MWAMBĨLĨLYO 39
39
Yosevu na mũka wa Votivali
1Na Yosevu atheew’a Misili; na Votivali, mũnene ũmwe wa kwa Valao, kavuteni wa nguthu ya asũvĩi, Mũmisili, amũthooa kw’okonĩ kwa Aisumaeli, ala mamũtheeisye kũu. #Mwa 37.25,28,36. 2Na Yeova aĩ vamwe na Yosevu, nake aĩ mũndũ mũathime; na aĩ nyũmbanĩ ya vwana wake Mũmisili. #Mwa 21.22; 28.15; 1 Sam 16.18; 18.14; Meko 7.9. 3Na vwana wake oona kana Yeova aĩ vamwe nake, na w’onthe ũla wekaa Yeova nĩwaĩlasya kw’okonĩ kwake. #2 Mav 26.5; Sav 1.3. 4Na Yosevu endeesya methonĩ make, nake amũthũkũma: na amũtw’a mũsyaĩĩsya ĩũlũ wa nyũmba yake, na kyonthe kĩla waĩ nakyo aia kw’okonĩ kwake. #Mwa 18.3; 19.19. 5Na kweethĩwa kuma ĩvinda yĩla wamũtwie mũsyaĩĩsya nyũmbanĩ yake, na ĩũlũ wa kyonthe kĩla waĩ nakyo, Yeova aathima nyũmba ya Mũmisili kwondũ wa Yosevu; na ũathimo wa Yeova waĩ ĩũlũ wa kyonthe kĩla waĩ nakyo, nyũmbanĩ na mũũndanĩ. #Mwa 30.27. 6Na kyonthe kĩla waĩ nakyo aia kw’okonĩ kwa Yosevu; o na ndaamanya kĩndũ o na kĩva kĩla kyaĩ nake, ate o lĩu ũla waĩsaa. Na Yosevu aĩ mwanake, na aĩ na wũmbe mũseo. #1 Sam 16.12.
7Na kweethĩwa ĩtina wa maũndũ asu, mũka wa vwana wake amũtemethya Yosevu metho; na amwĩa, Koma nakwa. 8Ĩndĩ alea, na amwĩa mũka wa vwana wake, Sisya, vwana wakwa ndesĩ kĩla nĩ nakyo nyũmbanĩ, na aiĩte kyonthe kĩla wĩ nakyo kw’okonĩ kwakwa: #Mwa 39.4. 9nake ti mũnene nyũmbanĩ ĩno kwĩ nyie; o na ndaambata kĩndũ o na kĩva ate o we, nĩkwĩthĩwa, we, wĩ mũka wake: ndonya ata kwĩka ũthũku ũsu mũnene, na kũmũvĩtanĩsya Ngai? #2 Sam 12.13; Sav 51.4. 10Na kweethĩwa, akĩneena na Yosevu mũthenya na mũthenya, ndaamwĩthukĩĩsya, akome nake, kana kwĩthĩwa nake. 11Na kweethĩwa ĩvinda o ta yĩu, avota nyũmbanĩ atethye wĩa wake; na kũtyaĩ ũmwe wa aũme ma nyũmba ku nthĩnĩ. 12Na amũkwata ngũa yake, akĩmwĩa, Koma nakwa: na atia ngũa yake kw’okonĩ kwake, na akuthũka athi nza. #Nth 7.13,18. 13Na kweethĩwa, yĩla wonie nĩwatia ngũa yake kw’okonĩ kwake, na akuthũka, athi nza, 14eetana kwa aũme ma nyũmba yake, na aneena nao, akĩmea, Sisyai, nũtũetee Mũevelania atũvũĩae ngũĩ: alikile kwakwa akome nakwa, nakwa nakaya na wasya mũnene: 15na kweethĩwa yĩla wewie kana nĩnookĩlya wasya na kũkaya, atia ngũa yake kwakwa, na akuthũka, athi nza. 16Na aia ngũa yake kwake, kũvika yĩla vwana wake wenũkie. 17Na aneena nake kwĩanana na ndeto ii, akĩmwĩa, Mũthũkũmi Mũevelania, ũla watũetee, avotie kwakwa ambũĩe ngũĩ: 18na kweethĩwa, ngyũkĩlya wasya na kũkaya, atia ngũa yake kwakwa, na akuthũka athi nza.
19Na kweethĩwa, vwana wake eew’a ndeto sya mũka, ila wamũtavisye, akĩmwĩa, Mũthũkũmi waku nũmbĩkie ũndũ ũilyĩ ũu; ũthilĩku wake wookĩla. 20Na vwana wa Yosevu amwosa, amwĩkĩa kolokolonĩ, vandũ vala ovwa ma mũsumbĩ mooveawa: nake ekala vau kolokolonĩ. #Mwa 40.3,5; 41.14; Sav 105.18. 21Ĩndĩ Yeova aĩ vamwe na Yosevu, na amwĩka nesa, na amũnenga kwona ũseo methonĩ ma mũsũvĩi wa kolokolo. #Mwa 39.2,4; Kuma 3.21; 11.3; 12.36; Sav 106.46; Nda 1.9; Meko 7.10. 22Na mũsũvĩi wa kolokolo aia kw’okonĩ kwa Yosevu ovwa onthe ala maĩ kolokolonĩ; na ũndũ o na wĩva w’onthe ũla meekaa vo, nĩwe waĩ mwĩkĩthya waw’o. #Mwa 40.4. 23Mũsũvĩi wa kolokolo ndaasisya ũndũ o na wĩva ũla waĩ kw’okonĩ kwake, nĩkwĩthĩwa Yeova aĩ vamwe nake; na ũla wekie Yeova nĩwaĩlasya. #Mwa 39.2,3.
Currently Selected:
MWAMBĨLĨLYO 39: Mbivlia
Highlight
Share
Copy
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
