MWAMBĨLĨLYO 50
50
1Na Yosevu amũvalũkĩla ĩthe wake ũthyũ, na amũĩĩa, na amũmumunya. #Mwa 46.4. 2Na Yosevu ameaĩa athũkũmi make aiiti mekĩe kimba kya ĩthe wake mũtĩ: na ala aiiti meekĩa kimba kya Isilaeli mũtĩ. 3Na matukũ mĩongo ĩna meanĩw’a kwondũ wake; nĩkwĩthĩwa nĩw’o meanĩw’a matukũ ma kwĩkĩa kimba mũtĩ: na Amisili mamũĩĩa matukũ mĩongo mũonza. #Mot 20.29; Kũt 34.8.
4Na matukũ ma kũmũĩĩa mathela, Yosevu aneena na andũ ma nyũmba ya Valao, akĩmea, Ethĩwa yu nĩnonete ũseo methonĩ menyu, nĩngũmwĩsũva, neenai matũnĩ ma Valao, mũkĩmwĩa, #Mwa 33.15. 5Nau nĩwambĩavĩthisye, akĩmbĩa, Sisya, nĩngũkw’a: mbũanĩ yakwa ĩla neeyĩnzĩe nthĩ ya Kanaani, kũu mũkanthika. Na yu ĩndĩ, nĩngũkwĩsũva, eka nambate nĩthike nau, na ngĩsyoka ĩngĩ. #2 Mav 16.14; Isa 22.16; Mt 27.60. 6Na Valao amwĩa, Ambata, ũthike au, kwĩanana na ũndũ wakwĩavĩthisye. 7Na Yosevu ambata athike ĩthe wake; na athũkũmi onthe ma Valao mambata vamwe nake, atumĩa ma nyũmba yake, na atumĩa onthe ma nthĩ ya Misili, 8na andũ onthe ma nyũmba ya Yosevu, na ana‐a‐ĩthe make, na andũ ma nyũmba ya ĩthe wake: no syana syoo nini, na ndĩthya syoo sya mbũi na malondu na ndĩthya syoo sya ng’ombe, matiie nthĩ ya Ngoseni. 9Na vambata vamwe nake makasya o na ala matũlĩte mbalasi: na meethĩwa nguthu nene mũno. 10Na mavika kĩvũĩoni kya Atati, kĩla kĩ mũingo wa Yolotani, kw’o maĩĩa kĩĩo kĩnene mũno kĩ woo: na aseũvya maĩo kwondũ wa ĩthe wake matukũ mũonza. #2 Sam 1.17; Meko 8.2. 11Na ala matwĩe nthĩ ĩsu, Akanaani, moona ala maĩo kĩvũĩonĩ kya Atati, masya, Aa nĩ maĩo me woo kwa Amisili: kwondũ wa wa ũu syĩtwa ya vo veetwa Aveli‐misili, na vo nĩ mũingo wa Yolotani. 12Na ana make mamwĩka kwĩanana na ũndũ wameaĩe: 13nũndũ ana make nĩmamũkuie mamũtwaa nthĩ ya Kanaani, na mamũthika ngunganĩ ya kĩsesi kĩ Makivela, ĩla Avalaamu wamũthooee Eveloni Mũititi, vu mbee wa Mamile, vamwe na kĩsesi, vethĩwe vake va mbũa. #Mwa 49.30. 14Na Yosevu asyoka Misili ĩtina wa kũthika ĩthe wake, we na ana‐a‐ĩthe na onthe ala mambatie vamwe nake kũthika ĩthe wake.
Yosevu aimaĩkĩĩthya ana‐a‐ĩthe ĩngĩ
15Na yĩla ana‐a‐ĩthe ma Yosevu moonie kana ĩthe woo nũnakwie, masya, Nokwĩthĩwa Yosevu atũmena, na kwĩĩvanĩsya vyũ ũthũku w’onthe ũla twamwĩkie. 16Na matũma ũtũmane kwa Yosevu, makĩmwĩa, Au atanakw’a eaie, akyasya, 17Neenai ũũ na Yosevu, Nĩngũkwĩsũva yu, ekea ana‐a‐au ĩvĩtyo na naĩ yoo, nĩkwĩthĩwa nĩmakwĩkie ũthũku. Na yu ĩndĩ, nĩtũũkwĩsũva, ekea athũkũmi ma Ngai wa au ĩvĩtyo yoo. Na Yosevu aĩa yĩla maneenie nake. #Mwa 49.25. 18Na ĩngĩ ana‐a‐ĩthe mathi na mavalũka nthĩ mbee wa ũthyũ wake; na mamwĩa, Sisya, ithyĩ twĩ athũkũmi maku. #Mwa 42.6. 19Na Yosevu amea, Mũikakĩe: nũndũ nyie nĩ vandũ va Ngai? #Mwa 30.2; 2 Asu 5.7. 20Nenyu nĩmwanzũanĩĩe ũthũku; ĩndĩ Ngai asũanĩa wĩthĩwe ũseo, kwĩkĩke, o tondũ kũilyĩ mũnthĩ ũũ, nĩtangĩĩe andũ aingĩ mekale thayũ. #Mwa 45.5,7. 21Kwondũ wa ũu mũikakĩe: ngamũĩthya inyw’ĩ, na syana syenyu nini. Na amakiakisya, na aneena nesa nao. #Mwa 47.12.
Kĩkw’ũ kya Yosevu
22Na Yosevu atũa Misili, we, na andũ ma nyũmba ya ĩthe: na Yosevu ekala myaka ĩana na ĩkũmi. 23Na Yosevu oona syana sya Evalaimu kũvika nzyawa itatũ: syana sya Makili mwana wa Manase nasyo syaasyaĩwe maunĩ ma Yosevu. #Mwa 30.3; Mot 32.39; Yovu 42.16. 24Na Yosevu amea ana‐a‐ĩthe, Nyie nĩngũkw’a; ĩndĩ nĩ w’o Ngai akamũkĩa inyw’ĩ, na kũmwambatya kuma nthĩ ĩno kũvika nthĩ ĩla wevĩtĩe Avalaamũ, na Isaka, na Yakovo. #Mwa 28.13; Kuma 3.16,17; Aevl 11.22. 25Na Yosevu eeavĩthya ana ma Isilaeli, akĩmea, Nĩ w’o Ngai akamũkĩa na mũkakua mavĩndĩ makwa mwambatye kuma kũũ. #Kuma 13.19; Yos 24.32; Meko 7.16; Aevl 11.22. 26Na ĩndĩ Yosevu akw’a, e wa myaka ĩana na ĩkũmi ũkũũ wake: na meekĩa kimba kyake mũtĩ, na eekĩĩwa ĩsandũkũnĩ Misili. #Mwa 50.2.
Currently Selected:
MWAMBĨLĨLYO 50: Mbivlia
Highlight
Copy
Compare
Share
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
