Nsengo sa Vanandeje 3

UPetulo iiponia umuunu yuna mulema amagulu

1Ilijuva limonga uPetulo nu Yohana valutile mu nanda imbaagule iya kifuunyila ilisala lya gonja ilya paminsi. Ilyo lilyene likhandi lisala lya Vayahuudi kimufuunya uNguluvi. 2Akhandi akwali umuunu yumonga yuna akhandi mulema kihuma asawe. Wiila wásumulwagwa na vaanu, vakhandi vikimuviikha nkholeela nu mulyango guna gukhandi gutambulwa Mulyango Munofu. Apo akhandi ilomba ihela kwa muunu yoyoona yuna akhandi ihuluta mu lukeeke lwa nanda imbaagule.

3Umuunu uyo, pina ikivaaga uPetulo nu Yohana vihuluta mu lukeeke lwa nanda imbaagule, wávalomba ihela. 4Baheene uPetulo nu Yohana vamuhonekha. UPetulo wámujovela wáaja, “Tuloleela ose!” 5Umuunu yula wávaloleela, wáava ni lihuuvi kiija, vana shiinu shina vasimupeele.

6Leelo uPetulo wámujovela wáaja, “One nigaya hela, leelo lina nikwiliile kiligaha nisikugahile. Nikikujova kwa litaawa lya Yeesu Kilisito uwa ku Nasaleti, yiima ujende!” 7Baheene uPetulo wámukhata umuunu yula iliwokho ilya kundiilo, wámuyiimya. Baaho ifipondawulongo fya magulu ga muunu yula, fyava fina ngufu. 8Wáyiima nyangu, wáyansa kijenda yumwene. Wáhuluta mu lukeeke lwa nanda imbaagule lumo nu Petulo nu Yohana, akhandi ijenda kuno iishima na kimusufya uNguluvi. 9Avaanu woona vamwaga umuunu uyo ijenda na kimusufya uNguluvi. 10Vamumanya kiija, yumwene yuna akhandi ilomba ifiinu pa mulyango ugwa nanda imbaagule. Umulyango ugo gukhandi gutambulwa Mulyango Munofu. Woona vaganaga kigaaga gina gasenjekhaga kwa mwene, vaswigaga mandu.

UPetulo ikivamanyisa avaanu ulwa Yeesu

11Uluhaavi ulo, umuunu yula yuna wáponaga, akhandi avangʼangʼaniile uPetulo nu Yohana. Avaanu woona vakhandi viswiga mandu, vavasijila bahala pina vikipatambula viija iNsila yina niime iya Selemaani.#3:11 INsila yina niime iya Selemaani: Insila iyi yikhandi mukhati mu lukeeke lwa nanda imbaagule. 12UPetulo wáganile kivaaga avaanu awo, wávajovela wáaja, “Omwe vaanu va Isilaheli vayeesu, kwashi mwiswiga aga? Kwashi mukituhonekha mandu? Mwihiiva umuunu uyu tamuponia kwa ngufu seesu, awu kwa kiiva ose tili vagolofu pa Nguluvi? 13UNguluvi wa vambuyeesu, uAbulahamu, uIsaaka nu Yaakobo, wámutufyaga umuvanda waakwe uYeesu.#3:13 Wámutufyaga umuvanda waakwe uYeesu: UNguluvi wámutufyaga uYeesu kwa kimufyusa kihuma kwa vina vafwile na kimutansa kwa Nguluvi. Leelo omwe mwamutwalaga kwa valugu, kiija vamubude. Hata umunjaajila uPilaato pina wálamulaga kimuleshela uYeesu, omwe mwakhaanaga. 14Mwalomba kiija, umubudaaji yumwene adindulilwe! Mwamukhaana uYeesu, uMunofu khanji wa shiyooli. 15Uyu yumwene shisansa sha wuumi, omwe mwamubudaga. Leelo uNguluvi wámufyusaaga kihuma kwa vina vafwile. Ose tili valunjikhaaji va kifyukha kwa mwene.

16“Lino mumanye wunofu kiija, umuunu uyu yuna mukimwaga apa, khanji mumumeenye, wákhangala ifipondawulongo fyakwe kwa kilihuviilila ilitaawa lya Yeesu. Ilitaawa ilyo, lumo na kimuhuviilila, lilyene lina lyamuponia wáava muumi, ngaja shina mukimwaga moona. 17Lino omwe valukholo lwesu, ago goona gina mwamugahilaga uYeesu, omwe lumo na vakhome veenyu, nimeenye kiija, mwagahaga kwa wuyasu. 18Ago gasenjekhaga baheene kiija, uNguluvi akwise amaswi gala gina wájovile kishilila kwa vakuwamalago vaakwe woona kiija, uMukulusaaji#3:18 UMukulusaaji: Kwa Shiyunaani yiyandiikhwe Kilisito. Yimba iliswi Kilisito mu Maswi aMahensa. waakwe akhalafisiwa.

19“Lino setukhaji, mulambiisile uwunansi weenyu, shiyooli mumuhuvililaje uNguluvi, baheene awuwuuse uwunansi weenyu. 20Mugahe ndeeno, baheene uMutwa uNguluvi avapeele uluhaavi ulwa kituuya na kivaleetela uYeesu ave Mukulusaaji,#3:20 Mukulusaaji: Kwa Shiyunaani yiyandiikhwe Kilisito. yuna wábagulwagwa kihuma ulwamwandi kwa kiiva yeenyu. 21UYeesu isakulwa kisigala kwa Nguluvi, mbakha uluhaavi luna uNguluvi akhaseetula ifiinu fyona kiiva fipya, ngaja shina wájovile kihuma pawukuulu, kishilila kwa vakuwamalago vaakwe avabaagule.

22“Lulwene kiija, uMusa#3:22 UMusa: Yimba iliswi Musa mu Maswi aMahensa. wájovile ndeeni, ‘Kihuma munyeenyu mumwene, uMutwa weenyu uNguluvi akhavabagulila omwe umukuwamalago ngaja one. Amaswi goona gina umukuwamalago waakwe uyo akhavajovela, mugapulisaaje wunofu. 23Kiiva umuunu yoyoona yuna akhakhaana kimupuliisa umukuwamalago uyo, uNguluvi akhamuwuusa kihuma mu vaanu vaakwe na kimubuda khabisa.’#3:23 Yimba mu litaafili lya Luuju lwa Ndaji 18:15, 18, 19. 24Avakuwamalago woona, kiyansisa uSamweli na vanji vina vatunjililaga, woope vakuwaagwa amalago ulwa maswi gina gisenjekha mu nsiku isi. 25Ago gina uNguluvi wájovile kishilila kwa vakuwamalago awo, gageene gina omwe muyanushila. Khanji ulufingo#3:25 Ulufingo: Yimba iliswi Lufingo mu Maswi aMahensa. luna wáfingaga na vambuyeenyu, loope lulwene omwe mukiluyanushila. Pina wáfingaga ulufingo, uNguluvi wámujovaga umbuyeesu uAbulahamu#3:25 UAbulahamu: Yimba iliswi Abulahamu mu Maswi aMahensa. kiija, ‘Kishilila kwa muunu wa shikholo shaakho, mumwene avaanu va nyi soona vakhayimiililwa.’#3:25 Yimba mu litaafili lya Shiyanso 22:18; 26:4. 26Baheene uluhaavi luna uNguluvi wámubagulaga umuvanda waakwe uYeesu, wámufilikhaga kunyeenyu tangusiina avayimiilile, kiija muhume mu wunansi weenyu.”

Currently Selected:

Nsengo sa Vanandeje 3: Shisangu

Highlight

Copy