MWAMBĨLĨLYO 37
37
Yosevu na ana‐a‐ĩthe
1Na Yakovo atũaa nthĩ ĩla ĩthe wake wekalaa ũeni, nthĩ ya Kanaani. 2Mosyaanĩo ma Yakovo nĩmo aa. Yosevu, e wa myaka ĩkũmi na mũonza, aĩthasya ndĩthya ya mbũi na malondu vamwe na ana‐a‐ĩthe; na aĩ kĩmwana vamwe na ana ma Mbila, na vamwe na ana ma Nziliva, aka ma ĩthe: na Yosevu atwaĩa ĩthe ũvoo woo mũthũku. 3Na ĩndĩ Isilaeli amwendaa Yosevu kwĩ ana make onthe, nũndũ nĩwe mwana wa ũkũu wake: na amũseũvĩsya kanzũ wĩ langi wa mĩthemba mingĩ. #2 Sam 13.18. 4Na ana‐a‐ĩthe moona kana ĩthe woo nũmwendete kwĩ ana‐a‐ĩthe onthe; nao nĩmamũmenaa, o na maiaatonya kũneena nake na mũuo.
5Na Yosevu aota ndoto, na atavya ana‐a‐ĩthe: nao mongela kũmũmena. 6Na amea, Nĩngũmwĩsũva, ĩthukĩĩsyei ndoto ĩno nĩotie: 7nũndu, sisya, ĩthyĩ twĩthĩiwe tũkyova syove sya ngetha mũũndanĩ, nakyo kyove kyakwa kyookĩla na ĩngĩ kyaũngama kĩlũngele; na, sisya, syove syenyu syathyũlũlũka, na syeekunamĩsya kyove kyakwa. #Mwa 42.6; 43.26; 44.14. 8Na ana‐a‐ĩthe mamwĩa, Ai nĩ w’o ũkatũsumbĩka? Kana ũu nĩ w’o ũkeethĩwa na ũsumbĩko ĩũlũ waitũ? Nao mongela mũno kũmũmena nũndũ wa ndoto syake, na nũndũ wa ndeto syake. 9Na aota ndoto ĩngĩ, na atavya ana‐a‐ĩthe, na amea, Sisya, nĩnĩotie ndoto ĩngĩ; na, sisya, syũa na mwei na ndata ĩkũmi na ĩmwe syeengunamĩsya. 10Na atavya ĩthe, na ana‐a‐ĩthe; na ĩthe amũkan’ya, na amwĩa, Ndoto ĩsu nĩ myaũ ĩla ũotie? Nĩ w’o tũkooka nyie na mwenyu na ana‐a‐au tũkwĩkunamĩsye kũvika nthĩ? #Mwa 35.18. 11Na ana‐a‐ĩthe mamwĩw’ĩa kĩwĩu; ĩndĩ ĩthe aia ĩla ndeto ngoonĩ. #Lk 2.19,51; Meko 7.9.
Yosevu akĩthoow’a Misili
12Na ana‐a‐ĩthe maenda Sekemu kũĩthya ndĩthya ya mbũi na malondu ya ĩthe woo. 13Na Isilaeli amwĩa Yosevu, Ana‐a‐au matikũĩthya ndĩthya ya mbũi na malondu Sekemu? Ũka, nĩngũũtũma vala maĩ. Na amwĩa, Nĩ vaa. 14Nake amwĩa, Enda yu, ũsisye kana ana‐a‐au nĩ aseo, na ndĩthya kana nĩ nzeo; na ũindetee ũvoo. Na ĩndĩ amũtũma kuma mwandanĩ wa Eviloni, nake avika Sekemu. #Mwa 35.27. 15Na mũndũ ũmwe amwĩthĩa, na, sisya, angangaa weũnĩ: na ũla mũndũ amũkũlya, akyasya, Wĩmantha kĩ? 16Na asũngĩa, Nĩmanthaa ana‐a‐asa makwa: nĩngũkwĩsũva, ndavya vala meũĩthya. 17Na ũla mũndũ amwĩa, Nĩmaumie vaa; nũndũ nĩneewie makyasya, Tũthii Ndothani. Na Yosevu amaatĩĩa ana‐a‐ĩthe na amethĩa Ndothani.
18Nao mamwona e kũasa, na mbee wa atanamathengeea, mamũsũanĩĩa mamũae. #Sav 31.13; 37.12. 19Na maneenan’ya ene kwa ene, Sisya, ũla mũoti nĩwũkĩte. 20Ũkai ĩndĩ, tũmũae, na tũimwĩkya nthĩnĩ wa ĩima yĩmwe, naitũ tũkasya, Nũlĩkĩte nĩ nyamũ mbai: na ĩndĩ tũkasisya ũndũ ndoto syake ikethĩwa. 21Na Leuveni eew’a ũu, na amũtangĩĩa kuma mokonĩ moo, na amea, Tũikamũae. #Mwa 42.22. 22Na Leuveni amea, Mũtikete nthakame; mwĩkyei ĩimanĩ yĩĩ yĩ vaa weũnĩ, ĩndĩ mũikamwilĩĩle kw’oko: nĩ kana amũtangĩĩe kuma kw’okonĩ kwoo, amũtũnge kwa ĩthe. 23Na kweethĩwa, Yosevu avika kũla ana‐a‐ĩthe maĩ, mamumya Yosevu ũla kanzũ wake, kanzũ wa langi wa mĩthemba mingĩ ũla wekĩe; 24na mamwosa, na mamwĩkya ĩimanĩ: na ĩima yaĩ ĩthei, yĩtyaĩ na manzĩ.
25Na mekala nthĩ maye lĩu; na mookĩlya metho na moona, na, sisya, kyalo kya Aisumaeli maumĩte Ngileati, na ngamĩle syoo ikuĩte mĩtĩ ĩnyungaa nesa na seli na manemane, maendete matheeetye Misili. #Mwa 37.28,36; 39.1; Isa 21.13. 26Na Yuta amea ana‐a‐ĩthe, Ve ũtandĩthyo mwaũ twooaa mwana‐a‐asa na kũvitha nthakame yake? 27Ũkai, tũmũthoosye we kwa Aisumaeli, o na kw’oko kwitũ kũtikethĩwe ĩũlũ wake; nũndũ nĩ mwana‐a‐asa, mwĩĩ witũ. Na ana‐a‐ĩthe mamwĩw’a. #Mwa 29.14; 1 Sam 18.17. 28Na kwavĩta Amitiani, atandĩthya; na mamũkusya na mamumya Yosevu ĩimanĩ, na mamũthoosya Yosevu kwa Aisumaeli ilungu mĩongo ĩlĩ sya vetha. Nao mamũvikya Yosevu Misili. #Mwa 37.36; 45.4,5; Sav 105.17; Meko 7.9.
29Na Leuveni asyoka ĩimanĩ; na, sisya, Yosevu ndaĩ ĩimanĩ; na atembũa ngũa syake. #Mwa 44.13; Mot 14.6; 2 Sam 1.11; Yovu 1.20. 30Na asyoka kwa ana‐a‐ĩthe, na amea, Mwana nde vo; nakwa, nĩela va? #Mwa 42.13,36; Yel 31.15. 31Na moosa kanzũ wa Yosevu, na mooaa nthenge, na mainda kanzũ nthakamenĩ; 32na matwaa kanzũ wa langi wa mĩthemba mingĩ, mamũetee ĩthe woo, na mamwĩa, Tũnawĩthĩie ũũ: manya ĩndĩ kana nĩ kanzũ wa mwana waku kana ti w’o. 33Na oomanya, na asya, Nĩ kanzũ wa mwana wakwa; nũlĩkĩte nĩ nyamũ mbai; vate nzĩka Yosevu nũtilangĩtwe ilungu. #Mwa 44.28. 34Na Yakovo atembũa ngũa syake, na eevotoa makunia kĩnyunyu, na amũĩĩa mwana wake matukũ maingĩ. #Mwa 37.29. 35Na ana make onthe na eĩtu make onthe mookĩla mamũkiakisye; ĩndĩ we alea kũkiakiĩka; na asya, Nũndũ ngamũtheeea mwana wakwa Seoli ngĩmũĩa. Na ĩthe nĩwamũĩĩaa. #2 Sam 12.17. 36Na Amitiani mamũthoosya Misili kwa Votivali, mũnene ũmwe wa kwa Valao, kavuteni wa nguthu ya asũvĩi. #Mwa 37.28; 39.1.
Currently Selected:
MWAMBĨLĨLYO 37: Mbivlia
Highlight
Copy
Compare
Share
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
