Luku 22

Mbayje lə Jiipije sangəje ddəw mba tɔl Jeju

1Ndɔ kusu mapa kə̂ n̂-dda kə wum ang ddee ngɔsi. Daw bbar kusu le nan Pakə. 2Mbayje lə njê-poloje Lubba kə njê-gərəje-Ndu aw sangəje gusu kə̂ ta tɔl nɛ̂n Jeju, a n̂-bbəəlje kəm dəwje. 3Yeenn ngaâ Satan andə mə Judas tə̂ kə̂ daw bbarɛ̂ nan Iskariyotə. Nee horo njê-kaw-kulaje tə̂ lə Jeju kə̂ dɔku gire joo le. 4Judas le aw oo mbayje lə njê-poloje Lubba kə mbayje lə njê-ngəmje ta-kəy-polo Lubba karə dooje ta naan dɔ gusu tə̂ kə̂ nâ kila nɛ̂n Jeju jide tə̂. 5Rɔde nəəlde ngaâ dunnje ndude ta karɛ̂ narɛ. 6Judas ndiki tə̂ kə de ngaâ aw sangə ddəw kə̂ maji kə̂ nâ kila nɛ̂n Jeju jide tə̂ bba karə dəwje kə̂ banya gərəje ang.

Jeju ula njê-kaw-kulaje karə n̂-ddaje muru Pakə

7Ndɔ kusu mapa kə̂ n̂-dda kə wum ang le asə ngaâ ndɔ tɔl ngann batəje dda nɛ̂n muru Pakə le asə tɔ. 8Jeju ula Piyɛr kə Jan. N̂-pa narəde nan: «Awje aw ddaje muru Pakə arəje jaw jɔnje.» 9N̂-paje darɛ̂je nan: «Lo kə̂ dda bba ə-ndiki karə jaw dda muru Pakə le kə tə̂ wa?» 10Nilade tə̂ nan: «Ooje, bbo andəje mə tɔkə bbe tə̂ toonn a, marə dəw kə̂ oto jo-maann a kingase. Awje goe tə̂ mə kəy tə̂ kə̂ nâ kandə tə̂ 11ta ə-paje arə nje-kəy le nan: ‹Nje-nɛ̂n-tɔju ulaje rɔi tə̂ nan: Kəy kə̂ dda â əman kə njê-njaje gom tə̂ ja kɔn muru Pakə kə tə̂ wa?› 12A nâ tɔjuse marə mə kəy kə̂ tatə kə̂ n̂-gɔl tokə kete mban kə̂ to dɔ marɛ̂ tə̂ taar. Nɛ̂nje tɔyn to məɛ tə̂. Ə-ddaje nɛ̂n-kusa arəjeje lo tə̂ənn le.» 13Dawje ngaâ dingaje nɛ̂nje le tɔyn tokə n̂-pa narəde le ngaâ n̂-ddaje muru Pakə le.

Muru mə-kâra

14Kar nɛ̂n-kusa le asə a, Jeju isi ta nɛ̂n-kusa tə̂ le, ne kə njê-kaw-kulaje le. 15N̂-pa narəde nan: «M-ndiki nya ta kusa Pakə nəənn kə se kete bba ta koo ndoo. 16Tɔkɔrɔ, m-pa marəse, mâ kɔn muru Pakə ang ngaa ndərəng ndɔ kə̂ Lubba a tɔju gəle mə Bbe-kɔn tə̂ laa.» 17Nunn maann-binyə kə̂ əngo tə̂, narə wooyo Lubba ngaâ n̂-pa nan: «Ə-taaje maann-binyə kə̂ əngo tə̂ nəənn ə-kaynje naan ayje. 18Tɔkɔrɔ, m-pa marəse, unn kute kar tə̂ nəənn, mâ kay maann-binyə ang ndərəng ndɔ kə̂ kɔn-mbay lə Lubba a ddee.» 19Goe tə̂ a, nunn mapa, narə wooyo Lubba, n̂-tətə narəde ngaâ n̂-pa nan: «Mapa nəənn to da-rɔm kə̂ munn marə mba tar dɔse. Ə-ddaje nɛ̂n nəənn mba kole nɛ̂n məse dɔm tə̂.» 20N̂-dda tokə baann kə maann-binyə kə̂ əngo tə̂ le tɔ. Go nɛ̂n-kusa tə̂ le a, nunn maann-binyə kə̂ əngo tə̂ le narəde ngaâ n̂-pa nan: «Maann-binyə kə̂ əngo tə̂ nəənn, to dɔnɔn kə̂ siki kə̂ Lubba ɔsu kə se ddəw məsəm tə̂ kə̂ kayn mba tar dɔse. 21A ooje, dəw kə̂ a kunn dɔm isi səm ta nɛ̂n-kusa tə̂ nəənn. 22Ngonn lə dəw a koy, mba to nɛ̂n kə̂ Lubba â ɔju. A, a to ndoo nya karə dəw kə̂ a kunn dɔ Ngonn lə dəw le.» 23Daw dujuje naan se nân horode tə̂ â, a dda nɛ̂n kə̂ be le wa?

Nân â to dəw kə̂ uta kəseje wa?

24Njê-njaje go Jeju tə̂ aw maynje naan tar ta gərə se nân dâ kooeje to dəw kə̂ uta marɛ̂je horode tə̂ wa? 25Jeju pa arəde nan: «Mbay-bbeje aw ɔnje dɔ dəwje ngaâ dəwje kə̂ bo aw ddaje arəje dəwje aw bbarjede to njê-ddaje maji. 26A əngase to tokə baann ang. Maji karə dəw kə̂ bo horose tə̂ ddee tokə lə ngonn. Maji karə dəw kə̂ ɔn dɔ njê-marɛ̂je to tokə lə nje-kula. 27Nân â to dəw kə̂ bo wa? Dəw kə̂ isi ta nɛ̂n-kusa tə̂ wase dəw kə̂ aw unda nɛ̂n-kusa nɔn nje-marɛ̂ tə̂ le wa? Dəw kə̂ isi ta nɛ̂n-kusa tə̂ le â to dəw kə̂ bo ang wa? A əman, mee horose tə̂ tokə lə nje-kula lə dəwje. 28Sese le ə-naynje səm mə nɛ̂n kəm-to-ndoo tə̂ kə̂ ingam. 29Mba yeenn bba, mâ karəse Bbe-kɔn le tokə Bɔmje arəm le, 30mba karə usaje nɛ̂n ddəm ayje nɛ̂n ddəm dɔ tabələ tə̂ ləm mə Bbe-kɔn tə̂ ləm ngaâ karə isije ngende-mbayje tə̂, mba gangə sariya dɔ gəl-kuju ngann Ijarayɛlje tə̂ kə̂ dɔku gire joo.»

Jeju pa nan Piyɛr a mayn tar laa

31 Əbbə-dəwje pa nan: «Simɔn, Simɔn, Satan duju ta pərəse tokə daw pərə waa. 32A əman, m-duju Lubba mba tar ləi ta karə mə-kunn ləi oso ang ngaâ karə bbo ə-təl rɔm tə̂ a, ə-dda arə ngakɔinje ingaje singa.» 33Piyɛr pa arə Jeju nan: «Əbbə-dəwje, m-to ngɔsi ta kaw səi kəy-kula tə̂ ddəm ta koy səi ddəm.» 34Jeju ilɛ̂ tə̂ nan: «Piyɛr m-pa mari, kete bba karə kuran nɔn bbokənɛn, â mayn tar ləm gɔl mota, â pa nan ə-gərəm ang.»

Maji karə njê-njaje go Jeju tə̂ ddaje singa dɔ rɔde tə̂

35Jeju pa arəde bbay nan: «Ndɔ kə̂ mulase marə awje kə narɛ ang ddəm bbɔl ang ddəm nɛ̂n-gɔl ang ddəm le, marə nɛ̂n duse wa?» Dilɛ̂je tə̂ nan: «Nɛ̂n kâra duje ang.» 36Yeenn ngaâ n̂-pa narəde nan: «Kə̂ bbasinɛn, dəw kə̂ narɛ laa to a, unn, ddəw kâra baa, dəw kə̂ bbɔl laa to a, unn. A bbo dəw kə̂ tɔkə kiya laa goto a, labbə kubbu-kul laa ndoko nɛ̂n tɔkə kiya. 37Mba m-pa marəse: Maji karə tar nɛ̂nje kə̂ n̂-pa dɔm tə̂ mə Makəturu tə̂ lə Lubba nəənn ingam njaa. Tar le nan: ‹Dəwje ooeje to marə dəw kə̂ maji ang.› Tar kə̂ dɔm tə̂ nəənn le ddee ngɔsi ta kɔsu kɔnyɛ̂ baann tɔkɔrɔ ngaa.» 38Njê-njaje go Jeju tə̂ le paje arɛ̂ nan: «Əbbə-dəwje, tɔkə kiya â ee joo nəənn.» Jeju pa arəde nan: «Yeenn njaa asə.»

Jeju duju Lubba dɔ ddingiri olibəje tə̂

39Jeju in mə kəy tə̂ le tee ngaâ aw dɔ ddingiri Olibəje tə̂ tokə naw dda kə ndɔ tɔyn. Njê-njaje goe tə̂ awje goe tə̂. 40N̂-tee lo tə̂ənn le a, n̂-pa narəde nan: «Ə-dujuje Lubba, mba karə osoje mə nɛ̂n-nan tə̂ ang.» 41Goe tə̂ a, nɔru rɔɛ̂ naw ddəw əw asə kɔr ər kə̂ dəw ila ngaâ nɔsu gɔlɛ̂ nangə̂, n̂-duju Lubba, 42n̂-pa nan: «Bɔy, bbo ə-ndiki a, uta əngo kəm-to-ndoo nəənn dɔm tə̂ kə ddang. Ə-dda tokə ye kə̂ məi ndiki bbo tokə ye kə̂ məm ndiki ang.» 43Karɛ̂ tə̂ənn njaa marə anjə tee ingɛ̂ mba karɛ̂ singa. 44Bbəəl uta dɔ Jeju arə n̂-duju Lubba nya. Tətə kə̂ rɔɛ̂ tə̂ təl ddee tokə lə kɔr məsə ngaâ aw gayn nangə̂.

45Go duju tə̂ kə̂ n̂-duju Lubba le a, nin taar n̂-ddee rɔ njê-njaje goe tə̂ le, a ningade dɔ bbi tə̂ mba rɔde nəəlde ang nyɔm. 46N̂-pa narəde nan: «Mba ddi bba aw tibbije wa? Inje taar, ə-dujuje Lubba, mba karə osoje mə nɛ̂n-nan tə̂ ang.»

Duwa Jeju

47 Jeju aw pa tar bbay a, dəwje kə̂ banya ddee teeje. Marə nje-kaw-kula laa kâra horode tə̂ kə̂ dɔku gire joo kə̂ ria nan Judas ɔru nɔn dəwje kə̂ banya le. Judas le ddee ngɔsi kə Jeju ta to mbia. 48Jeju pa arɛ̂ nan: «Judas, ə-to mbi Ngonn lə dəw mba kilɛ̂ nɛ̂n ji dəwje tə̂ wa?»

49Njê-njaje go Jeju tə̂ le ooje nɛ̂n kə̂ a ta to le a, n̂-paje nan: «Əbbə-dəwje, n-tuka dəwje kə tɔkə kiyaje ləje le wa?» 50Marɛ̂ kâra horode tə̂ tuka mbi nje-kula lə tɔkə nje-polo Lubba ti, to mbia kə̂ kɔl. 51A Jeju pa nan: «Asə baann!» Nula jia nɔru nɛ̂n mbi dingaw le narə mbia le təl ture tə̂. 52Goe tə̂ a, Jeju pa arə mbayje lə njê-poloje Lubba kə nje-kɔn dɔ dəwje kə̂ aw ngəmje kəy-polo Lubba kə tɔkəje kə̂ ddeeje ta kuwɛ̂ le nan: «Oomje to dəw kə̂ maji ang bba ə-ddeeje kə tɔkə kiya kə kakəje bba ta kuwam nɛ̂n wa? 53Mee kə se kəy-polo Lubba tə̂ kə ndɔ tɔyn, a dəw uwam ang. A bbasinɛn kar nəənn to ləse ddəm to kar lə singaje kə̂ lo ndul tə̂ karə dɔnje mbay ləde ddəm.»

Piyɛr mayn tar lə Jeju

54Dəwje le uwaje Jeju ngaâ awje saa, andəje saa kəy lə tɔkə nje-polo Lubba. A Piyɛr unn gode aw nja ddəw əw. 55N̂-yəlje puru dann lo tə̂ mə ndoko tə̂ le disije tɛɛ̂ tə̂. A Piyɛr isi horode tə̂. 56Marə nje-kula kə̂ dɛnɛ̂n ooe ta puru tə̂ le ngaâ ɛɛ̂ a, pa nan: «Dingaw nəənn nja kə Jeju tɔ.» 57A Piyɛr mayn nan: «Dɛnɛ̂n, m-gəre ang.»

58Ngaji goe tə̂ a, marə dəw ooe ngaâ pa nan: «Əi, ee horo njê-njaje go Jeju tə̂ tɔ.» A Piyɛr pa arə dəw le nan: «Mee horode tə̂ ang!»

59Asə gɔl kar kâra a, marə dəw pa arə ngəng bbay nan: «Tɔkɔrɔ, dingaw nəənn nja saa, mba n̂-to dəw kə̂ Galile.» 60A Piyɛr ilɛ̂ tə̂ nan: «Ya, m-gərə tar kə̂ a ta pa nəənn ang.»

Piyɛr aw pa tar bbay a, kar tə̂ənn njaa kuran nɔn. 61Əbbə-dəwje turu rɔɛ̂ ngaâ aa Piyɛr le. Piyɛr le ole məɛ̂ dɔ tar tə̂ kə̂ Əbbə-dəwje pa arɛ̂ nan: «Kete bba karə kuran nɔn bbokənɛn, â mayn pa nan ə-gərəm ang gɔl mota le.» 62Piyɛr tee ddaka ngaâ nɔn nya.

Dəwje tajije Jeju

63Dəwje kə̂ aw ngəmje Jeju le aw kokeje ngaâ aw tundɛ̂je. 64N̂-tɔje kəmɛ̂ kə kubbu ngaâ n̂-dujeje nan: «Nân â undai wa? Ə-pa arə joo.» 65N̂-tajɛ̂je nya kə nɛ̂n-tajije dang dang.

Daw kə Jeju lo gangə sariya tə̂

66Lo arɛ a, mbɔn-naan lə tɔkəje lə Jiipije, mbayje lə njê-poloje Lubba kə njê-gərəje-Ndu mbɔnje naan ngaâ arəje n̂-ddee kə Jeju lo gangə sariya tə̂. 67N̂-paje nan: «Bbo ə-to Kristə le a, ə-pa arəje.» Jeju ilade tə̂ nan: «Bbo m-pa marəse a, â ndikije tə̂ səm ang. 68Ngaâ bbo m-dujuse tar a, â kilamje tə̂ ang. 69A kunn-kute bbasinɛn, Ngonn lə dəw a kisi dɔ ji-kɔl Lubba tə̂ kə̂ to nje-singa-mɔngu.» 70Dede tɔyn n̂-paje nan: «Yeenn a, ə-to Ngonn lə Lubba wa?» Nilade tə̂ nan: «Sese njaa ə-paje mban, m-to ne le.» 71Yeenn ngaâ n̂-paje bbay nan: «Ddi â ta koo tar lə njê-tar-najije dda nɛ̂n bbay wa? Jeje njaa joo tar kə̂ tɛɛ̂ tə̂ mban.»

Currently Selected:

Luku 22: KabbaDkS

Highlight

Copy