na ũla mũnini syĩtwa yake eetawa Lakeli. 17Na Lea, metho make matyaĩ na vinya, ĩndĩ Lakeli aĩ mwanake na aĩ na wũmbe mũseo. 18Na Yakovo amwendete Lakeli; nake asya, Ngakũthũkũma myaka mũonza kwondũ wa Lakeli mwĩĩtu waku ũla mũnini. #Mwa 30.26; 31.41. 19Na Lavani amwĩa, Kavaa nĩkũnenge we, kwĩ kũmũnenga mũndũ ũngĩ: ĩkalaa kwakwa. 20Na Yakovo athũkũma myaka mũonza kwondũ wa Lakeli; na kwake yeethĩwa o ta matukũ mavũthũ, nũndũ wa wendo ũla wamwendaa. #Osea 12.12.
21Na Yakovo amwĩa Lavani, Nenga mũka wakwa, nĩlike kwake nũndũ matukũ makwa nĩ meanĩu. 22Na Lavani oomban’ya andũ onthe ma vandũ vau, avoka mboka. #Asi 14.10; Yoa 2.1. 23Na kweethĩwa wĩoo, oosa Lea mwĩĩtu wake, amũtwaĩa; nake alika kwake. 24Na Lavani amũnenga Lea Nziliva mũthũkũmi wake mwĩĩtu, ethĩwe mũthũkũmi wake. 25Na kweethĩwa kĩoko, sisya, nĩ Lea: nake amwĩa Lavani, Ũndũ ũũ ũmbĩkie nata? Ndiũthũkũmĩte kwondũ wa Lakeli? Nĩkĩ ĩndĩ wangenga? 26Na Lavani asũngĩa, Ũũ ndwĩkawa kwitũ, kũnengane ũla mũnini kwĩ ũla wambie kũsyawa. 27Ĩanĩĩsya kyumwa kya ũsu, na tũkaũnenga ũla ũngĩ nake kwondũ wa ũthũkũmi ũla ũkanthũkũma myaka ĩngĩ mũonza. #Asi 14.12. 28Na Yakovo eeka ũu, eanĩĩsya kyumwa kyake: na amũnenga Lakeli mwĩĩtu wake ethĩwe mũka. 29Na Lavani amũnenga Lakeli mwĩĩtu weke, Mbila mũthũkũmi wake mwĩĩtu, ethĩwe mũthũkũmi wake. 30Na alika kwa Lakeli nake, na ĩndĩ amwendaa Lakeli kwĩ Lea, na athũkũma kwake myaka ĩngĩ mũonza. #Mwa 30.26.
Syana sya Yakovo
31Na Yeova oona kana Lea nĩ mũmene, na amũnenga kũsyaa: ĩndĩ Lakeli aĩ ngũngũ. #Mwa 30.26. 32Na Lea aya ĩvu, na asyaa mwana, na amwĩta syĩtwa yake Leuveni: nũndũ asya, Nĩkwĩthĩwa Yeova nĩwona thĩna wakwa; nũndũ yu mũemewa akambenda. #Kuma 3.7; Kũt 26.7. 33Na aya ĩvu ĩngĩ, na asyaa mwana: na asya, Nĩkwĩthĩwa Yeova nĩwew’a kana nyie nĩ mũmene, kwondũ wa ũu anenga mwana ũũ nake: na amwĩta syĩtwa yake Simeoni. 34Na aya ĩvu ĩngĩ, na asyaa mwana; na asya, Yu ĩvinda yĩĩ mũemewa akalũman’ya nakwa, nũndũ namũsyaĩa ana atatũ: kwondũ wa ũu syĩtwa yake eetwa Livai. #Mot 18.2,4. 35Na aya ĩvu ĩngĩ, na asyaa mwana: na asya, ĩvinda yĩĩ nĩngũtaĩa Yeova: kwondũ wa ũu amwĩta syĩtwa yake Yuta; nake aeka ũsyaa. #Mwa 49.8.
Currently Selected:
MWAMBĨLĨLYO 29: Mbivlia
Highlight
Share
Copy
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
